|
داتاکانى رەوشى
گەنج لە کوردستاندا ، ترسناکە!
بەشدار عه‌لی
سێکتەرى توێژینەوە و زانیارى لە رێکخراوى تواناسازى لاوانى کوردستان،
راپۆرتێکى لەسەر رەوشى گەنجانى کوردستان لە
ساڵى(2007)بڵاوکردۆتەوە،بەتێرامانێک لە داتاکان ئاسانە تێبگەیت کە
گەنجان و لاوان چ جەهەنەمێکیان بۆ خولقاوە و لە نێو چ ئازار و
دڵەراوکێیەکى دەروونى و دەرد و بەڵاکان ساتەکانى ژیان دەگوزرەرێنن .
بەپێى ئەو داتایانە،تەنها لە دەروازەى ئیبراهیم خلیل لە یەک ساڵى
رابردوو(9499)کەس سنوورداش کراونەتەوە بۆ کوردستان(دیاریش نیە کە چەند
ئەوەندە گەیشتونەتە ئەوروپا و وڵاتانى ترى دەووروبەر و ناوچەکە و بێجگە
لەوانەش کە تیا چوون)،تەنها لە سنوورى پارێزگارى سلێمانى،بێجگە لە
گەرمیان کە بەرێوبەرایەتیەکى تایبەتیە(56)گەنج خۆیان کوشتووە،هەر
لەسلێمانیدا(78)گەنج رفێندراون و (2158)حاڵەتى هەرەشە کردن
روویداوە،هەروەها بە پێى راپۆرتێکى( بزافى ژیان )لە شەش مانگى سەرەتاى
ساڵى رابردوو (271) ئافرەت سوتاون و گیانیان لەدەستداوە کە هەمووشیان
گەنج بوونە،... .دیارە زۆرێک لەو داتایانە لە میدیایى بۆرژوازیى و
دامودەزگاکانى حکومەت وەرگیراون،ئاشکراشە کە ئەو سەرچاوانە چەندە
راستیەکان ئاوەژوو دەکەنەوە،کەرێکخراوى ناوبراویش خۆیان ئاماژەیان پێ
کردووە کە رێگریەکانیان زۆر بوونە بۆ وەدەست هێنانى زانیارى،چونکە لە
کوردستانداهیچ دەزگایەک ئامادە نیە زانیارى راست و دوورست بدات(نەوەک
ئەزموونوکە لەبار بچێت و دوژمنانمان پێمان خۆش بن!) ،بەڵام ئەو
داتایانە پێمان دەڵێن کە گەنجان و لاوانى کوردستان لە چ جەهەنم و
مەرگەساتێکە هەناسە دەدەن،ئەوەى زیاتر جێگاى تێبینیە و لەو داتایانە
دەخوێندرێتەوە ئەوەیە کە لاوان و گەنجان و خەڵکى کوردستان لە نێو بێ
ئۆقرەیى و سەرگەردانى و کێشە و گرفتەکانیاندا تەنها دوو رێگا شک دەبن
بۆ رزگارى و ئازادبوونیان لە وەزعیەتەى کە تێى کەوتوون، ئەوانیش یان
کۆچ کردنە یاخود خۆکوشتن و کۆتاى هێنانە بە ژیانى خۆیان! بەداخەوە ئەو
رێگایانە بەرێگاى چارەسەرى دانراوە لە کوردستاندا و رۆژانە گەنجان و
لاوانى کوردستان دەستى بۆ دەبەن.
پێش هەموو شتێک دەمەوێت ئەوە بڵێم هیچ یەکێک لەم رێگایانە رێگاى
چارەسەرى یەکجارەکى نیە و وەڵامدانەوەیەکى زەعیف و نێگەتیڤە بە
وەزعیەتى موجود،بەڵام بەداخەوە لە ئەنجامى وورد و خاش کردنى ووزە و
توانا و و ئیرادەى تاکەکان لە ناچاریدا دەستیان بۆ بردووە.
ئەوە چ وەزعیەتێکە تروسکایەکى رووناکى ناهێڵێتەوە بۆ ژیان کردن و
خۆکوشتن و کوورت کردنەوەى خۆشترین ساتەکانى تەمەن نەبێت کە ژیانى
گەنجییە؟!ئەوە چ فشارێکە تەنها رێگاى کۆچ بە ناخۆشترین و سەخترین و
ترسناکترین رێگا ببێتە رێگاى رزگارى(کە هەزاران گەنج هەر لە رێگادا تیا
چوون و نقومى ژێر ئاو بوون و بوونە قوربانى پۆستالەکانى جەندرمە و
قاچاخ چیەکان،دیارە گەنجان ئەو راستیەش باش دەزانن کەچى هەر کۆچ رێگا
چارەیە و ئەو رێگایە هەڵدەبژێرن!
