٢٨\٨\٢٠٢٠

چ چاکسازیی چ رووخاندن کەرستە و کەتواری گەرەکە.

دارا خونچە       

''کارەساتبارترین قۆناغی میللەت ئەوەیە لایەنە دژبەرەکان زۆر خراپتر بن لە دەسەلاتدارەکان.. ئێستای کوردستان وەک نموونە''.

ئەگەر کەسەک دان بەوەدا بنێ لە ئەزموونی تێکۆشانی خۆی شکستی خوارد.. ئەوە تەنێ ئەو کاتە راستگۆیە کە:

- شکستەکە نەخاتە ئەستۆی هاوخەباتەکانی و شانی خۆی لێنەتەکێنی.
- لە هیچ تێکۆشانەکی دیکە خاوەن بیرۆکە و دەستپێشخەر و پێشڕەو نەبی.
- لە هیچ تێکۆشانەکی دیکە خاوەن بڕیار نەبی و هەمیشە پابەستی ئەو تێکۆشەرە براوانە بی کە خاوەن دەستەکەوتن.

- لە هەر تێکۆشانەک کە دەیەوێ بەشداریی تێدا بکا یەک ساڵ خۆی بخاتە ژێر ئەزموون تا دڵنیا بی لەوەی کە دەتوانی درێژەی پێبدا.
- لە بەرانبەر تێکۆشەرانی نەوە تازەکان خۆی وە خاوەن ئەزموون دانەنێ و ئیدی ئەوان ئاراستەی بکەن نەک ئەو ئەوان.

ئەگەر پێچەوانەکەی کرد ئەوە گەللەک زیانبەخشتر دەبی لە هەڵپەرستانی نێو سیستەمی باو و دەسەڵاتداران و پیاوە دینییەکان و نێرسالاران.

زۆر ئاساییە و هیچ سەیر نییە ئەو کەسانەی شکست دەخۆن هەمیشە؛ رەشبینیی بڵاوبکەنەوە.. دەستکەوتەکان و سەرجەمی ژیان پووچ و بێ نرخ پیشانبدەن.. پێشنیاری بیروباوەڕ و بەرنامەکاری توندڕەویی و ئەندێشەبازیی بکەن.. سامان و ژێرخانی ئابووریی لە رێی ناڕەزایەتی دەربڕین و خۆپپیشاندانە بێ بەرنامە و سەرپێییەکان دابڕووخێنن.. قەوارەی دەسەڵاتی جوگرافیای رامیاریی میللەت بخەنە بەردەستی دەسەڵاتە داگیرکەر و چەوسێنەرەکانی وڵاتانی دراوسێ و زلهێزەکانی جیهان.. وە هەر بیانووەک هەیە خۆیان بفرۆشنە دامودەزگەکانی رەوتە نوێیەکانی سیستەمی دڕندەیی سەرمایەداریی و... تد. لە خوارێ ناوەناوە ئاماژە وە هۆکارەکان و دەرهاویشتەکانی ئەو ''ئاساییبوون''ە دەدەم.

