٩\٩\٢٠١٣

ئەو بە ناو زیندووەی دەنگی مردووی گەرەکە!

هۆگر موحسین

سیستم و میکانیزمی هەڵبژاردن لە ڕۆژهەڵاتی ناوەڕاست جگە لە نمایش و پیاهەڵدانێکی ڕۆتیینی بێزەوەر، هەرگیز وێنەیەکی جوان ناخاتە نێو پڕۆسێسی بە دیموکراتیزەکردنی دەوڵەت، دیرۆکی ئەو ناوچەیەش پێش ئەوەی لە سەر بنەمای چەمکی هاوڵاتی بوون خۆی بونیاد نابێت زێدەتر خۆی خزاندۆتە نێو ململانێکانی شەڕی دین، مەزهەب، خێڵ.. بۆیە ئەستەمە قسەیەک هەبێ بۆ گووتن وە نێوی دیموکراسییەت، هەر ئەمەشە وای کردووە دزێو و ناشیرنترین وێنەی حوکمڕانی لە نێو تێکڕای جیهان بۆ خۆی گڵ بداتەوە، لە خین ڕشتن و کوشت و بڕینی تاکی سڤیل، ڕوانگەو بیری زات لەم ناوچەیەیە لە جۆری بژاردە..، وێنەیەکی ڕەش و ترسناکی خستۆتە ناو زهنی هەر تاکێکی ئەم کیشوەرە ئەمیش بە هۆی هەژموونی قێزەوەنی دینی باڵا دەست، فێڵ و تەڵەکە بازی، ترسو تۆقاندن، زلهێزانی بەرژەوەندخوازی دونیا ئیدی شتێک نییە بە ناوی دەستاو دەستی دەسەڵات و بەهای دیموکراسی، کە ڕێگا خٶشکەر بێ بۆ خۆشگوزەرانی و بە هاوڵاتی بوونی دەوڵەت، بۆ ئەمەش نموونە گەلێکی هێجگار ڕۆشن و بەرچاو هەن.. نزیک بوونەوە لە بژاردەی پارلەمانی بە کێبڕکێی نێوان کیانە سیاسیەکان، فرە پارتی بەشداربووی سیاسی دوچاری دژواری و سەخت ئامێز کردووە، لێ ئەو سەختی و جەرگبڕە زێدەتر بەرۆکی دەسەڵاتی حوکمڕانی گرتووە چونکێ سات دوای سات دەنگە کپ و ناڕازی و ئازادەکان تەنانەت ئەو دەنگانەی ساڵانێکە وە هۆی بزری ڕاستییەکان..، ترس، نان هتد وەکو تیرێکی تیژی ژەهراوی سەرسەختانە ببوونە داکۆکیکار لە چینی دەسەڵاتی مشەخۆرو درێژەدان بە نایەکسانی و دژ بە دەنگە ئازادە لە بن نەهاتووەکان، ئیدی بە یارمەتی خاوەن هێزهەرچی لۆیان ڕەخسا کردیان، لێ ئەوانیش هەنوکە بتیی گومانیان چڕکردۆتەوە لە نەبونی یەکسانی، ئازادی مافە کەسییەکان..وە لە ئەندازە بەدەری گەندەڵی و لوشکردنی موڵک و ماڵی گشتی.

لە چارەگە سەدەیەکی دەسەڵاتی حوکمڕان، دەسەڵاتی کوردی هیچ کات هێندەی هەڵبژاردن ترسی لێ نەنیشتووە و بۆ هەمیشە ڕوانین و کردارەکانی بۆ ناشرین کردنی ئەو چەمکە بە کارهێناوە، وەک پسپۆڕێکی تایبەت توانیویەتی هەوای پاکژی دیموکراسی، ئازادی،دادی کۆمەڵایەتی.. بخاتە نێو شیوێکی تاریکەوە، پارلەمان، وەک دوو ئاوێتەی دژ بە یەک دەجەنگن لە پێناو زیاتر ڕیسواکردن و بە مێگەل کردنی کاکی دەنگدەر، لێ ئەو دوو گروپە دژ بەیەکە بۆ بڕیاردان لە سەر پرسێکی چارەنوس ساز یا بەرژەوەندییە حیزبییەکان لەق بکا ئیدی بە فەرمانێکی خاوەن شکۆی سەروی خۆ بە کۆیلە کپ کراوەکەی ڕادەگەیەنێ بڵێ" نا" کۆیلەی پەڕوباڵ کراویش دبێژێ: بەڵێ گەورەم، سەرداری کوردان لە هەنوکەوە نانانانانانانانا.

