١٤\١١\٢٠١٠

ناساندنی پەرتووک:

دەرزیئاژن.

ھەڵۆ بەرزنجەیی

دەزگای چاپەمەنی رۆژھەڵات ـ ھەولێر کوردستان
٢٠٠ لاپەڕە ساڵی ٢٠٠٩

ئێمەی کورد... لە پانتایی رۆژھەڵاتدا ھەر بوونێکی جوگرافیمان بەتەنیا نییە، رۆژھەڵات مێژوو و کۆمەڵایەتی و فەرھەنگ و سیاسەتی ئێمە پێکدێنێت . ئەم خەسڵەتانەش ناسنامەی تایبەتمەندێتی رۆژھەڵاتی ئێمە بەرجەستە دەکەن. ھەر بۆیە رۆژھەڵات گەر ھەڵکەوتێکی ناچاریش بێت ، وا بەسانایی ناتوانین بیسڕینەوە . ئێمە دەبێت شوێنگەی ناسنامەی خۆمانی تێدا بدۆزینەوە و ھەوڵی چەسپاندن و قایمکردنی بدەین.

راستە... لە رۆژھەڵات ھێشتا نەخشەی سیاسی و تابلۆی فەرھەنگی و ناسنامەی ئێمە وونە و نکۆڵی لێدەکرێت. رێگەی ئێمەی نادەن گوزارشت لە خودی خۆمان بکەین و رووبەرووی ھەڕەشەی جۆراوجۆری نامرۆڤانە دەبینەوە.

ئێمەی کورد لەگەڵ ئەو ھەموو خزمەتەی کردوومانە بە ناوچەکە و شارستانێتەکەی ، کەچی ئەوان!! لە پەراوێزیشدا جێگایەکمان بۆ تەرخان ناکەن . جاران دەوڵەتانی سەفەوی و عوسمانی و لە ھەنووکەشدا دەسەڵاتدارانی ناوەندی دەوڵەتە داگیرکەرەکانی کوردستان تورکیا،ئێران، عێراق و سوریا بەرۆگری خێروبێری ناوچەکەن و رۆڵی سەلاحەدین و دەیان زانای وەک ئین خەلەکان و چەندین سیاسەتمەداری دیار و نووسەری وەک عەققاد و محەمەدی قازی و جۆرەھا ھونەرمەند و گۆرانی بێژ و کەسایەتی دیکەی ھەڵکەوتووی شارستانێتی ئێران و ئیسلامی کە کورد رۆڵی بەرچاویان لە بەرھەمھێنانیدا ھەبووە باس لێوە ناکرێت .

سەبارەت بەم بارودۆخە لە روانگەی منەوە ماکی سەرلەبەری ئەم ھەموو کارەساتانە نەبوونی دەسەڵاتێکی سەربەخۆ و دەوڵەتێکی کوردییە، کە بتوانێت ناسنامەی کوردبوونی ئەو مێژووە بپارێزێت و داکۆکی لێبکات و بیکاتە جێی شانازی خۆی و کوردیش بە گەورەیی ئامادەگی خۆی لەو بەرھەمھێنانەدا نیشان بدات و بسەلمێنێت.

ئا لەم سۆنگەیەوەیە گەلێ جاران داکۆکی لە بەھاکانی رۆژھەڵات و کولتووری ئیسلامی بە سوودی ئەم دەسەڵاتە بێگانانە دەشکێتەوە و دەرئەنجام مرۆ لەناخەوەڕا تووشی دڵشکاوی و بێزاری و رەشبینی دەکات.!! جا بۆیەکا کورد ووتەنی : گەر گای کورد لەو گاڕانەدا نەبێ ، ئیدی دنیا بە کورد چی!!. ئێمە ھەرچیمان کردووە دەق وەک ئەوە وایە کە دەوترێت خۆت بۆ بۆرە پیاو بەکوشت بدە ، دەڵێ بەدەردی خودا مرد.

ئیدی بۆ دەبێت ھەر کورد سوورەی بەر لەشکر و کوچکی لە ئاگر گەرمتر بێت.؟؟ تا کەی خۆبەختکردن لە پێناوی شتەھایەکدا کە بەر و خێری بۆ نەتەوەکەم تێدا نەبێت؟؟؟ رستەیەک لەم پرسیارانە یەخە بە بیرکردنەوەی مرۆ دەگرێت و رەشمەی خەیاڵی لەدەست وەردەگرێت. بە تایبەت کە لە ئەمڕۆدا ھێزە سیاسییە ئیسلامییەکان سەختر لە سێکۆلارەکان بە گژ ھەر مانایەکی کوردبووندا دێنەوە.

دیوێکی دیکەی ھاوکێشەی بوونی کورد بریتییە لەوەی ، رۆژئاوا ھەر ئەو پانتاییە نییە کە جێی ئێمەی تێدا نییە و مانای خۆمانی تێدا رەنگ ناداتەوە و مێژوو و فەرھەنگ و سیاسەتی ریشاڵێکی بە ئێمەوە گرێ نەدراوە و نامانخوێنێتەوە ، بەڵکو ناوەندێکە بڕیاری دابەشکردن و بەخشینەوەی وڵاتی ئێمەی لێوە ھەڵقوڵاوە و ھێزێکە بەردەوام ئامادەگی ھەیە لە پشت ئەو ھەموو ماڵوێرانییەی بەسەر نەتەوەکەماندا بە درێژایی مێژوو ھاتووە و تا ئێستاش کە دێت.

بەشێک لە وڵاتانی رۆژئاوا بە ئاشکرا دۆستایەتی و ھاوکاریی داگیرکەرانی کوردستان دەکەن و بوونەتە سەرچاوەیەک سەرەکی گرنگ بۆ سووربوونی داگیرکەرانی کوردستان لەسەر کوشتنی کورد و سوتماککردنی کوردستان. تەلەفزیۆنیکی وەک رۆژتیڤی لە تورکیا و ئەڵمانیادا قەدەغەیە. ئەندام و دۆست و لایەنگرانی پ ک ک لەسەر داوای دەستگای میت و حکومەتی تورکی دەستگیر دەکرێن و دادگایی دەکرێن. وڵاتی نەمسا بکوژانی قاسملۆی وەک دیاری داوە بە ئێران و بە ھەموویان دۆستی سەدام بوون و چەکی کیمیاوی و گازی ژاراویان دایە .

ئەم ناوەندە لە کاتێکدا کەمتر لە رۆژھەڵات خاوەنی شارستانێتییە ، بایی گەردیلەیەک ھەستی مرۆیی و ویژدانی ھانیان نادات بەدەنگ ھانای کورد و گەلێ لە بندەستان و چەوساوانی دیکەی دنیاوە بێن.

