٢١\١٢\٢٠١٣

ئەوانی تریش مرۆڤن.
- لە پەراوێزی کوشتارەکانی دەڤەری سلێمانی -

شاخه‌وان برایم عه‌بدوڵا

بە ھۆی زۆربوونی ھۆکارەکانی میدیا و بە تایبەتی میدیای ئاسمانی لە باشووری کوردستاندا، رۆژ نییە ھەواڵی کوشتنی یەکێک یان زیاترمان بەرگوێ نەکەوێت، ئەمەش تەنیا وەک ھەواڵێکی ئاسایی میدیاکان بووەو لەسەر ئاستی کۆمەڵگە نەبۆتە ھۆی ڕاچڵەکانی تاکەکان، چونکە بە راستیی وەک پێویست میدیا نەیتوانیوە بایەخ بەو کردە تاوانکارییانە بدات کە گومانی کێشەی کۆمەڵایەتی لێدەکرێت یان کوژراوەکە کەسێکی دیاری ناو کۆمەڵگە نییە، ئەمەش لە کەم بایەخ بوونی مرۆڤەکان بەولاوە ھیچی تر ناگەیەنێت لە زاکیرەی ئەوانەی میدیاکان بەڕێوەدەبەن، ئەگینا کوژرانی ھەر ھاوڵاتییەک لەگەڵ رۆژنامەنووسێک و سیاسییەکدا لە رووی مرۆییەوە ھیچ جیاوازیی نییە و تەنیا جیاوازیی نێوانیان پێگە کۆمەڵایەتییەکەیانە و ئەویش لە کوردستاندا ئەو مۆدێلە ناشیرینە دروستبووە کە جیاوازیی لە نێوان مرۆڤەکاندا دەکرێت تەنانەت لە کاتی مردن یاخود تیرۆرکردن و کوشتندا.

میدیاکان دەبێت ئەوە باش بزانن کە جیاوازیی لە نێوان کرێکارێک و بازرگانێک و سیاسییەک و عەرەبێک و مەسیحێک و کوردێک و کۆنەجاشێک و بەعسییەکی دانیشتووی ھەرێمدا نییە لە کاتێک دەکوژرێن، چونکە مرۆڤ ھەر چییەک بێت دواتر مرۆڤە و ناکرێت بە ھەر بیانووێکی ئاینیی و ئایدۆلۆژیی و هزریی و سیاسیی و کۆمەڵایەتی و شەرەفەوە بکوژرێت یان دووچاری ئازاردان ببنەوە، ئەگەر لە کۆمەڵگەیەکدا دیاردەی کوشتن بە زەقیی دیارکەوت ئەوکات تەواوی ئەو کۆمەڵگەیە بە تەواوی کایە سیاسیی و ئەمنیی و کۆمەڵایەتییەکانی دەکەوێتە بەردەم پرسیاری رەخنەی جیدییەوە و ھاوڵاتیانیش مافی خۆیانە دووچاری ترس ببنەوە و بە ھۆیەوە ھەڵوێست لە دامەزراوەکانی ئەمنیی و حکومیی تایبەتمەند بە بواری پاراستنی گیانی ھاوڵاتیان وەرگرن.

ئەو بارە ناسەقامگیرەی بۆ سەر گیانی ھاوڵاتیان لە دەڤەری سلێمانی ھاتۆتە ئاراوە، بێ ھیچ ئەملاو ئەولایەک ئەمەمان پێ دەڵێت دامەزراوە ئەمنییەکانی ئەو ناوچەیە نەیانتوانیوە بە تەواویی بە ئەرکی خۆیان ھەڵسن کە پاراستنی ئەمنیەتی ھاوڵاتیانە، ئەم ھەڵومەرجە نالەبارە وا دەکات دیاردەی چەکداریی دووبارە زەق بێتەوە و ئەمەش یەکجاریی بارەکە بەرەو ئاڵۆزیی و مەترسیی بەرێت و بە ھۆیەوە دزیی و چەتەیی و مرۆڤکوشتن ببێتە پیشەی رۆژانەی چەتە و پیاوکوژەکان.

پێویستە دامەزراوە ئەمنییەکانی سلێمانی بە ئاشکرا داوای ھاوکاریی لە ھاوڵاتیان بکات بۆ ھاوکاریکردنیان لە دۆزینەوەی تاوانباران و دان بنێت بەوەی سەرکەوتوو نەبوونە لە پاراستنی ئەمن و ئاسایش بۆیان، ھەر ھیچ نەبێت داوایان لێ بکات پشت بە خودی توانا و بیرۆکەی خۆیان ببەستن بۆ پارێزگاری کردن لە گیانی خۆیان و بە ئاشکرا بە ھاوڵاتیان بڵێت ناتوانن سەروماڵیان لە دەست چەتە و دز و تاوانبارەکان بپارێزن، بە دڵنیاییەوە ئەوکات ھاوڵاتی ھەڵوەستەیەک دەکات و ناھێڵێت بە ئاسانیی بکەوێتە ناو تۆڕی تاوانکارییەوە!

ماڵپه‌ڕی شاخه‌وان برایم عه‌بدوڵا