|
٧\٢\٢٠١١
دیاردەیەکى
ناپێویست و دزێو بۆتە (خوو).
هیوا رەش
گەر سەرنج بدەین ڕۆژانە ژاوەژاوێکى نەشاز شەقامەکانى شار دادەپۆشێت و
گەلێک جار دەبێتە مایەى سەرلێشێوانى شوفێران و ڕوودانى کارەساتى هاتوچۆ
و پێکدادان ، ئەویش (( ویقەویقى )) بێزارکەرى ئۆتۆمبیلەکانى پۆلیس و
ئاساییش و ئامبوڵانس حیزب اسعاف حیزب ە ، کە سەربارى ویقەویق و
هاتوهەرا نانەوە و تیژپەڕیى ، ڕۆنگسایدیش دەئاژوون .
ئەم ئێوارەیە 6 2 2010 ڕۆژى یەکشەممە کاتژمێر 40 : 5 خولەک من و
هاوڕێیەکم بە کارێک لە حەوشەى نەخۆشخانەى منداڵبوونى سلێمانى
وەستابووین و پۆلیسى پاسەوانى بەردەرگاکەش لە ژوورەوە سەرقاڵى
ئامادەکردنى خواردنى ئێوارە بوو ، بە تیژڕۆییەوە بەدەم ویقەویقەوە
ئامبوڵانسێکى شارۆچکەى دەربەندیخان خۆى کرد بە نەخۆشخانەکەدا ، هەر لەو
دەمەدا بە هاوڕێکەم وت : بە گۆڕى شەهیدان ئەم هەرایەش دەکات و نەخۆشى
خەتەریشى پێ نیە ، هەردووکمان چۆنێتى هاتنە ژوورەوەى ئامبوڵانسەکە و
وەستانەکەشى سەرنجى ڕاکێشاین و بە وردى دیقەتمان دا ، هاوڕێکەم ڕووى
دەمى لێکردم و بە پێکەنینەوە وتى : وەڵا هیوا عاقڵى ، خۆ هەموویان بە
پێى خۆیان دابەزین !
بەدەم گێڕانەوەى دیاردەیەکەوە سەرنجى پۆلیسە پاسەوانەکە و هاوڕێکەمم
بەلاى خۆمدا ڕاکێشابوو کە بە سۆنگەى ئەو ئامبوڵانسەوە هاتەوە یادم ،
بۆیان گێڕامەوە کە : لە ساڵانى نەوەدەکاندا ئامبوڵانسێکى سەر بە
شارۆچکەى چەمچەماڵ لێقەوماوانە بە تیژڕۆییەکى لە ڕادەبەدەر و بە
ویقەویقى مەرگئامێزەوە هەفتەى جارێک و دووجار لە چەمچەماڵەوە بەرەو
سلێمانى دەڕۆییشت ، دووبارەکردنەوەى ئەم ( پیشە ) یە گومان لە لاى
پۆلیسەکانى بەڕێوەبەرایەتى گومرکى چەمچەماڵ دروست دەکات ، بۆیە بڕیار
دەدەن لە بۆسەدا بن بۆى ، ڕۆژێکیان پێشى لێدەگرن و ناهێڵن بەشێوەى
جاران بەرزەگى بانان بۆى دەربچێت ، دواى خۆسوور کردنەوە و چەلەحانێیەکى
زۆرى کاکى شوفێر و دەنگەدەنگ لەگەڵ پۆلیسەکاندا ، پۆلیسەکان هەر سوور
دەبن لەسەر پشکنینى ، لە دواییدا تەماشا دەکەن لەبرى نەخۆش کەلوپەلى
گرانبەهاى شۆڤڵى بار کردووە و بە مەبەستى قاچاقچێتى و کڵاو لە سەر نانى
زاڵگەکان ئەم حیزەفێڵە دەگرێتە بەر ، هێشتا بە تەواوى لە گێڕانەوەى ئەو
باسە نەببوومەوە ، ئەو ئامبوڵانسەى کە بە پڕتاو خۆى کردبوو بە ناو
نەخۆشخانەکەدا بە هەمان شێوەى پێشووى بە ویقەویقەوە چووە دەرەوە !
