٨\٨\٢٠١٢

داوای لیکۆڵینەوەی ورد لە کەیسی مردنی گوماناویی شاعیر ''عیرفان ئەحمەد'' دەکەین.

ئێمە وەک سەنتەری پەرەپێدانی دیموکراسی و مافی مرۆڤ بەشێکی فراوانی کارو ئەرکەکانمان چاودێری کردنی رەوشی مافی مرۆڤە لە گرتوخانەکان و بنکەکانی پۆلیسدا، لەو بوارەشدا چەندین راپۆرتمان بڵاوکردۆتەوە لەسەر بوونی ئەشکەنجەو خراپ مامەلەکردن لەگەلڕ تۆمەتباراندا.

ھەروەھا لە یەکەم رۆژەوە ئاگاداری کەیسی گرتنی کۆچکردوو " شاعیری ناسراو عیرفان ئەحمەدین " و بە دواداچوونمان بۆ کردووە.

بەربەیانی ٣١ی تەمووزی ٢٠١٢ لەلایەن ھێزەکانی پۆلیسەوە لەبەردەم ھوتیل سلێمانی پالاس دەستگیر دەکرێت و دواتر لەلایەن دادوەری لێکۆلینەوە بڕیاری راگرتن (توقیف) کردنی دەدرێت رەوانەی بەڕێوەبەرایەتی گرتن و گواستنەوەی سلێمانی دەکرێت، بەڵام لە بەرواری ١\٨\٢٠١٢ حالەتی تەندروستی تێکدەچێت و دواتر لە بەرواری ٥\٨\٢٠١٢ کۆچی دوایی دەکات .

تێکچوونی باری تەندروستی ناوبراو رۆژێک دوای دەستگیرکردنی بەم شێوەیە گومانی ئەوە دروست دەکات کە تووشی لێدان و زەبرو زەنگ بوبێتەوە ھۆکاری مردنەکەشی ئەشکەنجەدان بووبێت، بە پێی زانیاریەکانی ئێمە شوێنەواری لێدان و ئازاردان بە جەستەیەوە دیار بووە، ھەروەک پرسیاری ئەوەش دەکەین کە چۆن کەسێکی ناسراوو شاعیر باری تەندروستی بەم شێوەیە بووبێت و ھەر زوو رەوانەی نەخۆشخانە نەکرابێت؟

سەرجەم نووسەران و ھونەرمەندانی شاری سلێمانی خوالێخۆش بوو دەناسن و دەزانن ئاشتی خوازی و مرۆڤ دۆستی لە وشەی شاعیر ناسکتربووە و ئەگەر کەیسی کەسێکی شاعیر بەو شێوەیە بێت، دەبێت ھاولاتیانی ئاسایی حاڵیان چی بێت؟ ھەر بۆیە پێمان وایە لێکۆلینەوەی ورد لەم کەیسە و راگەیاندنی دەرئەنجامەکانی بە ئەرکی بە پەلەو جدی دەسەڵاتی دادوەری و وەزارەتەکانی ناوخۆو تەندروستی دەزانین و وەک سەنتەرەکەشمان بە دواداچوونی بەردەواممان دەبێت بۆ کەیسەکە.

سەنتەری پەرەپێدانی دیموکراسی و مافی مرۆڤ DHRD
٦\٨\٢٠١٢ - سلێمانی