ده‌رباز یونس :                                                  

من ڕاستگۆم له‌گه‌ڵ هۆنراوه‌ و ئه‌و که‌سانه‌ی هۆنراوه‌کانم ده‌خونێننه‌وه‌.

دیمانه‌: محه‌مه‌د کارێزی

ده‌رباز یونس  لاوێکی ته‌مه‌ن 18 ساڵی  شاری هه‌ولێره‌ ،

له‌ ئێستادا له‌ دونیای ئه‌ده‌ب و هونه‌ری هۆنراوه‌دا به‌ یه‌کێ

له‌و هۆنراوه‌ نووسانه ‌ داده‌نرێت که‌  به‌ په‌نجه‌کانی ده‌ست

ده‌ژمێردرێن ، له‌ چوارچێوه‌ی هۆنراوه‌دا دونیایه‌کی ڕۆمانسی

جوانی بۆ خۆی و ده‌ورو پشتی خۆی دروست کردوه‌ ،

زۆربه‌ی ئه‌وکه‌سانه‌ی که‌هۆنراوه‌کانیان به‌رده‌ست ده‌که‌وێت و

ده‌یانخوێننه‌وه‌  ده‌رباز  به‌ تروسکه‌ و پڕشنگی  شاعیرێکی

گه‌وره‌ی جیهانی له‌ داهاتوو دا  له‌ قه‌له‌م ده‌ده‌ن ، ئێمه‌ش

پێمان خۆش بوو بۆ چه‌ند ساتێک ده‌رباز یونس بدوێنین و

له‌ سه‌ر زاری خۆیه‌وه‌ بیهێنیه‌ گۆ .

محه‌مه‌د کارێزی : وه‌ک هۆنراوه‌ نووس نا ، با به‌ شێوه‌یه‌کی ئاسایی ده‌رباز بناسین .
ده‌رباز یونس : من ناوم ( ده‌رباز یونس حسین ) ـه‌ و له‌ 23/6/1990 له‌ شاری هه‌ولێر له‌ دایک بووم ، ئێستا له‌ قۆناغی شه‌شه‌می ئاماده‌یی له‌ شاری هه‌ولێر ده‌خوێنم .

محه‌مه‌د کارێزی : با بێینه‌ ناو دونیای هونه‌ر و هۆنراوه‌ ، با بزاینین چه‌ند به‌رهه‌می هۆنراوه‌ییت هه‌یه ، له‌ که‌یه‌وه‌ هۆنراوه‌ ده‌نووسی ؟
ده‌رباز یونس : وه‌ک به‌رهه‌می بڵاو کراوه‌ ، دوو کتێبم هه‌یه‌ له‌ ژێر ناوه‌کانی ( دڵێکی دوور ) که‌ له‌سه‌ر ئه‌رکی خۆم له‌ چاپخانه‌ی مناره‌ له‌ هه‌ولێر به‌ چاپم گه‌یاند و له‌ ساڵی 2007 بڵاوم کرده‌وه‌ ، وه‌ کتێبی دووه‌م به‌ ناوی ( خه‌می غوربه‌تیشت ئه‌خۆم ) که‌ به‌ هاوکاری سه‌نته‌ری ڕۆشنبیری به‌هره‌ و ئه‌رکی خۆم به‌ چاپم گه‌یاندووه‌ و له‌ سکرتاریه‌تی یه‌کێتی قوتابیانی کوردستان په‌یمانیان پێداوم که‌ %25 خه‌رجیه‌کانم بده‌نه‌وه‌ به‌ڵام تا ئێستا وه‌رم نه‌گرتووه‌ له‌م ساڵ واته‌ 2008 له‌ ڕۆژی 8.6 له‌ هه‌ولێر بڵاو کرایه‌وه‌ و کۆمه‌ڵێکیشم بۆ شاری سلێمانی ناردووه‌م له‌م چه‌ند ڕۆژه‌دا له‌ سلێمانیش بڵاو ده‌کرێته‌وه‌ ، یه‌که‌م هۆنراوه‌ی خۆم له‌ ساڵی 2005 له‌ 21/3 یه‌که‌م ڕۆژی نه‌ورۆز خوێنده‌وه‌ .