راستیەکەى ئەوەیە،گەنجان و لاوان و خەڵکى کوردستان هەر شەش لاکانیان
تەندراوە بە هەزارەها کار و شتى سەیر و سەمەرەى نامۆ بە ژیانى
ئینسانەکانى ئەو سەردەمە،حکومەت و دەسەڵات تەنها بۆ لە خاچ دانى حەز و
خۆزگە و ئاواتەکانى گەنجان بوونى هەیە،کەباس دێتە سەر ئاو و کارەبا و
سوتەمەنى و رێگاو بان و خزمەتگوزارییە سەرەتاکانى تر شتێک نامێنێتەوە
بە ناوى حکومەت،سەرەتاترین ماف و ئازادییەکان لە هیچ کون و قوژبنێکى
ئەو مەملەکەتە بوونى نیە،بۆ جێبەجێ کردنى مەرامەکانى خۆیان لە رێگاى
یاسا و دەستور و بریار و سیستەمە شەرمهێنەرەکان، دارزیوترین فەرهەنگیان
لە ناو خەڵکدا جێ کردووە،گرانى بازار و بێکارى و دانەمەزراندنى گەنجان
و لاوان و یان دامەزراندنیان بە کەمترین مووچە کە بەشى هەفتەیەکى ناکات
و تا مردنیش دەبێت خۆزگە بە کەلاوەیەکى قورین و جلێکى جوان بخوازێت
هێندەى تر وەزعیەتەکەى خراپتر کردووە،کەچى بەرپرسان لە هەموو
ئیمکانیاتى ئەو وڵاتە بەهرەمەندن و دەستیان بە هەموو شتێک دەگات و
هەموو داهاتى ئەو وڵاتەیان بۆ خۆشگوزەرانى و بزنسى خۆیان تەرخان
کردووە،لەگەڵ کۆنەپەرسترین وڵات و هێز هاوپەیمانێتى دەکەن و چارەنوسى
ئەو خەڵکە دەخەنە ژێر دەسەڵاتیان و بەرەو ئایندەیەکى تاریکتر راپێى
دەکەن،نزمترین نوزەى نارەزایەتیش دەبیت بە گەورەترین(تیرۆرست و
تێکدەر)و بە قورسترین سزا و حوکمت دەگەیەنن،بۆیە لە ساڵى رابردوو هەر
بەپێ ى ئەو داتایانە کەمترین خۆپیشاندان و نارەزایەتى لە کوردستاندا
روویداوە.... .
هەر بۆیە ئیستا گەنجان و لاوانى کوردستان بیر لە هیچ شتێک ناکەنەوە جگە
لە رزگاربوون و نەمانى فیزکى لەم مەملەکەتە،چونکە هەوڵەکانیان بۆ
باشتربوون و چاک کردنى هەمووى شکستى پێ دەهێنن،هەر بۆیە گەنجان زۆر
بەکەمى بەلاى باشترکردنى ئەو وەزعیەتە و پرۆژەکانى ژیان و خێزان دورست
کردنەوە دەچن ،چونکە هەموو شتێکیان لەبەر دەستى تاکەکان دەرهێناوە و
هەموو هەوڵ و ماندوبون و ئیرادەى تاکەکانیان خستۆتە بەر رەحمەتى میزاج
و ئەخلاقى دۆگمایى بەرپرسە حیزبیەکان،ئەمەش کێشەو گرفتى زۆرى بەدواى
خۆییدا هێناوە،هەر بەپێى ئەو داتایانە رێژەى جیابوونەوەش زۆر زۆر زیادى
کردووە و کێشە کۆمەڵایەتیەکانیش روو لە زیادییە و رێژەى تاوانیش رۆژ لە
دواى رۆژ زیاد دەکات،لە ساڵى رابردوو تەنها لە هەولێر(670)حاڵەتى
جیابوونەوە و تەڵاق روویداوە،لە دهۆکیش(220)حاڵەت و لە
سلێمانیش(247)حاڵەت.
تا دەسەڵاتێکى ئاوا بوونى هەبێت و لە هەموو لایەکدا لە هەوڵدابێت بۆ
وورد و خاش کردن و تێکدانى شیرازەى ژیانى تاکەکان و کۆنترۆڵ
کردنیان،داتاکان مانگ لەدوایى مانگ مەترسیدارتر و ترسناکتر دەبێت و
ئومێدى ئایندەیەکى باشتر چاوەڕوان ناکرێت،بۆیە ئێمە پێَویستە لە هەرەمى
سەرەوە دەست پێبکەین بۆ گۆڕِان.
Bashdar_net@yahoo.com
|