زۆربەی زۆری ئەو کەسانەی شکست دەخۆن هەر ئەوانەن کە لە رووی هزرییەوە هەناسەتەنگن و ناتانن درێژە وە خەبات بدەن.. لێ ئەوەیان هیچ لەو راستییە ناگۆڕی کە ئەوانیش کاتەکیان لە تەمەنی ژیانی خۆیان لە رێی تێکۆشان بەخشی و ئازار و ئەشکەنجەیان چێشت و ماندیی و شەکەت بوون، جا ئەوانە کاتەک کە هاوخەباتە خۆڕاگرەکانیان سەرکەوتن وەدستدەهینن تووشی شکستی دووەم دەبن چونکێ لە لایەک هەست وە لاوازیی و لەدەستدانی کەسایەتیی خۆیان دەکەن لە لایەکی دیکەش هاوخەباتە سەرکەوتووەکانیان بەشیان لە دەستکەوتەکان نادەنێ یان زۆر کەمیان دەدەنێ.. ئیدی وە رەخنەی توند و بێ بنچینە بەرانگژی هاوخەباتانیان دەبنەوە و وە لادەر و هەڵپەرست سووچباریان دەکەن و دەیانەوێ لەو رێیەوە هەردوو لای شکستی دووەمیان چارەسەر بکەن.. واتە هەم وەها پیشانبدەن لە هاوخەباتانیان تێکۆشەرتر و وەهەڵوێستترن هەم زۆربەی دەستکەوتەکانی سەرکەوتن ئی ئەوان بن یان وە لایەنی کەم لە میللەت و تەنانەت گەندەڵکارانیش پتریان وەبەربکەوی.. لێ کە ناتانن ئەوە بکەن یان هاوخەباتانیان رێیان پێنادەن.. ئەو جارە تووشی شکستی سێیەم دەبن و وە تەواویی رەشبین و گۆشەگیر دەبن.. ئیدی هێندەی لە دەستیان بێ دەیانەوێ وە هەر جۆر و شێوەک هەیە هەر تشتەک بڕووخێنن و داروپەردووی وەسەریەکەوە نەهێلین جا لە رێی خۆفرۆشتنە دوژمن بی یان ئاژاوەنانەوە و خۆپیشاندانی تێکدەرانە! ئەرێ.. هاوڕێی تێکۆشەر.. ئەو دوا کار و چالاکییەت تەنێ وە خۆهەڵدێرانت ئەنجامدەدەرێ.. ئەگەر بەختیشت یار بوو و تێیدا براوە بووی ئەوە خۆت و میللەتەکەت پێکەوە لەنێودەبا!

هەردەم لە ژیان تێکۆشان و دەستکەوت هەیە.. لێ وەپێی مێژوو و هەبوونە بابەتی و خودییەکان و جوولە و کەتواری ژیان هەمیشە دەستکەوتەکان هێندەکی کەمیان وەبەر میللەت دەکەون و ئەوەکەی دیکەشی هەمووی وەبەر ئەو کەس و لایەنانە دەکەون کە دوونێ تێکۆشەر و شۆڕشگێڕ بوون.. لەوێ سەردەمێ هەر کەسەک نەیدەتانی وەک ئەوان زیرەک و خۆنەویست و ئازا بی.. کەچی ئەوڕۆ دەیانەوێ سوود لە رەنجی پێشترێی خۆیان وەربگرن تەنانەت چەندی بتانن هەموو دەستکەوتەکانیش قۆرخ بکەن، لێ ئەواندیکە کە لە هەمان سەردەم هاوخەباتیان بوون و ئێستا وە هەر هۆکارگەلەک هەیە بەشیان لە دەستکەوتەکان نییە یان نایاندەنێ و هاوکاتیش وە هۆی شکستەکانیان ناتانن ئەوڕۆ وەک ئاراستەکەر تێکۆشەر بن.. باشترە لە پێناو مانەوەی ئەو دەستکەوتە کەمەی کە میللەت وەدەستیهنایە خۆیان بێدەنگ بکەن و ئاژاوە نەنێنەوە واتە خەڵک وە تشتەک سەرقاڵ نەکەن کە بەرهەڵستکاریی نییە و تێکدەرانەیە.. هەروا سەر لە تێکۆشەرانی نەوە تازەکان نەشێوێنن و لێیانبگەڕێن وەپێی هزر و پێویستییەکانی سەردەم تێبکۆشن، ئاخر وە هەڵڕشتنی رق و وێرانکردن هیچ سوودەک وە خۆشیان ناگەینن بەڵکە وە پێچەوانەوە لەو دەسەڵاتدارە سوودمەندبووانەش زیانبەخشتر دەبن کە دوونێ هاوخەباتیان بوون.. بەوەش دەردەکەوی کە لە سەردەمی خەباتەکەشیان هەر راستگۆ نەبوونە و هەمیشە بارەکی گران بوونە وەسەر تێکۆشانەکان و رەنگە ئەگەر بوونیان نەبا تێکۆشانەکان بەرهەمدارتریش دەبوون، لەبەرهەندێ باشترین چارەیان هەر پەیوەستبوونە وە تێکۆشەرانی نەوە تازەکان و ئەو تێکۆشەرە دێرینانەوە کە دەستکەوتەکان ناتانن لە خەبات ساردیان بکەنەوە.. ئیدی وەپێی هزری نوێی یەکسانیی چینایەتی و هزری رەوای رزگاریی نەتەوەیی و نیشتمانیی و وە لەبەرچاوگرتنی پێویستییەکانی سەردەم و کەتواری کۆمەڵ و ئاستە فەرهەنگیی و رامیارییەکان درێژە وە خەباتی خۆیان بدەن، ئەگەر نا زۆر باشترە رێزەک لە تێکۆشانی خۆیان بگرن کە سەردەمەک لە سەردەمەکان باجیان لە پێناوی دا.. شکست تاوان نییە ئەگەر پەلکێشی ئەنجامدانی کاردانەوەی نەرێنییت نەکا.. لێ بەرانگژبوونەوەی میللەت و لەنێوبردنی دەستکەوتەکان نەک هەر تاوانە بەڵکە مرۆڤیش لە مرۆڤایەتی دەخا!

