١٦\١\٢٠١١

دروود لە گیڤارا، سڵاو لەو گەلەى بە بێمۆڵەت رژانە سەر شەقامەکان.

هیوا رەش    

دواى زیاتر لە چارەگە سەدەیەک حوکمڕانیى دەسەڵاتدارانى تونس و بەڵێنى باقوبریق، دوێنێکە و لە ڕۆژانى نیوەى یەکەمى ساڵى نوێدا بە گیانى پڕ حەماسەت و بەرخودان ، گەلى تونس ساڵى تازە و داڕمانى حوکمى کۆن و چاوەڕوانى حوکمى تازەیان پیرۆز کرد ، ئەو دیمەنانەى موچڕکى شادى بە جەستەمدا هێنا زۆر بوون ، کاتێک چەکدارێکى وەزارەتى ناوخۆ لە باتى ئەوەى دەست بۆ تفەنگەکەى ببات دەستى ئەخستە نێو دەستى خۆپیشاندەران و ڕوومەتى یەکتریان ماچ ئەکرد ، ئەو کاتەى وێنەى سیمبولى شۆڕشگێڕیى جیهانیى (گیڤارا) هەمیشە ئامادە بوو لە کات و ساتە پڕ هەڵچوون و ڕابوونەکانى ستەم بە دەستى پیر و لاوى توڕە لە ناعەدالەتی ئەشەکایەوە ، خوێنى لاوێک و گرانییەکى ناکاوى بازاڕ موعجیزەى خوڵقاند ، دەسەڵاتێکى دیکتاتۆر و گەندەڵى ڕاماڵى ، دوێنێکەش بوو لە ئەمارەتێکدا کە ئێمە بە دواکەوتوو ناوزەدى ئەکەین ، وەزیرى ناوخۆ بە سۆنگەى گیان لە دەست دانى لاوێکەوە لە ژێر کاریگەریى ئەشکەنجەدا دەست لە کار کێشانەوەى خۆى ڕاگەیاند .

لاى ئێمە، لە نیشتمانى ئەنفال و کیمیا باران و جینۆسایددا، دواى پێشکەش کردنى بەهادارترین سەرمایەى خەبات کە گیانى دەیان هەزار لە ڕۆڵەکانى گەلەکەمان بوو. بە (پیرەمێرد - پیرەژن - کچ - کوڕ - لاو - مناڵ - سڤیل - چەکدار - هەژار و دەوڵەمەند)ەوە، بە تەواوى چین و توێژەکانى کۆمەڵگاوە، وا بیست ساڵمان بەسەر دەربازبوونمان لە ستەمى نەتەوایەتیدا تێپەڕاند ، کەچى تا دێت ، بێکار تر ، بێئاو تر، بێکارەبا تر، بێخزمەتگوزار تر ئەبین و هاوشانى ئەوانەش ناعەدالەتى، نایەکسانى ، ناشەفافى ، نادیموکراسى ، نائارامى و ناڕەحەتى زیاتر ڕوومان تێ ئەکات .

بمبوورن لەوەى لە دوێنێ شەوەوە سەرقاڵى ئەم نووسینەم بووم بەڵام بێکارەبایى مۆڵەتى نەدام بیخەمە بەرچاوى خوێنەرانى ئازیز ، لە دوێنێوە مناڵەکانم لەبەر تاریکى سەعى ئەکەن و بەو چوار بەرمیلە نەوتەى لە خاکى نغرۆ لە نەوتدا 500 هەزار دینارى پێدراوە بۆ گەرمبوونەوەى مناڵەکانم 2 سۆبەى هیسکەر بە نەوتى چەورم بۆ گڕ داون ، لە دوێنێوە تاو نا تاوێ سەرێک ئەکێشمە دەرەوە و دڵم بۆ دراوسێ نەدارەکانم ئەبێت بە بریان و ئەڵێم خۆزگە بمزانیبایە کامیان بێنەوت و بێچرا و بێسۆبایە تا میسقالێک لە بارى قورسى سەرشانى ئەم شەوە ئەنگوستە چاوەى بتەکێنم ، غەمى من و هەموو تاکێکى گەلەکەم بەس هى دوێنێى سەرما و سۆڵەى بیکارەبا نیە ، بەڵکو غەمى هەزاران شەوى چاوەڕوانییە لە ڕزگار بوون لە گەندەڵى ، ناعەدالەتى ، دەرکردنى سامانى سەر و ژێر زەوى و ئاسمان لە چنگى حزب و گێڕانەوەى بۆ خاوەنەکەى ، بەڵام ئەوەتا لە باتى وەدیهێنانى ئاواتى لە مێژینەمان تازە بە تازە چاوشارکێ لەگەڵ بودجەدا گەرمتر ئەکرێت ، ئازادى لە قاڵب ئەدرێت ، سامانى زیاتر بە سکاڵا لە ڕۆژنامە و ڕۆژنامەوان و نووسەرانى گەلەکەم کۆ ئەکرێتەوە ، مووچەى زیندانیانى سیاسى لووش ئەدرێت ، یەک حکومەتى دوو ئیدارەیى و دوو ئاساییش و دوو پۆلیس و دوو چاودێرى دارایى و دوو هێزى پێشمەرگە و دوو ڕەنگیى دووڕەگیى برەوى پێ ئەدرێت !!

هەموو ئەمانە بە لایەک ، تۆ بڵێى سەرانى پارتى و یەکێتى و پەرلەمانتارە هەمیشە دەستبەرزەکانیان تا کەى خۆیان لە ئاستى داواى ڕۆڵە سەربەرزەکانى گەل لە گێلیى بدەن ، تۆ بڵێى بیر لەوە نەکەنەوە کە ناتوانن بە پرۆژە یاساى ڕێکخستنى بە مۆڵەتى خۆپیشاندان بەر بە توڕەیى جەماوەر بگرن ؟ ئەوەتا خۆ ڕاپەڕیوانى تونس مۆڵەتیشیان وەر نەگرت و ڕژانە سەر شەقامەکان و ڕوخسارى قێزەونى دیکتاتۆر و گەندەڵکارانیان ڕەش کرد ، جا کە میللەت توڕە بوو لە کوێ چاوەڕێى مۆڵەت ئەکات ؟ !

ئەگەر بیست ساڵ لەمەوبەر چارەنووسى ئاییندەى گەلەکەمان نادیار و لە مەترسیدا بووبێت ئیتر نازانم دواى بیست ساڵ چاوپۆشى تا کەى چاوەڕوانیى ؟ ئەمە پرسیارێکە و پێویستە پارتى و یەکێتى هەڵوەستەى جددى لەسەر بکەن بۆ ئەوەى بە سۆنگەى ئەوانەوە جارێکى تریش کەلێن بۆ دوژمن دروست نەبێتەوە دزە بکاتە ناومان و نیشتمانەکەمان ئەنفال بکەنەوە ، قیرووسیاه لەوەى کەرکوک 3 ئیدارەیە و بەعسییەکانیش هێدى هێدى ئەگەڕێندرێنەوە سەر شانۆى سیاسى ، دەبا بیر لە لا بردنى ستەمە سیاسى و ئابورى و کۆمەڵایەتییەکانى سەر گەلەکەمان بکرێتەوە چونکە دەمێکە پێشینان وتوویانە : هەموو شتێک لە باریکیدا ئەپچڕێت تەنها زۆرداریى لە ئەستوریدا ، بە دڵنیاییەوە سبەى لە ئەمڕۆ درەنگترە .

ماڵپه‌ڕی هیوا ئه‌حمه‌د