|
٢٢\٤\٢٠١١
ئەشکەنجە، مۆدێلی
ئیسلامی تورکیا، ئینتەرپڕایز.
سەلام عەبدوڵا
مەلا کرێکارو کەتیبەکانی ئیسلام و کۆمەڵ و
یەکگرتوو تا عەمامە "پاکەکان" وەک "ئازادی دیموکراسیخواز" هەوڵ بۆ
فەرمانڕەوایی دەسەڵاتی ئیسلامی "میانڕەو" دەدەن. ئەو هەوڵە بە هاواری
"ئەڵڵاهو ئەکبەر"ی رێبین هەردی و دوعاکانی بەختیار و "شەرەفی"
دژایەتیکردنیان بۆ شوعییەت و دامەزراندنی حکومەتە تەکنۆکراتەکەی گۆڕان،
تێکەڵ بووە. ئەوە ئەو هاوپەیمانییە رەش و راستڕەوەیە کە لەلایەن
پەیمانگەی ئینتەرپڕایزی ئەمریکیەوە دژ بە"ئازادی و
دیموکراسییەگەی"حکومەتی هەرێم پێکدەهێنن. "عاشقەکانی"دیموکراسی و مافی
مرۆڤ و ئازادی لەنێو خۆیاندا بووە بە شەڕیان.
رێبین هەردی وتی: (ئەوانە لە نزیکبوونی عیلمانی و ئیسلامی ترساون،
دەزانن ئەمە بزووتنەوەکە بەهێز دەکات) و لەولاوە ئەندام پەرلەمانێکی
گۆڕان وەک پارێزەرێکی ئیسلامییەکان وتی(ئیهانە بە خوا و قورئانی پیرۆز
دەکەن وەک لە سەردەمی ئەنفال)!
دەرسی دیموکراسی و مافی مرۆڤ!
لەم رۆژانە دەرسێکی مێژووی بە خەڵکی کوردستان دەگوترێ. مامۆستا لە بری
تەباشیر، کلاشینکۆف و دەمانچە و کوتەکی بەدەستەوەیە، لەبری تەختە ڕەش،
گیانی دەیان کەسیان کێشا و سەدان مرۆڤیان بریندارکردو کەسانی وەک
ئەندام پەرلەمان محەمەد کیانی و نووسەر رێبین هەردی و سەدان کەسی تر
شین و مۆر کرد. ئەو رەفتارانە تاوانن و هیچ پاساوێک هەڵناگرن.
بەڵام ئەم دەرسە واقیعییە کە هیچ کەس ناتوانێ نکۆڵیلن لێ بکات، لایەنی
ئیجابیشی هەیە:
1- دوا وەهمی(ئێمە براین)وردوخاشکراو چیتر
کەس ئەو رستەیە بەکارناهێنێت.
2- زۆر کەس لە دوورەوە سەیری وڵاتە ئۆروپییەکانیان دەکردو پێیان وابوو
دەسەڵاتە دیموکراسییەکانی ئەو وڵاتانە لە خۆپیشاندانەکان زەبروزەنگ
بەکارناهێنن.
نەزانی لە کەناڵی(knn)بە مانشێتێکی گەورە
نووسراوە(ئەمەیە دیموکراسی و ئازادێکەتان؟)...بەڵێ بەڕێزان، بەڵێ! ئەوە
رووەکەیتری دیموکراسییە کە بەردەوام لە خەڵک دەیشارنەوە، بەڵام گۆڕان و
رەشبیرەکان پەییان پێنەبردووە. ئێستا لەبری ئەوەی دان بەو راساییە بنێن،
دەڵێن حکومەت دیموکراسی نییە!!
"سوپاس" بۆ پارتی و یەکێتی کە رەنجی منیان کەمکردووە بۆ راستکردنەوەی
ئەو بۆچوونە سەقەت و خوارە: دەسەڵاتدارە دیموکراسییەکان لە هەموو
شوێنێک چەندین دەزگای پۆلیسی و سەربازی و موخابەرات و ئاسایشی نهێنی و
ئاشکرای جۆربەجۆریان هەیە بە دەزگای ئەنتی تیرۆریشەوە(لە ئەڵمانیا
ناویgsg9)ە و لە بۆنە جیاجیاکان هەموو جۆرە زەبروزەنگێک بەکاردەهێنن.
