|
٢۴\٥\٢٠١٠
گه‌ڕان به‌دوای
ناوبانگ دا.
هه‌ورامان
عه‌لی تۆفیق
دیارده‌ی گه‌ڕان به‌دوای ناوبانگ و ناوداری وه‌ک ئامانجی تاک و هه‌وڵی
به‌رده‌وام بۆ گه‌یشتنه ئه‌و ئاکامه‌ی که مرۆڤ له‌و بواره‌ی خۆیی
کاری تێدا ده‌کات به‌و مه‌به‌سته‌ی ناوداربێت ، زۆربه‌ی کات تاکه‌کان
به‌لایانه‌وه گرنگ نیه چون به‌و ئاکامه بگه‌ن ، هه‌ندێ جاریش پێش گه‌یشتنه
ئامانج به‌و هیوایه‌وه شکست دێنێ و پێش ئه‌وه‌ی ده‌وروبه‌ری به‌و هه‌نگاوانه‌ی
بسوتێنێ بێ گومان خۆیی ده‌سوتێ .
ئه‌وانه‌ی به‌دوای ناوداری داده‌گه‌ڕێن زۆرن و مه‌رج نیه هه‌موو کاتێک
سه‌رکه‌وتن به‌ده‌ست بێت ، چونکه زۆر جار شکست خوارد و نه‌گه‌یشتنه
خه‌ونه‌کانی ناوداری ده‌بێته دواکامی کاروانه‌که‌یان و ئه‌مڕۆش له
کۆمه‌ڵگای کورده‌واری دا له‌م شێوه مرۆڤانه زۆرن و له‌گۆڕه‌پانه‌که‌دا
له‌پێشی په‌رده‌وه کارده‌که‌ن ، چونکه ئه‌و جۆره که‌سانه هه‌میشه
کاره‌کانیان له پشتی په‌رده‌وه بۆ ڕێک ده‌خه‌رێت و به‌پاڵ پشتی لایه‌ک
کار ده‌که‌ن .
که‌واته گه‌ران به‌دوای ناوداری و ناوبانگ دا وه‌ک خه‌ونێک له‌و
کاروانه ڕێیه‌ی که له بواره جیاوازه‌کاندا تاک خۆیی ده‌دۆزێته‌وه
وه‌ک سه‌رکه‌وتنه زانستی و وه‌رزشی و هونه‌ری و ڕۆشنبیری و لای هه‌ندێکیش
ته‌نها بۆ نادرای گرنگ نیه چۆن و له ڕێگایی ڕوداوێکه‌وه گه‌ر
ناشیرینیش بێت به‌و ئاکامه بگات .
هه‌ندێک له‌وانه‌ی به‌دوای ناوبانگ دا ده‌گه‌ڕێن به هۆیی بابه‌ته
سیاسی و ئاینی و هونه‌ری و کرده‌وه ئابڕوبه‌ره سکسیه‌کانه‌وه ئه‌و
ده‌رگایه بۆ خۆیان واڵاده‌که‌ن . له‌بواری سیاسی دا زۆر له‌وانه‌ی که
ته‌نها وشه‌ی ناڕازی بوون له‌ده‌سه‌ڵات و به‌ره‌نگاربوونه‌وه‌ی ڕای
گشتی و په‌لاماردان بۆ هه‌موو سوچێک له‌م لایه‌نه‌وه و دژایه‌تی ده‌سه‌ڵاتی
سیاسی و ئیداری به‌بێ بنه‌مایه‌تی فکری و ڕاستبینانه و شاره‌زایی ته‌واو
و ئامانجی دیارو به‌رچاو که به‌رژه‌وه‌ندی گشتی و به‌رژه‌وه‌ندیه نه‌ته‌وه‌ییه‌کانمان
له‌مڕۆدا بکاته ئامانجی کارکردن ، له‌هه‌مان ڕوانگه‌شه‌وه باس له‌بیرو
بۆچوونی ئازاد و جیاواز و ئازادی ڕاده‌ربڕین ده‌که‌نه پاساو بۆ هه‌وڵه‌کانیان
له ده‌روازه‌ی ناوداربووندا ، ئه‌مه‌ش به‌و مانایه نیه که ڕێگا له
ئازادی بیروڕاو بۆچونی ئازارد بگیرێ .
