|
٧\١٢\٢٠١١
دکتۆر و مەلاكان
گرەو لەسەر سەگی تۆپیو دەكەن!
سهلام عه‌بدوڵا
لەبری گوتاری پێكەوە ژیان، دادوەری كۆمەڵایەتی و ئازادی و نەهێشتنی
چەوساندنەوە، شوان قەڵادزێیی (وتەبێژی
بزووتنەوەی ئیسلامی) گورگ ئاسا دەڵێ: پشتگیری لە تێكدانی ئەم شوێنانە
ئەكینەوە. لەولاوە د. بورهان یاسین لێكۆڵەر و مامۆستای زانكۆی لوند لە
سوید، لە سایتی سبەی (٧\١٢\٢٠١١)،
دەڵێ (بارەگا سوتاندن لوتكەی فاشیزمە). ئەم
بۆچوونە بۆ كەسێك خۆی بە رۆشنبیر بزانێ نەنگییەكی گەورەیە و جۆری
رۆشنبیرییە نامرۆییه‌كەی دەردەخات، چونكە بە روونی بازێكی وەرزشكاری
بێوێنە دەدا بەسەردڕنده‌یی ترساندن و تۆقاندن و سوتاندن و تێكدانی
ژیانی خەڵك كە لە دواییدا (بمانەوێت یان نەمانەوێت)، رووی لە
كەمایەتییەكی دیاریكراو كردووە كە بریتین لە كەسوكارە مەسیحی و
یەزیدییەكانمان. رەفتاری فاشییەت بە روونی لە دڕنده‌یی ئەو حەشاماتە
بەدی دەكرێ كە ژیانی هەزاران خێزان خستۆتە مەترسی.
رێبین هەردی لە كەناڵی سپیدەوە بە هیچ شێوەیەك بەلای
دڕنده‌ییه‌ته‌که‌دا ناڕوات و ئەو كێشە قورس و گرانە دەهێنێتە ئاستی
تاوانی سووتاندنی بارەگای یەكگرتوو كە دەبێ بەربرسەكانی دەستگیر و
دادگایی بكرێن. ئایا بۆچوونەكەی رێبین پەیامی رۆشنبیرە؟ خزمەت بە خەڵكی
كوردستان و مرۆڤایەتی دەكات؟
لەولاوە (مەلا كامەران)یش پاش هەزاران ساڵ لە بەكارهێنانی مەی یان
شێلان دەڵێ...(دەزانین لە ئێستادا شوێنه‌کان شێلان وەك شوێنی داوێنپیسی
لێهاتووە و دوكانی مەیفرۆشەكانیش شوێنێكی خراپە لە روی كۆمەڵایەتییەوە
و هەڕەشەیە لە گەنجان دەكات...). هەموو داوێنپسییەكانی ناو شوێنه‌کان
شێلان ناكاتە تاوان و بیڕه‌وشتیی و داوێنپیسی مارەبڕینی تاقە یەك كچی
كەم تەمەن لەلایەن مەلای سەر بە حزبێكی ئیسلامی و بە پشتیوانی و
دەستخۆشی گەورە بەرپرسانی(بەبەڵگەوە).
ئەو"بەڕێزانە" ئەوەندە ویژدان"بەرزن"، دوور لە سەرەتاییترین رێنمایی
دیموكراسی، مافی مرۆڤ و سەروەری یاسا و شێوە ژیان یان چالاكی
مەدەنییانە، كەتنی هەستیری و دڕندانه‌ی ئیسلامییەكانیان پێ قبووڵە و
پشتیوانیشی لێدەكەن و سوتاندنی بەناهەقی بارەگای یەكگرتووی ئیسلامی
گەورە و بە گرنگتر دەزانن و بە بایەخێكی تایبەتەوە
لێدوانی"مێژوویی"لەسەر دەدەن.
یەكێك لە قەیرانە مەترسیدارەكانی كوردستان ئەمەیە: رۆشنبیری سەوداكەر،
رۆشنبیری سەر مێزە چەورەكان، رۆشنبیر گیرفان پڕ و زۆربەیان سیاسەتێكی
كۆنەپارێز، دژە شیوعی، راستڕەو و لیبراڵن و لەگەل گوتاری ئاینی دێنەوەو
بەرەیەكیان درووستكردووە، بۆیە قوڕەكە زۆر خەستەو چەقمانبەستووە لە
شوێنێك كە هێشتا هەوڵ بۆ سەرخستنی پڕۆژەی نەگریسی (ئەخوانی ئیسلامی
قەومی عەرەبی) دەدرێ ...هەموو بۆچوونەكانی دختۆر و رەشبیر و مەلاكان،
ئەو سەگە تۆپیوەیە كە لە دوا وتارەكەی مەلا كرێكارەوە بۆنی دەرهات!
ماڵپه‌ڕی سهلام عه‌بدوڵا
|