ئەوەی ئیمڕۆ لە سلیمانی و شوێنەکانی تر روودەدەن بە جیا لەوەی بەخۆم لە
سەدان خۆپیشاندانی ساڵانی کۆتایی هەشتا و نەوەدەکان لە ئەڵمانیا
بینیومە(بێجگە لە بەکارهێنانی چەک بۆ کوشتن)، بەڵام ئەوەی بیەوێ
بارودۆخی هەرێم بە نموونە ئەڵمانییەکەی ببینێ با زانیاری لەبارەی
شەستەکان ئەو وڵاتە کۆبکاتەوە!
پەیژەی ئیسلامییەکان.
گەمژەیی و تاوانی ئەو هێزە کە(رێبین)یان دەستگیرکرد ئەوەیە کە خودی
رێبین وەک برادەرەکەی بەختیار عەلی، ئابرووی خۆیان و قەڵەمەکەیان برد،
هەرگیز رۆشنبیری عیلمانی ئەوەند سووک و رسوا نەبووە خۆی بکات بە پەیژەی
ریکلام بۆ هێزو دەسەڵاتە ئیسلامییەکان، بەتایبەتی لەم بارودۆخە کە
ترسناکی زۆرێک لەو ئیسلامییانە لەبەرچاوون. ئیتر دەستگیرکردن و
ئەشکەنجەدان لەپای چی؟ ئایا ئەو تاوانە بۆ ئەوە نەبوو تا بیانکەن بە
پاڵەوان؟!
(بوش)ی عیلمانی و تالەبانی ئیسلامی، (سەدام)ی عیلمانی و ئیسلامییەکان.
بۆ گێلەکردن بە ئەقڵی جەماوەر دەڵێن(لەبەر دەرگای سەرا، ئیسلام و
عیلمانی و هەموو ئیدۆلۆژییەکان ئاشتبوونەتەوە)، وەک بڵێی داهێنانیان
کردووە. راستییەکان لە شوێنی ترە! ئەوە چ عیلمانییەکی گێل و گەمژەیە
ئەگەر ئەزموونی زۆر خوێناوی شۆڕشی ئێرانی لەبیر کردبێ؟ ئەوە چ زیقاو
و"پاشماوەی پیرۆزی"مرۆڤانە کە لەم قۆناغە، مەترسی باڵادەستی راستڕەو
تیرۆریستەکان لەبەرچاو نەگرێ؟!
پشتیوانی و"ئاشتبوونەوە"لەگەل ئیسلامییەکان نموونەی زۆرە و لەپێشەوەیان
نموونەی ئیدارەی ئەمریکی پێشوو و پشتیوانیان لە"شۆڕشگێڕ و
ئازادیخوازەکانی" تالەبان لە ئەفغانستان لەبەرچاوەو ئەزموونی
پشتیوانی"سەید ئەلرەئیس"ی عیلمانی عیراق لە سەلەفییەکان کە ئەو
بەروبوومە وەحشیگەرییە بێ وێنەیەی لێ کەوتەوە.
ئیسلامییەکان بە دووڕووییەکی ئاشکرا پاش 1400لە بوونی ئیسلام و
دامەزراندنی چەندین خەلافەتی پانوبەرین و حکومەت، ئێستا لە سەدەی بیست
ویەک لافی دامەزراندنی عەدالەت و ئازادیمان بۆ دەکەن. ئەوە چ کارەسات و
هەرەسێکە، تازە بە تازە لەگەل بوونی دەیان مزگەوت، بەردەرگای سەراش
بکرێت بە مزگەوت؟!
ئایا مەعریفەتی ئاشتبوونەوەی ئەو چەند رەشبیرە لەگەل کۆنەپەرەستان،
چییە؟ بۆچی وادەکەن؟ دەیانەوێ کۆمەڵگە بەرەو کوێ ببەن؟!
پەیمانگەی ئینتەرپڕایز لێرەیە!