له‌بواری ئاینیشدا به‌هه‌مان شێوه گرتنه‌به‌ری ڕێگایه‌ک که زۆر به‌توندی
دژ به پیرۆزی ئاینه‌کان ڕه‌فتاربکرێت و چه‌ندین کرده‌وه‌ی نه‌شیاو که
له‌بنه‌مادا پێچه‌وانه‌ی داب و نه‌ریته ئاینیه‌کانن و له ڕوانگه‌ی
ئازادیه‌کانی مرۆڤیشه‌وه له‌م مه‌سه‌له‌یه بڕوانین ده‌بێ ئه‌و
ئازادیه بۆ تاک پارێزراو بێت چۆن بیرو راجیاوازه‌کانی دی داوای ئازادی
ده‌که‌ن ئه‌ینه‌کانیش هه‌مان مافیان هه‌یه و ده‌بێ پارێزراو بن ، به‌ڵام
ئه‌وانه‌ی ئه‌و شێوه ڕه‌فتارانه ئه‌نجام ده‌ده‌ن ته‌نها مه‌به‌ست
ناوداربوون و ناوبانگیه له‌و ڕێگایه‌وه ، به‌هه‌مان شێوه‌ش له بواره
هونه‌ریه‌کاندا زۆر له‌و هونه‌رمه‌ندانه به‌و شێوه‌ی که خۆیان باسی
لێوه ده‌که‌ن ستایلی نوێ و تازه به‌م کۆمه‌ڵگایه به نیشان دانی له‌شولارو
جل و به‌رگی جیاواز و به‌کارهێنانی هه‌ندێ جوڵه‌ی نامۆ که ته‌نها ئه‌و
شێوازو مامه‌ڵه‌یه له هه‌ندێ جێگای تایبه‌ت هه‌ن له هه‌موو
دونیادا ، گه‌ر بابه‌ته سکیسه‌کان و بوونی هه‌ندێک له‌وانه‌ی بوونه‌ته
ئاڵاهه‌ڵگری ڕۆشنبیریه‌تی سکسی و ئازادیه‌کانی مرۆڤ و لێدوانی به‌رده‌وام
له‌م باره‌یه‌وه وه‌ک ده‌رگایه‌ک بۆ به‌ره‌و ناوداری ، ڕاگه‌یاندنه‌کان
وه‌ک هۆکارێکی ڕاسته‌وخۆ و ده‌رگایه‌کی کراوه بۆ ئه‌وانه‌ی که ده‌گه‌ڕێن
به‌دوای ناوداری دا ، ڕاگه‌یاندنه‌کان ئه‌و ڕوداوانه‌ی که ده‌بنه سه‌رنج
ڕاکێش و هه‌واڵی خێرا بۆ کۆکردنه‌وه‌ی خوێنه‌ر و بینه‌رو بیسه‌ری زیاتر
به‌رده‌وام له سه‌ربه‌رگی بڵاوکراوه‌کانیان سه‌ردێری نوسراوه‌کان ئه‌م
شێوه هه‌واڵانه‌ن که ده‌بنه هۆکارێک بۆ ناوداربوونی که‌سێک یان کۆمه‌ڵێک
.. لێره‌دا ئافره‌ت زیاتر ده‌رگاکان بۆیی واڵایه و زیاتر وێنه‌کانی له‌سه‌ر
به‌رگی گۆڤارو ڕۆژنامه‌کان بۆ سه‌رنج ڕاکێشانی خوێنه‌ر بوونیان له‌م
باره‌یه‌شه‌وه ئه‌وان شانسی زیاتریان هه‌یه ، له زۆربه‌ی کات دا
خوێنه‌ر ئه‌وه‌نده‌ی به‌دوای وێنه‌‌ێکدا ده‌گه‌ڕێ هێنده ناوه‌ڕۆکی به‌لایه‌وه
گرنگ نییه .
