|
٢١\٦\٢٠١٤
داعشی رەش و سپی!
حەمەی کاکەعەبە
وەک لای هەمووان ئاشکرایە داعش سونەی
دەمامکدارن و لە لایەن سعودیە و تورکیا و قەتەرەوە بەڕێوەدەبرێن و
هاوکاریی دەکرێن و وەک داشی شەترەنج دەیانجوولێنن، تورکیا و وڵاتە
عەرەبییەکانی کەنداو و ولاتانی رۆژئاوا بەرێوەیان دەبەن و هەر ئەوانیش
هۆکار و هاندەری ئەو هەموو وڵاتە سونییە بوون و لە تورکیای عوسمانییان
دابڕین واتە بانێک و دوو هەوا.. دروستکردنی چەند وڵاتی بچووک بچووک و
بێ کاریگەری عەرەبی و تورکیایەکی پر کێشەی ناخۆ.. ئەو سیاسەتە
درێژکراوەی رێکەوتننامەی (سایکس بیکۆ) رێکەوتنی ئینگلیزە لەگەڵ (حەسەن
بن شەریف)ی شەریفی مەککە.
ئەگەر هێندێک بە وردیی سەیری رووداوەکان و گۆڕانکارییەکانی جەنگی
جیهانیی یەکەم تاکو ئەمڕۆ بکەین ئەوە زۆر بە رۆشنیی بۆمان دەردەکەوێ کە
ئەو هێز و وڵاتە سونییانە چۆن لە بەرژەوەندیی هێزە رۆژئاواییەکان
دەجەنگن.. ژیان و گوزەرانی سەرلەبەری کۆمەڵگەکان بە تایبەتییش هی خەڵکە
هەژار و بێ دەسەڵاتەکانی ناوچەکەیان کردۆتە دۆزەخ و جەرگبڕاو و ماڵ
سوتاویان کردوون.. وڵاتەکانیشیان کردوونەتە بازاڕێکی گەرمی شەڕ و چەک
بۆ بەرژەوەندییەکانی نامرۆڤە سپی و چاو شینە دڵ رەشەکانی رۆژئاوا.
لە چاوخشاندن بە مێژووی نەخشە سیاسییەکانی
ئینگلیز و رۆژئاواییەکان سێ ئامانجی سەرەکیی بەدی دەکەین:
یەکەم:
نانەوەی دووبەرەکیی نەتەوەیی و پاشان ئاینیی.
دووەم: بێ
کاریگەرکردن و بچووککردنەوەی شیعە و زاڵکردنی هزر و رامان و دەسەڵاتی
سونە.. نموونەش پاشایەتی بەحرەین و ئێراق و... هتد.
سێیەم: پارچەپارچەکردنی نەتەوەی کورد لە
دوو قۆناغ و دوو شوێنی جیاوازدا؛ قوناغی یەکەم دابەشکردن و
ژێردەستەکردنی کوردان لە کوردستانی گەورەدا بۆ چوار بەش و
ژێردەستەکردنیان لە لایەن دەسەڵاتدارانی تورک و عەرەب و فارس، قۆناغی
دووەمیش ژێردەستەکردنی بەلوژەکان لە بەلوژستان کە دابەش کراون بەسەر
وڵاتەکانی پاکستان و ئەفغانستان و ئێران (لە سەردەمی سەربەخۆیی پاکستان
بە هاوکاریی بەریتانیا.. هەر لەو کاتدا بەلوژەکان شۆرشێکیان بۆ
سەربەخۆیی خۆیان هەڵگیرساند بەڵام بەریتانیا وەک سیاسەت و کردەوەی
هەمیشەیی خۆی دژ بە کوردان بە هێز و چەک پشتگیریی لە پاکستان کرد و
کەوتنە لێدان و داپلۆسینی شۆڕشی بەلوژەکان.. دوای شەهیدکردنی پتر لە
٤٦ هەزار بەلوژ ئەو شۆرشەش وەک شوڕشەکانی دیکەی
کوردان بە پیلانی ئینگلیزەکان لەناوچوو*.
لایەنێکی دیکەی ئەو شەڕەی رۆژئاواییەکان گەرمکردن و جۆشدانی شەڕی شیعە
و سونەیە و خۆشیان لە پشتی هێزە ئەڵقە لە گوێیەکانن.. ئەوەش چەند
بەڵگەیەکی زیندوون بۆ پشتڕاستکردنەوەی ئەم قسەیەمان؛ بە تیرۆرست
نەکردنی تالیبان و داعش و بێ دەنگیی لە بەرامبەر ئەو کردارە نامرۆیی و
نایاساییانەیاندا کە ئەنجامیان دەدەن، کردنەوەی نووسینگە بۆ
تالیبانەکان لە قەتەر و ئاڵوگۆڕکردنی دیلی نێوان ئەمەریکا و
تالیبانەکان، بە تیرۆریست کردنی حیزبوڵای لوبنانی، دامرکاندنەوەی شۆرشی
شیعەکانی بەحرەین و دەست بە دەست کردنی دەسەڵات لە یەمەن، دروستکردنی
٢٢ وڵاتی سونەی عەرەبیی پاشایەتی و بنەماڵەیی
سونەکان، ژێردەسەتەکردنی شیعە و کورد لە هەموو وڵاتێکدا، لاوازکردنی
هزر و رامانی شیعەگەرێتی لە سەردەمی پاشایەتییەوە تا شۆرشی گەلانی
ئێران.
