٢٠\٧\٢٠٢٤

    فستانەکە.

دایکم تەنیا یەک فستانی هەبوو

شەوانە دەیشوشت و

لە تەنیشت ناندینەکە هەڵیدەخست

سپێدان بۆنی گوڵی لێدەهات.

هەرگیز ئەوەم لێنەپرسی

چما یەکیدیکەی نییە ١

هەر خۆشم ئەوەم نەدەخواست.

ئەمن بەوە دایکم ناسی

بەو فستانە پەمبەی تا سەر ئەژنۆیانی.

کە ڕۆژێکیان

فستانێکی زەردی ئاوریشمینی کڕی

بە دزییەوە وەبەر نووکە قەیچیانم دا ٢

چەندین تیلمی گچکەم بڕین

گیرفانانم لێ پڕکردن

ئەو دوو ڕۆژان مت و بێدەنگ

ئەمنیش شادبووم لە ناخەوە

کە ئیدی هەر ئەوەی گۆرینێ دەپۆشێ ٣

هەر ئەو هزرەم لە مەژییدا دەزرنگاوە ٤

تا چەند دەمخواست وەک ئەو بم.

ئەوڕۆ لە دایکم تێدەگەم

گومانانم دەڕەونەوە،

لە کۆشان و لە ئاوازە غەمگینکەی

لە هەنسک هەڵکێشانی شەوانی

لە لایەلایەی ئومێد لە خەونانم

لە هەر تشتەک تێدەگەم.

لێ لەبەرچی

دەبووا دایکم تەنێ یەک فستانی هەبێ؟ ٥

پەڕەکانی گیانم هەڵدەدەمەوە

هاوشێوەکەی خۆم دەبینم

هەموو ساڵانی تەمەنم

لەبەردەم ئاوێنەی یادەوەرییدا

خۆڵەمێشیی دەردەکەون.

______________________________________

١- چما: بۆ، بۆچی، لۆ، ئەڕا، لەبەرچی، مەگەر...

٢- قەیچی: (مقەس).

٣- گۆرین: ناوبراو و ناسراو، لە جیاتی (هین، ئەوە، ئەو کەسە، ئەو تشتە، وانەک و... تد)یێش بەکاردێ.

٤- مەژی: مێشک، مۆخ.

٥- تەنێ: تنێ، تەنیا، تەنها، بەس.

ماڵپەڕی ئومێد قەرەنی