|
٢٩\١٢\٢٠٠٩
چەقبه‌ستن
و گێڕگۆڕینی بە پەلە.
سالار بابەشێخ
-: هاتووم
دیمانەیەکم لەگەڵ بکەی، لە رۆژنامەکەتان بڵاوی بکەیتەوە.
-: بۆچی خێرە؟ خۆ تۆ هیچ کارێکی مەیدانیت
بە بێ پێداچوونەوە و داڕشتنەوە، شیاوی بڵاوکردنەوە نین، هێشتا بە
تەواوی خۆت فێری رێنوووسی زمانەکە نەکردووە!! نووسینێکت لە هیچ
بوارێکدا نییە! ئینجا تۆ چ پەیامێکی گرنگت پێیە کە دەتەوێ لە دووتوێی
دیمانەیەکی رۆژنامەییدا ئاراستەی خوێنەرانی بکەی؟!
-: کاکە ئەوە بۆ شتەکان وا قورس دەکەی؟
ئەدی برادەرایەتی مانای چییە؟ دەیان کەس هێڕ و بێڕ لە یەکتر جیا
ناکەنەوە و دیمانەشیان لەگەڵ دەکرێ و ئیهتمامی تەواویشیان پێدەدرێ، تۆش
بۆ منی بکە و تەواو، دەمهەوێ تەوەری پرسیارەکانت ئەوە بێت، کە من وەکو
کۆمۆنیست و عەلمانییەک چۆن بوو تێکەڵ بە لایەنێکی ئیسلامی بووم؟!
-: کەواتە بابەتێک بنووسە و تێیدا باسی
چۆنیەتی ئەم گۆڕانکارییە بکە، بەڵام بزانە نووسین وەک کاری مەیدانی و
دیمانە و رێپۆرت نییە، کەس ئامادە نییە داڕشتنەوەی سەرلەبەری بکات...".
ئەمە گفتوگۆی من و هاوڕێیەکم بوو کە هەمووی دوومانگە تێکەڵ بە کاری
رۆژنامەنووسی بووە و خۆی بە رۆژنامەوان دەزانێت و دژی "واسیتە"شە!!
ئەم هاوڕێیەمان نەیهێشت چلەی ئەو دیالۆگە بەسەر بچێت، دوێنێ
وەدەرکەوتەوە و هات و گوتی "باش بوو دیمانەکەمان نەکرد، ئەوە چەند
رۆژێکە وازم لە ئیسلامیش هێناوە و ئێستا مەسیحیمە و زۆریش مورتاحم".
گوتم "کاکە دەزانی بیرمەند و تیۆریسیەنێکیی چەپ دەڵێت: (ئەو
کۆمۆنیستانەی کە لە سەنگەری سوسیالیزم وازدێنن، لە بەردەم دەزگە
سیخوڕرییەکان دەدۆزرێنەوە)...!! هۆکاری ئەم هەموو گێڕگۆڕینە بە پەلەیە
چییە؟ تا کەی خۆت ساغ ناکەیتەوە؟!..."، پێکەنینەکەی کرد بە قاقا و لە
پڕ لە قۆڕقۆڕاچکەیدا خنکاندنی و بە تووڕەییەوە پرسیاری کرد: "ئەدی تۆ
تا کەی لە قسەی رەق واز ناهێنی؟".
ئەم هاوڕێیە بە درێژیی تەمەنی کورتی چەب بوونی، دژی دروستبوونی دەوڵەتی
کوردی بوو، لە بادانەوەکەشیدا ئاڵای جیهانگەرایی ئیسلامی هەڵدەدا و
کێبڕکێی سەلاحەدینی ئەیوبی دەکرد و بە خەستی مامەخەمەی جامعەی عەرەبی
بوو! لە هەڵبژاردنی ئایینە نوێیەکەشیدا هەر ئەوەی بۆی گرنگ نەبوو،
دروستبوونی دەوڵەتی کوردی و ئینتیمای نیشتمانی بوو! کەواتە گێڕگۆڕینی
بەپەلە (لە ئایدیا و ئایین) و چەق بەستنی نەگۆڕ (لە دژایەتی کردنی بە
دەوڵەتبوونی کورد) و کوردایەتی پێفرۆشتنی هەندێک کەس و منیش وەک نموونە،
وایکرد هەتا دەهات مەودای نێوانمان زیاتر دەبوو!! هەرچی زیاتر پێمداگرت
لەسەر ئەوەی کە بوونی رای جیاواز کفر نییە و دەکرێ دۆستایەتی بە
بۆچوونی جیاوازەوە بەردەوام بێت، ئەو زیاتر تووڕە بوو، بۆیە دوای
دەمەتەقەیەکی زۆر گەیشتە ئەو ئەنجامەی کە چیدی سوود لە گفتوگۆکانمان
وەرناگرین و داوای کرد کۆتایی بە دۆستایەتیشمان بێنین! بەڵام ئەم
بڕیارەشی هەر هەفتەیەک بڕ دەکات...
28/12/2009
|