(مایکل رۆبن)لە وتاری(کۆتایی بێنن بە خۆێنڕێژی لە کوردستانی عیراق)،
وەک کۆنەپەرەستێکی سەر بە حزبی کۆمارییەکان، ئاماژە دەکات بە(شتێکی
خراپ لە کوردستانی عێراقدا کە درووستکراوی ئەمریکا خۆیەتی)و گەندەڵی
سیاسەتمەدارە ئەمریکییەکان دەردەخا و هێرشێکی ئاشکرا دژ بە ئیدارەی
ئۆباما دەکات و دەنووسێ(پشتگیری ئۆباما لە مافەکانی مرۆڤ تەماویە...).
ئێستا کەناڵی سپیدە لە مانشێتی هەواڵەکانی بڵاویدەکاتەوەو بەدڵنیاییەوە
کەناڵە گەندەڵەکانی تر بڵاوی دەکەنەوە.
بەڵێ ئێمە زۆر باش دەزانین سیاسەتی هەڵگری نۆبڵی ئاشتی چەندە تەماوی و
خوێناویشە، بەڵام ئەی سیاسەتی حزبی کۆمارییەکان چۆن بووە؟ ئایا رۆبن
دەتوانێ تاقە یەک نموونە لەبارەی پاراستنی مافی مرۆڤ لەلایەن حزبی
کۆمارییەکانمان بۆ بهێنێتەوە کە لە حزبە دیموکراتەکان باشتر بووبێ؟ لە
کوێ؟! کەی؟ چۆن؟
سەرۆکی یەکگرتوو ئێستا وتی: (ئەم خەباتە مەدەنییە درێژەی دەبێت).
لەوانەیە تا هەڵبژاردنی داهاتوو لە ئەمریکا درێژەی دەبێت، وا نییە!
ئینتەرپرایز، فرانسیس فۆکۆیاما، حزب و لایەنە ئیسلامییەکان و گۆڕان ئەو
دەستە رەشەن کە کار بۆ پڕۆژەی بەرگرتن لە بەرەوپێشچوونی
ناڕەزایەتییەکان دەکەن بەرەو ئەڵتەرناتیڤی دژ بە لیبَرالیزم و بازاڕی
ئازادی سەرمایەداری کە خۆی لەناو سەختترین قەیران دەبینێ. ئەمە ئەو
مەترسییەیە کە لە ئۆروپا و ئەمریکای لاتین و شوێنانی تر رووبەڕووی
دەسەڵاتدارانی دنیا دەبێتەوە.
خزمەتکارانی دەسەڵاتی گەندەڵی موستەشار - موستەفیدەکان.
حکومەت بە کردەوە دووپاتی ئەو راستییە دەکات کە لە بەکارهێنانی چەک و
تیرۆر و ئەشکەنجە دەست ناپارێزێ و منەتیشیان بە هیچ نیە، بە هەموو
شێوەیەک بەرگری لە شێوەی دەسەڵاتەکەی دەکات، واتە دەسەڵاتی بازاڕ،
زانکۆ، بانق، کۆمپانیای نەوت و گاز، نەخۆشخانە و کارەبا و ئاو و
یەکەکانی نیشتەجێبوونی ئەهلی و ئازادەکان، دەکات.
ئەو بازاڕ و سیستێمە لەلایەن هاوپەیمانی حکومەت و کۆمپانیا و بانق و
سوپا و دەزگا نهێنییەکانی زلهێزەکان لەگەل زانکۆ و رۆشنبیر و
تەکنۆکراتەکانیان لەچوارچێوەی حزبە لیبڕاڵ و کۆنەپارێزەکان و سۆسیال
ئینتەرناسیونال، کاردەکەن بۆ ئەوەی بە ئاگرو ئاسن بەسەر جیهان بیسەپێنن.
لێرەوە پرسیار لەبارەی ئەرکی مێژووی و ئەخلاقی و سیاسی و کۆمەڵایەتی
حزب و لایەنە چەپەکان دێتە پێشەوەو دەبێ وڵامیان هەبێت و داخوازی ناو و
ئازادی بە کەرامەت و جێبەجێکردنی داخوازی جەماوەر بەرزبکەنەوە بەبێ
هاوپەیمانی لەگەل راستڕەو ئیسلامییەکان و هاوپەیمانی لەگەل هەردوو حزبی
دەسەڵاتدار...ئێمەش دەبێ نەخشە رێگای خۆمان هەبێت!
ماڵپه‌ڕی سه‌‌لام عه‌بدوڵا
|
