٢\٢\٢٠١٤

دوێنێ سەرى بەرزمان بۆ مووچە نەوى نەکرد
ئەمڕۆ سەربەرزانە داواى مووچە دەکەین.

نەجم محەمەد     

لە رابردوودا مامۆستایانى کوردستان ئەو دەمەى کە ڕژێمى ڕوخاوى بەعس دام و دەزگاکانى خۆى لە کوردوستان کێشایەوە و بۆشاییەکى ئیداریی دروست بوو لە کوردستاندا و مووچەى فەرمانبەرانى بڕى ئەو دەمە مامۆستایانى کوردستان دروشمى (سەرى بەرزمان بۆ مووچە نەوى ناکەین)یان بەرزکردەوە و بەرپەرچى ئەو سیاسەتەى ڕژێمیان دایەوە و هەڵوێستێکى گەورە یان نواند و بەردەوام بوون لەسەر دەوامکردن و خوێندن و فێرکردنى قوتابیان و خوێنکارانى کوردستان تەنانەت کەوتنە فرۆشتنى کەلوپەل و شتەکانى خۆیان لە پێناودا بینکردنى بژێوى خاوخێزان و ڕۆژانەدا و لە پێناو بەردەوامى دان بەپرۆسەى خوێندن و پەکنەکەوتنى ئەو پرۆسەیە لە کوردستان.

بە ڕاستى ئەو دەمە باروگوزەرانى خەڵکى کوردستان بە گشتى و مامۆستایان بەتایبەتى لە بارێکى زۆر سەخت و ئاڵۆزوگرانى و دەستکورتى و نەبوونى دابوو و هێشتا وەکو حکومەتى هەرێم دانەمەزارابوو و پەرلەمان نەبوو و دەسەڵاتێکى بەرەیى هەبوو بەڵێ ئەو دەم مامۆستایان لە گەڵ ئەم بارە ناهەموارەشدا بۆ ساتێک دانەبڕان لە پرۆسەى پەروەردە و فێرکردن و بایکۆتى دەوامیان نەکرد و دەوامیان هەڵنەپسارد و ئەو بۆشاییە ئیدارییەى کە دروست ببوو لە کوردستاندا مامۆستایان توانیان بە قوربانیدان بە خۆیان و خاوخێزانیان ئەو بۆشاییە پڕ بکەنەوە و مێژووش شایەدى ئەم هەڵوێستە گەورەیەى مامۆستایانە.

بەڵام ئەمڕۆ لەم هەلومەرجەى ئێستادا مامۆستایانى کوردستان مافێکى ڕەواى خۆیانە کە لەکاتى خۆیدا مووچەیان بدرێتێ و مووچەیان دوانەکەوێت و هەروەها سەربەرزییە بۆ مامۆستایانى کوردستان داواى ئە و مافە ڕەوایەى بکات و دەبێت سەربەرزانە داواى مووچەى خۆیان بکە ن لە حکومەتى هەرێم و سەریان نەوى نەکەن بۆ پێنەدان و دواکەوتنى مووچەکانیان خەبات و گوشارى جۆراوجۆر ئەنجام بدەن بۆ وەرگرتنى مووچە و دابینکردنى هەموو ماف و داواکارییە ڕەواکانى تریان ئەمە لە کاتێکدایە کە ئەمڕۆ دوێنێ نییە ئەمڕۆ خاوەنى حکومەت و پەرلەمان و دامودەزگا و ئیدارە و بودجە و نەوت و گومرگ و هتد ین هیچ پاساوێک نییە بۆ پێنەدان و دواکەوتنى مووچەى مامۆستایان و فەرمانبەران.

من وەک مامۆستایەکى دوێنێ کە خۆبەخشانە وانەم دەگوتەوە و دروشمى (سەرى بەرزمان بۆ مووچە نەوى ناکەین) بەرزکردبوەوە ئەمڕۆ من لەگەڵ ئەوە دانیم بایکۆتى دەوام بکەین و دەوام هەڵپسێرین لە قوتابخانەو خوێندنگاکاندا چونکە ئەمە تەنها گورزێگکى کوشندە دەدات لە قوتابیان و خوێنکاران و زەرەر لەوان دەدات و هیچى تر ئێمە نابێت بێدەنگ بین دەکرێت ئێمە لە دەرەوەى ناوەندەکانى خوێندن لە سەر شەقام و لەبەردەم دامودەزگا پەیوەندیدارەکانى دەسەڵات و حکومەتدا هەڵوێست و گوشار و خەباتى مەدەنیانە و هێمنانە و شارستانیانەمان هەبێت بۆ داواکردنى هەموو مافە ڕەواکانمان بە مافى مووچەشەوە با ناوەندەکانى خوێندن و قوتابیان و خوێندکاران نەکەینە قوربانى چونکە ماف و داواکارییەکانى ئێمە لاى دەسەڵات و حکومەتە نەک لاى قوتابیان و خوێندکاران و ناوەندەکانى خوێندن منداڵێکى پۆلى یەکەمى بنەڕەتى چ تاوانێکى هەیە بێبەش بکرێ لە وانەکانى خوێندن.

ماڵپه‌ڕی نه‌جم محه‌مه‌د