٤\٢\٢٠١٧

دیسان مەرگی تاڵی کۆڵبەران!

دیسان قوربانیانی دەستی سیستەمی سەرمایە!

نەجم محەمەد     

بە داخەوە کۆمەڵێ کۆڵبەری ھەژار و دەست کورت و زەحمەتکێش لەم وەرزی سەرمایەدا لە سنوورە بێ بەزەیی و دروستکراوەکانی (سەردەشت)ی رۆژھەڵاتی کوردستان بە ھۆی ھەرەسی بەفرەوە گیانیان لەدەست دا.. ئەم مرۆڤە زەحمەتکێشانە بۆ سەیران و خۆشیی و گەشت و وێنەگرتن و جوانیی سروشت لە کاتی بەفرباریندا ڕوویان نەکردبووە ئەو چیا و دۆڵە بەڵکو بە دووی بژێوی و گەڕان بە دووی ناندا روویان کردبووە ئەوێ.. ئەوان بە چلەی سەرما بە گڕەی گەرما لە جوانیی بەھار و ماتەمی پایزدا هەردەم و ھەمیشە لەوێ بوون و ماندوو و شەکەتی رەنج بوون تا سفرەی ماڵەکانیان خاڵی نەبێ.. تا ماڵ و منداڵەکانیان بێ بەرگ نەبن، ئەوان لێرە ئازار و دەردەسەرییان دەچێشت تا گوڵی بزە لەسەر لێوی منداڵەکانیان بگەشێتەوە.. تا ژیانی وردیلەکانیان حەساوە بێ.. ئەوان لێرە وەک ئاگر دەسوتان.. وەک بەفر دەتوانەوە تا ژیان ببەخشنە خۆشەویستانیان.

 
ئەو کۆڵبەرە خۆشەویستانە قوربانیانی دەستی سیستەمی سەرمایەن.. ئەو سیستەمە نامرۆییە ئەو مرۆڤە خۆشەویستانە و ملیۆنان مرۆڤی دیەکەی لەسەر گۆی ئەم زەمینە ناچار بە پەیداکردنی پاروە نانێک کردوە تا ژیانی خۆیان و ھێزی کاری خۆیان لە پێناویدا بفرۆشن.. تا نان بەدەست بهێنن، ئەمە لە کاتێکدایە بە بارتەقای گەورەیی ئەم دونیایە نابەرابەرە سەروەت و سامان ھەیە کە بەشی ھەمووان بکا و لە ھەمووانیش زیاد بێ بەڵام سەرمایەداران لە پێناو قازانجپەرستیی و کەڵەکەکردنی سەرمایەدا ژیانێکی مرۆییانە و خۆشگوزەران بەو مرۆڤانە رەوا نابینن و مرۆڤ لە ژیانێکی سەخت و مەمرە مەژیدا رادەگرن و ناچار بە کار و پەیداکردنی پاروە نانێکی دەکەن و خۆشیان لە ژیانێکی شاھانە و خۆشگوزەراندا ژیان دەگوزەرێنن.

ئەو کۆڵبەرانەش مرۆڤن و شایەنی ژیانێکی مرۆییانە و خۆشگوزەرانن کە شیاوی مرۆڤ بێ، بۆ گەیشتنی مرۆڤەکان بە ژیانێکی مرۆییانە و خۆشگوزەران پێویستە خەبات بکەین دژی ستەمی سیستەمی سەرمایەداریی.. پێویستە یەکگرتوو و رێکخراو بین، بژی ژیان.. بژی مرۆڤ.. بژی کۆمەڵگای یەکسان، بمرێ سیستەمی سەرمایەداریی کە سەرچاوەی ھەموو گرفت و مەینەت و دەرد و ئازارەکانە.

ماڵپه‌ڕی نه‌جم محه‌مه‌د