|
١١\١٠\٢٠٢٠
دەرکەوتنی
"بەیان" لە وەرزی خەزانی
رۆژنامەگەریی کوردیدا.
هۆمەر
 لە
قۆناخێکی ھەرە ناسک و ھەستیاری مێژوودا کە ڕۆژنامەگەریی کوردی لە
ڕۆژھەڵات لە حاڵی گیان کەنشتدایە و تەنێ نووزەیەکی لێوە بەرگوێ دەکەوێت
و بەشی فرەی بە ڕەشکردنەوەی ڕووپەلی پاکژەوە مژولە یان نایەوێت یانژی
ناوێرێت خۆ لە قەرەی پرسە چارەنووسساز و ھەستیارەکانی کۆمەڵگە بدات و
کەمتر بڵاڤۆکێکت پێ شک دێت خودانی دەستەیەکی نووسەرانی کارامە و لێزان
و پیشەیی و پڕۆفشناڵی بواری ڕۆژنامەگەری بێت،لێ دەرچوونی ژمارەیەک
ڕۆژنامە و گۆڤار لێرە و لەوێ،ھەندێک تەمەکە دەڕەوێنێتەوە و تۆوی ھیوا
لە دڵاندا دەچێنێت.
گۆڤاری "بەیان"،یەک لەو گۆڤارانە دێتە ئەژمار کە خۆی بە گۆڤارێکی
فەرھەنگی،کۆمەڵایەتی ناودێر دەکات کە بە دوو زمانی کوردی-فارسی ھەر دوو
مانگ،جارێک چاپ و بڵاو دەبێتەوە. ئەم گۆڤارە،بە ھەمان ڕێچکە و
ڕێبازەکەی "سروە"ی ئازیز و یادگاردا دەچێت و دەستەی نووسەرانی دەیەوێت
بە ھەمان بین و ھەناسەوە لە پێناو درێژەدان بە خەباتی ڕۆژنامەگەریی
کوردی کار بکات و خزمەت و ڕاژەی چاند و کولتووری کوردی بکات.
خودان ئیمتیاز و بەرپرسی گۆڤارەکە،دوکتۆر"ئیسماعیل
مستەفازادە"،زانستوەرێکی گەلپەروەرە کە بە ھاریکاریی وھەوڵ و خەبات و
خەمخۆریی کۆمەڵە مرۆیەکی نیشتمانپەروەر،گۆڤارەکە چاپ و بڵاو دەکاتەوە و
لە باری ماددییشەوە ئەوە تەنیا مرۆ دڵسۆزە گەلپەروەرەکانن کە پاڵپشتی
دەکەن و لە ھیچ ئالی و لایەنێکی فەرمییەوە یارمەتی دراوی وەرناگرێت.
بەیان،گۆڤارێکی سەربەخۆ و بێلایەنە و ئێستا پێی ناوەتە ساڵی سێیەمی
تەمەنەوە و ھەتا ھەنووکەیش، ١٢ژمارەی لێ چاپ و بڵاو بۆتەوە. ژمارەی
یەکەمی ئەم گۆڤارە،مانگی گەڵاڕێزانی ساڵی ١٣٩٧ی ھەتاوی(٢٠١٨) بڵاو
بۆتەوە.
گۆڤارەکە،لە چاو ئەزموونی دوور و درێژی ڕۆژنامەگەریی کوردی،ھێشتا لە
قۆناخی دەستپێکدایە و بە گۆڤارێکی تازە و ساوا دادەنرێت و پێویستی بە
پێنووس و خامەی بەپێزی گشت ڕووناکبیرێکی پەرۆشی چاند و فەرھەنگی کوردی
ھەیە.
بەیان،ھەوڵ دەدات بە بێ جیاوازی،خزمەتی گشت زاراوە سەرەکییەکانی زمانی
کوردی بکات و ئەمەیشی لە ماوەی سێ ساڵ کارکردنەدا سەلماندووە. بەڵام
پێویستە ئەم پرسە بەوپەڕی وشیارییەوە جێبەجێ بکرێت و ئەرکەکە بخرێتە
ئەستۆی کەسانی شارەزا و پسپۆڕ و وەک دەرفەتێک سەیر بکرێت نەک چێکردنی
کەند و لەند و تێکدان و شێواندنی زمانی پاکژ و زەنگین و دەوڵەمەندی
کوردی.
نوێترین ژمارەی بەیان،ژمارە ١٢،مانگی خەرمانانی ١٣٩٩ی
ھەتاوی(سێپتەمبەری ٢٠٢٠)چاپ و بڵاو بۆتەە. ئەم ژمارەیەی بەیان،ئاوڕ لە
مۆسیقای کوردی لە ھەر ھەموو پار و بەشەکانی کوردستان دەداتەوە و کۆمەڵە
بابەتێکی دەوڵەمەند و ڕەنگاڵەیی لە خۆ دەگرێت.شیاوی ئاماژەپێدانە کە
بەیان لە شاری مەھاباد دەردەچێت و لە ھەر ھەموو ستان و پارێزگە
کوردنشینەکانیشدا بڵاو دەبێتەوە.
بەیان،یەک لەو دەگمەن بڵاڤۆک و گۆڤارە کوردییانەیە کە جیھانی زارۆکانی
لە بیر نەکردووە و ھەر جارە و پاشکۆیەک بە ناوی"گڕ و گاڵی نوێ"بۆ
منداڵان بڵاو دەکاتەوە و تا ئێستا ١٢ پاشکۆی بۆ منداڵی کورد بڵاو
کردۆتەوە. پەروەردەکردنی منداڵی کورد لەسەر دوو بنەمای ھەرە گرینگی
زمان و چاندی کوردی،یەک لە مەبەستە سەرەکییەکانی دەرکردنی ئەم پاشکۆیە
دێتە ئەژمار.
بەیان،ئەگەر دەیەوێت ژمارە لە دوای ژمارە زێتر پێش بکەوێت،پێویستە لە
بن چاودێری دەستەیەکی نووسەرانی کارامە و خودان ئەزموونی بواری
ڕۆژنامەگەرییدا دەربچێت و ھەرگیز خۆی پاتە نەکاتەوە و بەردەوام کاژ فڕێ
بدات. ژیرانە دەست بۆ پرسە ھەستیارەکان ببات و دەوری چرایەکی گەش بۆ
سبەی ببینێت؛ئەگینا ئەمیش زۆر زوو گیرۆدەی پەتا گشتییەکە دەبێت و پاش
ماوەیەکیش،تەنیا ناوێکی ڕووکەشی لێوە دەمێنێتەوە.
جێی خۆیەتی ھەر لێرەوە دەستخۆشی لە سەرپاک ستاف و دەستەی نووسەرانی
بەیان بکەم و دادێیەکی درەوشاوەیان بۆ بە ئاوات بخوازم.
لە ژمارە ١٢ی بەیاندا بابەتێکی توێژینەوەیی نووسەری ئەم دێڕانە لەسەر
ھونەرمەند ئیسماعیل سابوور لە بن سەردێڕی"سروەی دەنگێک و غوربەتی
ناخێک"بخوێننەوە.
h_noryawi@yahoo.com
|