بەهیوام ئەم نووسینەم سزاى شوفێرى ئامبوڵانسەکەى بە دواوە نەبێت و
بەڕێزى نەبێتە نێچیرى دیاردەیەک کە ساڵانێکە بۆتە باو ، بەڵکو داواکارم
لە لایەنە بەرپرسەکان لە هەوڵى چارەسەر و بنبڕ کردنیدا بن بەو تەرزەى
خۆیان پێیان باشە ، تا چى تر ژن و منداڵ زارەترەک نەبن و شوفێرانیش
سەریان لێنەشێوێنرێت و شەقامەکانیش هەراسان نەکرێن ، بێگومان ئەمە لە
لایەکى ترەوە دۆخێکى نائارامى شار پیشانى دەوروبەریش دەدات ، بە
تایبەتى ئەگەر بێت و لە لایەن ئۆتۆمبیلەکانى پۆلیس و ئاساییشەوە پیادە
بکرێت .
------------------------------------------------------------------------------------------------------------------------------
سیحرى دانەنانى بەڕێوەبەرێک بۆ (بەڕێوەبەرایەتى
گشتى کاروبارى مین)لە چیدایە؟!
یەکێک لە پیشە هەرەپیرۆز و ترسناکەکانى دواى ڕاماڵینى دامودەزگاکانى
حزبى بەعس لە کوردستاندا پاککردنەوەى خاکى بە مینڕێژکراومان بوو ،
سەرەتا ئەگەر بە هەڵەدا نەچووبم ڕێکخراوێک بە ناوى ( ئێم ئەى جى ) یەوە
بۆ ئەم مەبەستە سەرى هەڵدا و سەدان کوڕەهەژارى میللەتەکەمان لە پێناوى
بژێویدا بە نەشارەزایى چوونە ناو ئەم کارە مەترسیدارەوە ، دەیان کەسیان
لە کاتى مین هەڵگرتنەوەدا شەهید و سەدانیشیان بریندار و کەمئەندام بوون
، بە تێپەڕ بوونى ڕۆژکار ڕێکخراوى تریش پەیدا بوون و تا گەییشتە ئەوەى
کرایە مقاوەلات و بە تەندەر دەدرایە کۆمپانیاکان و قازانجێکى زۆر بە
کۆمپانیاکان و کرێیەکى کەمیش بە دیماینەر و تیم لیدەرەکان دەبڕا .
زیاتر لە 10 – 12 ساڵە بەڕێوەبەرایەتییەکى گشتى بۆ کاروبارى مین لە
سلێمانیدا کراوەتەوە ، ئەمە بە ناوەکەى بێت دەبێت حکومى بێت ، ئەگەر
حکومیش بێت دەبێت چ بەڕێوەبەرەکەى و چ کارمەندەکانى بە فەرمى بناسرێن و
وەکو هەر دەزگا و فەرمانگەیەکى دیکەى حکومى کارەکەیان بە خزمەت بۆ
ئەژمار بکرێت ، بەڵام ئەوەى تێبینى دەکرێت کارمەندانى ئەم
بەڕێوەبەرایەتییە زۆربەیان ( پێم وا بێت هەموویان ) تا ئێستا وەکو
کارمەندى فەرمى دانەمەزرێنراون و هەر بە گرێبەست کار دەکەن ، کە واتە
لە تەواوى ئەو مافانە بێبەشن کە پێویستە بۆ فەرمانبەرێک دابین بکرێت ،
بە تایبەتى خانەشینى و هەروەها دەرکردن ، کە ئەمە پایەیەکى لەقى زامنى
ئاییندەیانە بۆ ماڵ و منداڵەکانیان ، لە لایەکى تریشەوە تیایاندا هەیە
