په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٣\٢\٢٠١١

ئه‌وه‌ی روودەدا، بەرئەنجامی پاوانکردنی سەرجەم کایەکانی ژیانە لە لایەن حیزبەوە.


رابەر رەشید    


ئێمە ئەو نووسەر و رۆژنامەنووسانەی کە هەمیشە بە زمانی گوڵ نووسیومانە و تکای دونیامان لە دەسەڵاتی حیزبیی ناو حکومەتە حیزبییەکەی هەرێمی کوردستان کردووە کە پیاوی چاکبن، چیتر:


1. موستەشارو جاشە ئەنفالچییەکان و کۆنە پیاوەکانی بەعس و وەچەکانیان مەکەنە گەڵەکای میللەت و پلەوپایەی هەستیارو چارەنووسسازیان مەدەنێ و پشت لە میللەت و پاشماوەکانی ئەنفال مەکەن و ئەزموونی تاڵی خۆکوژی شاخ دووبارە مەکەنەوەو ئەم ئەزموونە مەشێوێنن و مەیکەنە قوربانی بەرژەوەندی خۆتان، کەس گوێی لێنەگرتین و گەلێجاریش بە چەقاوەسوو و ئاژاوەچیشیان ناوزەدکردین و بووینە پیاوێکی خراپی ناو دۆسییەکانی ئاساییشی حیزبی و بەقسەیان نەکردین.


2. مەبنە رمووزنی نێو کایەکانی پەروەردەو خەڵکانی ئاستنزمی حیزبی مەکەنە بەرپرسی شوێنە هەستیارەکانی ئەو بوارە چارەنووسسازەو سروودی حیزب لە جێگەی سروودی ئەی رەقیب دامەنێن و واز لە زانکۆو پەیمانگاکان بهێنن، با رەوشی ئاسایی خۆی وەربگرێت، هیچ گوێیان پێنەداین. ساڵی 1997 لەسەر بابەتێکی بڵاوکراوەم لە هەفتەنامەی رێگای کوردستان لە هەولێر، کە تیایدا ئاماژەم بە مەترسی لادانی بەڕێوەبەری قوتابخانەکان و دانانی کەسانی ئاستنزمی حیزبی لە جێگەیاندا کردبوو، هێندەی نەمابوو لە کونەرەشێمان قەپات بکەن و لەسەر ئامادەنەبوونیشمان بۆ پڕکردنەوەی فۆرمی حیزبی، پلەیەک دایانگرتین و بڕیاری گواستنەوەشیان لە قوتابخانەکە بۆ دەرکردین.


3. بۆ داکۆکیکردن لە جووتیاران، بزووتنەوەی جووتیارانمان دامەزراند، ساڵێکی بەسەردا تێنەپەڕی (مامۆستا ئەمین)یان لەتوپەت کردین و (6) ئەندامی سەرکردایەتی و هەڵسووڕاوی دیکەی بزووتنەوەکەیان گرتین و هێندەی نەمابوو وەکو شەهید (حەمە حەلاق و هاوڕێکانی)مان لێبکرێت. پێمانوتن: زەوی لە جووتیارەکانی (دووستەپە)و گوندەکانی دیکەی باشووری کوردستان مەسێننەوەو مەیدەنە خەڵکانی ناجووتیاری حیزبیی سەربەخۆتان، زۆرمان قیژەو هاوارکرد، پیاوی چاکوپاکبن کاری وا مەکەن، کەچی لە جیاتی پاداشت، لەلایەن خاوەنی ئەو رادیۆیەی بەرنامەی دەنگی جووتیارانی تێدا بڵاودەکرایەوە، سەرکۆنە کراین و هێندەی نەمابوو بەرنامەبڕاویش بکرێین. لەولاشەوە کۆمۆنیستەکانیان خەڵتانی خوێنکردو شاربەدەریشیان کردن، تەنها لەبەرئەوەی هاواریان دەکرد: بڕووخێ بێدادی.


4. جیاوازی لەنێوان پێشمەرگەیەک و پێشمەرگەیەکی دێرینی دیکەدا مەکەن، کەچی پیاوکوژەکانی خۆیان بە پلەی بەرز خانەنشین کردو پێشمەرگەی حیزبەکانی دیکەش، بە جوندی ئەوەل و عەریف و نائیب زابت.


5. کار بە تەزکییەی حیزبی مەکەن و سەرجەم کایەکانی ژیان بە ڤایرۆسی حیزبایەتی کێماوی و گەندەڵ مەکەن، پێیانوتین: ئێمە منداڵە ورتکەیەکی خۆمان لە شای لایەنەکانی دیکە بە شەریفتر دەزانین با کۆنە بەعسیش بووبێت!!.


6. دەرزەنێک کەناڵی رادیۆو تەلەفزیۆنی حیزبی مەکەنەوە، دانەیەکتان بەسە، کەچی بە دژە راگەیاندنتان لەقەڵەمداین و قسەکانی خۆمانتان پێفرۆشتینەوە، کە رێگە لە ئازادی رادەربڕین دەگرین، کەچی حکومەتەکەی هەرێم بەستەزمانە- بی کەناڵی ئاسمانییە.


7. دەست لە کاروباری رێکخراوەکانی کۆمەڵگای مەدەنی وەرمەدەن و بە ڤایرۆسی حیزبایەتی بارگاوی مەکەن، کەچی سەدان رێکخراو و سەنتەرو بنکەی رۆشنبیریی حیزبیتان کردەوەو تاکە سەنتەرێکی رۆشنبیریش بە خەڵکانی بێلایەن رەوا نابینن.


9. بۆ رازیکردنی ئەموئەو شاباشی زەویوزاری ئەم میللەتە مەکەن و مەیکەنە دیاریی دەستتان، کەچی نەک هەر گوێتان لێنەگرتین، تاوانباریشتان کردین.