وەک نموونە؛ ئەمن خۆم کەسەکم لە تێکۆشەرە دێرینەکان.. لێ لەبەرئەوەی دەستکەوتی مادیی و پێگە و پیشەی فەرمانبەریی و رامیاریی و ناو و ناوبانگی کۆمەڵایەتی ناتانن لەخشتەم ببەن تا ئێستا هەر وەک پێشان و وەپێی پێویستییەکانی سەردەم درێژە وە تێکۆشانی خۆم دەدەم.. دڵنیاشم هەرگیز جێم لە نێو دەسەڵاتداران و پارتییەکان و بەرژەوەندپارێزان نابتەوە، هێندەی بکرێ وە هاوکاریی و هەرەوەزیی لەگەڵ هاوڕێیە دێرین و نوێیەکانم لە پێناو ئەوە تێدەکۆشم پارێزگاریی لە دەستکەوتەکانی میللەت بکەم جا ئەوە لە پرسی رزگاریی نەتەوەیی و نیشتیمانیی بی یان لە پرسی چینایەتیی و یەکسانیی وەک یەکی نێوان ژنان و پیاوان یان لە هەر پرسەک کە مرۆڤەکان بەرەو ژیانەکی خۆشگوزەرانتر و ئاسوودەتر دەبەن، هەڵبەتە ئەوانەش بەوە دەکرێ کە دەسەڵاتداران پێ وە پێ ناچار بکەین دەستبەرداری چەوسانەوەکان ببن و نەتانن یاریی وە پرسە نەتەوەیی و نیشتیمانییەکان بکەن.. وە کورتییەکەی رێ لە ستەم و قۆرخکاریی و خراپەکارییەکانیان بگرین، هەر کاتەکیش بایی ئەوەندە هێز و بڕستمان پەیداکرد کە میللەت دەتانی وە شێوەی هەرەوەزیی و دامەزراندنی ئەنجوومەنەکانی خەڵک دەسەڵاتی خۆی بەڕێوەببا (جا ئەوە سبەی بی یان دووسبەی) شۆڕشی سەرتاسەریی رابگەینین و ئەو دەسەڵاتە لە بنوبۆتکەوە دەربکێشین.

