٢٧\٢\٢٠١١

ئەرێ جەنابى وەزیرى ناوخۆ، ماوى؟!

هیوا رەش    

(موعەممەر قەززافى = مودەممەر قەززافى) سەرۆکى لیبیا بە ئاشکرا ڕایگەیاند کە جەنابى بە شۆڕش هاتۆتە سەر دەسەڵات و چاوى میللەتى - دواکەوتووى - لیبیاى کردۆتەوە و نەیارەکانیشى بە حەبخۆر و مشکەکوێرە چوواند و بەڵێنى دا تا دوا فیشەک ، تاکبەتاک ، ماڵبەماڵ ، خانوبەخانو ، باڵەخانەبەباڵەخانە ، شەقامبەشەقام و شاربەشار ڕاویان بنێت تا ( کورسیشەهید ) دەبێت .

(مودەممەر قەززافى) دەبوایە بە ئەدەبەوە باسى مشکى بکردایە و بیوتایە لە کیسەى مشک بە زیادبێت ، چونکە ئەگەر مشک نەبوایە ئەوا سیکۆتینى مشک دروست نەدەکرا و ئەگەر سیکۆتینى مشکیش دروست نەکرایە جەنابى بەو شێوەیە بە کورسییەکەیەوە نەدەنوسا .

ئەم پەتاى ( کورسى تا مردن ) ەى دووچارى سەرۆکە دیکتاتۆرەکان هاتووە نامۆ نیە و لاى ئێمەش نزیکەى نیوسەدەیە خۆرى هەڵاتووە و ئێستا لە دەمەدەمى ئاوابوونیدایە ، بۆ ڕاستى ئەمەش ئەو ناو و دەموچاوە هەمیشە میوانانەى تێکەڵ بە خەو و خۆراکمان بوونە چ لە شاخ و چ لە شاردا باشترین بەڵگەى زیندوون ، خۆمان و نەوەکانمان و نەوەى نەوەکانیشمان هەموویان ناوى جەلال تاڵەبانى و مەسعود بارزانى لە سێبەر زۆرتر بە دوایانەوە بووە ، کە دەڵێم لە سێبەر زیاتر ، مەبەستم ئەوەیە لە تاریکیشدا بەرۆکیان بەرنەداوین ، وەچەکانى دواى ڕاپەڕینیش لە ئێمە بەدبەختتر ناوى فەرخە سەرۆکگەلێکى زۆر و زەوەند تر پێیان ئاشنا بووە ، خودایە علاجێ ، چارەیێ ، ڕوحمێ ئامان ده ستم بە دامانت !

سەرۆکە دیکتاتۆرەکان گڵۆڵەیان کەوتۆتە لێژى ، لەبەر چاوى خەڵک کەوتوون ، دواى تێکشکانى بتەکانى تونس و میسر نۆرە گەییشتە سەر ( مودەممەر قەززافى ) ى لیبیا ، گەردەلوولى ڕاماڵینى دیکتاتۆرەکان بەردەوامە ، یەمەن ، مەغرب ، جەزائیر ، بەحرەین ’ ئوردن و هى دیش بە دوادا دێن ، هەموویان باس لەوە دەکەن بە شۆڕش ، هەڵبژاردن و پرۆسەى دیموکراسی هاتوونەتە دەسەڵات ، بە داخەوە سەرۆکەکانى لەمەڕ خۆشمان لە باتى پەند و وانە وەرگرتن ، پێَداگیریى لەسەر هەمان بالۆرە بێزراوەکەى ئەوان دەکەنەوە و ناڕەزایەتى دەربڕینى جەماوەرى کوردستان بە ناڕەوا دەزانن و بە ناڕەواش تۆمەتى جۆراوجۆرى نەخوازراویان دەدەنە پاڵ و لە باتى مشک و حەبخۆر و دەستى ئوسامە بن لادن ، بە ئاژاوەچى و گێرەشێوێن و دەستى دەرەکى ناویان دەزڕێنن .

