١٣\١٠\٢٠١٨

ئەشکەنجەدانی زیندانیان لە ژێر هەر بیانوێکدا بێ مەحکومە.

عەبدولڕەحمان رەسول  

لە چەند پەیجێکدا بڵاوکراوەتەوە کە ( ئیسماعیل سوسێی) لە ٦/۱۰/۲۰۱۸ لە ژێر ئەشکەنجە و ئازاردانی زۆر ، زۆر بەداخەوە گیانی لەدەست داوە ،زۆرم پێ ناخۆشە. ئەو جۆرە کارە مەحکوم و ڕیسوا دەکەم . لەبەرئەوەی ئەشکەنجە و ئازاردانی زیندانی سیاسی پێشێل کردنی مافەکانی مرۆڤی زیندانی کراوە.
نابێت ڕێگەی پێ بدرێت لەژێر هەر بیانوێکەوەبێت ئازار و ئەشکەنجەی کەسی زیندانی کراو بدرێت. پێویستە ئەگەر تاوان بارە بە ئاشکرا سزای یاسایی بدرێت و حکوم بدرێت بە پێی یاسا.

ئەگەر حکومەتی هەرێم دژی بڵاو کردنەوەی بیروباوەڕی توندڕەوی و کۆنەپەرستی یە پێویستە بەپێی یاسا هەموو ئەو شوێن و جێگایانە دابخات کە گەشە بەبڵاوکردنەوەی بیروباوەڕی توندڕەوی و فکری توندڕەوی و تیرۆریستی دەدەن لەژێر ناوی پەروەردە و فێربوونی ئاینیی و دینی دا ، پێویستە دەستی بیروباوەڕی دینی لەپەروەردە و فێربوون لە ناو خوێندنگا و قوتابخانە و زانکۆکان دەربهێنێت و دابخرێن.

پێویستە کاربکرێت بۆ جیاکردنەوەی دین لەپێگەو بوارەکانی ئیدارەدا.

پێویستە حکومەت بەپێی یاسا ڕێگا بگرێت لە فتوادانی مەلاکان لە بەرامبەر خاوەن هەبوونی ئاینیی جیاواز و بیروباوەڕی جیاواز و فکری جیاواز.کاتێک مەلایەک سەرپێچی یاسایی کرد و کاری بۆ گەشە و بڵاوکردنەوەی بیروباوەڕی توندڕەوی و فکری توندڕەوی و تیرۆریستی کرد ئەوا بە ئاشکرا بانگهێشتی دادگا بکرێت و بەپێی یاسا سزا بدرێت و حکوم بدرێت ،نەک بە نادیاری و شاراوەیی بکوژرێت یان لەژێر ئەشکەنجەدا بکوژرێت.

لەبەرئەوەی هەبوونی ئەشکەنجە و ئازار لە زیندانەکاندا لە گەڵ بنەماکان و بەند و بڕیارنامەکانی تایبەت بە مافەکانی مرۆڤ نایەتەوە و پێچەوانەیە بە بڕیارنامەکانی بەرگری کاران و داکۆکی کارانی ڕێکخراو و ناوەندە جیهانی یەکان و دەوڵەتانی نەتەوەیەکگرتووەکان و دەوڵەتانی پێشکەوتووی مرۆڤ دۆست.

وێڕای هەبوونی بیروباوەڕی جیاواز و دینی جیاواز و فکر و بیرکردنەوەی جیاواز بەڵام وەک ئەرکێکی مرۆڤایەتی و ئازادیخوازی ناکرێت ڕێگا بە هەبوونی ئەشکەنجەدان و ئازار دانی زیندانی یەکان بدرێت ،دواجار ئەوانیش هەر مرۆڤن ،پێویستە مرۆڤایەتی بوونیان بپارێزرێت ، مافی ژیان و تەندروستی تەواو یەکێکە لەمافە سەرەتایی یەکانی مرۆڤە.
 

ماڵپه‌ڕی عه‌بدوڕه‌حمان رەسول