|
|
|
٢٨\١٢\٢٠٢٢ ئەمن وەتۆم! ١
دارا خونچە ئەز چم دایە لە پێنج جاران هەشتا و هەفت و ٢ رەگی دووجای سێ دابەش هەشت! کەنگێ پەیوەستن وە منەوە؟! ٣ یەک ئۆکسگین.. دوو هایدرۆگین... ئەرکی زانا و دانا و مانای ئەویو جوانیین ٤ چ پەیوەندیی وە من هەیە؟! ٥ ئەمن ئاوم و ئاو دەناسم.. وە رەوتی وی هەنگاو دەنێم! ئەمن بەوڕۆ و دوونێ و پێرێی زمانەکەم شکۆمەندم؛ ٦ تاوناتاوێ لەسەر بانیژەی هۆنراوان وە ناز و لەنجەولارەوە لەسەر پەنجان سەما دەکەم تاوناتاوێ وە نێو سەربردە و سەرهاتان سەروەر سەرکەش پیاسان دەکەم ئەدگاری مە دەستەواژە و پەیڤەکانن.. ٧ یارۆیانم هەر کێی دەستی پێنووس دەگری و لەبەردەمی وشەگەڵێ دادەچەمێ هەست و سۆز و حەز و خولیا و جوانییەکانی ئاورینگ دەدەن! ئەز چم دایە لە بەرپێنەی رامیاربازیی و دینگەرایی ٨ لە کوتەکی نێرەوزیی و نەریتبازیی ٩ پووڵ و سامان و خەزێنە تاکە بەها و تاکە رەوشتی ئەوانە چ پەیوەندییان وە من هەیە؟! مە خاوەنی یەک زمانی هێندە پوخت و پڕ گەوهەرین؛ ئەز یەک وە خۆم ١٠ تەنێ شیلاوی چۆڕاوگەی پیت و پەیڤە تەڕەکانی تاهەتایێ دەمژیێنێ! ئەز چم دایە لەو ژیانەی زمانبڕا و زمان کورت بم دوور لە زمان بم.. بەستەزمان بم.. بێ زمان بم! ١١ ئەمن ئەوهام تاوناتاوێ لەسەر بانیژەی هۆنراوان وە ناز و لەنجەولارەوە لەسەر پەنجان سەما دەکەم تاوناتاوێ وە نێو سەربردە و سەرهاتان سەروەر سەرکەش پیاسان دەکەم ئەمن وەتۆم.. زمانم هەس.. ١٢ تا دەبێژی شکۆمەندم! ____________________________________________________ فەرهەنگۆک: ١- وەتۆ: ولۆ، ئەوها، ئاوها، ئیوها، ئاوەها، ئاوا، وا، بەو شێوە، بەو جۆرە. ٢- چ: چی. ٣- کەنگێ: کەی. ٤- دانا و مانا: وەک ''بەرد و مەرد''، شووشە و مووشە''، ''پەڕ و مەڕ'' و... تد، تەنێ لۆ ئەو وشانە ناشێ کە وە ''م'' دەستپێدەکەن. ٥- وە: بە. ٦- بەوڕۆ: بە ئەوڕۆ، بە ئەمڕۆ. ٧- ئەدگار: ئاکار، سەروگێلاک، بچم. ٨- بەرپێنە: پێدانە بەر پێی کەسەک تا بکەوی. ٩- نێرەوزیی: نێرینەیی. ١٠- ئەز یەک وە خۆم: من سەبارەت بەخۆم، من وەکو خۆم. ١١- بەستەزمان: زمان بەسترا، لۆ ئاژەڵ وەکاردێ کە زمانی نییە و وەک مرۆڤ چالاک و کردە نییە، لۆ کەسی بێوەی و هەژار وەکاردێ. ١٢- هەس: هەیە.
کانوونی یەکەمی ٢٠٢٢ - لەندەن
|
|
|
