١٣\٤\٢٠١٥
دەنگی
منداڵانی کۆبانێ و شەنگال.
مەنسوور جیهانی
سینەماکاری
کورد "بەھمەن قوبادی" ئێستاکە لەسەر پڕۆژەی فیلمی بڵندیی سینەمایی
"دەنگی منداڵانی کۆبانێ و شەنگال" کار دەکات.
دەرھێنەری ناوداری کورد "بەھمەن قوبادی" ئێستاکە لەسەر پڕۆژەی فیلمێکی
بڵندیی سینەمایی بە ناوی "دەنگی منداڵانی کۆبانێ و شەنگال" کار دەکات
کە باسی بەسەرھات و ئەزموونەکانی ژیانی ڕۆژانەی منداڵانی کۆبانێ و
شەنگال دەکات کە بە ھۆی شەڕ لەگەڵ گرووپی تیرۆریستی داعش لە
ئۆردووگاکان ژیان بەسەر دەبەن و باسی پەیھاتە و بوونی ئەوان لەم
شوێنانە دەکات.
لەم پڕۆژەیەدا، شەش فیلمساز سەردانی ھەرێمی کوردستان و تورکیا دەکەن و
لە تەنیشت ئەو منداڵانەدا دەمێننەوە کە بەھۆی شەڕ لە ئۆردووگاکاندا
ژیان بەسەردەبەن و بوونەتە ئاوارەی جەنگ، ئەو دەرھێنەرانە لە ماوەی دوو
مانگدا لە کەمپەکانی ئاوارەکاندا بنەما و رێسا سەرەتاییەکانی سینەما و
وێنەگرتن فێری ئەو منداڵانە دەکەن کە تووشی شەڕبوون و لە لایەن ئەو
ستافەوە لە تیمە ٦ تا ٨ کەسیدا رێکخراون، تا بتوانن بیرەوەریی، رەنج و
ھیواکانی خۆیان لە چوارچێوەی کورتە فیلمدا وێنە بگرن. ئەو منداڵانە لە
ھەر تیمێکدا، بۆخۆیان دەرھێنان و وێنەگرتن بۆ یەک یا دوو فیلم
ئەنجامدەدەن و ھەروەھا بە ھاوکاریی ئەندامانی دیکەی ئەم تیمە وەکوو
ستاف، فیلم ساز دەکەن.
"بەھمەن قوبادی" سەبارەت بە ئامانجی لە رێکخستنی پڕۆژەی فیلمی بڵندیی
سینەمایی "دەنگی منداڵانی کۆبانی و شەنگال" گوتی: لەڕاستیدا ئامانجی
سەرەتایی و سەرەکیی لە رێکخستنی ئەم پڕۆژەیە فێرکردنی منداڵان و
مێرمنداڵانێک بووە کە لەم ناوچانەدا لە ژێر فشاری راستەوخۆی شەڕ لەگەڵ
داعشدا بوونە و ئەوەی کە بەسەریاندا ھاتووە لە رێگای کامێڕای دەزگا
راگەیاندنە جۆراوجۆرەکانی دنیاوە وێنەگیراوە، بەڵام ھیچ کاتێک لە
روانینی خۆیانەوە سەیری ئەم رووداوانە نەکراوە و زۆربەی توێیە
شاراوەکانی ئەم کارەساتە لە تەپوومژێکی لێڵدا شاردراوەتەوە و مەبەست
لەم فیلمە، نیشاندانی ئەم نەبیندراوانەیە لە گۆشە نیگای ئەم
منداڵانەوە.
ئەوەیشی خستەڕوو: ھەر چەندە ئەم فێرکاریانە ئاساییە و لە ئاستی وەرگرتن
و باروودۆخی ئەم منداڵانەدایە بەڵام مەبەست لەوانە، زیاتر لەو
لایەنەوەیە تاکوو ئەم منداڵانە بتوانن ئەم کارەساتە لە روانینی
خۆیانەوە بگێڕنەوە و لە لایەکی دیکەشەوە، ئەمجارە بتوانن خۆیان
گێڕانەوەیەکی راستەوخۆ بن و بۆ ئەم مەبەستەش بە ھەر تیمێک لەم منداڵانە
دوو کامێڕا و پێداویستیی ئاسایی سینەمایان پێدەدرێت تا چەخماخەیەک بێت
بۆ کارەکانی داھاتوویان و بتوانن لە دەلاقەی کامێڕاکانیانەوە بانگھێشتی
دنیا بکەن تاکوو ئەزموون و رووداوەکانی دەورووبەریان ببینن.
ئەم سینەماکارە بەئەزموونە کوردە راشیگەیاند: ئەم کورتە فیلمانە لە
تەنیشت یەکتریدا یەکدەگرن و بە شێوەی فیلمێکی بڵندی سینەمایی بۆ
بەشداری لە فیستیڤاڵە نێودەوڵەتییەکانی فیلم و ھەروەھا نمایش لە زانکۆ
و ناوەندە زانستییە جۆراوجۆرەکانی جیھان ئامادەدەکرێت.
"بەھمەن قوبادی" پلانداڕێژی سیناریۆ و بەرھەمھێنەری پڕۆژەی فیلمی
بڵندیی سینەمایی "دەنگی منداڵانی کۆبانی و شەنگال"ـە و ھەروەھا
بەرپرسی پلانی ئەم بەرھەمە لە ئەستۆی "شاھۆ نیعمەتی"یە و بەرھەمھێنەری
ئەم پڕۆژەیە کە ئێستا لە دوایین قۆناغەکانی ئامادەسازیی خۆیدایە لە
ئەستۆی کۆمپانیای سینەمایی "مژ فیلم"ـە.
تریلێری فیلمی بڵندیی سینەمایی "دەنگی منداڵانی
کۆبانێ و شەنگال":
لێرە کرتە
بکە:
ماڵپهڕی مهنسوور جیهانی
|