٣\٤\٢٠١٤
دەنگی
ژنانی کوردستان گەیەندرایە پەرلەمانی
ئەوروپا.
راگەیاندنی هاوبەشی گرووپی ژیان و ڕێکخراوی
کوردستان فۆروم - بەلجیکا سەبارەت بە
کۆنفرانسی ژنان لە پەرلەمانی ئەوروپا.
ئەمڕۆ
بەرواری ١\٤\٢٠١٤
له پەرلەمانی ئەوروپا لە برۆکسل کۆنفرانسێك سەبارەت بە کێشەکانی ژنان
لە هەریمی کوردستان ئەنجام درا بە ناوی (ڕێگری یاسایی و دادوەری لە
بەدیهێنانی مافەکانی ژنان لە هەرێمی کوردستان).کۆنفرانسەکە لە لایەن
سۆزان سەعید ئەندامی دەستەی سەرپەرشتیاری کوردستان فۆروم ـ بەلجیکا،
ڕێزان سهڵح شانۆکار و نەجیبە قەرەداخی میدیاکار ئامادەکاری بۆ کرابوو.
کۆنفرانس لە لایەن ئانا گۆمێز پەرلەمانتاری ناسراوی یەکێتی ئەوروپا،
ئەندامی نێردەی هەمیشەیی یەکێتی ئەوروپا لە ئێراق سەرپەرشتی کرا.
چەندین پەرلەمانتاری تری یەکێتی ئەوروپا و نوێنەری ڕیکخراوەکانی ژنان و
ڕێکخراوەکانی کۆمەڵگای مەدەنی ئامادەی بوون.
سەرەتا فلیمێکی دۆکۆمێنتاری کە لە لایەن خاتوو نەجیبە قەرەداخیەوە
ئامادە کرابوو پێشکەش کرا. فلیمەکە سەبارەت بە باری ناهەمواری ژنانی
کوردستان و پێشێلکاریەکان بوو بەرامبەریان.
هەرسێ ژنانی چالاکوانی بواری یەکسانی ژنان، بەهار مونزیر بەڕێوەبەری
ریكخراوی خەڵك بۆ گەشەپێدان (PDA) و
وتەبێژی گرووپی ژیان، چلورە ئەحمەد هەردی چالاکوانی ژنان و ئەندامی
گرووپی ژیان و گۆنا سەعید چالاکی بواری یەکسانی ژن و پیاو و ئەندامی
ڕێکخراوی ژنانی کورد و خۆرهەڵاتی ناوەراست لە بەریتانیا، بابەتی
جیاوازیان پێشکەش کرد.
بابەتەکانیان بە گشتی سەبارەت بە كهمتهرخهمی حکومەتی هەرێم و
دەزگاکانی بوو لە ئاست تاوانەکانی کوشتن و توندوتیژی بەرامبەر ژنان و
پێشێلکاریەکان بەرامبەریان و زیادبونی رادەی کوشتن و توندوتیژی.
هەروەها تاوانە بێشومارەکان بە داتا خرانە ڕوو، هاوكات بە ئەنفالی ژنان
ناوهینرا.
لە کۆنفرانسەکەدا چیرۆکی چەندین تاوان بەرامبەر ژنان و کچان باسکرا.
ئەو یاسا ناشارستانیانە خرانە ڕو کە دژ بە مافەکانی ژنانن و پێچەوانەی
بنەماکانی یەکسانی ژنان و پیاوانن و لە لایەن پەرلەمانی کوردستانەوە
دەنگی لەسەردراوە و لە لایەن سەرۆکی هەرێمەوە واژو پەسەند کراون. لە
نمونەی ئەو یاسایانەش فرەژنی و سزانەدانی لاقەکاری کچان لە کاتی
ئامادەبونی بۆ هاوسەرگیری لەگەڵ قوربانیەکەی.
بە شێوەیەکی گشتی کەمتەرخەمیەکانی پەرلەمان و حکومەت و دەسەڵاتی
دادوەری هەرێم سەبارەت بەو تاوانانەی بەرامبەر ژنان ئەنجام دەدرێت
خرانە ژێر پرسیارەوە. چالاکوانانی گرووپی ژیان داوای پشتیوانی و
بەتەنگەوەهاتنی پەرلەمانی ئەوروپا و ڕێکخراوە بیانیەکانیان کرد بۆ فشار
دروستکردن لەسەر حکومەت و دەزگاکانی هەرێمی کوردستان.
ئانا گۆمێز پەرلەمانتاری ئەوروپا داوای لە ژنانی چالاکوانی ئامادە بوو
کرد کە لەمەوبەر بە بێ هیچ شەرم و دودڵیەك و زۆر بە ڕاشکاوانە کێشەکانی
ژنان بگەیەننە پەرلەمانی ئەوروپا و گرنگیەکی زۆریان هەیە بۆ باشکردنی
باری ژنان لە هەرکوێیەکی دونیادا بن. هەروەها سۆزی دا بە ئامادەبوان کە
بەدواداچون بۆ سەرجەم کەیسەکان بکات و بە یەکێك لە ئەرکە مرۆڤ
دۆستیەکانی خۆی دەزانێت.
پاشان دەرگای پرسیار و گفتوگۆ و بیروڕاگۆڕینەوە لە نێوان میوانەکان و
چالاکوانان کرایەوە. ئامادەبوان پرسیاریان ئاراستەی خانمە چالاکوانەکان
سەبارەت بە لایەنە جیاوازەکانی کێشەی ژنان لە هەرێمی کوردستان کرد.
ڕێکخراوی کوردستان فۆروم وێرای هاوکاری و پشتیوانی لەبەرچاوی بۆ
سەرکەوتنی کۆنفرانسەکە، بەرپرسی ڕێکخراوەکە پێشڕەو ئیسماعیل ڕەخنەی
ئاراستەی پەرلەمانی ئەوروپا کرد کە لە کاتی سەردانیان بۆ هەرێمی
کوردستان تەنها گوێ لە لایەنی دەسەڵات دەگرن و پشت دەکەنە ڕێکخراوە
مەدەنیەکان، لە کاتێکدا ئەوان هەڵبژێردراو و نوێنەری خەڵکی ئەوروپان و
پیویستە لە پێشدا گوێبیستی خەڵکی کوردستان بن ئەوسا دەسەڵات و پارتە
سیاسیەکان.
شایانی باسە بیرۆی پەرلەمانتار ئانا گۆمێز داوەتنامەیان ئاراستەی
نوێنەرایەتی حکومەتی کوردستان لە برۆکسل کردبوو، بەڵام ئەو
نوێنەرایەتیە ئامادەی ئەو کۆنفرانسە نەبوون.
گرووپی
ژیان
رێکخراوی کوردستان فۆروم
|