١٧\١٠\٢٠١٠

 ئەوانەى دەبنە داکۆکیکارى گەندەڵییەکانى سەرانى حیزبى شیوعى کوردستان،

حیزبایەتى دەکەن یان کاسبى؟

هیوا رەش    

لێرە و لەوێ هەندێک دەنگى نەشاز کە لە پێستى پارێزەریى حیزبى شیوعییەوە خۆیان حەشار داوە ، بە بڕوبیانوى ناجۆرەوە ئەیانەوێ بە خشکەیی پەلامارى ئەو کەسانە بدەن کە ڕەخنە ئاراستەى حیزبى شیوعى ئەکەن ، بێگومان ئەوانەى ڕەخنە ئەگرن زۆربەیان بریتین لەوانەى لە نێو حیزبى شیوعیدا ( دەرکراون ، دەرپەڕیندراون ، وازیان هێناوە ، ستەم و ناهەقییان بەرامبەر کراوە ) ، دەگمەنن ئەوانەى بە مەبەست و لە هەست کردن بە مەترسیى ( کۆمۆمیزم ) ەوە دژ بە حیزبى شیوعى بنووسن چونکە سەرانى حیزبەکە باى ئەوەیان تێدا نەهێسشتۆتەوە کە حیزبەکە ببێتە جێبایەخى دوژمنانى و ئەو کارەساتانەى لە نێوخۆى خودى حیزبەکە بەسەر حیزبەکەدا ئەهێنرێ مەحاڵە دوژمنانى بتوانن بە سەریدا بهێنن ، هەندێک کۆنە شیوعیش هەن چەشنى ئەوانەى کە ئێستا لە ناوەوەى حیزبەکەدان و وێڵن بە دواى پارووى چەور و سەنگەریان فرۆشتووە و چوونەتە نێو حیزبە دەسەڵاتدارەکان و پێگەى باشیان وەچنگ هێناوە ، کاتى خۆشى کە لە ڕیزى حیزبەکەدا بوون ئێمە تێبینیمان لەسەریان هەبووە و وەکو ئەوانەى ئێستا شتێکمان لە بارەیانەوە بوتایە بەرامبەرمان ئەڕشانەوە ، مخابن ئێستا بە سۆنگەى هەندێک لەو کادیرە هەلپەرستانە و سەرکردایەتییەکەیانەوە شتێک نەماوە بە ناوى ڕەخنەى فکرییەوە ئاراستەى حیزبى شیوعى بکرێت و بە تەواوى لە هەموو ئەو تێزە فکرییانە داماڵدراون کە حیزبەکە لەسەر بنەماکەى دامەزرێنراوە ، چونکە :