ئەجیندای بیر و کاری ئەمانە لەسەر بنەمای بەرژەوەندی خۆیان دارێژراوە و بەربەرییانە لەژێر پەردەی ئاڵوواڵادا پیادەی دەکەن. ئیدی چی و کێ و کوێ دەبێتە قوربانی و پێخوستی گەیشتن بە مەرامەکانیان باکیان لێی نییە. رۆژئاوا چاوچنۆکانە سەیری نەخشەی دنیا دەکات و لە ھەر کونوقوژبنێ دەرک بە بەرژەوەندی و پێویستییەکی خۆیان بکەن ، بێشەرمانە ھەرچی رێگای ناشەرعی ھەیە دەیگرنە بەر و ھەڵپەی بۆ دەکەن و دەیدزن و دەیڕووتێننەوە و داگیری دەکەن.

رۆژئاوا بە شێوازی جۆراوجۆر بێ پسان لە دژایەتی فەرھەنگ و ئایین و شارستانێتی و بەھا کۆمەڵایەتییەکانی دیکەی رۆژھەڵات و گێتیدایە و ئەمەش بەپێی ئەو دروشمە بەڕێوە دەبەن کە دوژمنییان ھەیە و مەترسییان لەسەرە.

خوێندنەوەی بە دیقەتی ھەر دوو بەرەی ئەم ھاوکێشەیە و دەستنیشانکردنی بەرژەوەندیی نەتەوەیی لە میانەی ئەم دوو بەرداشەدا، پێویستی بە ئاوەزێکی ژیرانە و دەستاوێژێکی جددی و ھەڵبژاردنی سەلامەترین و باشرین میتۆدی بیر و کار ھەیە.

ئەم باسوخواستەی ئێمە قسەی لەسەرد دەکەین ، خۆشبەختانە لە بەرھەمە نوێکەی شاعیر و روناکبیری گەلەکەمان کاک فەرھاد شاکەلی بەناوی " دەرزیئاژن " بەرچاو دەکەوێت.. بەرھەمەکەی شاکەلی بە کۆمەڵێ وتاری جۆراوجۆر زۆر بە چڕی و بە زمانێکی پلە بەرزی زانستییانە و بە میتۆدێکی ئەکادیمی ھاوچەرخ بەدەوری چەقی ئەم پرسە گرنگانەدا خول دەخۆن.

نووسەر... وەک خاوەن دیدێکی دەرەوەی بازنەی کلاسیکی رۆشنبیران ، لە پرس و بابەتگەلەکانی جیھانی کوردەواری و گەردوونی دەڕوانێ . ئەوەشی پتر لە پێویست ئیستێکمان لەسەرەڕێی بیروباوەڕەکانی شاکەلیدا لا دروست دەکات ، بایەخی ھزری بۆچوونەکانی و راشکاوی گوزارە لێکردنی ئەو بابەتە ھەستیارانەیە.

ھەڵبەت خۆ بەستنەوەی نووسەر بە تێز و روانگەی ئیدوار سەعیدەوە ، دەشێ رەنگێکی دژە رۆژاوا بەکارەکانی ببەخشێ ، وەلێ بە ئاگایی تەواوەوە کار لەسەر پرسە گرنگانە دەکات.

لەم قەیرانەی ئێستای رۆشبیرانی کوردی تێکەوتووە، شاکەلی قسە لەسەر شێواندنی و تێکەڵاوکردنی چەمکی فکر و سیاسەت و رۆڵی نێگەتیڤانەی میدیای حیزبی و دەستگاکانی دیکەیان کە شوێنەواری ترسناک لەسەر پلەی ئازادی تاک و کۆمەڵ دادەنێن بە جددی دەکات. دیارە میدیای کوردی پشکی گەورەی بەرپرسێتییەکی مێژوویی بەرانبەر بەو ماڵوێرانی و گەڕەلاوژێیەی فەرھەنگ و زمان و رۆشنبیریی و ھزر و مەعریفەی تێدایە بەردەکەوێت . ئەمەش بەواتای ھەموو ئەو لەشکرە قەڵەم بەدەستە دێت کەوان لە پشت ئەم دەستگایانەوە. وەک دەبینین لە سێبەری ئەم دەستگا راگەیاندنانەدا چەندین بەناو رۆشنبیر و خاوەن قەڵەم خۆیان مەڵاس داوە و لەبەر دەستکەوتێکی کەسی و چڵکن قەڵەمەکانیان ھەرزانفرۆش کردووە و بێشەرمانە و نابەرپرسانە ئامادەی داکۆکیکردنن لە دیاردەی ناشرین و ھەق بە ناھەقکردن .

مامۆستا شاکەلی... پێیوایە کە پەیدابوونی ئاخاوتنێکی رووناکبیرانەی سەربەخۆ یەکێکە لە مەرجە ھەرە بنەڕەتییەکانی دەرچوونی کۆمەڵگە لەو دەیان و سەدان قەیرانە سیاسی و دیپلۆماسی و ئابووری و فەرھەنگی و کۆمەڵایەتییانەی بەدەستیانەوە داماوین .

ئێمە ھەموو لە کاریگەرێتی نەرێتی رۆڵی حیزب لەم سیاقەدا بە ئاگاین و رۆژانە بە بەرچاومانەوە دەیان و سەدان ناھەقی و ناراستی و ئەتککاری لەسەردەستی ئەمانەدا دەبینین و دەبیستین.

باشترین دەرفەت بۆ قوتارکردنی دەنگ و رەنگی ئەم دەسەڵاتە میدیاییە لەم مۆتەکەیە ، تاوەکو جڵەوی کارەکانی بکەوێتەوە سەر سکەی ئاسایی خۆی و بتوانێ رۆڵی سروشتی بگێڕێت ، بەخشینی ئازادییە پێی و کردنەوەی دەرگا و پەنجەرەی ئازادییە بە روویدا.

لای شاکەلی شاراوە نییە کە کاریگەرێتی رۆژاوا بە ئەندازەیەکە ، کە دەتوانێ یان دەیەوێت خۆی بکاتە داینەمۆی ھەڵسوڕانی دنیا و جێ پەنجەشی بە سەرجەم بڕیار و رووداوەکانە دیار بێت. ئەمەیە وای لە نووسەر دەکات بە دڵتەنگی و گومانەوە بنووسێ:

<< ئەمڕۆ رۆژاوا نەک تەنیا بڕیاری ئەوە دەدات کە دەبێ مرۆڤایەتی چی بکات و چۆن بکات ، بەڵکە دەیەوێ بڕیاری ئەوەیش بدات کە مرۆڤایەتی چۆن بیر بکاتەوە>>. دیارە کاتێ تەنیا ناوەندێکی وەک رۆژاوا ھەموو چارەنووسی مرۆڤایەتی بەدەستەوە بێت ، ھەموو دەزانین بە چ رێگایەکدا دەمان بەن بەرەو کامە ھەڵدێری ھەزار بەھەزار. لە لایەکی دیکەشەوە ئەم ناوەندە چۆن خۆی دەکاتە کەڵەگا بەسەر دنیاوە و بە کامە شێوە زەوتی ئازادی مرۆیی دەکات و چ ئامانجێکی گڵاو ھا لە ئەجندای بیر و کاریاندا.

