١٧\٣\٢٠١١

 ئێمە و تونس و میسر، یان ئەزموونى کۆمارى کوردستان.

هیوا رەش     

دەسەڵاتدارێتى کوردستان هاوچەشنى دەسەڵاتدارێتى ئەو وڵاتانەى ستەمە سیاسى و کۆمەڵایەتى و ئابورییەکانى دیکتاتۆرە تاکە کەسییەکان حوکمى تیا ئەکەن، لە هەڕەمى ئیداریدا چوون یەکن :

1 - زین العابدین بن على و حوسنى موبارەک کە لە دەسەڵاتدارێتیى داماڵدران و قەززافیش کە هەمان چارەنووس چاوەڕوانیەتى ، هەموو جومگەکانى ژیانى هاوڵاتییانیان قۆرخ کردبوو ، لاى ئێمەش وایە و ئەگەر نا ئەوە ملى من و ئەوەش شیرى دەسەڵات .
2 - سیستمى ئیدارى ئەو وڵاتانە لە چنگى حیزبدا جەم ببوو ، حیزبیش بوکەڵەى دەستى بنەماڵە ، و بنەماڵەش ئەڵقەى پەنجەى دەستى سەرۆک بوو ، لاى ئێمەش وایە و ئەگەر نا ئەوە ملى من و ئەوەش شیرى دەسەڵات .
3 - گەندەڵیى وەکو شێرپەنجەیەکى کوشندە تەواوى کایەکانى ژیانى هاوڵاتییانى ئەو وڵاتانەى داخوراندبوو ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
3 - داهاتى نیشتمانى ئەو وڵاتانە ئەکرایە دۆلار و بە ناعەدالەتى ئەخورا و بە ناوى جۆراوجۆرەوە لە سەر حیسابى سەرۆک و کاسەلێسەکانى بانکەکانى وڵاتانى دنیاى پێ پڕ ئەکرا ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
4 - ژیانى بچووکترین ئەتباعى سەرۆک لەو وڵاتانەدا لەگەڵ ژیانى هاوڵاتییەکى ئاسایى جیاوازى نێوانیان ئاسمان و ڕێسمان بوو ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
5 - حیزبى سەرکردە تەواوىکایەکانى ژیان و ئیدارەى وڵاتى لەو وڵاتانە گرتبووە دەست ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
6 - بە پارەى لافیتەى جیزب و وێنەکانى سەرۆکى ئەو وڵاتانە هەژارى بنبڕ ئەکرا ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
8 - سەرۆکەکان و حیزبەکانیان بە ( هەڵبژاردن ! ) لەو وڵاتانە بۆ هەتا مردن هاتوونەتە سەر کار ، ئەگەر لاى ئێمەش وا نیە ئەوە ملى من و ئەوەش شیرى دەسەڵات .
9 - کەرتى گشتیى ( خەڵک ) لەو وڵاتانەدا کراوە بە کەرتى تایبەتى ( دەسەڵات ) و کۆمپانیاى زەبەلاح ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
10 - ناسنامەى نیشتمانپەروەریى لەو وڵاتانەدا بەستراوەتەوە بە پیاهەڵدان بە شان و باهووى سەرۆک و حیزب و حکومەتەکەى لەو وڵاتانەدا ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
11 - سەرۆکەکانى ئەو وڵاتانە تا خۆیان لە ژیاندا بمێنن خۆیانن و دواى ئەوە بە نەوە بازى دەساودەس بە کورسییەکانیان ئەکەن ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
12 - سیستمى حیزب و حوکمڕانى لەو وڵاتانە بە موو جیاوازى نیە لەگەڵ لاى ئێمە ، ئەگەر وا نیە ئەوە ملى من و ئەوەش شیرى دەسەڵات .
13 - وێنە و وتە و شەکر شکاندنەکانى دەسەڵات لەو وڵاتانەدا ئەبنە میوانى هەمیشەیى هەواڵ و سەردێرى میدیاکانى ڕاگەیاندن ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .
14 - هەرچى ناشیرینى سیستمە دیکتاتۆرەکان هەیە لە وڵاتە دیموکراسییکەى منیشدا بە مکیاژ کراوى بوونى هەیە ، ئەگەر نا خوێنى من وەکو شیرى بەر دایک حەڵاڵی دەسەڵات بێ .
15 - لەو وڵاتانە ئەگەر هاوڵاتییان سەر بە حیزب نەبن بە پلە دوو دائەنرێن ، مافیان نیە ناڕەزایەتى بنوێنن ، مافیان نیە دابمەزرێن ، مافیان نیە خزمەت بکرێن ، ئەگەر بکرێت مافیان پێ نادەن ئۆکسجینى هەواى نیشتمانەکەشیان هەڵبمژن ، هەموو مافێک بۆ پیاوى حیزب و سەرکردە و گەندەخۆران ڕەوایە ، بەڵام نابێت هاوڵاتییان بپرسنەوە لە بێمافى خۆیان ، لاى ئێمەش وایە ئەگەر نا ئەوە ملى من و ئەوەش شیرى دەسەڵات .