لە سەردەمی شۆڕشی گەلانی ئێرانیش جارێکی دیکە کورد و شۆرشەکەیان
پەرتەوازە کرد و رێگەیان بۆ دەسەڵاتێکی شیعیی خۆش کرد بۆ بێ
کاریگەرکردنی توودەییەکان و کوردەکان.. خۆشکردنی شەری شیعە و سونی کە
شەڕێکی مەزهەبییە قۆناغی دووەمی سیاسەتی رۆژئاوایە، ئەگەر کوردان لە
نێوان ئەو دوو بەرداش و ئەو دوو هەڵویستییەدا یەک دەنگ و یەک هەڵوێست
بن ئەوا ئەو بەستەڵەکی ژێردەستەیی و چەوساندنەوەیە دەشکێنن و دەبنە
خاوەنی قەوارەی سیاسیی و سەربەستیی خۆیان.. ئەگەر نا ئەوە لە نێوان ئەو
دوو بەرداشەدا چارەنووسیان لە هەڵەبجە و ئەنفال و کومەڵکوژیی دەرسیم و
بنبزرکردنی بارزانییەکان باشتر نابێ، جا باشتر وایە هێز و لایەنە
کوردییەکان هەڵوێستی خویان روون بکەنەوە دەبارەی ئەو رەوشەی کە ئێستاکە
دروست بووە.. با گەلی کورد بۆی روون ببێتەوە کە هێز و دەسەڵاتی کوردی
کامیان خاوەندارێتی لێ دەکا و کامیان خیانەتی لێدەکا.
دوو جۆر داعش هەن؛ یەکەم داعشی رەش و دووەمیش داعشی سپی، داعشی رەش
ئەوانەن ئاڵا و دڵ و جلیان رەشە و ریشیان پانە کە ئەوە هێزە
سەربازییەکەیانە، داعشی سپیش ئەوانەن کە دڵیان رەشە و ریشیان قەڵەمییە
و بۆینباغ لە مل و کراس سپین و ئاڵای هەمەجۆریان هەیە.. لە ناو
کوردانیش هەردوو جۆرە داعشەکە هەیە؛ داعشی رەشی کوردی ئەوانەن کە لە
بەرامبەر کوردەکانی رۆژئاوا دەجەنگن و ئێستاش چەک هەڵگری داعشن، داعشی
سپیش ئەوانەن کە جنێو بە یەزید و زەردەشتیی خاوەن فەرهەنگی
مرۆڤپەروەرانە دەدەن و خۆیان لە مێژوو و کەلتووری کوردی کەڕ دەکەن و لە
ئاڵایەکانیشیاندا بچووکترین هێمای کوردی نییە و لە پەرلەمانی هەرێمی
کوردستاندا (ئەی رەقیب) بە حەرام دەزانن بەڵام سەربڕین و
سۆزانییخانەکانی ئەکەپە و ئۆردوگان و کەناڵە لیبڕاڵەکانی سەر بە
رۆژئاواییەکان بە حەرام نازانن! ئیمامی عەلی دەڵێ لە نێوان هەق و
ناهەقدا لەگەڵ هەق نەبی ناهەقە، بێ دەنگییش بەرامبەر داعش واتای
شەرعیەتدانە بە داعش.
_____________________________
پەراوێز:
*
شایەنی باسە بەلوژەکان
کوردن و خۆشیان شانازیی پێوەدەکەن.. بەلوژەکان پەرتووکێکی هاوشێوەی
(شەرەفنامە)یان هەیە کە ناوی (کوردگەل نامە)یە و نووسەرەکەشی ناوی
(ئاخوند محەمەد ساڵح زەنگەنە بەلوژ)ە.. وەک دەزانین خێڵێک بە ناوی
زەنگەنە لە دەڤەری گەرمیان هەیە هەروا زۆر بەلگەی دیکەش هەن دەیسەلمێنن
کە بەلوژەکان کوردن.
٢٠\٦\٢٠١٤
- بەریتانیا
diyako88@hotmail.com
_________________________________
هەموو بابەتەکان دەربارەی
''داعش'' لێرە ببینە:
www.emrro.com/dosyeydahish.htm
|