دەنگ، بە زیندو و مردوو! لە لایەن دەسەڵات وەکو مافێکی کەسی بۆی هەیە کوێخای خۆی هەڵبژێرێ، ئەدی نابینی مردووی قەبرستانانۆ چەندە بەهاو ڕێزی ڕاستەقینەی پێ بەخشراوە چ ئەوسا گەر زیندوو بێت؟ دەبێ چ نیشتیمانێک وەک نیشتیمانی من قەدری مردووی لە لا هەبێ، زاتی هاوخاکی من چەند ساڵێکە گیانی سپاردووە لێ دەسەڵات بۆ ڕێز گرتنی تا نها پسولەی خۆراکی بۆ دەستە بەر کردووە، چونکێ هاونیشتیمانیانی خۆیەتی و وەفا دەنوێنێ بەرامبەری، مردووی خۆڵەمێشیش گەرەکە لە بڕی خۆراک دەنگی پێ بدات، بە هیمەتی ئاغاکان مردوو پێویست ناکا لە ٢١ /٩ ئازار بچێژن بە دەم ڕێگاوە، ئاغا خۆی ناسنامە، ڕەگەزنامە.. دەست دەخات و بە سەر بنکەکان دابەشیان دەکا، ئیدی زیندووی خاوەن مردوو ملکەچی گەمژەیی خۆی دوپات دەکاتەوە لە پێناو بڕە خۆراکێکی کەمی ماوە بەسەرچوو.

هۆسە و قڕەی هەڵبژاردن هەر لە وادەی دەست پێ کردنیەوە چەمکی (چەواشە، بەرژەوەندی..، شەرعیەتی شۆڕشگێڕی خزمەتکاری میللەت، پاراستنی دەسکەوتەکان.. هتد) دەبێتە وێردی سەر زمانان وەک کاڵایەکی بە سەرچوو دەیدەنەوە بە چڕوچاوی تێکرای تاکەکان، هەر لەو ماوەیەدا "پەیمانی ڕاستی" وەک بزرۆکەیەکی نێو وشە کەنار گیر دەکرێت و خۆی دەخزێنێتە خوار هێڵی پلەی سەدی، و زمان و ویژدان ئەو ئەرکە دەگرنە ئەستۆ لە ئەنجام دا ڕاماڵینی "ڕاستی" سەرهەڵدەداو نیشتیمانی یاخی دێتە بەرهەم، بۆ کۆچ کردن لەم یاخی بوون و چەرمەسەرییە دەشێ کۆشکی ستەم بخرێتە زیهنی خودی ستەملێکراو وەخۆبێتەوە لەو تەلبەندەی ئاڕاستەی زمان و هەنگاو پێکانی کراوە، ئەوە ڕاستە کە دەگوترێ: قەتیسی دەنگ، پڕبوونی دەرون لە نائومێدی و دژواری ژیان، نایەکسانی و بەرزی باڵانسی نێوان چینی باڵا دەست و چەوساوە.. بێگومان هۆکاری سەرەکین بۆ درێژەدان بە دەسەڵاتی ستەمکارو وە پێی بەرژەوەندیەکانی خۆی - حیزب، وەکو ئەلقەیەکی بازنەیی کوی بوێ گەمە بە شکۆی مرۆڤایەتی و خەونە پەراوێز خراوەکانی ناواخنت دەکا، ئیدی تۆش وەک زاتێکی یاخی ئەو نیشتیمانە لە دەمی هەڵبژاردندا گەر هەتە بەرگی سۆزو هەست، وە تەسلیم بوونت بە ئەقلیەتی حیزبگەرایی لە خۆ دابماڵەو ڕوبکەرە ماڵی هەمیشەیی و کلیلی"ئەقڵ" وە کاربێنە بۆ ئەوەی تۆ خۆت بیت، خاوەنی خۆت بیت نەک گەمژەیەک ببێت بە خاوەنت یاری بە ئەقل و دواڕۆژو نێشتیمانت بکا، بەمەش ویژدانت پێ دەنێتە دونیایەکی ئاسودە و دەنگ و هەنگاوت دەبێتە کۆسپێکی بەهێز بۆ دەسەڵاتە ستەمکارو قازانج خۆرەکان.

هەرێمی کوردستان بە هۆی کەرت بوون و دابەشبونی بۆ هەردوو زۆنی کەسک - زەرد ڕێکەوتنیان دگەل یەک وەکو برایەکی شیری بەرهەمی گەمارۆی سەربازی و فکریان رۆچاندۆتە نێو هەر کونو قوژبنێکی زەمینی ئەم هەرێمە، ئیدی بۆ ئەوەی خۆی نزیک بکاتەوە لە (سی) ساڵی تەمەنی فەرمانرەوایی وکڕینی زۆرێک لە تاکی چەموش و هوردتکە پارت، کار دەکات لە سەر بەڵێن و نمایشی سیحراوی و نەسازی دەنگی دەکاتە هێزێک بۆ بنیاتنانی کۆمەڵگەیەکی ژێردەستەیی، بەمەش هوردە هوردە دژواریەکانی ژیان سەرهەڵدەدەن، و دۆخی تاک و کۆمەڵگە پێ دەنێتە نێو نائومێدی، رەشبینی، داهاتووی نادیار، گیانی هاوکاریش دەبێتە قسەیەکی پوچ سەرئەنجام مرۆڤگەلێکی بیر وشک و دڵ رەقی لێ دێتە بەرهەم.
 

ماڵپەڕی هۆگر موحسین