|
هه‌ندرێن حه‌مه‌ده‌مین
ئاسمانی پڕ له گریان و هه‌نیسک و ئافات، هه‌ر له مندالیه‌وه له چاوانی
فه‌خۆ دیار بوون، ئه‌و چاوه شینانه‌ی، له یه‌که‌م بینیندا دنیایه‌ک له
به‌زه‌ییان ئه‌گواسته‌وه ویژدانی ئه‌و که‌سانه‌ی ئه‌یانزانی رووخسار
بخوێنه‌وه، ووشه شیرن و ناسکه‌کانی له‌منداڵی ئه‌و په‌پوله ره‌نگاوڕه‌نگانه
ئه‌کرد، که ته‌نیا له سه‌وزایدا ئه‌ژیان، کێ هه‌یه رووه سووره‌که‌ی فه‌خۆی
دیبێ و ماچبارانی خوای نه‌کردبێ، کێ ئه‌یتوانی له‌گه‌ڵ پرچه درێژه‌که‌ی
شۆڕنه‌بێته‌وه بۆ جیهانی که‌س نه‌دیوی پڕ له شه‌رم، که بناغه‌ی مه‌مکیشی
دائه‌نا کراسه‌کانی هه‌ر له شه‌رم بوون، ئه‌و به‌ژن و باڵایه وه‌ک
لاولاوی هه‌میشه به‌هار ئه‌یویست بگاته خوا و ئه‌م نهێنیه‌ی پێ
ئاشکرابکات.
بۆ له‌گه‌ڵ بوونم دایکمت برد؟؟؟؟
پرسیارێکه هه‌ر ئه‌وه‌نده‌ی لێده‌زانێ، که پێی ئه‌لێن به‌خت، دیاره به‌ختیش
له‌گه‌ل جوانی و ژیری ناکۆکیه‌که‌ی بێ سنووره و جه‌نگێکی به‌رده‌وام،
بۆیه له سه‌ره مه‌رگی هه‌موو جوانه‌مه‌رگه‌کان نه‌فره‌ت له جوانی ئه‌کرێ
و له‌سه‌ر کێله‌کانیشیان ئه‌نووسرێ ).......ئای بێ به‌خت.......( ئه‌وه
ئه‌گه‌ر گۆڕ و کێلیان هه‌بێ.
ئه‌و ده‌ستانه له کوێ هاتن، که ئه‌توانن گیان و جه‌سته له یه‌کتر بکه‌ن،
په‌رده‌ی گوێی بکوژه‌کان ج ئاسنێکه، به‌رگه‌ی هه‌نیسکه‌کانی مردن ئه‌گرێ،
ج هێزێک له‌م چاوانه کۆبۆته‌وه که ئه‌توانن به‌رانبه‌ر لاشه بێ گیانه‌کان
زه‌ق بوه‌ستن.
تف له‌وانه‌ی مه‌رگی ناوه‌ختی خه‌لکی تریان هه‌لگرتوه، تف له‌وه‌ی مه‌رگی
ناوه‌ختی دانا، بۆ ئازاردانی هه‌سته ناسکه‌کان .
ئه‌م ناکۆکیه ج شێت بوونێکی گه‌وره‌ی به‌دواوه‌یه، چۆن بگه‌مه ویژدانی
ئه‌و که‌سانه‌ی فه‌خۆیان کوشت .
ئه‌لێن ویژدانیان نیه .
نایان بینی چۆن به‌م ریشه رووی ره‌شیان شاردۆته‌وه، مه‌ندیل و عه‌مامه‌شیان
خستۆته سه‌ر قۆچه‌کانیان، ئه‌وانه دڵیان له ئایه‌ته‌کان زۆر ره‌قتره،
وا ئه‌زانن خوا به‌کوشتنی فه‌خۆییه‌کان ئه‌ژی .
بۆچی کوشتیان ؟؟
گونه‌هه‌که‌ی زۆر له کوشتن گه‌وره‌تر بوو ؟؟؟؟؟
کاتێک گونه‌هه وورده‌کان زۆر به زوویی ریشه‌کێش بکرێن، گونه‌هه گه‌وره‌کان
دروست نابن، ئه‌مه بیردۆزی دینداره‌کانه..
چۆن ریشه‌کێش ؟
کوشتنی ئه‌و که‌سانه‌ی که‌مترین گونه‌هیان لێوه ئه‌زێ.
گونه ه.......گونه ه......گونه ه......
من تێناتێناگه‌م گونه‌ه چیه !!!!!
جولانه‌وه........چاوکردنه‌وه........گوێڕاگرتن..........قسه‌کردن.........بۆنکردن..........تامکردن.......هه‌موو
ئه‌مانه له ده‌ره‌وه‌ی سنووری ته‌سکی ئه‌وان گونه‌هن... گونه‌ه و
تاوانن..
ئه‌ی گونه‌هی فه‌خۆ ؟؟
وێنه‌ی ده‌م و چاوی له‌گه‌ڵ کوڕێک گۆڕیبووه‌وه.
٦ی ١٢ی
٢٠٠٠
Handren88@hotmail.com
|
