|
١٩\٦\٢٠١٢
دارا ئەحمەد:
ئێراق لەنێو ''قەیرانی قەیرانەکان''دا دەژی،
چاکترە خەڵکی کوردستان سەربەخۆیی خۆیان رابگەیەنن.
سازدانی: ئەرسەلان عەبدوڵا
ئەرسەلان عەبدوڵا:
ئایە به رای به‌ڕێزتان ئه‌م قه‌یرانه سیاسییەی ئێستا که ئێراق ته‌نانه‌ت
کوردستانیشی گرتۆته‌وه تا چه‌ند په‌یوه‌ندیی به نێوخۆ و ده‌ره‌وه‌ی
ئێراق و کوردستان هه‌یه؟
 دارا
ئەحمەد: ئەگەر بە دەگمەن دەنا هیچ قەیرانەکی سیاسیی نییە لە
جیهان بتوانی بە دەر لە پەیوەندییە نێوخۆییەکان بوونی هەبی، هەر
قەیرانەکی سیاسیش لە ئێستادا جا لە هەر جێیەک بی لەنێو ئەو پەیوەندییە
سیاسییە پەیوەستدار و تێکچڕژایەی ئێستای جیهان - کە لەسەر بنچینەی یەک
سیستەمی ستەمکار ئاواکرایە - هۆکارە دەرەکییەکان رۆڵی پڕ گرنگ و
یەکلاکەرەوەی تێدا دەبینن، لێ ئەو قەیرانە سیاسییەی کە ئێستا لە ئێراق
هەیە قەیرانەکی زۆر زۆر ناسروشتیی و نائاساییە و دەتوانین بە ''قەیرانی
قەیرانەکان'' ناوی ببەین، واتە ئێراق بە کوردستانیشەوە کە تا بیناقاقای
لە کۆمەڵەک قەیران نوقم بووە.. خودی ئەو قەیرانانەش دیاردەیەکی ناوازەی
و نوێی ئافەریدە کردییە.. کە ئەوەش بە رای من قەیرانی قەیرانەکانە،
لەبەرئەوە رۆڵی هۆکارە نێوخۆییەکان هێندە لاوازن تا ئاستی ئەوەی کە
نەتواندرێ هەستیان پێ بکرێ، بێگومان ئەوەش لە ئەنجامی ئەو داگیرکارییەی
ئەمەریکا و بەریتانیا - کە جۆرەکی نوێ و زۆر دڕندانەیە لە داگیرکاریی -
سەرچاوەی گرتییە، جا ئەو جۆرە داگیرکارییە کە تێکڕای کایە سیاسیی و
ئابووریی و دیبلۆماسیی و جیۆپۆلەتیکیی و تەنانەت فەرهەنگیی و
هەڵسوکەوتە جڤاکییەکانیشی وەبندەستی خۆی گرتییە هیچ واتەیەکی لۆ
سەربەخۆیی نیشتمانیی وەک سەربەخۆیی هەر نیشتیمانانەک کە ئێستا لە
جیهاندا هەن نەهێشتیشتەوە.. تەنیا قەیرانەک کە مابوو دروستی بکا
قەیرانی قەیرانەکان بوو کە لەو دوواییانە بە هۆی پیربوونی قەیرانەکان
ئەویش خۆبەخۆ دروست بووە و (ئێراق و کوردستان)ی بە جۆرەکی وەها پووچ
کردیتەوە کە تەنیا وەک دوو ناوی رووکەش لەسەر نەخشەی جیهان بمینێتەوە.
ئەرسەلان عەبدوڵا:
پێتان وایه که وه‌ک له راگه‌یاندنه‌کان باس
ده‌کرێ به لابردنی که‌سێک یاخود چه‌ند که‌سانێکی پله به‌رزی ئه‌و ده‌سه‌ڵاته‌ی
ئێراق، کێشه سیاسییەکان چاره‌سه‌ر بکرێن؟
دارا ئەحمەد: وەک لە سەرێ ئاماژەم پێدا
ئێستا ئێراق بێجگە لە قەیرانی کێشە سیاسییەکانی لەنێو (قەیرانی
قەیرانەکان)یشدا دەژی.. سەروەریی و
سەربەخۆیی دەسەڵاتەکانی تەنیا بە رووکەش هەن.. کەواتە پەیوەندیی نێوان
بەناو دەسەڵاتدارانی ئێراق و داگیرکەران وەک پەیوەندیی نێوان ئاغا و
رەعیەتە، هاوکات لە بارودۆخی هەنووکەی ئێراق و کوردستان دەسەڵاتدارە
پاوانخوازەکانی دەوروبەریش (وەک دەسەڵاتدارانی ئێران و تورکیا و
ئیسرائیل و وڵاتە عەرەبییەکان) بە پیێ بەرژەوەندییەکانی خۆیان
قورساییان لەسەر دەستنیشانکردنی کەسەکانی نێو دەسەڵاتە رووکەشەکەی
ئێراق هەیە کە گومانی تێدا نییە تێکڕای ئەو کەسانە بە شێوەیەک لە
شێوەکان بەوانەوە گرێدرانە یان هەر بە
تەواویی (پیاو!)ی خۆیانن، لەبەرئەوە قسەی راگەیاندنەکان بەو جۆرەی کە
باسی دەکەی قسەگەلەکی پووچن و هەر لایەو بە پێی بەرژەوەندییەکانی خۆی
لە بەڕکی خۆیەوە قسان فڕێ دەدا.. چونکە ئەوانەی کە ئێستا دەرهێنەری (فیلمی
ئێراق)ن هیچیان خەڵکی ئێراق نین و نایانەوێ بیرۆکەی سەرەکیی
سیناریۆیەکەشیان بگۆڕن.. جا هێشتنەوەی ئەکتەرەکان وەک ئێستا یان
جێگۆڕکێ پێکردنی هەمان ئەو ئەکتەرانە هیچ لە مەسەلەکە ناگۆڕێ رەنگە
کێشەکان ئالۆزتریش بکەن.
