په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٨\٩\٢٠١٨

    دوانزە هایکۆ.

سمکۆ ئه‌حمه‌د ره‌شید

رووژاوە هەوری بەهار و
کەوتۆتە سەر گازەرەی پشت
خاتوو زەوی
  *  *  *
دوورە وڵاتی
ئاوازی غوربەت دەژەنێ
شمشاڵی وجوود
  *  *  *
زەوی دەکوژێت
بە گەڵا کفن و دفنی دەکات
چەتەی پاییز
  *  *  *
دەمەو عەسران
لەخۆم ناچێ ، نایناسمەوە
سێبەرەکەم
  *  *  *
کائینێکە دەچێتەوە سەر سولالەی
رەنگی بەفر و شکۆی چیا
پێشمەرگە
  *  *  *
هەموو رەنگەکانی قڵپ کرەوە
ناو تابلۆیەکی سپی پێست
بەفر
  *  *  *
سووک سووک گوێیان هەڵخستووە
بۆ بیستنی تەپەی پێی هاتنی بەفر
شاخەکان
  *  *  *
بە بەرچاوی هەموانەوە
خۆی لە سمتی درەختە رووتەکان دەخشێنێ
ـ با ـ ی ورووژاو
  *  *  *
تابلۆکە پڕە لە هەڵە
چون لە تۆ ناچێ
مۆنالیزا
  *  *  *
دارتووی حەوشەکەمانم بڕییەوە
سێ رۆژ پرسەیان بۆ دانا
چۆلەکەکان
  *  *  *
جەستەی ئاوە
بارستێک پۆڵایە دڵی
دەریای ئیجە
  *  *  *
هەواڵی ژنە وەرزشکارەکانی دنیا
پێش هەواڵە نیشتیمانییەکان دەخوێنێتەوە
ژنە بێژەرێک.

 

 

smkoahmad3@yahoo.com
 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک