٢٧\٣\٢٠١١

(دکتۆر) فاروق ڕەفیق چى دەبێژێ؟

هیوا رەش    

لە بەرنامەیەکى کەناڵى کەى ئێن ئێن کە فاروق ڕەفیق قسەى تێدا خەرج دەکرد ، کۆمەڵێک سەرنجم لا گەڵاڵە بوو کە سەرلێشێواوییەکى ئەوتۆى پڕ لە غرورى تێدا بەرجەستە دەبوو نەدەکرا بێدەنگیى لێ بکرێت :

1 - ئەو زاتە پڕ لە هزرى نامۆ و سەرلێدەرنەکردووە ، نمونەى ئەمریکییەکى هێنایەوە کە گوایە 65 ملیۆن دۆلارى تەرخان کردووە بۆ شاڵاوى ڕاگەیاندنى هەڵبژاردن و گەییشتن بە پۆستێک تا ناوى بچێتە مێژووەوە ، ئەمە قسەى نەخوێندەوارێکى کوێرە گوندێکى سنوریى دوور لە ئاوەدانى و شارستانیەتى سەرکوتى ژێر چەپۆکى سیستمى ئاغایەتى نیە ، بەڵکو ئەمە ( داهێنان ) ى دکتۆرێکى خاوەن ڕەگەزنامەى کەنەدییە ، بێئەوەى بۆمان ڕوون بکاتەوە کە ئەو ئەمریکییە جێگە سەرنجەى ( دکتۆر ) ەکەمان ئەو گوژمە - 65 ملیۆن دۆلارە - ى چۆن و لە کوێ و بە چ شێوەیەک بە دەست هێناوە و بۆچى بەو شێوەیە بە فیڕۆى دەدات و 65 هەزار خێزانى برسیى لە مردن پێ ڕزگار ناکات تا ڕەونەقدارتر ناوى بچێتە مێژووەوە ، یان دەبوایە ( دکتۆر ) ە گەروو نووساوەکەى بەردەرکى سەرا ، لەگەڵ ئەوەدا ستەمى سستمى دنیاى سەرمایەدارى و دڕندایەتییەکانیشى بخستایەتە ڕوو کە چۆن لە پێناوى ناودەرکردنێکدا ملیۆنەها دۆلار تەخشان و پەخشان دەکرێت و لە هەمان کاتدا ملیۆنان ئینسانیش لە برسا دەمرن .

2 - ئەو زاتە پڕ لە هزرى نامۆ و سەرلێدەرنەکردووە ، ستالین لەولاوە بووەستێ ، بەڵکو دەمى لەوەش وەردا کە لینین لەگەڵ فاشیەتدا ناو بهێنێ ، ئەگەر تۆزێک بە ویژدانەوە خوێندەوارى هەبوایە ، دەبوایە بۆ دیموکراسییەتى سەردەمى شۆڕشى ئوکتۆبەر ، لینینى بە نمونە بهێنایەتەوە و شتێکى لێوە فێر بوایە نەک بەو شێوەیە بەربێتە وێزەى مێژوو ، یان خۆ نمونەى باشتر و بەرجەستەترى لە تەوروەشاندن و چەقۆ کێشان و نارنجۆک تەقاندنەوەى لەبەردەستدا بوو ، مەگەر خۆى بزانێت بۆچى بەسەریاندا بازى دا و لمۆزى لە گیانى لینین گیر کرد .

3 - ئەو زاتە پڕ لە هزرى نامۆ و سەرلێدەرنەکردووە ، هێشتا گیرفانى هاوار دەکات کەچى پێى نەنگ نەبوو خۆى بەسەر قەنەفەیەکى سەرکردە ئاسادا ببینێتەوە و ڕەعیەتە بەسزمانەکەشى بەسەر کورسییەکى ئاساییەوە پرسیارى ئاراستە بکەن و ئەویش وەڵامى یەکلاکەرەوەیان بداتەوە .

4 -ئەو زاتە پڕ لە هزرى نامۆ و سەرلێدەرنەکردووە ، شەرم نایگرێت ببێت بە بەتەڵى شاشەى شەوانە و ڕۆژى سەرا و شاشەى تى ڤى ، و بیست و چوار سەعاتە دەرمانى نەخۆشییەکان بە پێى ڕەچەتەى هەست بە کەمیى خود بۆ ئەم و ئەو بنووسێتەوە ؟

5 - ئەو زاتە پڕ لە هزرى نامۆ و سەرلێدەرنەکردووە ، گۆرانییەکى کۆنى کوردى ( کچێ خەجێ ) ى بیر هێنامەوە کە دەڵێت : بەهارێ نەمرم شایى و سەیرانە ، هاوینێ نەمرم خەلە و خەرمانە ، پاییزێ نەمرم گەڵا ڕێزانە و زستانى نەمرم بەفر و بارانە ، ئەدى جەنابى وەرزەکان و کەسەکانى بە دڵ نەبێت ، ئەبێت بە تەما چى بێت ؟ تۆ بڵێى ئەویش وەکو ئەمریکییەکە لە هەوڵى کۆکردنەوەى ملیۆنان دۆلاردا نەبێت لەسەر شانى خەڵکى زەحمەتکێش و لەو ڕێگەیەشەوە نەیەوێت ناوى خۆى بخاتە ناو مێژوویەک کە تەنها و تەنها جێگەى شانازى خۆى و خۆى بێت ؟ ! بەڵام ئەو مێژووە ناڵێم کە لینین وەکو سیمبولێک بۆ نەهێشتنى ستەم تێیدا درەوشاوەیە ، بەڵکو ئەو مێژووەى کە ( دکتۆر ) لە نامەى دکتۆراکەیەوە لێى وەژوور کەوتووە .

لە دواییدا بە هیوام ئەو لاوانەى ئێستاش وەکو سەردەمانى لاوێتى ئێمە کە لە لایەن سەرکردەکانەوە بازرگانى بە ژیان و ئاییندەمانەوە کرا ، لاوانى ئێستاش چەشنى ئێمە نەبنە گەمەى دەستى فاروقەکان و بە وریاییەوە قسە بێسەر و بەرەکان لێک بدەنەوە و بە هەمان شێوەى ئێمە نەبنە بەردەبازى گەندەڵباز و چەنەبازەکان.

ماڵپه‌ڕی هیوا ره‌ش