٢٩\٤\٢٠١٥

    دیسان مەم و لێوـ!

دارا خونچە

کە لێوەکان.. کە گۆی مەمکان
                   تا ئەوپەڕی مەستییم دەبەن
    ئیدی ئەمن
    شیلە و (شەراب)ی دەنکە ترێم گەرەک نیە..
    *    *    *
تا دامەنی باخچەکانی بوژانەوەش
                                 خۆم رانەگرت؛
هێڤی و هومێد؛

          هێشوو.. هێشوو
          وە چڵە هەرە بەرزەکانی سەرمەستییم
                                  شۆڕ ببوونەوە
   ئەوەی وە کۆست و رەشبینیی ناودێر دەکران
        نەک لە مەژییم
                   لە خەونیشم شوونبزر بوون..
کەچی؛
چش لە ئاسۆ و پۆپەی سینگی
                         بەژنوباڵای وێردەکانم
چش لە خواستی تەڕوبڕی
                  پەیڤ و پاچڤەی*
                      پێنووسی نێو دەستوپلانم...
نە یەک داری شەنگەبییم دیت
         تا تێیگەینم؛
                       چیدی نازم وەسەر نەکا
        چون قژی وی*
         رێک لاسایی قژی شۆڕی یارۆی منە و
                         نەوەک وەپێچەوانەوە..
نە یەک بنە دارمێویشم لەو ناوە دی
تا پێی بێژم:
کە لێوەکان.. کە گۆی مەمکان
                   تا ئەوپەڕی مەستییم دەبەن
    ئیدی ئەمن
    شیلە و (شەراب)ی دەنکە ترێم گەرەک نیە..
    تکا دەکەم
    وە دار سێو و
                 هەرمی و هەنار و هەلووژە و
    هەرچی تۆرمەی* دار و درەختی
       بەر و بەرهەم خڕوخۆڵ و پڕ وەدەستە

       رابسپێرە:
           ''ئیدی ئەمن تەنیا و تەنیا
                                  مەمم بەسە''!

____________________________

* پاچڤە: وەرگێڕان و هەڵگێڕانەوە، لێرە مەبەست لە وەرگێڕان و راڤە و لێکدانەوەیە وە نووسین.
* وی: ئەو، ئەڤ.
* تۆرمە: توخم، رەگەز، رەسەن.

کۆتاییەکانی نیسانی ٢٠١٥ - لەندەن

ماڵپه‌ڕی دارا خونچە