محه‌مه‌د کارێزی : ( خه‌می غوربه‌تیشت ئه‌خۆم ) وه‌ک ئه‌وه‌ی ئێمه‌ بیزانین ده‌نگۆیه‌کی باشی هه‌یه‌ ، به‌راوردی له‌گه‌ڵ کتێبی یه‌که‌مت واته‌ ( دڵێکی دوور ) چۆن ده‌که‌یت ؟
ده‌رباز یونس : من هه‌موو کاتێک که‌ هۆنراوه‌یه‌کم نووسیوه‌ له‌گه‌ڵ هۆنراوه‌که‌و له‌گه‌ڵ خوێنه‌رانیشم زۆر ڕاستگۆ بووم ، هه‌ر چه‌ند هۆنراوه‌کانی کتێبی دووه‌مم له‌ هی یه‌که‌مم باشتر بوون ، به‌ڵام من شانازی پێوه‌ ده‌که‌م که‌ یه‌که‌م به‌رهه‌م بوو منی هێنا ناساندنه‌وه‌ .

محه‌مه‌د کارێزی : ده‌رباز یونس هیچ هۆنراوه‌یه‌کی له‌سه‌ر زاری گۆرانی بێژان ووتراوه‌ ؟
ده‌رباز یونس : به‌ڵێ ، له‌ ڕۆژی 1/6/2007 له‌ ڤیستیڤاڵی ڕۆژی جیهانی مناڵان له‌ شاری هه‌ولێر هۆنراوه‌یه‌کم کرا به‌ گۆرانی و هه‌روه‌ها چه‌ند هۆنراوه‌یه‌کی کتێبی یه‌که‌مم له‌ لایه‌ن گروپێکی موزیکی هه‌ولێر به‌ ناوی ( په‌نجه‌ی زێرین ) کراوه‌ته‌ گۆرانی ، له‌ داهاتووش خۆشحاڵم که‌ ووشه‌کانم له‌سه‌ر زاری چه‌ند هونه‌رمه‌ندێکی ده‌نگ خۆش ده‌وترێت به‌ڵام پێم خۆش نیه‌ لێره‌ ناویان بێنم .

محه‌مه‌د کارێزی : چی وای لێکردووی هۆنراوه‌ بنووسیت ؟ یا بڵێین هۆنراوه‌ بۆ کێ ده‌نووسیت ؟
ده‌رباز یونس : هه‌ست کردن به‌ ڕابردووی پڕ غه‌دری نیشتمانم ، غه‌رق بوونی ئێستای نیشتمان له‌ سته‌م و نا یه‌کسانی ، خه‌مه‌ ڕه‌نگاو ڕه‌نگه‌کانی دایکم ، خۆشه‌ویستی ئه‌و زاته‌ پیرۆزه‌ی که‌ بۆ چرکه‌یه‌کیش ناتوانم فه‌رامۆشی بکه‌م ، کاتێک بۆ نیشمان هۆنراوه‌یه‌ک ده‌نووسم ، ته‌واو هه‌ست به‌ ئازاره‌کانی ده‌که‌م ، ته‌واو له‌ ناخی دایکم و ڕابردوو و ئێستاشی ده‌گه‌م ته‌واو بیری باوه‌شه‌ گه‌رم و پڕ سۆزه‌که‌ی ده‌که‌م ، ئه‌و کاته‌ هۆنراوه‌یه‌ک بۆ خه‌م و بۆ دووری باوه‌شی پیرۆزی ده‌نووسم ، ته‌واو ده‌چمه‌ ناخی ئه‌شقی پیرۆزی ئه‌و ئه‌و ساکه‌ هۆنراوه‌یه‌کی بۆ ده‌نووسم ، وه‌ک له‌ پێشتریش ووتم من ڕاستگۆم له‌گه‌ڵ هۆنراوه‌ و ئه‌و که‌سانه‌ی هۆنراوه‌کانم ده‌خونێننه‌وه‌ .