دەرکەوت تۆکمەترین سیستمى دیکتاتۆرى رژێمى لیبیایە ، ئەویش لە ڕەفتار و بڕیارەکانى ( موعەممەر قەززافى ) سەرۆکى وڵاتەکە خۆى پیشان دا ، وێڕاى سووربوونى بنەماڵەى قەززافى لە بە خوێن سوورکردنى دەستى خۆیان بە کوشتوبڕى خەڵکى ڕاپەڕیو ، زۆرێک لە بەرپرسەکانى سوپا ، پۆلیس ، ئاساییش ، فڕۆکەوان و دیپلۆماتکاران ، ئەو ستەم و ناهەقییەى سەرۆکە خۆسەپێنەکەیان پێ قبوڵ نەکرا و دەستیان لەکار کێشایەوە ، لە نێو هەموو ئەوانەشدا بەڕێز - وەزیرى ناوخۆ - ى وڵاتەکەیان بوو ، کە جگە لەوەى دەستى لەکار کێشایەوە و بەرەى زۆرداریى جێهێشت ، چوونە ڕیزى بەرەى گەلیشى بە بوێرانە ڕاگەیاند ، کەچى لەم نیشتمانە چکۆلانە زامدارکراوەى ئێمەدا کە دەیان کەس لە خەڵکى ڕاپەڕیو لەسەر داوا کردنى مافى ڕەواى خۆیان خوێنیان بە ناهەق ڕژا و هەندێک لە جگەرگۆشەکانمان شەهیدیش بوون - وەزیرى ناوخۆ - نەک نە باى دیوە نە باران ، بەڵکو مێشێکیش میوانى نیە !

ئەم ڕووداوە ناوخۆییانەى کوردستان لە چەند ڕۆژى ڕابردوودا کە خەڵک ڕژانە شەقامەکان و توندوتیژى لێکەوتەوە و لەسەر دەستى چەکدارەکانى وەزارەتى ناوخۆ و پاسەوانى بارەگاکان و میلیشیاکانى حیزبەکەى وەزیرى ناوخۆ خۆپیشاندانەکان خڵتانى خوێن کرا ، بە هەموو پێوەرێک وەزیرى ناوخۆ بەرپرسى یەکەمى ئاکامەکانیەتى و دەبوایە هەڵوێستی خۆى دەرببڕیبایە ، ئەگەر هێزەکان بە ئیعازى جەنابى نەجووڵاون و بێئاگایە لێیان ، دەبوو بە سۆنگەى ئەو سەرکێشییانەى ئەو هێزانە ئەنجامیان داوە و تاکەکانى وەکو بکوژ ڕەفتاریان کردووە و بە تەقە وەڵامى خۆپیشاندەرانیان داوەتەوە و خۆپیشاندانەکانیان خوێناوى کردووە دەستى لەکار بکێشایەتەوە ، لەبەر ئەوەى : 1 - سنورى دەسەڵاتى ئەویان بەزاندووە ، 2 - کردەى کوشتنى تێدا ئەنجام دراوە ، بە دیوێکى تریشدا ئەگەر بە فەرمانى جەنابى بەرپەچى خۆپیشاندەران دراوەتەوە و ئاکامە خوێناوییەکەى لاى ئەو نەخوازراوە ، هەر دەبوو دەستى لەکار بکێشایەتەوە بۆ ئەوەى خۆى لەو بەرپرسیارێتییە مێژووییە بتەکێتێت .

جەنابى وەزیرى ناوخۆ ، لە بێدەنگیت سەرسوڕماوم ! مەزەننەى خراپ و ئەگەرى ناپەسەندیش ئەوەیە ، تۆ ڕەزامەندى خوێناوى کردنى ڕووداوەکان بیت ، لەم حاڵەتەدا دەبێت داواى دەست لەکار کێشانەوەت لێ بکرێت ، ئەگەر دڵت نایەت کورسییەکەشت جێبهێڵیت پێویستە داواکارى گشتى لە ڕێگەى دادگاوە کارى پێویستت لە بەرامبەردا بکات ، لە کۆتاییدا دەڵێم : تۆ بڵێى باى وەزیرى ناوخۆى لیبیات لە دەست نەیات کە زیاتر لە چل ساڵە سیستمێکى دژەگەلى بە گەندەڵى و نادادپەروەرى زاخاوى دەکات ؟ وەڵامێکى چەند وشەیى ئەم پرسیارەم بۆ خۆت جێدەهێڵم ، دڵنیام بێوەڵامیشم بکەیت ، مێژوو ناهێڵێت بێوەڵام بین .

لە نووسینەکەم نەبووبوومەوە لە کاتژمێرى یەک و پێنج خولەکى دواى نیوەشەو کەناڵى ئاسمانى - العربیە - دا ، بەڕێز ( شەلقەم ) نوێنەرى لیبیا لە نەتەوە یەکگرتووەکانم بینى ، دواى هێرشێکى مەردانە بۆ سەر سەرۆکى وڵاتەکەى ، ئینجا دەستى بە گریان کرد بۆ تاوانى بە خوێناوى کردنى جەماوەرى گەلەکەى و سەنگەرى بەرەى دەسەڵاتى جێهێشت ، چووە سەنگەرى گەلەوە ، منیش هاوکات موچڕکەیەکى حەپەسان و گریانێکى ناوەخت دایگرتم .
 

ماڵپه‌ڕی هیوا ره‌ش