١٢\١٢\٢٠٢٢

داڕماندنی ترس!

دارا خونچە       

هەموومان لە چارچێوەی ئەوەی لە پێکهاتەی جەستەیی و گیانیی یەکسانین و هەمان پێداویستییەکانمان هەن.. مرۆڤین، لێ گەلەک لەمێژە بە تایبەتییش لەوەتەی چینەکان دروستبوونە و بە درێژایی هەموو ئەو قۆناغانەی تا نهۆ شێوازی ژیانی کۆمەڵی پێدا تێپەڕیوە زۆرینەی مرۆڤەکان نەرێنیی بوونە؛ رەنج و ماف و ئازادییەکانی ئەوانیدیکەیان بە تەواویی لە رێی دەسەڵاتی ئابووریی و رامیاریی و کۆمەڵایەتییەوە داگیرکردوە، هاوکاتیش رەنج و ماف و ئازادییەکانی خۆشیان پلە بە پلە بە پێی ئاستی پلەبەندییە چینایەتییەکە لە سەرێوە بەرەو خوارێ و یەک لەسەر ئەویدیکە (کەمتر بەرەو زۆرتر) داگیرکردوە!

خۆ مرۆڤی ئەرێنییش گەلەک زۆرن لە چین و توێژە رەنجدەر و چەوساوەکان تەنانەت زۆریشیان ئێستا هۆشیاریی چینایەتی و پێشکەوتنخوازییان هەیە لێ زۆرینەیان لە کرداردا لە ژێر هەژموونی ئەو مرۆڤە نەرێنییانەن کە ئاماژەم پێیاندا.. ئیدی ترس لە پەلوپۆی خستوون و فرە ئەستەمە بتوانن بەرانگژ ببنەوە؛ ترس لە کوشتن و ئەشکەنجەدانی جەستەیی لەسەر ئازادیی رامیاریی و رێکخراوبوون نا (کوردستان و رۆژەڵاتی نێوەڕاست و هەندێک وڵاتانی دیکەی ئاسیا و ئەفەریقا و نێوەڕاست و خوارێی ئەمەریکای لێدەرچێ کە ئەو کوشتن و ئەشکەنجەدانە تێیاندا کاری رۆژانەیە) بەڵکە ترس لە نانبڕین و بێکاریی.. لە پەراوێزخستنی کۆمەڵایەتی و دابڕین لە کۆمەڵ.. لە هێرشی دین و دابونەریت.. لە دڕندەیی نێرسالاریی.. لە پێشێلکردنی شکۆمەندیی.. لەو دەستوور و یاسا و رێسایە ستەمگەر و بەرزەفتکەرانەی ژیان کە بە ناوی پاراستنی بەرژوەندیی تاک و کۆمەڵ دادەڕێژدرێن و دادەسەپێندرێن.. و زۆر ترسی دیکە!

هەڵبەتە ئەو ترسانە بە تێپەڕینی کات و خۆبەخۆ بوونەتە بەشێک لە فەرهەنگی باو.. تا ئەو ترسانەش دانەڕمێندرێن شۆڕش و راپەڕین و بەرخۆردانەکان سەرپێییانە روودەدەن و سەرەنجام بێ کاریگەر دەبن، لەبەرهەندێ پێویستە ئەو کەسە هۆشیارانەی لە چین و توێژەکانی خوارێ توانیویانە تا ئێستا سەربەخۆیی خۆیان بپارێزن و گیانی بەرانگژبوونەوەیان تێدا هەیە یەکبگرن و لە پێناو هەڵوەشاندنەوەی ئەو فەرهەنگە و رەواندنەوەی ئەو ترسانە خۆیان بە شێوازێکی تازە رێکخراو بکەن، گرنگ نییە تۆ چ کارێک دەکەی بۆ گوزەران و ژیانت لە چ پێگەیەکدایە و ئاستی رۆشنبیرییت چەندە.. بەڵکە گرنگ ئەوەیە تۆ لە کارەکەت کرێگرتەی کەسان و کۆمپانیایە چەوسێنەرەکانی و هێندە تێدەگەی کە کێ و چ سیستەمێک ئەو هەموو نەهامەتییەی وەسەر مرۆڤدا هانیوە هەروا باش هەست بەوە دەکەی کە رۆژانە ئازادییە جۆراوجۆرەکانی دەربڕین و خۆدەربڕینت سەرکوت دەکرێن.