لاى ئێمە کۆپییەکى بێڕتووشى وێنەى ئەو وڵاتانە بە زەقى دیارە ، بەڵام :

1 - لەو وڵاتانە خەڵکى بەشخوراو هاتنە شەقام و هێڵێکى ڕاست و چەپیان بە نێوچەوانى دەسەڵاتداران و سەرۆکەکانیاندا هێنا و کۆڵیان نەدا تا کورسى بەدەریان کردن ، لاى ئێمە هاوڵاتییان داواى گۆڕانى سیستمى ئیدارى و بەخۆداچوونەوەى دەسەڵات ئەکەن ، کەچى بێویژدانانە ناوى ( گێرەشێوێن ) یان بە باڵاماندا بڕى !
2 - لەو وڵاتانە خەڵکى ناڕازییان بە دەسیسەى ئەمریکا و ئیسرائیل تۆمەتبار کرد ، کەچى بێویژدانانە لێرە تۆمەتى ( دەستى دەرەکى ) ئەخەنە پاڵ ئێمە .

بارودۆخى پڕ لە نەهامەتى خەڵک و داواکانیان ، دیکتاتۆریەتى حیزب و تۆمەت و پاساوەکانیان ، سەرلەبەرى چوون یەکن ، کتومت وەکو یەک وان ، بە میسقاڵ جیاوازییان نیە تەنها :

1 - لەو وڵاتانە ئۆپۆزیسیۆن پاڵپشتى خۆپیشاندانەکانیان ئەکرد لاى ئێمە سەرپشتى ئەکەون.
2 - ئەو وڵاتانە خاوەن سنورى خۆیان و قەوارەى دان پێدانراو و دەسەڵاتى فەرمیى نێودەوەڵەتى و ئابورى سەربەخۆ و هێزى چەکدارى ڕێکخراون ، لاى ئێمە وا نیە ، ئەگەر داواى ڕووخانى ڕژێمى دەسەڵاتى پارتى و یەکێتى نەکرێت شەفاعەت بۆ پاکییان ناخوازین ، بەڵکو لە خۆشەویستى نیشتمان و چارەنووسى گەلەکەمانە ، بۆیە بە هەموو پێوەرێک ئێمە لەوان نیشتمانپەروەرترین و ئەوان هیچ نین جگە لە دەسەڵاتێکى میلیشیایى تاڵانچى ، هەتا ئەو ڕادەیەى بۆمان ئەکرێ ئەبێت هەوڵ بدەین حیزب لە دەسەڵات دوور بخرێتەوە و دەسەڵاتیش فێرى نیشتمانپەروەرى بکەین نەک نیشتمان دۆشین ، مەترسیى هەرە گەورەشمان دووبارە بوونەوەى مێژووە بە سەرماندا ، ئەترسین ئەزمونى خوێناوى تا ئێستا بڕست لێبڕاوى کۆمارى مەهاباد ، هەرچەندە کاتەکەى جیاوازە ، بەڵام بۆ گەلێکى بێ پشت و بێ سنورى دیارى کراوى وەکو ئێمە ، بە دوور نازانرێ خۆى دووبارە بکاتەوە ، چونکە دۆستە تەماعاوییەکانى ئێستامان هەمان ئەو دۆستە دێرینانەى کۆنن کە یەک بەرمیل نەوت بە یەک ملیۆن بەرمیل خوێنى ڕۆڵەکانى گەلەکەمان ناگۆڕنەوە ، بۆیە ترسان لەوەى مێژوو خۆى دووبارە بکاتەوە و خەونەکانمان ئاوەژوو بکاتەوە ڕەوایە ، چونکە ئەوسا ئێمە دڵمان نایە خاکى نیشتمانى خۆمان جێ بێڵین و ئەوانیش قاسەکانیان لە کوێ بێت ئەوێ بۆ خۆیان ئەکەن بە نیشتمان ، بەڵام ئاخ نە ئاڵاکەمان و داخ نە ئەزموونەکەمان هى ئەوانە و نە ئەوانیش ئەو جوامێرانەن هەڵوێستى وەکو پێشەوا ( قازى محەمەد ) بنوێنن ، ئاڵاکەمان بێتە خوار و ئەزمونەکەمان ژێر و ژوور بێت بە لاى ئەوانەوە بەقەد ژاکانى سەفتە دۆلارێک بایەخیان نیە ، ئەگینا هەقى وابوو بە دەم ( بڕوخێ ، بڕوخێ ) ەوە ( مام هێمن ) ئاسا بمانووتایە : بڕۆن بەغدا نیوەى ڕێتان بێ.

ماڵپه‌ڕی هیوا ره‌ش