مامۆستا شاکەلی بۆ ئەوەی بەسەر بەرەیەکدا ساغ نەبێتەوە و بەردەوام بێت لە دەمەتەقێی لەسەر ئەم دیاردانە ، بە روونی ئەم بۆچوونە دەردەبڕێت و دەنووسێ :

<< نە دژایەتیکردنی ئەمەریکا و رۆژاوا و نە ھاودەردی لەگەڵ گەلانی ئیسلامی و رۆژھەڵاتدا ، نابێ بە مەعنای باوەڕی دینی یا خۆبەستنەوە بە بنەما و ئامۆژگارییەکانی ئیسلامەوە لێک بدرێنەوە. لە بەرەیەکدا کە بە شێوەیەکی زۆر روون بەرانبەر ئەمەریکا و رۆژاوا دروست بووە گەلانی رۆژھەڵاتی و ئیسلامی و ئەفریقایی و ئەمەریکای لاتینی ھێزی سەرەکین>>.

نووسەر بە ھۆشیارییەکی دیقەتدارەوە سەرنجمان بۆ خاڵێکی گەوھەری نووسینەکەی رادەکێشێت و لەگەڵ ئەو ھەموو داکۆکیە لە ئیسلام و رۆژھەڵات بێ پەردە دەنووسێت:

<< ئەمە ھەرگیز مەعنای ئەوە نییە کە ئێمە بێ دوودڵی ھەموو شتێکی ئیسلام و موسڵمانانمان قەبووڵ بێت و بەرگریی لێ بکەین>> .

شاکەلی دروست ھەستی بە ناجۆری و ناکۆکی زۆر لایەنی ئیسلام لەگەڵ سروستی ژیانی سەردەم و پلەی گەشەکردنی گۆڕانەکانی مرۆڤدا کردووە. لێرەدا بەتوندی دژی ئەوانە دەوەستێتەوە کە بۆ ھەموو شتێک بۆ رەگوڕیشەی و سەرەتاکانی ئیسلامی بەر لە ١٥٠٠ ساڵ دەگەڕێنەوە. ھەر لەم روانگەیەوە داوا لە بیریاران و رێبەرانی ئیسلام دەکات بە خۆیان و باوەڕەکانیاندا بچنەوە و بە جۆرێک ئیسلام پێشکەش بکەن کە بێتە چەترێک بۆ چەوساوە و بەشخوراو و بێدەسەڵاتانی دنیا... دیارە کورد لە پێشەنگی ھەموویانەوە دێت. بەکورتی و کرمانجی داوای ریفۆرمێکی رادیکالانەی سەرتاسەری دەکات بۆ دەرچوون و رزگاربوون لەو بارە چەقبەستووە وشکھەڵاتوو و ناجۆرەی ئیسلام و موسڵمانی تێدایە. لێدانی ئەم زەنگەش وەک گەلێ لە بیریاران و شرۆڤەکارەکان باسی لێوە دەکەن باشترین دەرمانی ئەو دەرد و ناتەواوییانە کە ئیسلام پێوەی گرفتارە. لەم میانەشدا ئاماژە بە دەستەیەک لە بیریاران و ریفۆرمخوازانی دنیای خودی ئیسلام دەکات . لەوانە(( محەمەد ئەرکوونی جەزائیری ، ئانماری شیممەلی ئەڵمانی و سەید حوسەین نەسری ئێرانی و حامید ئالگاری ئینگلیز)).

ئیمڕۆ ئیسلامی سیاسی زۆر کوێرانە و ھێشتا لەپشت چاویلکەی رەشەوە تەماشای جیھان و گەردوون دەکەن ، بۆیە ئەم داخوازی و بانگەوازانە بە کودەتا و کوفر و لادان دادەنێن و راستەوخۆ بە پلانی دوژمنانی ئیسلامییەوەی دەبەستنەوە. بەدرێژایی ئەو مێژووەی کە ئیسلام تێیدا راگەیەندراوە وردە ھەوڵی چاکسازی ھەبووە و لەلایەن بەرەی دەسەڵاتداری ئیسلامەوە بەربەرەکانی کراوە. مێژووی ئیسلامیش تژییە لەو نموونانە و خۆمان رۆژانە ئەو گرووپ و ھێزانە دەبینین چ ماڵوێرانییەکیان لە پاکستان و ئەفغانستان و ئێران و عێراق و لوبنان و تا دەگاتە کوردستانەکەی ئێمە بەرپاکردووە و خوڵقاندووە. رەفتارەکانی قاعید و سەربازانی ئیسلام و ئەنسار و ئیسلام و بەدەم سەڵاواتەوە سەربڕینی مرۆڤ و خۆتەقاندنەوە لەبەردەم باخچەی ساوایان و بەکارھێنانی گیانلەبەرو مێردمنداڵ و ژن بۆ کاری خۆتەقاندنەوە. سڵاوات لە دیاری ئەتاتورک و خومەینی سەدامئاساکان بەشێکی گەوھەری ستراتیژی ئیسلامی سیاسییە. یەک خەون بە سەڵتەنەتی عوسمانی و ئەوی دی بەشاھەنشایی ئێران و ھەر ھەمووش بە خەلافەتی عروبە و ئیسلامەوە دەبینن . ئەم دەستەوتاقمانە سەرگەرمی رەتکردنەوە و دژایەتیکردنی ھەر پێشکەوتن و داھێنانێکی باوەڕدانی رۆژاوایی یان جولەکە و مەزھەب و ئایینەکانی دیکەن. ئەمانە و زۆر شتی دیکە ھەمووی مشتێ لەو خەرمانی ھەڵە و گوناھو سەرلێشێواییەی موسڵمانان لە ھەلومەرجی ئێستای دنیادا دەردەخات و دەسەلمێنێت.