لە بارودۆخی ئێستای میللەتەکەم دەتانم زۆر راشکاوانە بێژم دەسەڵاتدارانی ئێستای کوردستانی باشوور کە وەک تێکڕای دەسەڵاتدارانی جیهان چەوسێنەر و ستەمگەرن.. زۆر لەو وە ناو بەرهەڵستکارانە باشترن کە فەیسبووک و دەزگەگەلەکی بازرگانیی رامیاریی و بێ فەرهەنگی وەک (رۆژنامە و تەلەفزیۆنە وە ناو دژبەرەکان) گێژووڕی کردینە و وەک کویلەگەلەک وەکاریاندەهینن.. کەچی زۆر وە دەبەنگیی و کۆلەواریی وە ناوی بەرەی میللەت یان رۆشنبیران و چالاکوانان و چەندین ناوی سەیروسەمەرەی دیکە لە شاشەی مۆبایلەکانیانەوە گاڵتە وە خۆیان دەکەن.. ئیدی دەسەڵاتدارانیش پێیان پێدەکەنن و زۆریش سوپاسگوزارن وە هەبوونی ئەو جۆرە بەرهەڵستکارە سووک و چرووکانە! لێ پێویستە ئەوەش لەبیرنەکەین کە زۆرینەی ئەو کەسانەی ئەوڕۆ لە لووتکەی دەسەڵاتن و ملهوڕانە بەرخورد دەکەن دوونێ گیانی خۆیان خستبووە بەر گوللەی فاشیترین رژێم و داگیرکەری کوردستان کەچی زۆرینەی میللەت (بەعسی و چەکداری خۆفرۆش و رۆشنبیرانی خۆگونجێنەر و بێ هەڵوێست) بوون و ئەواندیکەش دەستیان وە کڵاوی خۆیانەوە گرتبوو با نەیبا.. لێ ئەو دەستکەوتانەی لە ساڵی ١٩٩١ەوە تا ئێستا میللەت لێیان بەهرەمەندن و ماف و ئازادییەکانیان بەراورد وە پێشان بردە ئاستەکی زۆر باڵاتر.. ئەنجامی ئەو تێکۆشانەی ئەوانن، ئەوەش مێژووەکی دوور نییە و ناشێ بیرەوەرییەکانمان وە هەڵەماندا ببەن و پێویستە نەوەکانی پاش ١٩٩١یش لە کوێرەوەرییدا نەژین و شارەزای ئەو مێژووەی میللەتەکەی خۆیان بن و لە نەوەکانی پێش خۆیان باشتری لێبزانن.

ئەگەر بمانەوێ وە شێوەکی رۆشن و بابەتییانە دەسەڵاتی ئێستای باشوور بناسین پێویستە بەراوردی ئاستی چەندیەتی و چۆنیەتیی خۆشگوزەرانیی و ئازادییەکانی پێشان و ئێستا بکەین، لێ هەرگیز ئەو بەراوردکردنە لە پێناو ساردکردنەوەی تێکۆشەرانی دژ وە دەسەڵات نییە.. بەڵکە دەبی ئەو دەسەڵاتە یان ملکەچی ماف و ئازادییەکانی خەڵک بی یان بنەوبارگەی خۆی تێکبنێ و بڕوا.. هەردوو بژاردەش هەر دەبی لە رێی تێکۆشانی خەڵکەوە ئەنجامبدرێن و دوور بن لە دەستتێوەردانی پارتی و پارتیایەتی و بزووتنەوە دینییەکان و دەستەبەندییە لیبرالییەکانی سەرمایەداریی و هەموو ئەوانەی کە ئێستا ناویان لە خۆیان نایە بەرهەڵستکار کەچی هیچ جوایەزییەکیان نییە لەگەڵ پارتییە گەندەڵکار و چەوسێنەرەکانی نێو دەسەڵات ئەگەر خراپتریش نەبن.. لێ سەرباری ئەوەش دەبی میللەت لە بژارادەی دووەمدا بایی ئەوەندە خۆی ئامادە و رێکخراو کردبی کە بتانی دەسەڵاتەکی باشتر دابمەزرێنی و پارێزگاریی لێبکا هاوکاتیش وە پووچەڵکرندنەوەی پیلانەکانی دەسەڵاتی داگیرکەری عێراقی و داگیرکەرانی دیکەی کوردستان ئەو ئەزموونەی باشوور وە سەروەخۆیی بگەینی.

چەند نموونەک لە بەراوردی ئاستی چەندیەتی و چۆنیەتیی خۆشگوزەرانیی و ئازادییەکانی پێشان و ئێستادا:

