١١\٩\٢٠١٠

 (دیموکراته‌کانی سوێد) لە هەڵپەی گەیشتنە کورسی پەرلەمانن!

سەرکەش     

لە هەڵبژادنی ئەمساڵی سوید (دیمۆکراتەکانی سوید / سڤارییە دیموکراتەنا) خۆ هەڵدەکووتن بگەنە پێگەی پەرلەمان، سڤارییە دیموکراتەنا پارتێکی بچووکی سودییە، لە دژی سیاسەتی مرۆدۆستانەی دەسەڵاتدارەتی سویدە بۆ داڵدەدانی بێگانە و پەنابەران. هەر لە سەرەتاوەش ئەم پارتە لەسەر ئەم بنەما ڕەگەزپەرستی یە دەرکەوت و پەری گرت، ئەم پارتە بەر لە چەند ساڵێک بە هۆی ڕوانگەی ڕاسیستی و بوونی پەیوەندی و ڕایەڵە بە نازیزم وەک گروپێکی نامۆ و قەدەخە مامڵەی لەتەک دەکرا، ئەندام و لایەنگرانی هەمیشە دەکەوتنە بەر هێرش و پەلاماری گەلە کۆمەی ڕێکخراوە چەپە توندڕەوەکان، ڕێکخراوە دژە فاشیستیەکان، ڕێکخراوەکانی بێگانە و پەنا بەران، بەڵام بە هۆی گۆڕانکاری لە پەیڕەو و پرۆگرام و بانگەشەی قوتکردنی هەر چەشنە پەیوەندییەک بە نازیزم دانە دواوەی هەر نوچە و هەواڵێکی لەم جۆرە، دەرگەیان بە ڕوودا کرایەوە و توانیان لە هەڵبژاردنەکانی ڕابردی بگەنە کورسی کۆمونەکان، ئەم پارتە بەرز بوونەوەی ئاستی بێکاری، باری نالەباری پیر و گەورە ساڵانی خانەنشین، گرفت و چارەڕەشییەکانی تری کۆمەڵگای سویدی بە ڕێژەی زۆری بێگانەوە گرێ دەدا، سەرنجەکانی خۆی لەسەر هەڵە و کەم و کوڕی و لایەنە لاواز و نێگەتیڤەکانی خەڵکی بێگانە لە لایەک و هەڵە و کەم و کوڕی و گەندەڵکاری بەشێک لە کاربەدەستانی حکومەتی سوید خەست دەکاتەوە، سەرنج دەخاتە سەر پەرەگرتنی ئیسلامی سیاسی لە نێو ڕەوەندی بێگانە و هەڕەشەکانی ئەم ڕەوتە، بۆ سەر کۆمەڵگای سویدی ئەمیش بە خستنە بەرچاوی برە و دان بە داب و نەریت و ڕەفتاری توند ڕەوانەی ئەم ڕەهەندە بەرامبەر بە ئازادی ژنان، داسەپاندنی سەر پۆش، پێچانی سەرتاپای لەش و لاری ژن، دوور لە پێشاندانی ستاتیکا و ڕێژەیەکی زانستییانەی بێگانەی بە ڕچە ئیسلام و بێگانەی بە ڕەگەز لە ئایین و ئاینزاکانی تر.

ئەم پارتە بەرزبوونەوەی ئاستی بێکاری، بەربڵاوی تاوان، دەستدرێژی سێکسی، توندوو تیژی دژی مێینە، زۆری منداڵ و گەورەیی قەبارەی خێزانی بێگانە و پەنابەر، دادۆشینی هەرچی زیاتری پارە و داهاتی کۆمۆنەکان، ژیان و گوزەران کردن لە سەر سۆسیال کە بریتییە لە باجی زۆر و گران لە سەر داهاتی تاکی سویدی بە گۆتەی ئەوان، کار نەکردن و تەوەزەلی، دەداتە پاڵ خەڵکی پەنا بەر و بێگانە و بەم میتۆدە ڕەگەز پەرستانیە تاوانباریان دەکا.

سڤارییە دیموکراتەنا زۆر پێگیری دەکا بۆ خستنە گەڕی سیاسەتی وەرنەگرتنی پەنابەر و بێگانە، لە گەڵ فرە کلتوری و ڕەنگا و ڕەنگی کلتورەکان کە کۆمەڵگا دەوڵەمەند دەکا ناتەبا و دڕدۆنگە، هەر لە بەرهەندێ دژایەتی ڕاژەی فێربوونی زمانی دایک بۆ زارۆیان و مێرمنداڵان دەکا،هەروا دەخوازێ هیچ بێگانە و پەنابەرێک لە زمانی دایک بەهرەمەند نەبێ، زمانی دایک لە بیرکا، لە بری زمانی دایکی زمانی سویدی لە هەموو شوێن و بۆنەیەک بەکار بەرێ، کە ئەمە لە ڕاستیدا دژایەتی کردنی ڕاستە و خۆی هەیە لەگەڵ بنەما سەرەتاییەکانی مافی مرۆڤ و بڕیار و پرۆتۆکۆلەکانی ڕێکخراوەی نەتەوە یەکگرتووەکان.

ئەم پارتە لە هەمان کاتدا چاوپۆشی لە قەیرانی ئابووری جیهانی و گەندەڵی دەسەڵاتدارانی بانک و بازاڕەکان و کۆنترۆڵی پۆلیسیانەی کۆمپانیا زەبەلاحەکان دەکا، بە هەمان هەناسە خۆ لە هۆکاری بنەڕەتی ئاوارە بوون و هەژاری و برسێتی و پەرەگرتنی نەخۆشی لەسەر ئاستی دونیا بە سویدیشەوە دەبوێرێ. لە خستنەڕووی پرسەکان و لە گوتاری سیاسی ئەم پارتە بۆنی شەرمئامێزی نازیزمی ئەڵمانی، فاشیزمی ئیتالی، ڕاسیزمی تورکی زۆر بە سانایی دەکرێ.

١٠\٩\٢٠١٠ - ئوپسالای سوید
ماڵپه‌ڕی که‌ریم سه‌رکه‌ش