ئێستا ئەگەر بە شێوەیەکی ئاسایی و زۆر سەرپێییانە سەرنجی بانگەشکەکانی هەڵبژاردنەکانی ئەنجوومەنی پارێزگایەکان و پەرلەمانی عێراق بدەین ئەوە بە بێ هیچ خۆماندووکردن و وردبوونەوەیەک زۆر بە رۆشنیی بۆمان دەردەکەوێ کە هەر یەکێک لە کاندیدەکانی تێکڕای حیزبەکان دەڵێن: دەنگ بدە بە من.. چونکە ئەمن:

دەتوانم لە هەمووان باشتر درۆ لەگەڵ خۆم و لەگەڵ تۆ و لەگەڵ تێکڕای میللەت بکەم! دەتوانم لە هەر کەسێکی دیکە کورسییەکەم باشتر بەکاربهێنم بۆ بەرژەوەندییە خودپەرستییەکانی خۆم و (واسیتە)کردن بۆ خزم و کەسوکاری خۆم و دەروێشەکانی سەرۆکەکەم و حیزبەکەم! دەتوانم تێکڕای نووسەران و هونەرمەندان و رۆژنامەنووسان بکەمە تووتیی خۆم و سەرۆکەکەم و حیزبەکەم.. هەر کەسێکیشیان زماندرێژیی بکا زمانی لە بنەوەڕا ببڕم! دەتوانم تێکڕای ژنان تەنانەت رۆشنبیر و ئازادییخوازەکانیشیان بکەمە بووکەشووشە و هەر کاتێکیش بمەوێ بیانشکێنم! دەتوانم گەڕاندنەوەی ناوچە داگیرکراوەکان و سەربەخۆیی کوردستان لە مێشکی هەمووان بسڕمەوە و هەر کەسێکیش لاملیی بکا ملی بشکێنم! دەتوانم مێشکی گەنجان بە وەرزشی ناپێویست و دین و داهێنانە تەکنەلۆژیاییە خراپەکان بشۆمەوە و بیانکەمە کۆمەڵە مشەخۆرێکی کەللەپووچ! دەتوانم میللەت هێندە گەمژە بکەم وەک مێگەلێک بۆ هەر کوێیەک بمەوێ رای بدەم! دەتوانم هەر بە واتای وشە گاڵتە بە (منداڵان و خاوەن پێداویستییە تایبەتییەکان و پیر و پەککەوتەکان و کەسوکاری ئەنفالکراوان و کیمیابارانکراوان و تێکڕای شەهیدان و زیانلێکەوتووانی کارەسەتەکان) بکەم! سەرئەنجام دەتوانم لەو چوار ساڵەی دادێ لە هەر کەسێکی دیکە باشتر میللەت برسیی و سەرکوت بکەم و وایان لێ بکەم جارێکی دیکەش دەنگ بە خۆم یان حیزبەکەم بدەنەوە!

هەربۆیە زۆر باشترە دەنگەکەت بۆ من بخەیە نێو سندوقی هەڵبژاردن و خەونەکەشت بۆ خۆت بخەیە نێو زبڵدان!!!