|
١٠\١١\٢٠١١
دەسەڵات راستەوخۆ
بەرپرسە لە دروستکردنی
ئەو دۆخەی ھۆکار و
پاڵنەری گەنجانە بۆ خۆکوژیی!
 ئامارەکان
نیشانی دەدەن کە لە چەند مانگی ڕابردوودا خۆکوشتن لە ناو گەنجانی
کوردستان بە شێوەیەک پەرەی سەندووە, بۆتە دیاردەیەکی مەترسیدار و جێی
نیگەرانییە.
رۆژنامەی رێوان لە ژمارەی (٢٤٣ ی بەرواری ١٦ ی سێپتەمبەری ٢٠١١
سەرژمێریەکی بڵاو کردۆتەوە کە لە ھەشت مانگی رابردوودا (٧١) حاڵەتی
خۆکوشتن لە لایەن پۆلیسی پارێزگای سلێمانی‌یەوە تۆمار کراوە.
بەپێ‌ی ھەواڵەکانی ڕۆژنامەی ئاوێنە تەنھا لە ماوەی ٢ ھەفتەدا لە مانگی
ئۆکتۆبەر ی ٢٠١١دا، ٤ گەنج کە تەمەنەکانیان لە ١٤-٢٠ ساڵیدا لە
شارەکانی کوردستان خۆیان کوشتتوە.
ھەموو ئاگادار بووین "بەناز جەواد" بەھۆی بێکاری و ھەژاری، وەک
ناڕەزایەتی بە دانەمەزراندنی ئاگری لە جەستەی خۆی بەردا و گیانی
لەدەستدا. زۆرن ئەو بەنازانەی بەسەد قاچ لەم بارودۆخەی ئێستای کوردستان
ڕا ئەکەن. ماوەی چەندین ساڵە گەنجانی کوردستان، سەد قاچ قەرز ئەکەن و
بە نێو ھەزار ئاگرو چەندین سەرزەمین و سنوری دڕکاوی و مەترسی
دەریاکاندا لەم دۆخ و دۆزەخەی کوردستان ڕائەکەن.
ئەم دۆخە فشارێکی ڕاستەوخۆی خستۆتە سەر خەڵکی کوردستان و بەتایبەتی
گەنجان. گەنجان کە ناسکترین و ھەستیارترین توێژی کۆمەڵگان، زۆرترین
زیانیان بەرکەوتووە و ئەکەوێت. ھۆکار و پاڵنەری سەرەکی خۆکوژیی گەنجان
ئەگەرێتەوە بۆ نائومێدی و ڕەشبینی کە دەرئەنجامی بارودۆخی کوردستان و
سەرکوت و بێمافی گەنجان و نەبوونی مافە سەرەتاییەکانی خەڵکە.
خۆکوشتنی گەنجان پەیامی ئەوەمان پێدەدات کە سیستم و دەسەڵاتدارەتی
کوردستان لە قەیراندایە. قەیرانێک دوای سەرکوتی خۆپیشاندانی سەراکانی
ئازادی دۆخێکی سەرکوتگەرانەی ھێنایە ئاراوە، دۆخێکی نائارام و نالەبار،
دۆخێکی قەرەباڵغ بە سیناریۆ و ڕووداوی شێواو. بە واتایەکی تر
بارودۆخەکە گەیشتوتە ئاستێک کە زۆربەی کێشەکان بە ھەڵواسراوی و
بێچارەسەرکردن ماونەتەوە . خەڵکی کوردستان لە چاوەڕوانییەکی تاقەت
پڕوکێن نادیاردا ماونەتەوە ژیان بەسەر ئەبەن.
حکومەتی ھەرێمی کوردستان و دەسەڵاتدارەتی پارتی و یەکێتی ڕاستەوخۆ
بەرپرسن لە دروستکردنی ئەو ھەلومەرجە و پاڵنانی گەنجان بۆ دۆزەخی مەرگ
و خۆکوژیی. لێرەدا حکومەت و دەزگا بەرپرسەکان ئەرکیان فەراھەمکردنی
پێداویستیە سەرەتاییەکانە بۆ ژیانی گەنجان و مافەکانیان.
بۆ پێشگرتن بەو دیاردە مەترسیدارەی کە ھەڕەشەیە لەسەر ژیانی گەنجانی
کوردستان. ئەم پێداویستی و مافەسەرەتاییانە بە ئەرکێکی دەستبەجێی
دەسەڵات دەزانین:
• دەستەبەرکردنی مافە سەرەتاییەکانی لاوان لە خوێندن، کارکردن،
مومارەسەکردنی ئارەزووەکانیان لە وەرزش و ھونەر و زانست، ئازادیە
تاکەکەسیەکان و فەراھەمکردنی شوێنەکانی سەرگەرمیی و ناوەندەکانی
بڕەودان بە تواناکانیان و حەساندنەوەیان.
• پەیداکردنی کار بۆ لاوانی بێکار، یاخود فەراھەمکردنی بیمەی بێکاریی و
بەرنامەی بردنە سەری کارامەیی و توانای لاوان لە بواری کاردا.
• ئازادی دەربڕین بە ھەموو شیوازەکانیەوە. ھەڵوەشاندنەوەی یاسای
خۆپیشاندان، دانانی یاسایەکی نوێ بۆ دابینکردنی ئازادی خۆپیشاندان.
• کۆتایی ھێنان بە ھەموو جیاوازیەک لە بواری خوێندندا، وەک قبول خاس و
تاد... مامەڵەی یەکسان لەگەڵ ھەموو خویندکاران بێ لەبەرچاوگرتنی
ئینتیمای سیاسی و حزبی، ئاینی، نەتەوە، ڕەگەز..تاد.
• کۆتایی ھێنان بە گوشار و ھەڕەشە و ترساندنی ڕۆژنامەنووسان و سزادانی
یاسایی ھەموو ئەوانەی ئەشکەنجە و ئازاردانی ڕۆژنامەنووسان و ھاوڵاتیان
دەستیان ھەبووە. قەرەبووکردنەوەی ھەموو ئەوانەی دووچاری ئەو جۆرە
مامەڵەیە بوون.
• پاراستنی کەرامەتی گەنجان، کۆتایھێنان بە سوکایەتی، بێڕێزی و شکاندنی
کەرامەتی گەنجان لەلایەن دەزگای ئەمنی و حزبیەکانەوە لە شارەکان.
رێکخراوی سەردەشت عوسمان بۆ داکۆکی لە ئازادی
١٠\١١\٢٠١١
serdasht.osman@gmail.com
|