هەر بەو پێودانگەی سەرێ ئێمە یەکگرتنێکمان لە چارچێوەی رێکخراوی ''ئازادیی دەربڕین'' چێکردوە کە بتوانین لە رێی کاری هەرەوەزیی و بەکۆمەڵ خۆمان لەسەر چەمکی ئازادیی پەروەردە بکەین تا لە پەیڕەوکردنی ئازادییەکانی دەربڕین و خۆدەربڕین بەهرەمەند ببین و چ وەک تاک چ وەک کۆمەڵ بە بێ ترس لەسەر خۆمانی جێبەجێ بکەین، هەر لە سەرەتاشدا شێوە رێکخراوبوونی ئاسۆییمان هەڵبژارد کە زۆر دوورە لە رێکخرابوونی قووچەکیی و خۆسەپێنەرانەی حیزبیی و حکومیی و دەسەڵاتخوازان بە گشتیی.

بێ گومان ئێمەش وەک هەر ئازادییخوازانێکی دیکە زۆرینەمان زۆر سەرقاڵین بە تێکۆشانی کەسیی لە بوارە فەرهەنگییەکان.. لێ خولیای ناوبانگ و خۆدەرخستن لە کارە فەرهەنگییەکان بە بیانووی ئەوەی (کاری بەکۆمەڵ کات کوژ و کەم بەرهەمە و دەرفەتی کار و داهێنانە تایبەتەکانمان بەرتەسک دەکاتەوە.. زۆر نابەجێیە ئاستی هۆشیاریی و داهێنانی خۆمان بخەیەنە ئاستی یەکگرتن و کاری بەکۆمەڵ کە پڕیەتی لە خەڵکی ناهۆشیار و بێ کاریگەر!) ساردمان ناکەنەوە و ئەگەر ئەو رێکخراوەش سەرنەگرێ ئەوە هەر پێویستە لە داهاتوودا رێکخراوی لەو جۆرە بێنە ئاراوە.. چونکە هەر بەهرەمەندبوون لە ئازادییە جۆراوجۆرەکانی دەربڕین و خۆدەربڕین لە چارچێوەی کاری بەکۆمەڵ دەتوانێ کار و داهێنانە کەسییەکان لەسەر پانتایی کەتواری کۆمەڵ کارا بکا و بیکاتە هێز لە پێناو ئەنجامدانی هەر گۆڕان و وەرگۆڕانێک.

سەرەڕای ئەوەش خۆ ئێمەش بە هەمان شێوە رووبەڕووی هەموو ئەو ترسانە دەبینەوە کە ئاماژەمان پێدان.. لێ دڵنیاین لەوەی بە بێ رەواندنەوەی ئەو ترسانە لە رێی لەخۆبووردەیی و کار و تێکۆشانی خۆڕاگرانەی ئازادییخوازان و خۆدەربڕینی ئازادانەی خۆیان هەرگیز ئاستی ئازادییەکانمان لەوە باشتر نابن بگرە خراپتریش دەبن.. بەوەش ژیان و گوزەرانی تاک بە تاکی کۆمەڵ و یەکسانی کۆمەڵایەتیش هەر بەرەو دوایێ دەگەڕێتەوە، جا هومێدەوارین هەرچی ئازادییخوازە وەک ئەزموونێکی تازە بەو رێکخراوەوە پەیوەست بێ.. خۆ ئەگەر بۆی دەرکەوت رێکخراوەکە گوزارشت لەو ناکا و هەمان بەزموڕەزمی رێکخراوەکانی دیکەیە ئەوە هیچ زیانی لێناکا و با بە زووترین کات دەستبەرداری بێ.

١١\١٢\٢٠٢٢ - لەندەن

ماڵپه‌ڕی دارا خونچە