محه‌مه‌د کارێزی : هۆنراوه‌ له‌گه‌ڵ ده‌رباز چ په‌یوه‌ندیه‌کی دروست کردووه‌ ؟
ده‌رباز یونس : په‌یوه‌ندیه‌کی ڕۆحانی ، هه‌موو هۆنراوه‌کان له‌ ناخ و هه‌ستی رۆح و دڵمه‌وه‌ ده‌ر ده‌چن !

محه‌مه‌د کارێزی : ده‌رباز چۆن ده‌ڕوانێته‌ دونیای هۆنراوه‌ و هۆنراوه‌ نووسان ؟
ده‌رباز یونس : ڕێزم بۆ هه‌موو هۆنراوه‌ نووسان ، دیاره‌ هۆنراوه‌ نووسی زۆر به‌ هێز و به‌ پێزمان هه‌یه‌ ، من ناتوانم بڕیار له‌سه‌ر هیچ هۆنراوه‌ نووسێک بده‌م ، جگه‌ له‌ خۆشه‌ویستیم بۆ هه‌موویان .

محه‌مه‌د کارێزی : کامه‌ هۆنراوه‌ نووس زۆرترین کاریگه‌ری له‌سه‌رت هه‌یه‌ و کێ به‌ پێشڕه‌وی نووسینی هۆنراوه‌ی ئێستا و ڕابردوو داده‌نێیت ؟؟
ده‌رباز یونس : عبدالله‌ په‌شێو ، بێگومانم له‌وه‌ی که‌ عبدالله‌ په‌شێو پێشڕه‌وی هۆنراوه‌ی کوردیه‌ له‌ ئێستادا له‌ کۆی هه‌موو ئه‌و هۆنراوه‌ نووسانه‌ی من هۆنراوه‌کانیانم خوێندۆته‌وه‌ ، له‌ ڕابردووش خوێنده‌وه‌م بۆ هۆنراوه‌ نووسه‌ کۆنه‌کان نیه‌ ، به‌ نیازم له‌ داهاتوودا زانیاری به‌ هۆی خوێندنه‌وه‌ی هۆنراوه‌ی کۆن به‌ ده‌ست بێنم بۆ زیاتر ده‌وڵه‌مه‌ند کردنی ووشه‌کانم .

محه‌مه‌د کارێزی : کۆبونه‌وه‌ت یا نزیکیت له‌گه‌ڵ هۆنراوه‌ نووسان دا هه‌یه‌ ؟
ده‌رباز یونس : نزیکیم له‌گه‌ڵ هۆنراوه‌ نووس ( کازم کۆیی ) هه‌یه‌ و یارمه‌تی دام له‌ چاپکردنی کتێبی یه‌که‌مم له‌ هه‌ڵبژاردنی هۆنراوه‌ گونجاوه‌کان بۆ بڵاو کردنه‌وه‌ ، وه‌ هه‌روه‌ها وه‌ک ئه‌ندام په‌یوه‌ندیم به‌ چراکانی تاراوگه‌ هه‌یه‌ که‌ گروپێکه‌ چه‌ند هۆرنراوه‌ نووسێکی گه‌نجی کۆکردۆته‌وه‌ له‌ 18.6.2008 به‌ڵام تا ئێستا زۆر نه‌چوومه‌ته‌ ژووره‌وه‌ .

محه‌مه‌د کارێزی : ئێمه‌ له‌ کۆتاییدا زۆر سوپاسی به‌ڕێزتان ده‌که‌ین و هیوای سه‌رکه‌وتنت بۆ ده‌خوازین ، دوا ووته‌ت بۆ ئێمه‌ و بۆ ئه‌وانه‌ی که‌ ئه‌م بابه‌ته‌ ده‌خوێننه‌وه‌ و خوێنه‌ری هۆنراوه‌کانتن .
ده‌رباز یونس : منیش له‌ کۆتایی سوپاس و خۆشه‌ویوستم بۆ ئێوه‌ هه‌یه‌و مه‌منونتام که‌ کاتتان به‌ من به‌خشی ، وه‌ خۆشه‌ویستیشم بۆ هه‌موو ئه‌و که‌سانه‌ی که‌ خوێنه‌ری هۆنراوه‌کانمن و توانیومه‌ به‌ هۆی نووسینه‌کانم هه‌ستم پێ بکه‌ن .

24/6/2008
هه‌ولێر