دەرئەنجام کۆمەڵێ نەخۆشی و دیاردەی ناشایستە بە ئیسلامەوە نووساوەکە تەنیا ریفۆرمێک کە ھەڵگری پەیامێکی لێبووردەیی و مرۆڤدۆستی و قەبوڵکەری ئایین و کەسانی دیکە بێت دەتوانێ بنەبڕیان بکات. بەڵام ئایا ئەوانەی نان و پیازی سیاسی و سەڵتەنەتی دەسەڵات بە ئیسلامەوە دەخۆن و ئیسلام بۆ خزمەتی تورکچێتی و فارسچێتی و عروبەچێتی بەکاردەبەن و لایان وایە لە گێتیدا ئاوەزێکی دیکە لەخۆیان بەولاوە نییە و ئیمڕۆ لەناو فەرھەنگی دواکەوتوویی دا نقووم بوون ، ئامادەی گۆڕان و ریفۆرم و پەسەندکردنی کەمکردنەوەی دەسەڵاتیان و کردنەوەی جێگایەک بۆ ئایین و رێبازی دیکە ھەن؟؟؟؟؟

بۆ شاکەلی ئایین و ئایدۆلۆژیا و بیر و رێبازێک گرنگە کە پایەی مرۆڤی تێدا بەرز و خزمەتی راستی و بەھا کۆمەڵایەتییە جوانەکان بکات. شەڕی گەورە و سەختیشی لێرەدا بەگژداچوونەوەی ھەموو ئەوانەیە کە بەناوی شتەھایەکی پیرۆزەوە خراپە و تاوان ئەنجام دەدەن. شاکەلی لە تەک درێژەدان بە باسەکانی کاتێ دێتە سەر کارەساتی ١١ی سێپتەمبەر دەیەوێ تەمومژێکی گوماناوی بەدەوری رووداوەکەدا دروست بکات و ئەمەریکا و ئیسرائیل بە بکەری رووداوەکە دابنێت.

من لێرەدا لە بەراییەوە باوەڕم بەوە ھەیە ئەم رووداوە خوێندنەوەی جیاوازی لەسەر ھەیە ، وەلێ من ناتوانم ھاوڕای نووسەر بم . خوێندنەوەی شاکەلی چەشنی ئەو بەرە بەرفراوان و بەدگومانانەی ئیمڕۆی جیھانی عەرەب و موسڵمانان دێتە بەرچاوان. کێ دەتوانێ نکۆڵی لە بەھا و نرخی تاک لە رۆژاوادا بکات . شتێکی بەڵگەنەویست و زانراوە ئەم رۆژاوایە چەند و چۆن بە تەنگ تاکەکانیانەوە دێن، کاتێ لە ھەر گۆشەیەکی ئەم گۆی زەوییەدا تەنگانەیان بێتە بەر. کوشتنی زیاتر لە ٣٠٠٠ ھەزار کەس و ھەڵمەتبردنە سەر شکۆ و دەسەڵات و سیمبۆڵی ھەرە دیاری رۆژاوا ھەرگیز ناچێتە ئەقڵەوە کارێکی لەم چەشنە لەسەردەستی ئەمەریکادا بەئەنجام گەێندرا بێت.

لە بەشێکی تری نووسینەکانیدا شاکەلی گلەیی توند لە راگەیاندنی کوردستان دەکات ، بەرانبەر بەو لاساییکردنەوە کوێرانە و سنگکوتانە نەزانانە بۆ ھەر ھەموو شتێکی رۆژاوا. لای وایە ئەوانەی رۆژاواپەرستی دەکەن و دەیانەوێ پوشوپەڵاشی ترادیسیۆنەکەیان بھێنن و لە جێی کرۆک و مۆرک و بەھای چەندین ساڵەمان قووتیان بکەنەوە، ئەوانە سەرچڵ و خرابەکارن. لەمەش زیاتر پێمان دەڵێ:<< میدیای کوردی لە رووی سیاسەتی فەرھەنگی و پەروەردەی فکری و دەستەبەرکردنی ئازادیی بیر و دەربڕینەوە ، ھەر بەردەوامییەکی ئاوساو و خۆخەمڵاندووی راگەیاندنی سەردەمی بزوتنەوەی چەکداری و خەباتی شاخن>>.

نووسەر... دروست بۆ مەسەلەکە چووە ، ئیمڕۆ لە کوردستاندا ئەو قەیرانەی میدیای حیزبی بۆ سەرجەم کایەکانی فەرھەنگی و مەعریفی تاکی کوردی دروست کردووە ، زیانەکانی ھێندەی ئەنفالێکی خۆکرد وایە . گەر تەنیا نموونەی سیستەمی خوێندنی ژێر دەسەڵاتی دوو حیزبەکە و بەکارھێنانی دوو شێوە زاراوەی جیا لە پرۆگرامی خوێندن و نەبوونی ھیچ دەستگای ئەکادیمی و زانستی تەرخان بۆ پرسەکانی زمان و میژوو و ئەدەب و ھونەر و چەندان بواری دیکە دەشێ بەڵگەی بەس بن بۆ ماڵوێرانیمان بەدەست ئەو دەستگایانەوە. سەرگەردانی کارکردن و بیرکردنەوە رووی لە گشت بوارێکی ژیانی کۆمەڵایەتی و فەرھەنگی کردووە و بارە سیاسییەکەش لە مێژە لە کێشە و گرفتەکانی خۆیدا داڕزاوە. ئیدی دەردی سەری لەو پنتەوە دەست پێدەکات کە ئازادی لە ھەموو بوارەکاندا بۆ حیزب قۆرخکراوە و حیزبایەتی پاوانی ھەر شتێکی کردووە و بۆتە پێوەرە بۆ ھەر دیاردە و پێداویستییەک.

ھەموو ئەو دەربڕینە ئایینئامێزانەی شاکەلی ھێشتا پێمان ناڵێ شاکەلی نرخ بۆ رۆژاوا و ئەو ھەموو دەستکەوتە زەبەلاحانەی بۆ مرۆڤایەتییان بەدەست ھێناوە دانانێ. نەخێر نووسەر بە دەنگێکی زوڵاڵ و راشکاوانە دەڵێ :<< ناسینی رۆژاوا بۆ ئێمە زۆر گرنگە. رۆژاوا ئەمڕۆ ناوەندی فکر و تەکنەلۆژیا و زانست و سیاسەتیشە. ناوەندی جڵەوکێشی و بڕیاری سیاسیشە. لە زۆر بواردا پێشەنگ و سەرکردەی دنیای ئەمڕۆن>>.

نووسەر ژیرانە لەم دیاردەیە دەڕوانێت و بە ھۆشیارییەکی زیتەوە گەرەکێتی ئەم بارە بە واقعی کوردستانەوە ببەستێتەوە . شاکەلی بە گومانەوە لەو ھەموو گۆڕانە خێرا و بە پەلانەی روویان لە کوردستان کردووە دەڕوانێت. پێی وایە ئەم دیاردە رووکەش و دەستکردانە ھیچ پەیوەندییان بە پێشکەوتنی ھۆش و ئاوەزی مرۆڤی کوردەوە نییە . تا دەگاتە ئەوەی دەنووسێ:<< کە ئەمانە نەبووەتە ھۆی فراوانبوونی رووبەری ئازادییەکانی کۆمەڵ و تاکەکەس>>.

