|
١٩\٩\٢٠١٠
چەواشەکارییه‌کانی
''لێژنه‌ی لێکۆڵینەوە'' لە تیرۆری سەردەشت
عوسمان.
بەرواری 15-9-2010 ئەو لێژنه تایبەتەی کە "سەرۆکی هەرێم" پێکی هێنابوو،
بەناو بۆ لێکۆڵینەوە لە ترۆری ڕۆژنامەنوس "سەردەشت عوسمان"،
ڕاگەیاندنێکی خستۆتەڕوو کە گوایە باندی ترۆریستی "ئەنسار ئەلئیسلام"
فڕاندویانە و ترۆریان کردوە. ئەوەش چونکە "سەردەشت" گوایە "بەلێنی بەم
گروپە دابوو کە هەندێک کاریان بۆ بکات بەڵام کارەکانی بۆیان ئەنجام
نەدابوو"!
چۆنیەتی پێکهێنانی ئەم "لێژنه"یە و شێوازی کارکردنەکەی و دەرکردنی
یەکەمین ڕاگەیاندنی، زۆر بەئاشکرا ناوەڕۆکی ئەم لێژنه‌یە و ئەرکێک کە
پێشوەخت بۆی دیاریکرابوو دەردەخات لە چەواشەکردنی ڕاستیەکان بۆ پاکانەی
"ترۆری دەوڵەتی" دژی هاوڵاتیانی ناڕازی بەتایبەت رۆژنامەنوسان و
نوسەرانی ئازادیخواز.
نەک هەرئەوەش بەڵکو هەوڵدان بۆ پەیوەست کردنەوەی سەردەشت عوسمان بە
گروپێکی ترۆریستیەوە، پەیامێکە "پارتی" و "پاراستن" و "بنەماڵە"کەیان
لەڕێگەی ئەم لێژنه‌یەوە ڕایدەگەێنن کە مامەڵەکردنی ناڕەزایەتیە
کۆمەڵایەتیەکانی کوردستان و هەموو دەنگێکی ئازادیخوازی دژی گەندەڵی و
سەرکوتی فکری و سیاسی، وەک کارێکی ترۆریستی مامەڵە دەکەن.
لێرەوە ئەم ڕاگەیاندنە نەک ئاکامێکە لە هەوڵێک بۆ لێکۆڵینەوە لە ترۆری
سەردەشت عوسمان بەڵکو هەڵمەتێکە بۆ سەر ئەو بزوتنەوە ناڕەزایەتیە
بەرینە جەماوەریە ئازادیخوازەی کوردستان و لەکەدارکردنی کە بەدوای ئەم
ترۆرە سیاسیەدا هاتە ئاراوە، چونکە دەسەڵاتدارەتی "پارتی" و دەزگای "پاراستن"
و "بنەماڵەی سەرۆکی هەرێمی" خستە ژێر پرسیارەوە.
چەواشەکاریەک کە لێرەدا بۆ چاوبەستەگی خەڵکی کوردستان "بەناوی
لێکۆڵینەوە لەم دۆسیە" خراوەتەڕوو، ئەو بەشە لە ڕۆشنبیران و نوسەرانی
لیبراڵی کوردستانی توشی شۆک و بێ ئومێدی کرد کە چاوەڕوانیەکیان هەبوو
لە "سەرۆکی هەرێم"ەکەیان و شەرعیەتێکیشیان بە "لێژنه‌کەی"دەدا. ئەم
هەوڵە لیبراڵانەیە، ئەمڕۆ لەشکڵ و شێوازێکی تردا بەردەوامن بۆ ڕاگرتنی
جەماوەری ناڕازی و ئازادیخواز لە چاوەڕوانیدا و "داواکاری بڵاوکردنەوەی
بەڵگەنامەکانی ئەو لێژنەیە" و "به‌ڕێوه‌چوونی لێکۆڵینه‌وه‌یه‌کی شه‌فاف
و ته‌ندروست" دەکەن.
هەرجۆرە پێشڕەویەک لە لێکۆڵینەوەی ئەو تاوانە و ئەم ترۆرە سیاسیەدا
پەیوەستە بە ناچارکردنی دەسەڵاتدارانی کوردستان بە چونە ژێرباری لێژنه‌یەکی
جەماوەری سەربەخۆ لە "حکومەتی هەرێم" و حیزب و دامودەزگا جاسوسیەکانیان.
ئەمەش ئەستەمە بەبێ هاتنەمەیدانی جەماوەری ئازادیخوازی کوردستان. لەو
پێناوەدا هێنانەدی بەرەیەکی ڕادیکاڵ لەدەرونی ئەم بزوتنەوە ناڕەزایەتیە
دیموکراتیکەدا بە دەوری پلاتفۆڕمێکی چەپەوە بۆ ڕەواندنەوەی ئاسۆی زاڵی
ناسیوناڵ-لیبرال بایەخێکی مانونەمانی هەیە بۆ ئەو بزوتنەوەیە. "ڕەوەند"
لە بڕیارنامەی خۆیدا لە چلەی ترۆری سەردەشت عوسمان کە لە 15-6-2010 دا
خستویەتیەڕوو، ئەرکی خۆی بە هەوڵوکۆشش لەو ڕاستایەدا پێناسە کردوە.
ئێمە جارێکی تر لێرەدا بانگەوازی ئازادیخوازانی کوردستان، هەڵسوڕاوانی
چەپ، ڕادیکاڵ و کۆمۆنیست دەکەین کە بۆ بردنە پێشەوەی وەها ئەرکێک
هاوئاهەنگی کاروچالاکیەکانیان بکەن و لەدیالۆگدابن بۆ هێنانەدی
پلاتفۆڕمێکی هاوبەش.
رەوەندی سۆشیالیستی کرێکاریی
16\9\2010
rewend.info@googlemail.com
|