10. کەرکوک دابەشی سەر حیزبەکانتان مەکەن و ئەو دۆخە هەستیارو لەبارە بقۆزنەوەو یەکێتیی نەتەوەیی تێدا پەیڕەو و پیادە بکەن و مافی نەتەوەکانی دیکەش فەرامۆش مەکەن، کەچی هاتن: جەستەو کەرامەتی شارتان لە مەزادخانەی حیزبایەتیدا هەڕاج کردو کوردتان بچووک بچووک کردەوەو خەڵکانی دیکەتان لێکردینە کەڵەگاو بە ناسیۆنالیست و بیرتەسکتان ناوزەدکردین.


11. دوژمنایەتی مەخەنە نێو گوندە ئاسوودەو رووخاوەکانی ناوەڕاستی هەشتاکان و بە پاساوی ئاوەدانکردنەوەیەکی بێبەرنامەو سەقەت دابەش دوو و سێ و هەتا چواریشییان مەکەن، وەڵامتان دژایەتیکردنمان بوو.


12. گوێتان لە ئاستی خاوەن هزرو قەڵەمە بوێرو سەربەخۆکان دامەخەن و چاوتان مەنوقێنن، کەچی لای ئێوەو بە تێگەیشتنی ئێوە، هەموو وشەیەکی هەق کوفرو ئیلحادو دژی خوداو دەسەڵاتەو دەبێ کۆتایی بە ژیانی بێت.


13. دووانەی دەمچەورکردن و هەڕەشە مەکەنە سیاسەتی خەساندن و دەستەمۆکردنی نووسەران و رۆژنامەنووسان و روناکبیرانی پێشکەوتنخواز، کەچی لەشکرێکتان لە دەوراندەوری خۆتان کۆکردۆتەوەو هەرکەسێک بڵێ لەل، وەکو تەبارەی کۆتایی بەهار تەزرەکوتی دەکەن.


14. ئەوانەی ئامادەنین فۆرمی حیزبیتان بۆ پڕ بکەنەوە، بە دوژمنی خۆتان مەزانن، چونکە ئەوانیش مافی ژیانیان لەم نیشتیمانەدا هەیە، کەچی بێسوود بوو و گوێتان لە وشەیەکیشمان نەگرت.


15. گەل و میللەت و خەباتی بزووتنەوەی رزگاریخوازی نەتەوایەتیمان مەکەنە قوربانی حیزبەکانتان، چونکە گەل لە حیزب پیرۆزو مەزنترە، کەچی پێتان وتین: جارێکی دیکە ئەو کوفرە بکەنەوە زمانتان دەبڕین!!


زۆرو یەکجار زۆرن ئەو (چیتر)انەی کە وتمان و وتمانەوەو ئامادەیشین دەیانجاری دیکەش بیڵێینەوە کە ئەو بوارانەی ئێوەی حیزب، تەنهاو تەنها بۆ بەرژەوەندی خودی حیزب، حیزبانتانن و لە خەڵکانی دیکەتان حەرام کردن، لەولاشەوە هەرهەمان ئەوانەی هەتا بۆیانکرا دوژمنایەتی میللەتیان کردو کەواسووری بەر لەشکری شەڕی ناوخۆو بەرە ئابڕووتکاوییەکانی شەڕی خۆکوژی بوون، لە پڕێکدا بەشێوەیەکی نائاسایی هەڵتۆقین و جنێوبارانی زەوی و ئاسمانیان کرد، گوایە ئۆپۆزیسۆنن و دەیگۆڕن!!، ئەرێ پێمان ناڵێن کام گۆڕین؟!.. باشە وا گریمان گۆڕیشتان، ئەی سبەینێی دوای گۆڕانەکە، کورد وتەنی: (هەمان تاس و هەمان حەمام)ـەکەی جاران نییە، تۆ بڵێی لە شەو و رۆژێکدا هزر و رەوشت و خەون و خولیا و خوو بەشەڕەوەگرتن و خوێنی بەناهەق رژێنراوی ساڵانێکی دەستی ئێوەو ئەوانەی دیکەش وا سووکوسانا لە رۆح و جەستەتان ببێتەوەو راستگۆیانە دەستونێژی نوێژی مرۆڤپەرستی بگرن و لەسەر بەرماڵی میللەت نوێژێکی پاک و بێگەرد و دوور لە پیلانڕێژیی دژی میللەت بکەن؟!


دوای ئەم هەموو کێماسی و (کێماوی) کردنەی جەستەی نەتەوایەتی و نیشتیمانی و مرۆڤایەتی و مێژووییمان، هەر ئەوە روودەدات کە روویداو، لەوانەیە دەیانجاری دیکەش رووبداتەوە، چونکە رەوڕەوەی مێژوو بەرەوپێش دەڕوات و لە گۆڕانکاری بەردەوامدایە و مەحاڵە هەتا سەریش ستەم و چەوساندنەوە چینایەتییەکان بەردەوامبن و کورسی دەسەڵاتیش، تاسەر بۆ کەس نامێنێت. بۆیە تەنها چارەسەر بۆ کێشە و کەموکووڕییەکان، بنەبڕکردنی گەندەڵی و دەستبەرداربوونی حیزبە باڵادەستەکانە لە پاوانکردنی گۆڕەپانی سیاسی و خۆتەکاندانی حیزبەکانی دیکەشە بۆ چیتر بێدەنگ نەبوون لە ئاست نغرۆکردنی ئەم نیشتیمانە بێ ئاڵا و داگیرکراو و دابەشکراوەی کوردستان.

 

کەرکوک

ماڵپەڕی رابەر رەشید