دروست وایە تاکی کورد لە بەرھەمھێنانی ئەم داھێنانە تەکنەلۆژیانەدا بەشداری نییە و ھیچ پەیوەستێکی بەم جیھانە سەراپاگیرەوە نییە. بەڵام ئایا تاکی کوردیش ھەر نەیتوانیوە ھەتا ئێستا سوود لە داھێنانی وەک کۆمپیوتەر و ئینتەرنێت و مۆبایل و دەستکەوتە تەکنەلۆژییەکانی دیکە بکات ؟ ئەمە پرسیارێکە بە دیار وەڵامەوە لەچاوەڕوانیدایە.

ھەستکردن بەم راستییانە و گوزارەکردنیان بەو شێوەیە ، ھێمای ھۆشیاری و خوێندنەوەی واقعی سەردەمەکەیە و نکۆڵینەکردنە لە راستییە بەڵگەنەویستەکان. لێرەشەوەیە جارێکی دیکە نووسەر دێتەوە نێو باسی رۆژاوا و دەڵێ :<< گەلێ دەستگای فەرھەنگی و زانستی مرۆڤانە و خەڵکی ئاسایی ھەیە لە رووی مرۆڤدۆستی و فەرھەنگدۆستی ئاشنای رۆژھەڵاتن و دەیانەوێ ئاشنا ببن>>.

ھەڵوێستێکی دیکەی نووسەر قسەکردنێتی لەسەر سیاسەتی پاوانخوازی و داگیرکردن و شەڕھەڵگیرسێنانەی ئیمپەریالیزمی ئەمەریکی. بە تایبەت لەسەردەمی جۆرج بوشدا.

مەخابن لێرەدا شاکەلی دەیەوێت پێمان بڵێ ئەمەریکا شەڕفرۆشە و بەزۆردارەکی شەڕی عێراقی کردووە. پەردەی نیگەرانی و خەمێک بەسەر ئەم بۆچوونەی نووسەرەوە دیارە. من لەگەڵ شەڕدا نیم ، وەلێ شەڕی سەددام لە پێناوی ئاشتیدا بوو. سەدام و رژێم و دەوڵەتەکەی لەوەتەی دروستکراون سیمبۆڵی شەڕ و ھەڕەشەن بۆ تێکڕای ناوچەکە .

وەکو دیکەش ئەو شەڕە لە دیدی کوردایەتییەوە داوایەکی نەتەوەیی بوو بۆ لێدان و لاوازکردن و داڕمانی دەسەڵاتێکی دڕندەی داگیرکەری کوردستان . ئەوە خەونێکی پیرۆزی ساڵەھای ساڵ بوو ھاتە دی ، دەنا قەڵای بەعس و عروبەی سەددام نە بە کەس دەرووخا و نە لە راستیشدا کەس دەویست بیروخێنێت . لە کاتێکدا دەوڵەتی عێراق چەندین بەرنامەی وەک ئەنفال و ھەڵەبجە و سوتماککردنی کوردستان لە ئەجندەیدا مابوو دەرھەق بە کورد پیادەی بکات. بۆ مێژووش دەبێت ئاماژە بەوە بکەین ئەنجومەنی ئاسایشیش چەندین بڕیاری دەرکرد و سەدام پێشێلی کردن ، ئەوجا شەڕ بەرپا بوو.

نووسەر لە شوێنێکی دیکەشدا بۆچوونەکانی لەسەر ئەو پەیوەندی و دۆستایەتییە و کاریگەریی ئەمەریکا لەسەر کوردستان بە نەرێتی دەردەبڕێت و گوناھێکی گەورە لەمل کوردایەتییەوە دەپێچێتەوە و دەنووسێ :<< کوردستانیش دەبێتە داردەستێکی بێنرخی رۆژاوا و دەبێتە پێگەیەک بۆ ھێزە سەربازی و فەرھەنگی و ئابوورییەکانی رۆژاوا، بێ ئەوەی کورد خۆی ھیچی بەر بکەوێت یا رێگەی بدرێت پرۆژە و پرۆگرامەکانی بە پێی بەرژەوەندی نەتەوایەتیی خۆی دابرێژێت و جێبەجێ بکات. فەرھەنگی ھەزاران ساڵەی کورد لەناو دەبرێت و کورد دەبێتە نەتەوەیەکی بێفەرھەنگی بێناسنەمەی وەک ئەمڕۆی خەڵکی تورکیا>>.

ئەم بۆچوونانە تا ئەو شوێنە راستن کە پرۆژەیەکی ئەلتەرناتیف و بەرەنگاری بەرانبەر بە ھەژموونی رۆژاوا بۆ کورد لە ئارادا بێت. دەنا مانای وایە کورد چوامشقی لە ماڵی خۆیدا دانیشێت بەدیار میھر و سۆزی جیھانی ئیسلامییەوە تا رەحمیان دەتلیسێتەوە و وەک ھاوئاینێک قەبوڵمان دەکەن و دەمانکەنە برای خۆیان!!.

ئاخر بەرنامەی رۆژھەڵاتە فەرمانی تەفروتوناکردنی فەرھەنگی کوردی لە ھەگبەدایە. ئەردۆغانە عوسمان بایدەمیری سەرۆکی شارەوانی ئامەد دەداتە دادگا لەبەر ئەوەی بە کوردی ئاخاوتنی داوە. خامنەیی و نەژادی و رەفسەنجانییە کەمانگیر و ھاورێکانی لە سێدارە دەدەن لەبەرئەوەی کوردایەتی دەکەن. فارس و عەرەب و تورکە فەرھەنگیان تاڵان کردووین و ئەوەی پێیان قووتدرا کردوویانە بە ھی خۆیان و ئەوی دیکەشی دەشێوێنن و بزردەکەن.

