١٣\١٠\٢٠١٧

دژ بە هەڕەشەکانی شەڕی حکومەتی عەبادی

بۆ سەر خەڵکی کوردستان رادەوەستین.

ئاشکرایە کە هەوڵەکانی ئێستای حکومەتی عەبادی بۆ هێرشکردنە سەر کەرکوک لە درێژەی بڕیاری پێشوەختی حکومەت و پەرلەمانی عێراقە کە دژ گشتپرسیی و شکست پێهێنانی بڕیاری سەربەخۆیی خەڵکی کوردستان داویانە و هەر لە سەرەتاوە خۆیان بۆ شەڕ دژی خەڵکی کوردستان ئامادەکردوە. ئەمە بەشێک لە ستراتیژی ئەم حکومەتی عەبادی بوە کە دوای شەڕی دژی داعش دەستبکات بە سەپاندنەوەی دەسەڵات بەسەر کوردستاندا و گێڕانەوەی کەرکوک و ناوچە کێشە لەسەرەکان لە ڕیگەی لەشکرکێشیەوە.

ئێمە وەک خەڵکی کوردستان هیچ ڕێگایەکی ترمان لەبەردەمدا نییە جگە لە بەرگری لە مافی سەربەخۆیی و بڕیاری گشتپرسیی ٢٥ی ئەیلوول و ڕاکیشانی پشتیوانی نێودەوڵەتی بۆبەرگرتن بەم شەڕەی حکومەتی عەبادی بڕیاری داوە و خۆی بۆ ئامادە کردوە.

ئەمڕۆ پێویستە کۆمەڵگەی نێودەوڵەتی بزانێ کە ئێمە بەرگری لە بڕیاری سەربەخۆیی خۆمان دەکەین بەرامبەر بە حکومەتێکی دینیی و شۆڤێنستە کە بە ناوی یاسا و دەستورەوە شەڕ دژی ئەم مافی سەربەخۆییەی خەڵکی کوردستان بەرپادەکا. ئەم حکومەتە دینییە ١٤ ساڵە بە درێژەدانی شەڕی مەزهەبی عێراقی وێرانکردوە و ئێستاش دەیەوێ شەڕی قەومیش دژ بە خەڵکی کوردستان هەڵگیرسێنێ. دەبێ ئەم هەڕەشەی شەڕەی ڕوو بە کۆمەڵگەی نێودەوڵەتی بکەینە بەڵگەیەک کە بزانن خەڵکی عێراق و کوردستان لەسایەی ئەم حکومەتەدا ئاسایش و پێکەوەژیان و ئازادی نابینن و بڕیاری خەڵکی کوردستان بۆ جیابونەوە لەم حکومەتە ڕەوا و ناچاریە.

کۆماری ئیسلامی ئێران وەک سیاسەت داڕێژ و بەڕێوەبەری مەیدانی ئەم حکومەتە شیعە مەزهەبیەی عێراقی دەوری گێڕاوە لە گەرمترکردنی شەڕی مەزهەبی و دروستکردنی میلیشیایی ئیرهابی، و ئێستاش فشارەکانی بە یارمەتیدانی حکومەتی عێراق بۆ بەستنی سنورەکانی کوردستان و سەرپەرشتی هێرشی حەشدی شەعبی بۆ سەر کەرکوک لەلایەن قاسم سلێمانی دەوری هێزێکی داگیرکەر بەرامبەر بە خەڵکی کوردستان دەگێڕێ.

هەر پاشگەزبوونەوەیەکی حیزبە دەسەڵاتدارەکانی کوردستان لە ئەنجامی گشتپرسیی و بڕیاری سەربەخۆیی نەک بەرامبەر بە حکومەتی عێراق و ئێران خەڵکی کوردستان لەو سیاسەتە داگیرکاریانەی ئەم دوو حکومەتە ناپارێزێ بەڵکو هێرشی زیاتر و هەمەلایەنتر بۆ سەر خەڵکی کوردستان درێژەپێدەدەن تاکو ژێردەستە و ملکەچی دەسەڵاتی مەزهەبی و کۆنەپەرستانە و داگیرکەرانەیانی دەکەن. هەربۆیە نابێ ڕێگە بەو دەنگانە بدرێ کە بەناوی بەرگرتن بە بەرپابوونی شەڕەوە دەیانەوێ خەڵکی کوردستان رادەست بەم حکومەتە دڕندە و مەزهەبیە بکەنەوە و ملکەچی کۆماری ئیسلامی بێ، بەڵکو دەبێ خەڵکی کوردستان بۆ بەرگری دژ بەم حکومەتە شۆڤینیستیە دینییەکان ئامادەبکرێ.

پێویستە خه‌ڵکی کوردستان به‌هیزی ڕێکخراو و چه‌کداری خۆیه‌وه‌ خۆی بۆ به‌رپه‌رچدانه‌وه‌ی هه‌ر هێرشێکی دۆژمنکارانه‌ بۆسه‌ر خه‌ڵکی کوردستان ئاماده ‌بکات و پێویسته‌ خه‌لکی ئازادیخوازی به‌غداو شاره‌کانی تری عێراق بۆ پشتیوانی له‌ مافه‌ ره‌واکانی خه‌لکی کوردستان ده‌نگی ناڕه‌زایه‌تی دژ به‌ شه‌ر به‌رامبه‌ر به‌ حکومه‌ته‌که‌ی عه‌بادی به‌رزبکه‌نه‌وه‌ و هاوکات له‌ده‌ره‌وه‌ی ولاتیش وەک ڕەوەندی کوردستانی بەهاتنە سەر شەقامەکان و مانگرتن و خۆپیشاندان لە دەرەوەی وڵات لە بەردەم سەفارەتەکانی عێراقدا فشاربخەینە سەر ئەم حکومەتە کە دەست لەم شەڕ فرۆشتنەی هەڵگرێ. هاوکات کۆمەڵگەی نێودەوڵەتی و نەتەوەیەکگرتوەکان ناچار بکەین کە دژ بەم هێرشانەی حکومەتی عێراقی ڕاوەستن و هێزی پاراستنی ئاشتی بنێرن و دان بەماف و بڕیاری سەربەخۆیی خەلکی کوردستاندا بنێن.

ناوەندی سەربەخۆیی کوردستان بەردەوامە لە ڕاکێشانی پشتیوانی نێونەتەوەیی بۆ بڕیاری سەربەخۆیی و ڕاوەستانەوە دژی ئەم هەڕەشانەی حکومەتی عێراق و داوای بەستنی کۆنگرەیەکی نێودەوڵەتی بەسەرپەرشتی نەتەوەیەکگرتوەکان دەکا بۆ چارەسەری کێشەی نێوان حکومەتی عێراق و کوردستان و جێبەجێکردنی بڕیاری سەربەخۆیی کوردستان و گشتپرسیی لە جێگاناکۆکەکاندا.

ناوەندی سەربەخۆیی کوردستان
١٣\١٠‏\٢٠١٧