|
٢٥\٨\٢٠١٧
(ئەکرادی) ئاغای
مالکی؟
شەماڵ عادل سەلیم
(ئەکرادی) ئاغای( مالکی) ، یان جاشی ئاغای (مالکی )، زاراوەیەکی یان (
بیدعەیەکی ) نوێی نێو بەشێک لە ڕاگەیاندنە حیزبییەکانی هەرێمی بەتەمای
خودایە ، دیارە ئەو زاراوەیە یان باشتر بڵێم ئەو تۆمەتە ئاراستەی ئەو
کەسانە دەکرێت کە باس لە گەندەڵی هەردوو حیزبی ئۆلیگارشی ( پارتی
دیموکرات و یەکێنی نیشتمانی ) دەکەن ، ئەوجۆتە حیزبەی کە لەماوەی ٢٦
ساڵی حوکمیاندا ، لە پرسە چارەنوسازەکاندا هەرێمی بەتەمای خودایان
دووچاری شکست لەدوای شکست کردۆتەوەو خەڵکی خێرلەخۆنەدیوی ئەو هەرێمە
بێنازەیان دووچاری قەیران و بێ کارەبایی و بێ ئاویی و بێ مووچەیی و
تەقەشوف و نابەرابەری لە هەموو بوارەکاندا کردووە.
لێرەدا نامەوێ باسی شکستی حیزبە ئۆلیگارشییەکانی هەرێمی بەتەمای خودا
بکەم ،چونکە لای هەرهەموومان روون ئاشکرایە ، بەڵکو دەمەوێ وەڵامێکی
کورت و پوختی ئەو دۆڵەنگێوانە بدەمەوە کەماوەیەکە سەرقاڵی بەشینەوەی
تۆمەت و ناوزڕاندنی ئەو کەسانەن کە ڕاستییەکان وەک خۆیی و بەبێ ماکیاج
دەردەخەن و ڕاستەوخۆ و ڕاستگۆیانە پەنجەیان لەسەر هۆکاری کێشەکان و
بەلاڕێدابردنان دادەنێن ، هەربۆیە بە( جاش و ئەکرادی مالکی ) ناوزەدیان
دەکەن.
لێرەدا دەمەوێ زۆر ڕشکاوانە بەو دۆڵەنگێوانە بڵێم : ئەوەی ماڵی
لەشووشەبێت واباشترە بەرد لەخەڵک نەگرێت ، خۆ هەردوێنێ بەچاوەکانی
خۆتان بینیتان کە چۆن شاندەکەی بەغدای ئەنجوومەنی باڵای ریفراندۆم (
شاندی دانوستاندکار ) کە پێکهاتبوون لە بەرێزان (رۆژ نووری شاوەیس، د.
فوئاد حوسێن، سەعدی پیرە، محەممەد ئەحمەد، ماجید عوسمان، رۆمیۆ هەکاری
و ڤیان دەخیل) ، بینیتان چۆن دەست لەناودەستی نەیارە سەرسەختەکەیان (ئاغای
مالکی) دانابوو، هەروەک ئەوەی نەبایان دیبێت نەباران.
لێرەدا لەو دۆڵەنگێوانە دەپرسم و دەڵێم : ئایا کێ بوون ئەوانەی
دەیانگووت ، ئاغای ( مالکی) سەدام ئاسا خەریکی قڕکردن و برسی کردنی
کوردستانیانە؟
کێ بوو دەیگووت ئەو دۆخە شلۆقەی ئێستای
هەرێمی بەتەمای خودای تێدایە ئۆباڵی لە گەردنی (مالکی و
ئەکرادەکانییەتی)؟ کێ بوون ئەوانەی دەیانگووت هه‌رلایه‌نێک دەست
لەناودەستی (مالکی) دابنێت (جاشە ، بەکرێگیراوە ، ناپاکە ، ڕووخاوە ،
بێگانە پەرستە ، عیراقچییە)؟ ئەرێ بەراست کێ بوو دەیگووت ، ئاغای (مالکی)
قوتی خەلکی هەرێمی بەتەمای خودای بەناهەق بڕیووە و کێشەکانی نێوان
بەغداو هەرێمی قووڵترکردۆتەوە ، بۆیە دەبێ دادگایی بکرێت و سزا بدرێت ؟
کێ بوون ئەوانەی دەیانگووت بەغدا گرنگی نەماوە بۆ مانەوەی کورد تێیدا ،
بۆیە دەبێت کورد لە بەغدای ئاغای (مالکی) بکشێتەوە ؟ کێ بوون ئەوانەی
دەهۆڵیان دەکوتی و دەیانگووت ( ئاغای مالکی ) و حیزبەکەی و (ئەکرادەکانی)
بۆسەر بەرژەوەندی کورد و کوردستان گەورەترین مەترسینە؟
ئەرێ ئەو هەموو تاوان و تاوانکارییەی ( ئاغای مالکی و ئەکرادو و
جاشەکانی) تان چۆن وا زوو لەیاد کرد ؟ لەوەش گەرێن ، ئەی کاتی بەدیداری
ئاغای ( ئەبو ئیسرا) گەیشتن و دەست لەناودەست هەنگاوتان دەنا ،چیتان پێ
گووت ، چیتان پێ ڕاگەیاند ، بەچی پێدەکەنین ؟ ئایا لەم زوانە لەهەولێری
پایتەخت وهەروەک جاران فەرشی سوری بۆ ڕاناخەن؟
مەخابن ، ئەو سەرکردانەی هەرێمی بەتەمای خودا ، چەندە بێ کەسایەتی و بێ
زاکرە و بێ پرەنسیپ و بێ موڕالن.
ئاخ ، ئەو خەڵکە بێ نازو خێرلەخۆنەدیوەی هەرێمی بەتەمای خودا چەندە بێ
کەس و بێ خاوەن و بێ پشت وپەنایە.
ئاخ ، ئەو خەڵکەی ئەو هەرێمە خێرلەخۆنەدیوە چۆن بەدەستی ئەم بازرگانە
سیاسیانە گیریان خواردوە.
لەکۆتایدا هەر ئەوەندە ماوە بڵێم :
سەرکردەکانی هەرێمی بەتەمای خودا، ئێوە نەک تەنها ماڵتان لەشووشە نییە
، بەڵکو ماڵتان لەتەنەکەش نییە ، بۆیە واباشرە بەرد لە خەڵک نەگرن و
بەناهەق بە (جاش و ئەکرادی مالکی) تاوانباریان نەکەن ، چونکە جارێکی
دیکەش سەلماندتان کە کێ (جاش و ئەکرادی ئاغای مالکییە)؟
بەڵێ ، سەلماندتان کێن ئەوانەی نەک تەنها لەسەر دوو پەت ، بەڵکو چەندین
پەت مەیموون ئاسا یاری دەکەن.
ماڵپەڕی شەماڵ عادل سەلیم
|
