|
دیسانەوە بۆ تەها
بەروارى!
بەشدار عه‌لی
رێک دوو مانگ بوو کابینەى حکومەتەکەت راگەیاندرا بوو،واتە دوو مانگ بوو
تۆ لە سوید گەرابویتەوە و بوبویتە وەزیرى وەرزش و لاوان،لەبەر ئەوەى
ماوەیەکى زۆر بوو لە ئەوروپا دەژیایت و نزیکایەتیەکت لەگەڵ گەنجانى
کوردستان نەبوو و ئاگادارى وەزعیەت و گوزەرانى خەڵکى کوردستان بەتایبەت
لاوان نەبوویت و بێئاگابوویت لە گوزەرانێک کە بەدرێژایى نزیکەى دوو
دەیە خەون و خولیاکانى گەنجان و لاوانى کرد بە سەراب!،بێخەبەر بوویت لە
کۆمەلێک نەخۆشى کە گەنجانى بە کۆمەڵ راپێچى مەرگ دەکرد،بۆیە وەکو
گەنجێکى ئەو کوردستانە کە ساکارترین گۆرانکارى و چاکسازیش لە ژیانى
لاوان و خەڵک بەبەروپێشچوون دەزانین خەمخۆرییەک بۆ
هاوتەمەنانم،نامەیەکم لەرێگاى راگەیاندنەکانەوە ئاراستەکردیت و لە
کۆمەڵێک کێشە و گرفت ئاگادارم کردیتەوە،بەڵام بەداخەوە دوایى دوو ساڵ و
لەسەروبەندى تەواو بوونى وەزیفەکەت و کۆتاى هاتنى کابینەى حکومەتەکەت
دووبارە ئەو نامەیەت بۆ دەنێرمەوە، هەموو شتێکت کرد بەس بەلاى کیشە و
گرفتەکانى گەنجان و لاواندا نەچوویت و هەر بەئاگا نەهاتیەوە،تاکە
ئیزافەیەکت لەگەڵ خۆت لە ئەوروپاوە هێنات سازکردنى ڤیستیڤاڵى شەکراو
خواردنەوە بوو بۆ خۆت و نزیکەکانت !
پێم باشە دیسانەوە چەند شتێکت بیر بهێنمەوە،کاک تەها ئەوکاتى پێمگووتى
کێشەى لاوانى کوردستان ئەوە نیە کە لە زمانى بەناو رێکخراوەکانى گەنجان
و لاوان دەبیستیت کە مۆڵەتیان لە دەسەڵاتى سیاسى وەرگرتووە،بۆیە
ئاگاداربە و گوێیان لێمەگەرە ئەوانە دوژمنى گەنجانن و نوێنەرایەتى
گەنجانى کوردستان ناکەن،ئەوان کۆمەڵێک بەچکە کادیرى حیزبن و وەکو
بەرپرسانى ترى ئەو وڵاتە ڤایرۆسى گەندەڵى لێیداون و هەڵپەى سامان
کۆکردنەوەن،بەڵام لەوان حیزبیتر بیرت کردەوە و بەداخەوە ئەگەر تەمەنى
کابینەى حکومەتەکەت 10 ساڵى تریش درێژبیتەوە ئومێدم نیە و ناتوانى
داهێنانێکى تر بکەیت.پێمگووتى گەنجان بێزار و سەرگەردانن و بەلێشاو بۆ
دەرەوە کۆچ دەکەن،دەست بۆ خۆکوژى و کۆتایهێنان بە ژیانى خۆیان
دەبەن،ماددەى کهولى و ئاڵودەبوون بە ئەفوین و کۆکاین بۆتە دیاردە لاى
گەنجانى کوردستان،لە خوێندن دادەبڕێن و ئاستى دەرچوون ساڵ لەدوایى ساڵ
روو لە لێژییە و ئومێدێکیان بە سبەینێى باشتر نیە،کچان و کوڕانى لاو لە
کەلتور و فەرهەنگى دواکەوتوویى زاڵى کۆمەڵگا توڕەن و چارەسەرنەبوونى
کێشەکانیان دووچارى نەخۆشى دەروونى کردوون ورۆژانە لە دەشت و دۆڵەکان
زیندەبەچاڵ دەکرێن،نەبوونى و بێ پارەى دەستى خستۆتە بیناقاقەى زۆرێک لە
گەنجى کوردستان و ناچار بە کەمترین پێداویستییە رۆژانەییەکان
کراون،لەملاشەوە مناڵە بەرپرسەکان کە دەستیان بەسەر سامانى خەڵکدا
گرتووە و بە ئارەزووى خۆیان یارى پێدەکەن،جا ئەو جیاوازییە هۆکارێکى
سەرەکى دارووحانى گەنجانە و بێ هۆنیە گەنجان لە شەقامەکان هاوار دەکەن
دەڵێن (هیچ شتێک نیە ئێمە بەم مەملەکەتە ببەستێتەوە،تەنها
پێلاِوەکانمان نەبێت)،وەرە هێشتا باشە لەهۆکارى دورست بوونى ئەو
کێشانەوە دەست پێبکە... .
تۆ نەهاتى یەک دانە پرۆژە و بەرنامە لەم بوارانە بخەیتە کار(لەگەڵ
ئەوەى لە نزیکەوە ئاگادارم چەندین پرۆژە لەم بوارانە لە بەردەستا بوون
و پێشکەش بە وەزارەتەکەت کراوە ،بەڵام بە فەرامۆشیت سپاردن)چوویت لە
شار و شارۆچکەکان بە تایبەت لە ئیدارەى سلێمانى کۆمەڵێک فەرهەنگخانەت
کردووە کە بووە هۆى بێزارى لایەنەکەى بەرامبەرت،چونکە کردتان بە شوێنى
کۆبوونەوەى حیزبى و سەرەنجام لەژێر فشارى لایەنى بەرامبەر خەریکە
هەموویان دادەخرێن،سەرەنجام دورست بوونى وەزارەتێک بەناویان گەنجان و
لاوانى زیاتر توڕە کرد.
بۆیە لێرەدا حەقى خۆمانە بیڵێینەوە،هەموو ئەو دامودەزگا و سەتنەر و
رێکخراو و پرۆژە و بەرنامانەى لەچواچێوەى دەسەڵاتى سیاسى لە کوردستان
بەرێوە دەچێت،ناتوانێ ببێتە جێگاى ئومێدى خەڵکى کوردستان و ئوزقاڵێک
گەنجان و لاوانى کوردستان دڵخۆش ناکات،چونکە لە پشتەوەى هەموو ئەمانە
عەقڵیەتێکى دۆگما و نا ٍعەقڵانى تەسکى حیزبایەتى بوونى هەیە،بەکردەوە و
دەسەڵاتیش بینیومانە لە کارنامەى ئەو حیزبانە شوێنێک بۆ ئازادى تاک و
پێداویستیەکانى خەڵک و کەمکردنەوەى کێشە و گرفتەکان بوونى نیە.کاک تەها
تۆش تازە بچۆوە ئەوروپا باشترین جۆرى شامپانیا نۆش بکە و رەخنە لە
دەووروبەرەکەش بگرە!!
Bashdar_net@yahoo.com
|