- ماڵەکانی ئەو سەردەم تەنێ چاردیوارەکی سەرگیرای بێ کەلک بوون و هیچ پێداویستییەکی ژیانی سەردەمیان تێدا نەبوو. لێ ئێستا ماڵەکان دەبینین وە چ شێوەکن؛ ماڵەکی ئەو سەردەمی کوردستان و بەریتانیا جوایەزییان ئاسمان و رێسمان بوو.. ماڵەکی ئێستای کوردستان و بەریتانیا جوایەزییەکی زۆریان نییە.. جا خۆت بەراوردی توانای مادیی بەریتانیا داگیرکەری جیهان بکە لەگەڵ ئی کوردستان کە هێشتا لە بندەستی عێراقە! کەم ماڵ هەبوون ترومبێلیان هەبی.. ئێستا زۆربەی زۆری ماڵەکان هەیانە. پێشان تەنێ بەعسییەکان و ژمارەکی کەم لە دەوڵەمەندان دەیانتانی گەشتی دەرێ بکەن.. ئێستا دەیبینین گەشتکردن لە چ ئاستەک دایە.
- تێکڕای خۆپیشاندانەکان وە درێژایی سەردەمی بەعسییەکان وە پەنجەی دەستان دەژمێردرێن.. وە درێژایی دەسەڵاتی هەرێمی کوردستان وە هەزاران خۆپیشاندان ئەنجامدرانە و تەنانەت خەڵک وە مانگ و دوو مانگ لەسەر شەقام بووە. نەماندەتانی تەنانەت لە نێو ماڵەکانی خۆشمان باسی ماف و ئازادییەکانمان بکەین.. ئێستا خەڵکی کوردستان گشتپرسیی دەکا و وە داگیرکەران و هەموو جیهان دەبێژی هیچ چار نییە و دەبی نیشتمانەکەمان هەر ئێستا سەروەخۆ بی. کێ هەیە بتانی ببێژیی ئەوەی ئێستا میللەت بەرانبەر بارزانی دەیکا دەیتانی یەک لە سەتی ئەوە بەرانبەر سەدام بکا؟! زمانەکەمان نیمچە قەدەغە بوو و نەماندەتانی لە هەر جێیەک قسەی پێبکەین.. ئێستا زمانەکەمان بەراورد وە پێشان لە سەردەمی زێڕینی خۆی دایە. ژنان تەنێ لە پشت دەرکەکان چاکوچۆنییان لەگەڵ مێوانان دەکرد یان نەیاندەکرد.. ئێستا رۆژانە لە سەر کار و لەسەر شەقامەکان لە پێناو ماف و ئازادییەکان تێدەکۆشن و دژ وە نێرسالاریی دەنگ هەڵدەبڕن و سواری فڕۆکە دەبن و جیهان دەبینن!

ناکرێ و ناشێ هێندە سادەگۆ بین و بێژین ئاخر سەردەم گۆڕایە و ئێستا لە هەموو جیهان ماف و ئازادییەکان پتر بوونە! هەر ئەو ئێرانەی تەنیشتمان کە وە هەزاران ساڵ ئیمپراتۆری هەرە گەورەی نێوچەکە بووە.. ئەگەر ئێستا کوردانی رۆژەڵات دەرفەتیان هەبی هەموویان دێنە باشوور تا لە نێو ماف و ئازادییەکی باشتر لە ئی خۆیان هەناسەک هەڵبمژن، ماف و ئازادییەکانی باشوور زۆر لە ئی کوردانی باکوور باشترە وە تایبەتییش ئەگەر بەراوردی باشوور وە تورکیای پێنج سەت ساڵەی دەسەڵاتی ئیمپراتۆریەتی عوسمانی و ١٠٠ ساڵەی هاوپەیمانی ئەوروپا و هاوپەیمانی ناتۆ بکەین.. هەڵبەتە باشوور بەرانبەر وە عێراقی عەرەبی و هەموو سوریاش هەر بەراورد ناکرێ!