ئەم بۆچونەی کاک فەرھاد لەرووی سیاسییەوە وامان پێ دەڵێت کەوا ئێمە شەڕی رۆژاوا بکەین. جارێ کورد لە بارێکدا نییە شەڕی ئەمەریکا و سیاسەتەکانی بکات. لەسەر کورد ئەوە پێویستە سیاسەتێ پەیڕەو بکات بەرژەوەندی نەتەوەیی لە خۆ گرتبێت و بە ئامانجی رزگاریی و دامەزراندنی دەوڵەتی نەتەوەیی بگەیەنێ. بۆ گەشتن بەم مەرامە لە کێوە و چۆن ھاوکاری دەکرێت لای مەبەست نەبێت و ھاوئاینی و دراوسێیەتی و جوگرافیا رێگر نەبێت لەبەردەم ویستە سیاسییەکانیدا . بە واتایەکی دیکە کورد خۆی نەکاتە شمشێری بەگژداچوونەوەی رۆژاوا و قەڵغانی بەرەنگاری لە ئیسلام . دەنا ھەرخەریکی خولانەوە لە دیرۆکی خۆماندا دەبین و ھەرگیز ناتوانین لەو رۆڵەی لە مێژوودا بەسەرماندا سەپاوە دەرباز بین. ئێمە دەبێت بەرگریی لە سیاسەتی بەرژەوەندی خۆمان بکەین و بەس ، دەنا جارێکی دیکەش لە ژێر رەوڕەوەی رووداوەکانی مێژوودا دەفلیقێینەوە.

ھەر ناوەند و دەسەڵاتێک ئەمەریکا ، ئەوروپا ، نەتەوە یەکگرتووەکان ،جیھانی ئیسلامی یان عەرەبی ھەنگاوێ بەلای سوودی کوردایەتیدا ھەڵنێن ، دەبێت کورد پێشوازی لێ بکات. لەو ھەلومەرجەی کوردی تێدایە گەر تاکە پووشێک فریادڕەسی بێت ، گەرەکە دەستی بۆ درێژ بکات و نابێت لە ھیچ لۆمە و گازندەییەک سڵ بکاتەوە. گەر کورد بە زۆرزانی و فڕوفێڵ و ماستاوکردنیش بێت و تەنانەت لەسەر حسابی ھەندێ شتی کاتیش بێت ، بتوانێ قەناعەت بە ھەر بەرەیەک رۆژاوا بە تایبەت بێنێت دەوڵەتێکی بۆ دروست بکات ئەو سیاسەتەی زۆر رەوا و پیرۆزە. بە کورتی و کرمانجی ھەرگیزاو و ھەرگیز لە سوودی کورد نییە لەم ھەلومەرجەدا خۆی بخاتە خانە و سەنگەری دژە رۆژاواوە. ھەڵبەت نەک بە ھەر مەرج و نرخێک وــ ناشڵێـم سبەی بۆمان دروست دەکەن ! ـــ . تەپڵی بەتاڵ و دڕاویش ئەوەیە بێ ھیچ لێکدانەوە و لەبەرچاوگرتنی بەرژەوەندییەکی نەتەوەیی خۆ بکەیتە قوربانی ئایین و ئایدۆلۆژیا و دروشمی برایەتی گەلان و خەونی زڕە ھاوئایینی و ھاومێژوویی و ھاونیشتیمانی کورد و گەلانی رۆژھەڵات.

رۆژاوا چۆن چەمکەکانی تیرۆریزم و سیکۆلاریزم دەخوێنێتەوە بە چ دیدێک لێیان دەڕوانێت و چی بە ئەلقائیدە دەڵێ و چۆن بنلادنی پەروەردەکردووە، ئەمە لە زانیارییەکی گشتی بەولاوە ، نابێت وابەستە بێت بە بیرکردنەوە و ھەڵوێست وەرگرتنمان دەرھەق بە رۆژاوا.

لێرەدا منیش دەبێت قسەیەک بۆدزەکەی رۆژاوا بکەم. خەباتی ئیرلەندە و باسکیش لە روانگەی رۆژاواوە ھەر بە تیرۆریزم ناو دەبرێت. کەواتە مەسەلەی ئەو چەمکانە ھەر بە ئیسلام و موسڵمانەوە پەیوەست نییە. بە باوەڕی من میتۆدەکانی کارکردنی ھەڵگرانی ئیسلام بۆ بەرەنگاربوونەوەی رۆژاوا ھەڵەن و لەگەڵ ئاستی گەشەکردن و بیرکردنەوەی مرۆڤایەتیدا ناگونجێن و میکانیزمێکە بێئەندازە نەگریس و خوێناوی و دڵڕەقانەیە و لەم سەردەمەدا شیاوی قەبوڵکردن نییە.

پاشان شاکەلی دەستنیشانی دوو مەرج و پێویستی ھەستیار و گرنگ دەکات بۆ دەربازکردنی ژیانی سیاسی و فەرھەنگی لە کوردستان. ئالێرەدا شارەزایانە بەدوای چارەسەری لایەنێکی بایەخداری بە ھەڵەداچوونی سیاسەتی کوردستاندا دەچێت و پێی وایە:

یەکەم ... دامەزراندنی سیستەمێکی سیاسی و دیموکراتی. ئەم داخوازییە چەند روویەکی شارستانی ھەیە بەو ئەندازەیەش مەحەکی فەراھەمکردنی ھەلومەرجێکی سروشتی و شایستەی سەردەمە. دەکرێت دەستکەوتی گەورەتر لەسەر ئەم زەمینە بینا بکرێت و ئاسۆی ئاییندەشمان رۆشنتر بێت.

دووەم... فەرگەنگی ئازاد. ھەڵبەتە ئەو داوایەی سەرێ نە پێکدێت و نە سەر دەگرێت ، گەر فەرھەنگێکی ئازاد و بیرکردنەوەیەکی ئازاد و ھەڵسوکەوتی ئازادانە ھاوشان و ھاوکار و ھاوداوای خاڵی یەکەم نەبێت.

نووسەر پێی وایە و دروستیشی پێکاوە کە رۆژاوا کار لەسەر دوژمنایەتی نانەوە لە نێو خودی ئیسلامییەکاندا و سوود وەرگرتن لە ناکۆکییەکانیان دەکات . بۆ نموونە رۆژاوا ناتوانێ ئیسلامی ئیندۆنیسیا و ئیران و میسر یا مەغریب وەک یەک فەرھەنگی ھاوشێوە تەماشا بکات.. سیاسەتی رۆژاوا لە پرسەکانی دیموکراسی و ئازادی بیروباوەڕ و فشارھێنان بۆ دەوڵەت و سیستەمە نادیموکراتەکانی دنیا ھەمان شێوازی گلەیی و گازندەکردنێتی لە جیھانی ئیسلامی و تەشەنەکردنی ھەڕەشەکانی تیرۆریزم لەم دەڤەرەدا بووە .

سەرکۆنەکردنی سیستەمی نادیموکراتی لە روسیا و چین و کۆریای باکوور و گەلێ شوێنی دیکە ھیچی کەمتر نەبووە لە بەرەنگاریکردنی ئەو ھەڕەشانەی چەکی ئەتۆمی کۆماری ئیسلامی ئێران بۆ ناوچەکە و جیھانی دروست کردووە.