ئەرسەلان عەبدوڵا: ئایە کێ بە پلەی یه‌که‌م
لەو سیاسه‌ته ئاڵۆز و پڕ لە کێشه‌یه زه‌ره‌رمه‌ندە که هیچ ئومێد و
ئامانجێکی روون دیار نییه بۆ خەلکی ئێراق و کوردستان؟ به پێچه‌وانه‌وه
که‌س هه‌یه به‌رژه‌وه‌ندیی له‌و بارودۆخه‌دا هه‌بێ؟ چۆن؟
دارا ئەحمەد: بە بێ گومان تێکڕای خەڵک بە
هۆی ئەو سیاسەتەی کە ئێستا لە ئێراق و کوردستان دەگوزەرێ زیانیان پێ
گەیشتییە و لە بەردەوامبوونیشیدا پتریش زیانیان پێ دەگا، هەست ناکەم
هیچ کەسەکی ئێراق و کوردستان هەبی هیچ قازانج و بەرژەوەندییەکی لەو
بارۆخەدا هەبی، وەلی ئەگەر بەڕێزتان ئەو کۆمەڵە سیاسەتبازە مافیا و
بازرگانانەی خەڵکی ئێراق و کوردستان کە ئێستا بە رووکەش حوکمی ئێراق و
کوردستان بەڕێوە دەبەن بە (کەس) ناوزەد دەکەن.. ئەوە ئەمن پێم وە نییە
(کەس) بن! چونکە ئەوانە لە کۆیلە ملکەچترن و
لە هەموو هەست و نەستەکی مرۆیی داشۆراینە و دڕندەئاسا دێنە بەرچاوان..
ئاخەر سیاسەتمەدارانی هەر وڵاتەک ئەگەر سیاسەتبازیش بن و
بەرژەوەندییەکانیشیان بە تەواویی بە
بەرژەوەندیی وڵاتە زڵهێز و داگیرکەر و پاوانخوازەکان بەسترابیتەوە
هێشتا هەر بە تەواویی ملکەچ نابن و بە پێی یاسا و نەریتە باوە
جیهانییەکەی هەبوونی دەوڵەت رووبەڕووی هەر پێشێلکارییەک دەبنەوە کە
بەرانبەریان ئەنجام دەدرێن و هەر هیچ نەبی لە پێناو بەرژەوەندییەکانی
خۆیان پارێزگاریی لەو بەها و سەروەرییە نیشتمانییە باوە دەکەن کە لە
جیهان جێی خۆی گرتییە.
ئەرسەلان عەبدوڵا: ئایا پێت وایه
رۆشنبیران و نووسه‌ران به شێوه‌یه‌کی به‌رپرسیارانه و ته‌واو
راستگۆیانه مامه‌له‌یان له‌گه‌ڵ رووداوه‌کانی ئێراق و کوردستان کردییە؟
دارا ئەحمەد: دیارە نووسەران و
رۆشنبیرانی هەر چین و توێژەک لە یەکەکی دیکە جودایە و فەرهەنگ و
بەرژەوەندییەکانیشان جودان و لەنێو هەر جڤاکەکیش زۆرینەیان پابەندن بە
بەرژەوەندییەکانی دەسەڵات و سیستەمەکەی، بەڵام ئەو بارە مەرج نییە
هەموو کاتەک جێگیر بی بە تایبەتییش لە کاتەک کە مشەخۆران و ستەمکاران
بە تۆبزیی خۆیان وەسەر گەلدا دەسەپێنن یان لە کاتەک گۆڕان و
وەرگۆڕانەکانی سیستەمی حوکم بەڕێوەن، جا نووسەران و رۆشنبیرانی خۆمانیش
بە شێوەیەکی گشتیی بە هۆی ئەو بارودۆخەی کە ئێستا ئێراق و کوردستان
لەنێو قەیرانی قەیرانەکان دەژین تا ئەندازەیەکی زۆر لەگەڵ ئەو سیستەمە
حوکمڕانییە کڵۆڵ و بەربادە هەڵ ناکەن و ناڕازین، هەرچەندە هێندەکیان
لەسەر پەتی سیاسەتبازان یاری دەکەن.. بەشەکی زۆریشیان ئەگەرچی ناتوانن
بە پێی پێویست لە راژەی ویست و ئامانجەکانی گەل و چینە رەشوڕووت و
چەوساوەکان و بەرژەوەندییە نەتەوەیی و نیشتیمانییەکان پیتەکان بخەنە
سەر وشەکان.. لێ هەر لە بەرەی گەل دوور نین و زۆر کات دەسەڵاتداران
ریسوا و شەرمەزار دەکەن، دیارە خەڵکانەکیشیان تێدا هەیە کە زۆر
بەرپرسیارانە بەرخورد لە تەک کێشە و رووداوەکان دەکەن و رووبەڕووی
دەسەڵاتداران دەبنەوە و قەیسەرییان لێ دەکەنە کوونە مشک، بە شێوەیەکی
گشتیی ئەمن رۆڵی نووسەران و رۆشنبیران بە شێوەیەکی ئەرێنیی دەبینم و
ئەگەر دەزگاکانی میدیا بەو شێوازەی ئێستا لە لایەن دەسەڵات و کەسانی
خۆپەرست و بەرژەوەندپارێز قۆرخ نەکرابان ئەوە بە دڵنیاییەوە رۆڵی چاکتر
و رۆشنتریشیان دەگێڕا.