رەنگە کەسانەکیش هەبن بێژن؛ ئەوە ئەمەریکا بوو عێراقی داگیرکرد و ئەو هەلەی رەخساند! ئەگەر ئێستا توێژینەوەکی ورد لە رامیاریی ئەمەریکا و رامیاریی نێودەوڵەتیی بکەین و بیانناسین ئەوە باش تێدەگەین کە لەگەڵ ئەوەی رەخسانی هەل هۆکارەکی زۆر باشە.. لێ کە میللەت خۆی هیچ جوولە و وەخۆداپەڕموونەکی نەبی ئەوە هیچ زلهێزەکی جیهان ماف و ئازادیی بەو میللەتە وە رەوا نابینی تەنانەت وە کۆیلەش وەریناگری! بزووتنەوەی باشوور لە ١٩٦١وە تا ١٩٧٥ وە تێکۆشانی خۆی و گیانبەخشینەکی زۆر کۆمەڵە دەستکەوتەکی وەدەستهینا و پێیەک چووە پێش.. لە ١٩٧٦یش تا راپەڕینی ١٩٩١ دیسان هەر وە تێکۆشانی خۆی و گیانبەخشینەکی زۆر ئەوەی وەدەستهینا کە لە سێ شار خۆی خۆی بەڕێوەببا و سەرەنجام گشتپرسیی ئەنجامدا و چەندین پێ چووە پێش. خۆ چەندین هەل لە پارچەکانی دیکەش رەخسان.. لێ چونکێ بزووتنەوەکی ئەوتۆیان نەبوو هیچیان وەدەستنەهینا و ئەمەریکا و رامیاریی نێودەوڵەتییش هەر ئاوڕیشیان لێنەدانەوە! ئەو هەلەی لە کوردستانی رۆژاوا رەخسا کە ئێستا دەسەڵاتەکی خۆبەڕێوەبەرییان هەیە.. ئەگەر کوردەکانی ئەوێ جوولەی خۆیان نەبووایە ئەوە نەک هەر ئەمەریکا و رامیاریی نێودەوڵەتی وە فەرامۆشییان دەسپاردن بەڵکە پارتییە گەورەکانی کوردستانیش (پەکەکە.. پارتی.. یەکێتی.. کۆمەڵە و دیموکرات.. چەپ و کۆمۆنیستەکانی کوردستان و هەر چار وڵاتە داگیرکەرەکەی کوردستان) هەروەک پێشان رۆژاوایان وە پارچەکی کوردستان دانەدەنا و هەر وە کوردانی رۆژاوایان دەگۆت ئاوارەکانی تورکیا و دەبووایە ئێستاش هەر لە پێناو وەرگرتنی ناسنامەی سوریایی تێبکۆشن چونکە زۆریان هەر وە هاوڵاتییش دانەدەندران! خۆ لەوەتەی حکومەتی هەرێمی کوردستان هەیە چەندین جار هەلی ئەوە رەخسا کە باشوور سەروەخۆیی وەدەستبهینی یان لێیەوە نێزیک ببتەوە.. لێ ئەو هەلانە لەبەرئەوە لەبارچوون چونکێ هێزە رامیارییەکان ئەوەیان لە باردا نەبوو تەنانەت لە گشتپرسییەکەشدا زۆربەی هێز و لایەنە کوردستانییەکان ئەگەر لە ترسیی پەراوێزخستنیان لە لایەن پارتییەکەی بارزانییەوە نەبا نەیاندەهێشت دەنگی ''بەڵێ'' زۆرینە وەدەستبهینی.. ئەمەریکا و رامیاریی نێودەوڵەتییش ئەوەیان دەزانی کە گشتپرسییەکە سەردەکەوی لێ کوردان ئەو جوولە و هێزەیان نییە بتانن پێدابگرن و جێبەجێی بکەن.. ئیدی نە پێش ئەنجامدانی لەگەڵی بوون نە پاش ئەنجامدانی تەنانەت سزای کوردستانییانیشیان دا.. لێ لەبەرئەوەی گشتپرسییەکە خواست و دەنگی میللەت بوو ئاستی سەروەخۆییخوازانەی هەموو کوردستانییانی گەیاندە پۆپە.