دنیای ئیسلام بۆخۆی لە قەیران و سەرگەردانی و دواکەوتن و ھەزار بەرەکیدا گلاوە. لە شارێکی وەک سلێمانیدا دەیان مزگەوت ھەیە ھەر یەکەی سەر بە لایەن و دەستەیەکن. وەھابی ، سەلەفی ، یەکگرتوو . کۆمەڵ و چەندانی دیکە. لە گەلێک لەم دەوڵەتانەدا دەرەتانی جموجوڵێکی ئازادانە بۆ ئەم گروپە ئیسلامخوازانە بەرچاو ناکەوێت. ھەر وەک مامۆستا شاکەلی خۆیشی ئاماژەی پێداوە: << ئەو ئازادییەی موسڵمانێکی کورد لە وڵاتێکی وەک سوێددا ھەیەتی لە کوردستانەکەی خۆیدا نییەتی>>. من چەند ناوێکی بۆ زیادەکەم و دەڵێم ئەوەی موسڵمانی عەرەب و تورک و ئەفغانی و پاکستانی لە لە پاریس و لەندەن و بەرلین و ئەمستەردام و نیۆرک ھەیانە لە جەزایر و میسر و سوریا و ئەنقەرە و ...ھتد نییانە و ناشیان بێت.

سیاستی رۆژاوا ھەر بەرانبەر بە ئیسلام و کۆمەلگەی موسڵمانان رەخنەئامێز و خۆپارێزی نییە. جا دەبێت بە ئاگابین و بەدەردی عەرەب نەچین ھەر شتێک ئەمەریکا بیکات بە دژایەتی خۆمانی لەقەڵەم بدەین.

سامۆئیل ھەنتینگتۆن کە شاکەلی بەرپەرچی تێزەکانی دەداتەوە باس لەدیاردەی کۆچبەرانی مەکسیکی بەرەو ئەمەریکا و مەترسییەکانیان دەکات. بەدرێژایی ١١٠٠کم سنووری نێوان مەکسیک و ئەمەریکا رۆژانە بەھەزاران مەکسیکی بە نایاسایی دەچنە ئەمەریکاوە. لەوێش رەوەندێکی تایبەت بەخۆیان دروست کردووە، جگە لە زمانی ئیسپانی تاقە ووشەیەک ئینگلیزی چییە نایزانن و نایانەوێت فێربن. ئەم گردەوەبوونەش سیمای کۆمەڵایەتی وڵاتەکەی بەرەو گۆڕین بردووە. نووسەر ئەمانە بە مەترسی لەسەر سیستەمەکەیان دادەنێت. ئێ خۆ مەکسیکییەکان موسڵمان نین و بگرە ھاو ئاینی خۆیانن .

ئاشکرایە پەرۆشی مامۆستا شاکەلی قوڵ و دوورەبینانەیە و ئارەزوومەند نییە ئایندەیەکی خوێناوی رووبەرووی کورد بێتەوە. ئەمەش ھەست و بیردنەوە و دڵسۆزی خۆی تێدا بەیان دەکات و لە شوێنێکی تری باسەکەیدا دەنووسێ : << دژایەتی ھەڵوێستی وڵاتە موسڵمانەکان و خۆپارێزی لە دیاردە نەگونجاوەکانی ئیسلام ،گەرای پرۆگرامێکی سیاسی دڕندە لە کوردستاندا دادەنێ. سیاسەتی ئەنتی عەرەب و ئیسلامیزم دەبنە ماکی لەدایکبوونی فاشیزم لە کوردستاندا>>.

لە روانگەی منەوە شەڕی ئیسلام و عەرەب بە ئەرکی کورد نازانم و کورد لە ھیچ سیاسەتێکی ئەنتیئامێز بەرانبەر بە ھیچ گەل و کەمەنەتەوە و کولتوور و ئایین و مەزھەبێک سوود وەرناگرێت ، وەلێ بەرەنگاربوونەوەی سیاسەتی داگیرکاری و ئیستیتانی بە ئەرکێکی خودایی و گەردوونی و سەرزەمینی و مۆڕاڵی ھەر تاکێکی کورد دادەنێم. ئیسلامی عەرەب و تورک و فارس ئیمڕۆ پیادەی ئەو سیاسەتە دەکەن لە کوردستان و دەرھەق بە نەتەوەی کورد ، بۆیە دژایەتی ئەمانە مەزنترین شەرەفی خەبات لەخۆدەگرێت. ھەق نییە کەسایەتییەکی وەک مامۆستا شاکەلی لە ئێستاوە ترس و خەمی لە دروستبوونی فاشیزمی کوردی ھەبێت!! فاشیزم وا لەناو خوێنی ئەوانەی ئێمەیان بندەست کردووە و وڵاتمانیان سوتماککردووە و ئیش لەسەر ژینۆسایدمان دەکەن لەژێر پەردەی ئایینی پیرۆزی ئیسلام و برایەتی گەلان و ھاوسێیەتی میژوویی...

دواتر کێ دەڵێ کوردستان باشترین پێگەی بێلایەنی لە ناوچەکەدا نابێت و رۆڵی داھێنەرانە و گردەبڕ لە بڕیارە سیاسی و ئابوورییەکانی ناوچەکەدا بەرقەرار ناکات. شیاوی باسکردنە چارەسەربوونی پرسی نەتەوەیی کورد ، فاکتەرێکی بەھێز و چارەنووسسازی کەمبوونەوەی گرژی و ئالۆزییەکانی ناوچەکە و بەرقەراربوونی سەقامگیریی و دامەزراندنی بناغەی پتەوی ئاشتی و برایەتی و شارستانێتییە. ئەودەمەش چیتر مەترسی سەرھەڵدانی شۆفێنیزم و ھیچ دیاردەیەکی دیکەی زیانبەخش ھەڵنادات و ھەموو بە ئارامی کامەرانی دەکارین لەو بستە زەوییەی خودادا ژیان بگوزەرێنین. ھەڵبەت ئایندەی ئەم بابەتە و تاقیکرنەوەشی ھەمووی وابەستەی ئاوەزێکی سیاسی حەکیمانەن و من بەدووری نابینم دەوڵەتی کوردی پێشەنگی ئەم مەیدانە بێت .

دواتر نووسەر دەڵێ : << بۆیە دژایەتی ئیسلام دەکرێت لە رووی جوگرافییەوە ھەرەشە لە رۆژاوا دەکات و خاوەنی نەوتە>>. رۆژاوا وەک ناوەندێکی بەھێز و خاوەن داھێنانی پیشەسازی و تەکنەلۆژی ھەردەم بەدووی بەرژەوەندی یەکانی خۆیدا وێڵە . ئەم تەقەلایەشی لە سنووری چاوچنۆکی و رووتانەوەوە تا دەگاتە مەرامی داگیرکاری وڵاتانی دیکە پەرەی سەندووە و ملی بە رەو سیاسەتی نامرۆڤایەتییەوە ناوە. لەگەڵ ئەمانەشدا ئەفغانستان خاوەنی نەوت نییە ،بەڵکو تالیبان تێیدا حاکم بوو کە رێگەی لە رادیۆکردنەوە و گوێ لەمۆسیقا گرتن و چوونە قوتابخانەی ژن دەگرت.