ئەگەر خوانەخواستە دووچارى ڕووداوێکى دڵتەزێن ببنەوە کە هەمیشە بە
حوکمى ئیشەکەیان لە ئانوساتدا ئامبازیان دەبێتەوە ئەوا بە گوێرەى ئەو
پەندە کوردییە حیسابیان بۆ دەکرێت کە دەڵێت : (( ئەگەر بۆ بۆرە پیاو
خۆت بدەیت بە کوشت ، دەڵێت : بە ئەمرى خوا مرد ! )) ، لە گەڵ هەموو
ئەمانەشدا کەسانێک هەن بەر لە دروستبوونى ئەو بەڕێوەبەرایەتییە لەو
بوارەدا کار دەکەن و بە درێژایى تەمەنى بەڕێوەبەرایەتییەکەش تیایدا
خزمەت دەکەن ، جگە لەوەى بوونەتە کەسانى پسپۆڕ و شارەزا ، خاوەن
بڕوانامەشن ، بەڵام وەکو ئەوەى لە بۆشایى هەوادا هەنگاو بنێن ناتوانن
پێشڕەوى بکەن و لە جێى خۆیاندا و لە نێو بازنەیەکى بۆشدا دەخولێنەوە ،
کەچى بەڕێزێک بە ناوى ( جەمال نادر حەمەد ) ناسراو بە ( حاجى مەسیفى )
لەوەتى ئەو بەڕێوەبەرایەتییە هاتۆتە بوون ، ئەو لەبەر ئەوەى
بڕوانامەکەى ڕێگەى پێنەداوە وەکو بەڕێوەبەرێکى گشتى دەست بەکار بێت ،
بەڵکو بە درێژایى ئەو هەموو ساڵە بە ( بریکارى بەڕێوەبەر ) لەوێیە ،
بریکار دەڵێم نەک جێگر کە واتە خەسڵەت و ڕواڵەتى بەڕێوەبەریى زیاتر لە
10 ساڵە بە باڵایدا بۆى بڕاوە ، خۆزیا جێگر بوایە و بە تێپەڕ بوونى کات
پلەى ئیستیحقاقى خۆى ببڕیبایە و بە پێى بڕوانامەکەشى بکرایەتە
بەڕێوەبەر ، نەک بۆ ئەوەى تاپۆکەى لێ نەسەنرێتەوە چۆتە بەر خوێندن و
ساڵانێکە بەڕێوەبەرایەتى ناوبراو ئیشوکار و نووسراوەکانى بە واژۆى (
بەڕێوەبەرى گشتى کاروبارى مین بە وەکالەت – جەمال نادر حەمەد ) ەوە
دەردەچێت ! جا نازانم کەسێکى شایستە و چالاک و لێهاتوو لەم کوردستانەدا
بوونى نیە لەو زیاتر یان دەبێت لە ئاستى ئەم مەتەڵەدا سەرى سوڕماومان
بلەقێنین و فیکەى نیگەرانى بکێشین !
( شتێکە دەڕوات و پاى نیە ، دەگریەت و چاوى نیە ، هاوار دەکات و دەمى
نیە ) ، هەموو کەس دەزانێت ئەم مەتەڵە – هەورە - ، بەڵام ( کەسێکە
بڕوانامەى بەکالۆریۆسى نیە ، ساڵانێکە هەر خۆى لەوێدایە و دائیرەکەى
بەڕێوەبەرى نیە ، بە وەکالەت ئیمزا دەکات بە - بەڕێوەبەریى - بۆى نیە )
هەر کەسێک هەڵى بێنێت ئەم مەتەڵە ، کەسێکى ژیرە و ناگەندەڵە ، بە
مەزەندەى من ئەمە بەدەر نیە لە کوتلەبازى و پێڕپێڕێنە ، نەکەى وبڤەیە ،
پیاوى پسپۆڕ و چالاک مەدوێنە ، ئەگەر لە مقەباش بێت پیاوى حزبى بۆ بێنە
، ئەوسا شازى گەندەڵى و ناعەدالەتى بەرهەم بهێنە .
ماڵپه‌ڕی
هیوا ره‌ش
|