1 - ئەگەر باس لە ئیمپریالیزمى جیهانى و ئەمریکا و بەریتانیا و ئیستیعمار بکەن ، خۆیان پیاویان نەبن بە ڕاستەوخۆ ، بە ناڕاستەوخۆ بوونەتە پیاوى پیاوەکانى ئیمپریالیزم .
2 - ئەگەر باس لە خەباتى چینایەتى نێوان کرێکاران و سەرمایەداران بکەن ، لە هەناوى حیزبەکەدا ئەو جیاوازییە چینایەتییە دەقى بەخۆوە گرتووە و هەرگیز ژیانى پڕ نەهامەتى ئەندامێکى خوارەوە بەراوورد ناکرێ لەگەڵ هى سەرکردایەتییەکى دابەستەدا .
3 - ئەگەر باس لە ململانێى فکریى حیزبەکە بکرێت ، خۆ لە سایەى مەرحەمەتى سەرکردایەتییەکەیدا هێڵێکى ڕۆشنیان نەهێشتۆتەوە تا خەڵک بۆى ئاشکرا بێت و بزانن سەر بە کام بەرەى فکرین ،مارکسیزم - لینینیزمیان هێندە کاڵ کردۆتەوە تا ئەو ئاستەى لینینیزم بسڕنەوە و مارکسیزمیش سەرگەردان بکەن و سۆشیالیزمیش بکەنە دروشمێکى بۆش و بەتاڵ .
4 - ئەگەر باس لە گوتارى نەتەوەییان بکەین بڕوا ناکەم جیاوازییەک لە نێو ئەوان و ئاغاکانى ناو پارتى و یەکێتیدا هەبێت .
5 - ئەگەر باس لە سەروەریى یاساش بکەین ئەوا ئەوان نەیانوێرا دژ بە تاوانبارێکى وەکو - قاسم ئاغا - ى سەرەک جاشى ئەنفالچى دەست سوور بە خوێنى هاوڕێکانیان دەنگ هەڵبێنن ، نەخوازەڵا ڕەخنە لە نەهامەتیەکانى دەسەڵاتە هاوپەیمانەکانیان بگرن کە بەسەر کردستانیاندا هێناوە و بوونەتە هەڕەشە بۆ داتەپینى کۆمەڵگاى کوردەوارى و نەهێڵانى ئینتیماى نیشتمانیى لە لاى خەڵکى زەحمەتکێش ، نەبادا هاوسەنگەرە دۆستەکانیان هەڕەشە لە بودجە و داهاتیان بکەن .
6 - ئەگەر باس لە یەکێتى فکریى بکرێت ، ئەو پاشاگەردانییەى لە نێو ئەواندا هەیە لە قتووى هیچ عەتارێکدا بەدى ناکرێت ، بەس ڕەخنە لە سیاسەتى سەرکردایەتییەکەى نەگیرێت ئیتر ئارەزوومەندی لە چ ئاوازێک بخوێنیت !
7 - ئەگەر باس لە ڕەخنە و ڕەخنە لە خۆ گرتنیش بکەیت بۆ خۆیان ڕەوایە هەرچى تانە و تەشەر و درۆ و بوختانێک هەڵبەستن ، بەڵام لەسەر ڕەخنەیەکى بچووک ، هەندێک قەلەموونى بە گوێز پەروەردە کراویان دێنە دەنگ و هەموو ڕەخنەکانى بەرامبەریان بە ناڕەوا لە قەڵەم ئەدەن و سیاسەتى ( لە خۆم عادەتە و لە تۆ عیبرەتە ) ئەگرنە بەر ، ڕەخنە بۆ خۆیان بە ڕەوا ئەبینن و بۆ بەرامبەریش کفرێکى موتڵەقە .
8 - ئەگەر باس لە شکستەکانى حیزبى شیوعى بکرێت ئەوا ئەندامە لەمیشخۆرەکانى سەرکردایەتى بێئەوەى تەماشایەکى بچووک بوونەوەى حیزبەکە بکەن ، بە پاساوى بێبنەما و بە درۆى شاخدار خۆڵ بە چاوى گێل و گەمژەکانى دەوروبەریاندا ئەکەن و دەم لە سەرکەوتنە یەک لە دواى یەکەکانیان ئەکوتن و شانازى بە کورسییە سەدەقە وەرگرتووەکەى پەرلەمان و پۆستە شلۆقەکەى حکومەت ئەکەن .
9 - ئەگەر باس لە ڕاى جیاواز بکرێت دەرگا کراوەیە بە مەرجێک شکستەکان بکەیتە سەرکەوتن و سازشەکان بە داستان زاخاو بکەیت وگەندەڵى بکەیت بە دەسپاکى و کلکایەتیش بە پرۆسەیەکى شۆڕشگێڕى بچوێنیت ، و بە دەست پانەوە کردن و ڕوو لە ئاسمان بپاڕێیتەوە بۆ سەرکردایەتى و بە شان و باهوویاندا هەڵبڵێى .
10 - ئەگەر باس لە مێژوو بکەیت ئەوان دواى چووان ئەکەون و قارەمانێتى شیوعییە کۆنەکان هەڵئەدەنە و لەسەرى ئەلەوەڕێن و بۆ ئاییندەش هیچ پێویستییان بە خەڵکانێکى وەکو ئەو شیوعییانەى جاران نەماوە و پەنا بۆ کۆمەڵێک زوڕناژەنى کۆنە ڕەفیق و مەفیق ئەبەن بۆ تەشەردان لە هاوڕێ شۆڕشگێڕەکانى دوێنێیان و ناوزڕاندنیان .

لینین ، ڕاستى فەرمووە : (( ئەگەر بورژوازیەت بە حیزبى شیوعیدا هەڵبدات پێویستە شیوعییەکان بە سیاسەتى خۆیاندا بچنەوە )) ، بەڵام ئەم بەناو سەرکردایەتییەى حیزبى شیوعى و یاوەرە بودەڵەکانیان لە خۆشییاندا ئەکەونە هەلەکە سەما و ئەڵێى ختوکەیان ئەدەى دەمیان نایەتەوە یەک ! جا تۆ بڵێى وانەى شیوعییەت فێرى کردبن دەست بە کڵاوەکانیانەوە بگرن با نەیبات ، یان لەبەر ئەوەى سەروکڵاویان پیرۆزى با و ڕەشەبا بووە ؟ نازانم وەڵامى زۆربڵێ و چەنەبازە ترسنۆکەکان چى بێت ؟ پەنا بە خوا لەوانەیە بڵێن ئەوانەى ئەم ڕەخنانە ئەنووسن ( دەست لە پشتیان ئەدرێت ) ، لە کاتێکدا پێست بە پشتى خۆیانەوە نەماوە ، لەگەڵ ڕێزى زۆرم بۆ ئەوانەى ناڵە و نرکەى چاکسازى حیزبەکەیان خەریکە دوژمنانى نێوخۆى حیزبى شیوعى ئەکات بە زوخاڵ .

ماڵپه‌ڕی هیوا ره‌ش