ئەرسەلان عەبدوڵا:
پرسیاری کۆتاییم ئەوەیە کە ئایە به بۆچوونی به‌ڕێزتان چی بکرێ باشه
بۆ ده‌رچوونی یه‌کجاره‌کیی له‌و قه‌یرانه‌ی که هه‌یە؟
دارا ئەحمەد: ئەهـ کە پرسیارەکی قورسە!
لێ بە پێی ئەو دەرفەتە و بە پێی ئەو بەرسڤانەی سەرێ دەتوانم بە کورتیی
ببێژم تەنیا کارەک لۆ دەرچوونی یەکجارەکیی لەو قەیرانە ئەوەیە کە ''شۆڕش''
ئەنجام بدرێ، لێ شۆڕشیش کە واتای جودا جودای هەیە.. بە تێڕوانینی من
ئەو شۆڕشە پێویستە بە شێوەی خۆپیشادان لە لایەن تێکڕای چەوساوان و
گەنجانی دوور لە حیزب و حیزبایەتیی و دوور لە تێکڕای رەوتە دینییەکان و
دوور لە رەگەزپەرستیی و ناوچەگەریی ئەنجام بدرێ تا دەسەڵاتداران واز لە
دەسەڵات دەهینن و کۆتایی بە داگیرکاریی دەرەکیی و نێوخۆیی دەهێندرێ..
ئیدی خەڵک ئازاد بن لەوەی کە چیان دەوێ و چ جۆرە دەسەڵاتەک دادەمەزرێنن،
وەلی رەنگە ئەو پێشنیارەی من بە هۆی ئەو بارودۆخەی کە باسمان کرد چانسی
جێبەجوونی لە ئێراق زۆر کەم هەبی و بە خەون
یان ئەندێشەیەکی خۆش بێتە بەرچاوان یان بە هۆی ئەوەی فەرهەنگی ئێراقی
عەرەبیی - کە بە هەردوو ڤایرۆسی شیعە و سوننە و نەخۆشیی درێژخایەنی
شۆڤێنیزمی عەرەبی ئاڵوودە بووە - پێشنیاری من وەک کەسەکی خەڵکی
کوردستان بە هیچ جۆرەک وەرنەگرن و قسەی باشیان لۆ بکەین یان خراپ هەر
بە (جنۆکە و فورسی مەجووس) یان (ئینفیسالیی) یان (دەسیسەی ئیمپریالیزم
و سەهیۆنیزم)مان ناو دەبەن! لەبەرئەوە باشترە ئەو مافە بە خۆمان نەدەین
و واز لە ئێراق بهینین و فرە چاکترە لە خەمی کوردستانەکەی خۆماندا بین،
باشترین چارەش بە رای من لۆ دەرچوون لەو قەیرانەی ئێراق ئەوەیە کە
خەڵکی کوردستان گێ بە دەسەڵاتدارانی کوردستان نەدەن - کە هەرگیز پارەی
موفتی فیدراڵییە پەڕپووتەکەیان بە سەربەخۆیی کوردستان ناگۆڕنەوە و
هەمان رەوشتی گەندەڵکاریی سیاسەتبازانی ئێراقیان هەیە - و لە
خۆپیشاندانەکی سەرتاسەریی سەربەخۆیی کوردستان رابگەیەنن و هاوکات ئەو
دەسەڵاتە گەندەڵەی خۆمانیشی لەگەڵ رابماڵن و لە هەڵبژاردنەکی ئازاددا
حکومەتی خوازیاری خۆیان دابمەزرێنن.
١٨\٦\٢٠١٢
ماڵپه‌ڕی دارا ئه‌حمه‌د
|
