|
دادگایەک بۆ
تاوانبارانى شەڕى ناوخۆ،
ژمارەى تاوانبارەکان هێندەى ژمارەى گەندەڵکارەکانە.
پێشڕەو حەمید
قوربانییەکانى شەڕى ناوخۆیى نێوان هێزە کوردیەکانى باشورى کوردستان،
مرۆڤ گەڵێک بون کەلەنێوان بڕوابون بەشەڕەکان و تەسلیم بونیان بەواقعێکى
تاڵى نەدارى ، بەشدارکەرێکى بەهێزى گەرمترکردنى ئاگرى شەڕەناوخۆیەکان
بون و لەپێناوى هیچدا بوونە قوربانى ؟ (لەگەڵ
ڕێزو حورمەتم بۆ قوربانیەکان و خێزانى ئەوقوربانیانەى شەڕى ناوخۆ)
هیچ بەماناى ئەوەى شەڕى ناوخۆ هیچ دەسکەوتێکى نەتەوەى و کۆمەڵایەتى
بەدواى خۆیدا نەهێنا و تەنها ژمارەکى زۆرى خەڵکى هەرێمەکەمان گیانیان
لەدەستداو ژمارەیەکیش کەم ئەندام بون و ژمارەیەکى زۆرى گەنجانى
کوردستانیش دەربەدەرى وڵاتانى ڕۆژئاءاوبون .
لەپشتى هەڵگیرسانى شەڕى ناوخۆى حیزبەکوردیەکانەوە لەدواى ڕاپەرێن ،
چەندین تاوانبارهەیە کەدەبێت بەتاوانبارى جەنگ و پشتگیرکردن لە کوشتنى
خەڵکى کوردستان بدرێنەدادگا و مافى تاوانەکانى خۆیان وەربگرن ؟! بەڵام
کام دادگا و کێن ئەوانەى کەتاوانبارى شەڕى ناوخۆن ؟ ئایا دادگاکانى
کوردستان سەربەخۆن و دەتوانن ئەو کەسانە دادگاى بکەن و دۆسێ یەکیان
بۆبکەنەوە و وەک تاوانبارى جەنگ دادگایان بکەن ؟ بیگومان ئەوەیان
ئەگەرێکى دورە چونکە تائێستاش دادگاکانى کوردستان سەربەخۆنین و لەلایەن
هەردو حیزبى دەسەڵاتدارەوە بەڕێوەدەبرێن و ئەو کەسانە دەکەنە خاوەن
بڕیار کە ئەندامێکى دڵسۆزى لق و مەڵبەندەکانیان بێت .
ئاخۆ تاوانبارانى شەڕى ناوخۆى کوردستان کێن و چۆن بدۆزرێنەوە ؟
لەکاتێکدا سەرکردەى حیزبەکان خۆیان لەتێوەگلان لەشەڕەکاندا بەدوور
دەگرن و دەڵێن ئەگەر ئێمە تاوانبارین با میللەت دادگایمان بکات ، ئاخۆ
بێباکى ئەو سەرکردانە لەپاى چیدێت ، لەکاتێکدا حیزبەکانى ئەوان
بەشەڕهاتبون و ئەوانیش سەرۆکى حیزبەکانن و بە فەرمانەکانى ئەوان
گوللەیەکى زیاتر دەنرا بەیەکترەوە ؟ ئێمە دواکارى لەکام دادگابکەین تا
دۆسێیەک بۆ تاوانبارانى شەڕى ناوخۆ دروست بکات ؟ چەند کەس دەست نیشان
بکەین و بەتاوانبارى شەڕ بیان ناسێنین ؟ ئایا داواکارى گشتى
لەکوردستاندا چى کارێکى هەیە ئەگەر لەسەر مافى گشتى نەیەتەدەنگ ؟ کێن
ئەوانەى ناویان لەخۆیان ناوە ( داواکارى گشتى ) و تائێستا چیان کردوەو
لەسەر کام لەپرسە گشتیەکان وەک داواکاریەک دۆسێ یەکى دروستکردو و
تاچەند شەڕى یاسایى لەسەر کردوە بۆ بردنەوەیان ؟ بیگومان هیچ و هیچ و
هیچ .
تاوانبارانى شەڕى ناوخۆ هێندى گەندەڵکاران ژمارەیان زۆرە و تائێستاش
لەبرى ئەوەى شەرم بکەن کە بەفەرمانى ئەوان کەسێک کوژراەو برینداربوەو
دەربەدەر کراوە ، تەواوى ئەو تاوانانە بە ئازایەتى دەزانێت و بەئاشکرا
لەسەر شاشەى تەلەفزیونە کوردیەکان ( حیزبییەکان ) باسى قارەمانێتى
خۆیان دەکەن و کورد کوشتن بەبیانوى کارکردن و قوربانى دان بۆ بیروباوەڕ
( مەبد ْ ) کەى دەهێنێـتەوە .
بەرلەهەڵبژاردنەکانى ڕۆژى 25/7/2009 هەمومان بە هیواى ئەوەوەبوین کە
(پەرلەمانێکى سپى) دروست بکرێت و ئەو
کەسانە نەبنە ئەندام پەرلەمان کە دەستیان هەبوە لە هەڵگیرسانى شەڕى
ناوخۆ و کوشتن و ژن کوژى دا ، کەچى بەداخەوە پەرلەمانەکەمان پڕوبە لە
مۆرڤ گەڵێک کە دەستیان هەبوە لە ئاوارەکردنى ڕۆڵەى ئەم میللەتە لەسە
رخاکەکەى خۆیى و بە هەمو هێزێکییەوە بەشدارى لەشەڕەکانداکردوەو یارمەتى
دەرى ژن کوژەکانیش بووە .
بۆئەوەى تاوانبارانى شەڕى ناوخۆى کوردستان دادگاى بکرێن و ئیدى
خەڵکانێکى تاوانکار نەبنە بەرپرس و چارەنوسى خەڵکى بەش مەینەتى
کوردستانیان نەکەوێتە دەست ، ئێستا کاتى ئەوە هاتوە کە داواى
دامەزراندنى دادگایەکى سەربەخۆ بکرێت بۆ دادگاى کردنى تاوانبارانى شەڕى
ناوخۆى کوردستان .
peshrawhameed@googlemail.com
|
