|
١٧\٩\٢٠١٠
ئێرە ناوچەی ژەهری
مارە ناکۆکی لەسەرەکانە!
سەلام عەبدوڵا
ئایا کەس بیستویەتی خاوەن ماڵێک یان گەلێکی
سەر ئەم ئەستێرە سەوزە لەبارەی ماڵ و خاکی خۆی بڵێت(ماڵە کێشە
لەسەرەکە)یان(ناوچە ناکۆکی لەسەرەکان)؟
بەڵێ، کوردان تاقە میللەتی ئەم زەمینە، خانەوەنی ئەم"داهێنانە"ن، زۆرێک
لە سیاسەتمەدارو رۆژنامەو هەفتەنامەی بلیمەتی عەیار بیست و
چواری"ئۆپۆزیتسیون"و نیشتمانپەروەر و"حەقبێژ"و دڵسۆز" هەیە، ئەگەر لە
بەکارهێنانی ئەو پێناسە سەقەت و رسواکەرە پشکی شێریان بەرنەکەوتبێت،
ئەوا پشکی گورگیان هەیە!
ئەم ناوچە پەراوێزو پشتگوێخراوانە، وەک بڵێی بەشێک نەبن لە مێژووی گەلی
کوردستان: بۆ نموونە ناکرێ بەراوردکاری لەنێوان کتێبخانەی گشتی مەندەلی
و کتێبخانەی گشتی سلیمانی و هەولێرو کۆیە و تەنانەت کەلاریش بکرێ،
چونکە یەکەمەکەیان کلاوە شڕێکە و لەبری شوێنی کتێب و خوێندن، کراوە بە
زبڵخانەو ئەوانی تر بە شان و شەوکەت، شانیان لە شانی کتێبخانەکانی
بەرلین و پاریس دەدەن. ئایا بەو حاڵە دەتانەوێت خەڵک بۆ سەر زێدی
باوباپیرانیان بگەڕێنەوە؟
ئەگەر ئەو بەڕێزانە لەم کێشەیە کە لە نێوان هەرێمی کوردستان و حکومەتی
مەرکەزی هەیە، لایەنی سێهەم پێکدەهێنن وەک نەتەوە یەکگرتووەکان یان
بزووتنەوەی ئاشتی جیهان یان ئەگەر ناوبژیکەرن، ئەوا راستتان فەرمووەو
دەستتان خۆش بێت، بەڵام ئێوە لایەکی کێشەکەن و ماڵەکەش ماڵی خۆتانەو
دەبێ لە بەکارهێنانی(ناوچە بە زۆرەملی داگیرکراو و تەعریبکراو)
یان(ناوچە دابڕاوەکان)کەمتر نەیەژن-نەڵێن-!
ئاخر کو دەبی بەڕێزتان وەک خەمخۆری گەلە چەوساوەکەتان بەشێکی بەرینی
خاک و میللەتە چەپۆک لەسەرەکەتان بەو شێوەیە ناونووس بکەن؟!
ئایا لە کاتی نووسین یان وتنی(ناوچە ناکۆکی لەسەرەکان) ئاگاتان لە
خۆتان و قەڵەم و بەرپرسیاریتان هەیە؟
بڕواناکەم، چونکە ئەو وەسفە پشتکردنە لەو ناوچە پان و پۆڕانە کە لە
پێناویاندا چەندین جەنگ و بەرگری کراوە.
تکایە، هیچ نەبێت بۆ خاتری کەرامەتی خۆتان یان بۆ خاتری سەروەت و
سامانە لە بن نەهاتووەکانیان، چیتر(خانەقین، سەعدیە، جەلەولا، مەندەلی،
قەرەتەپە، جەبارە، کەرکوک، شنگار، بەحزانی، بەعشیقەو کەرکوک...هتد)
ناونەنین(ناوچە ناکۆکی لەسەرەکان)!
ئەگەر بەرپرس و لایەنە پەیوەندیدارەکان بەم شێوەیە رەفتار لەگەل ناوچە
بە زۆرەملی دابڕاوەکان بکەن، ئەوا بێگومان لە ئێستاوە دەتوانین بڵێین،
زۆرێکیان لەدەست دەچن و خۆمان لەبەردەمیدا بەرپرسیارین نەک زۆرداری
عارەبە شۆفێنستەکان...
بەگشتی ئومیدەوارین لەمەودوا سوکایەتیمان پێ نەکرێت...ئامین!
ماڵپه‌ڕی سه‌‌لام عه‌بدوڵا
|