سەرەنجام ئەگەر ئامانج لە چاکسازیی یان رووخاندن و دامەزراندنی دەسەڵاتەکی دیکە هەم گەیشتنە وە سیستەمەکی باشتر لە ئاستی خۆشگوزەرانیی و ئازادییەکان هەم گەیشتنە وە مافە نەتەوەیی و نیشتیمانییەکان تا ئاستی سەروەخۆبوون.. ئەوە پێویستە کەرستە و کەتوارەک کە ئێستا نیمانە بڕەخسێنین تا بتانین شان بدەینە بەر ئەرکەکان و ئامانجەکان یەک لەدوو یەک وەدەستبهینین، لێ ئەو چەقەچەق و گەڕەلاوژێیەی کە ئێستا کۆیلەکانی نێو فەیسبووک دەیکەن و ئەو جوولە بیسەروبەر و ئاست نزمانەی وە ناوی ناڕەزایی دەربڕین و خۆپیشاندان ئەنجامدەدرێن و لە لایەن دەسەڵاتخوازانەکی خراپتر لە دەسەلات بەڕێوەدەچن.. هەرگیز ئەو کەرەستە و کەتوارە پێویستە نین و ئەگەر کۆتاییان پێنەیێ ئەوە دەتانن یەک لەو دوو ئامانجە بپێکن؛ یەکەمیان دەسەڵات لاواز بکەن و وە لاوازبوونیشی دڕندەتر دەربکەوی لە بەرانبەر ماف و ئازادییەکانی خەڵک.. دووەمیشیان یەک شەپۆڵی ئاژاوەگێڕیی گەورە بەرپا بکەن کە لە ئاشی پیلانەکانی داگیرکەران بکاتەوە و ئیدی تشتەک وە ناوی ئەزموونی باشوور نەمینێ و وەک پێشان بکەوینەوە بندەستی داگیرکەران و کارەساتگەلەکی وەک ئەنفال و کیمیاباران و وەعارەبکردن دووبارە ببنەوە!

کەرستە و کەتواری پێویست چ لە گرتەنەبەری بژاردەی چاکسازیی چ لە گرتنەبەری بژاردەی رووخاندن هەر ئەوەیە کە زۆرینەکی هۆشیار و خۆنەویست و ئازا و شۆڕشگێڕت لە نێو میللەت هەبی و کەسە رامیارەکانیان رۆشنبیر بن و کەسە رۆشنبیرەکانیشیان رامیار بن و بتاتن لە جێ و دەمی گونجاودا هێرشی پێچەوانە بکەنە سەر دەسەڵات و وە ناو بەرهەڵستکارەکان.. هاوکاتیش بتانن لە بەرانبەر پیلانەکانی داگیرکەرانی کوردستان رابوەستن و نەهێڵن رامیاریی نێودەوڵەتیی وەکاریانببەن، هەڵبەتە لەبەرئەوەی دەسەڵاتی باشوور هێندە خراپ و چەوسێنەرە ئەگەر بارودۆخەکان دەرفەتیان نەدا و ناچار بووین بژاردەی چاکسازیی بگرینەبەر ئەوە جوایەزییەکی ئەوتۆی لەگەڵ گرتنەبەری بژاردەی رووخاندن نییە چونکێ چاکسازییەکی هێندە گەورەمان پێویستە کە سەرلەبەری دەسەڵات بگرتەوە واتە دەبی هەموو دەسەڵات هەڵبوەشێنینەوە و لە نۆژەنڕا چێیبکەینەوە.. ئەوەش خۆوەخۆ و لە کرداردا رووخاندنی دەسەڵاتە لێ پێ وە پێ و وە ئارامیی و دوور لە توندوتیژیی و زەبروزەنگی رووخاندنی راستەوخۆ!
____________________________________________
تێبینیی: سەرجەمی وتارە رامیارییەکانم بەرهەمی هزر و رامانی تایبەتی خۆمن و پڕن لە رادەربڕین و ئەنجامگیریی.. لەبەرهەندێ نە پێویستم وە هیچ پارتی و پارتیایەتیەک هەیە تا رامان و ئاراستە رامیارییە تاکتیکبازیی و دژە مرۆییەکانی ئەوان تێکهەڵکێشی نووسینەکانی خۆم بکەم.. نە هیچ پێویستیشم وە وەکارهینانی شێوازی رەقوتەق و ناوەجێ و نازانستییانەی ئەکادیمیایی هەیە تا قسەی نووسەرانی دیکە کاوێژ بکەم و نەتانم خۆم دەرببڕم و راشکاوانە و رەخنەگرانە بدوێم.

ماڵپه‌ڕی دارا خونچە