|
٢١\٣\٢٠٢٢
"ئەزموون" خەڵاتی باشترین فیلمی
نێودەوڵەتی
فێستیڤاڵی "سانتا باڕباڕا"ی بەدەستهێنا.
مەنسوور جیهانی
 فیلمی سینەمایی "ئەزموون" لە دەرهێنانی سینەماکاری
کورد "شەوکەت ئەمین کورکی" خەڵاتی باشترین فیلمی نێودەوڵەتی لە سی و
حەوتەمین خولی فێستیڤاڵی نێودەوڵەتی فیلمی "سانتا باڕباڕا" لە وڵاتی
ئەمەریکا بەدەستهێنا.
فیلمی سینەمایی "ئەزموون" چوارەمین فیلمی بڵندی سینەماکاری
کورد "شەوکەت ئەمین کورکی"، لە بەرهەمهێنانی "مەمەد ئەکتاش"، بەرهەمی
هاوبەشی هەرێمی کوردستان و وڵاتانی ئەڵمانیا و قەتەر؛ لە نوێترین
بەشداریی نێودەوڵەتی خۆیدا لە دوو سانسی جیاوازدا لە بەشی "پێشبڕکێی
نێودەوڵەتی" سی و حەوتەمین خولی فێستیڤاڵی نێودەوڵەتی فیلمی "سانتا
باڕباڕا" لە وڵاتی ئەمەریکا نمایشکرا و لە لایەن بینەران
و ڕخنەگرانی سینەمایی و هەروەها ئەندامانی لێژنەی دادوەرانەوە بە گەرمی
پێشوازیی لێکرا و توانی خەڵاتی باشترین فیلمی نێودەوڵەتی ئەم ڕووداوە
کۆن و گرینگەی سینەمای ئەمەریکا بە ناونیشانی "جێفڕی سی. بارباکۆ" بەدەستبێنێت.
ئەندامانی لێژنەی دادوەرانی بەشی پێشبڕکێی سی و حەوتەمین خولی
فێستیڤاڵی نێودەوڵەتی فیلمی "سانتا باڕباڕا" بریتی بوون لە: "کاڕلۆس
ئاگیۆلار"، "جۆستین بێتیمێن" "دۆپ
بۆسۆ"، "جۆلی کارمێن"، "ئانلی ئێلینگسۆن"، "تیم گریرسۆن"، "بیندریا جولی"، "ئێلیزابێت لو"، "ئێسکات مانتز"، "خۆزێ نۆڤۆئا"، "گیل ڕابێرتسۆن"، "چاڕلز
سۆلۆمۆن"، "ئانجی وانگ"، "ئێستیو زێن"، "ئانتۆنی زێربە" و "ئانێت زێربە".
سی و حەوتەمین خولی فێستیڤاڵی نێودەوڵەتی فیلمی "سانتا باڕباڕا"
بە هاوکاری ڕێکخراوەی ناحوکمی "یو.جی.جی"، بە بەشداریی ئەستێرە
ناودارهکانی سینەمای دنیا و بە نمایشی فیلم لە سینەماکارانی
٥٤ وڵاتی جیهان لە بەشە جۆراوجۆرەکانی پێشبڕکێی و دەرەوەی پێشبڕکێی لەوانە:
بەشی "پێشبڕکێی نێودەوڵەتی"، بەشی پێشبڕکێی "بەڵگەفیلم"ی کورت و درێژ،
بەشی پێشبڕکێی "ئەنیمەیشن"، بەشی پێشبڕکێی "سینەمای سەربەخۆ"، بەشی
پێشبڕکێی "ڕۆژهەڵاتی ناوەڕاست"، بەشی پێشبڕکێی "سینەمای نۆڕدیک"، بەشی
"سێمینارە سینەماییەکان"، بەشی پسپۆڕانەی "ڤۆرکشۆپی فێرکاری" و ... لە
ڕۆژانی ٢ تا ١٢ی
ئاداری ٢٠٢٢ لە شاری سانتا باڕباڕا لە ویلایەتی
کالیفۆڕنیا لە وڵاتی ئەمەریکا بەڕێوەچوو.
"ئەزموون" بەرهەمی کۆمپانیای "میتۆس فیلم"ی بەڕلین و کۆمپانیای "مەستی
فیلم"ی سلێمانی کە بە پاڵپشتی وەزارەتی رۆشنبیری و لاوانی حکوومەتی
هەرێمی کوردستان بەرهەمهاتووە و لە لایەن کۆمپانیای ئەڵمانی "ئاڕت هوود"
لە جیهاندا بڵاودەبێتەوە.
لە فیلمی سینەمایی "ئەزموون"دا کۆمەڵێک ئەکتەری بە ئەزموونی هەرێمی
کوردستان لەگەڵ چەندین ئەکتەری گەنجی کوردستان، تیایدا ڕۆڵیان بینیوە،
لەوانە: ئاڤان جەماڵ، ڤانیا سالار، حوسێن حەسەن، شوان عەتووف، هوشیار
زێڕۆ نێروەیی، نیگار عەسمان، کاوە قادر، عادڵ عەبدوالڕەحمان و ... .
فیلمی سینەمایی "ئەزموون" لە دوایین بەشداریی نێودەوڵەتی خۆی لە بەشی
سەرەکی بیست و حەوتەمین خولی فێستیڤاڵی نێودەوڵەتی فیلمی "ڤیکتۆریا" لە وڵاتی کەنەدا نمایشکرا و لە لایەن هۆگران، ڕخنەگران و
نووسەرانی سینەماییەوە پێشوازیی لێکرا و توانی خەڵاتی باشترین فیلمی
بەشی "پێشبڕکێی نێودەوڵەتی" ئەم ڕووداوە گرینگە سینەماییە بەدەستبێنێت.
بۆ زانیاریی پتر:
https://sbiff.org
https://www.facebook.com/SBIFF
https://fb.watch/bLlBss6Xix
لاپەڕەی فەرمی فیلمی سینەمایی "ئەزموون" لە ئینستاگرام:
https://instagram.com/the_exam_movie?utm_medium=copy_link
لاپەڕەی فەرمی فیلمی سینەمایی "ئەزموون" لە فهیسبووک:
https://www.facebook.com/The-Exam-%D8%A6%DB%95%D8%B2%D9%85%D9%88%D9%88%D9%86-106319785023346
ماڵپهڕی مهنسوور جیهانی
|