سەرئەنجام نووسەر دەگاتە ئاکامێک و پێمان دەڵێت :<< فەرھەنگی ئێمە فەرھەنگێکی ئێرانی و ئیسلامی و رۆژھاڵاتییە. وە بەراشکاوی پێمان دەڵێت : نابێ بەو فەرھەنگە نامۆ بین خۆمان و نەوەکانی ئایندەی لێ بێبەش بکەین>>.

ھەڵبەت من لاریم لەم بۆچوون و پرنسیپ و خەسڵەتە بە ھیچ جۆرێک نییە و کتومت لەگەڵ بۆچوونەکەی شاکەلیدا ھاوبیرم. وەلێ لێرەدا مەرجێکی قورسم ھەیە و پێموایە دەبێت ھەر یەک لە ئێمە بایی ھێندە خۆی بکاتە خاوەنی ئەم پێناسەیە و شەڕی لەسەر بکات ، کە ھەبوون و بوونی نەتەوەکەی لەریزی ئەوانی دیکەدا بەرانبەر و ھاوشان و یەکسان بێت. ھەردوو فاکتی مێژوویی و جوگرافیایی نابێت ھەرگیزاو و ھەرگیز بێتە مایەی ئەوەی خۆمان لەبیر بچێتەوە ، دەنا ھەر داکۆکییەک لەوەی ئێران وەک دەوڵەتێکی ئیسلامی ببێتە خاوەنی چەکی ئەتۆمی بەرانبەر بە ئیسرائیل و رۆژاوای نەگریس و شەرانگێز ، راستەوخۆ دەکاتە خزمەتی وەچەکانی کۆرش و پەھلەوی و خومەینی. ھیچ بەدووری نازانم کوردستان یەکەم تاقیگە و شوێنی بەکارھێنانی ئەو ئەتۆمەی ئێران بێت. ئەمە تەنھا وەک نموونە و گریمانەک دێنمەوە و لە واقعیشەوە زۆر دوور نییە. پوختەی قسە ئەوەیە ئێمە سەلاحەدینێکمان پێویستە کورد لەو مەینەتی و مەرگەساتە رزگار بکات ، با ئاڵا و شمشێری ئیسلامیشی بەدەستەوە بێت، نەک سەلاحەدینێک ئەحمەدی نەژادی و ئەردۆغان و دەوڵەتە داگیرکەرەکانیان لە رووخان قوتار بکات. ئەرکی رۆشنبیرانیشە بەشداریی لە دروستکردنی کەسایەتیی زەردەشت یان سەلاحەدینێکی رزگارکەردا بکەن.

دوا بەشی دەرزیئاژن لە دووتوێی ٤٣ لاپەڕەدا لە ژێر ناونیشانی رێنوێنی ناو و چەمکەکان ، مامۆستا شاکەلی بە چڕ و پوختی دەیان چەمک و ناوی کەسایەتی ھزری و سیاسی و ئەدەبی کوردیی و بێگانەی لە شێوەی فەرھەنگۆکێدا پێناسەکردووە. ئەم میتۆدەش تایبەتمەندێتییەکی دیکەی شێوازی زانستییانە و مۆدێرنانەی ئەم بەرھەمە نیشان دەدات و کلیلی ئاسانکاریی چوونە نێو دنیای باسە فکرییەکان و پرۆفایلی کەسایەتییەکان دەداتە دەست خوێنەر.

بەر لە ماڵئاوایی ناساندنی ئەم بەرھەمەی کاک فەرھاد شاکەلی گەرەکمە جارێکی دیکەش جەخت لەسەر ئەو بنەما و خەسڵەتە رۆژھەڵاتییەی بوون و فەرھەنگ و شارستانیمان بکەمەوە. ھیچ ناجۆرییەک لە نێوان من و برای نووسەردا ھەست پێناکەم . وەلێ بەداخم کە سیاسەت لەو دەڤەرەدا بە گشتی داینەمۆی ھەڵسوڕاندنی ئەم تایبەتمەندییانەیە . سیاسەتیش بەدەست ھێزەوەیە و ھێزیش خۆی لە دەوڵەتدا دەنوێنێ. کورد دەوڵەتی نییە بۆیە لە پەراوێزی باسەکانیشدا جێی نابێتەوە. ھەر ئەم ھۆکارەشە وای کردووە ، من پتر لە پێویست لە روانگەی سیاسییەوە ھەڵسەنگاندن بۆ بابەتەکان بکەم.

بۆ خۆم دڵنیام لەوەی لە ھەر دێڕ و ووشە و رستەیەکی شاکەلیدا پرسی مرۆڤ و ژیان ، ئازادی و رەھەندەکانی و بەھا و کامەرانی بۆ خەڵک خۆی مەڵاس داوە. کوردایەتیش بە چەمکی فراوانی رۆشنبیرانە رەگەزێکی چەسپیو و ئامادەی بیر و بەرھەمەکانی نووسەرە. خاترجەمیشم لە خەم و پەرۆشی شاکەلی بۆ سەرجەم لایەنەکانی ژیانی ئادەمیزاد ، بەتایبەت لەو بەشەی گۆی زەویدا کە رووبەرووی ھەڕەشە و مەترسی بۆتەوە.

وێڕای بوونی ھەندێ سەرنج و بیروڕای جیاوازم لەسەر شتەکان، زۆر بەگەرمی دەستخۆشی لە مامۆستا شاکەلی و ئەو بەرھەمە نازدارەی دەکەم . بە ھیوام لەرێگای ئەم جۆرە بەرھەمانەوە فەرھەنگ و رۆشنبیریمان دەوڵەمەنتر و سوودبەخشتر بکات. ئەم جۆرە باسانە دەرگای مشتومڕێکی گەرم دەخوڵقێنن و دەرفەت بە خوێندنەوەی جیاوازی باسە فکری و مەعریفییەکان دەدەن. جگەلەوەش کتێبخانەی کوردی زۆر پێویستی بەم جۆرە بەرھەمانە ھەیە و تەنھا لەم دەروازەیەشەوە ئاسۆی رۆشنترمان لەبەردەمدا واڵاتر دەبێت .

٢٠\١٠\٢٠١٠ - بەرلین
ماڵپه‌ڕی هه‌ڵۆ به‌رزنجه‌یی