ئه‌وه‌ی لێره‌دا گرنگه بۆ ئه‌وانه‌ی له‌م ده‌رگایه‌وه به‌دوای ناوده‌رکردندا
ده‌گه‌ڕێن و ئه‌وه‌ی له‌ده‌ستیان دێت درێغی لێناکه‌ن له‌وه به‌ئاگابن
که دونیا و سیسته‌می ئه‌م ژیانه تاسه‌ر بۆکه‌س نیه‌و له ساته وه‌ختێک
دا کۆتایی دێت و ئه‌و مۆمه‌ی ژیان و ناوداری و ده‌سه‌ڵات و خاوه‌ن سه‌رمایه‌و
سامان له‌بن دێت ، گه‌ر له مێژوو بڕوانین چه‌ندین که‌سایه‌تی ناودار
ڕۆژانه ناویان له‌سه‌ر زمانی خه‌ڵک و له‌سه‌ردێڕی هه‌واڵه جهانیه‌کاندا
بوو دواتر خه‌ڵک له‌بیری کردن .
گرنگ ئه‌و ناوه‌یه که خزمه‌ت به‌وڵات و نه‌ته‌وه و مرۆڤایه‌تی بکات
و دوای خۆیی کارێک ڕێچکه‌یه‌ک و کرده‌وه‌یه‌کی خزمه‌تگوزاری له‌دوا به‌جێ
بمێ نێ و به‌رده‌وام سودی بۆنه‌وه‌کانی داهاتوو هه‌بێت .. بێ گومان
ژیانی ناوداران ئه‌وه‌نده ساده‌و ساکارو بێ کێشه نه‌بووه چونکه ئه‌وان
به‌رده‌وام ڕوبه‌ڕووی ناوناتۆره‌و ناوزڕاندن و گه‌ڕان به‌دوای ورده‌کاریه‌کانی
ژیانیان یان دا مه‌به‌ستی ڕاگه‌یاندنه‌کانه .
که‌واته ده‌کرێ ڕاگه‌یاندن ئه‌و ئه‌رکه مێژوویه‌ی خۆیی بپارێزێ و له‌سه‌ر
ئه‌و بنه‌مایه کاربکات که خزمه‌ت به‌کۆمه‌ڵگا بکات و هه‌میشه ئاوێنه‌یه‌ک
بێت بۆ به‌دیارخستنی ڕاستیه‌کان و جیاکردنه‌وه‌ی ڕه‌ش و سپی له‌یه‌ک ،
بێ گومان ئه‌و شێوازه ڕاگه‌یاندنه له‌دونیادا بوونی نیه ، چونکه ئه‌مڕۆ
ده‌زگاکانی ڕاگه‌یاندن له ڕوانگه‌ی بنه‌ما ئابوره‌کانه‌وه کارده‌که‌ن
و ئامانجی بنه‌ڕه‌تی به‌ده‌ست هێنانی سه‌رمایه و ڕێچکه بازگانیه‌که‌یه‌تی
وه‌ک ئه‌رکی یه‌که‌م و دواتر ئامانجه حزبی و لایه‌نیه‌کانن .
له‌به‌ر هه‌مان هۆ ئه‌مڕۆ ئه‌و دیارده‌یه به‌ئاشکرا ده‌بینین و ئه‌م
ده‌زگایانه ته‌نها له‌خزمه‌ت کۆمه‌ڵێک دان و له‌به‌رژه‌وه‌ندی ئه‌واندا
کاره‌کان به‌ڕێوه ده‌به‌ن و ناوده‌رکردن و به‌ناوبانگ بوونیان ئه‌رکی
پێش وه‌ختی ئه‌و ده‌زگایانه‌ن گه‌ر حزبی بن یا به‌ناو ئازادو سه‌ربه‌خۆ
.
23\5\10
ماڵپه‌ڕی هه‌ورامان عه‌لی
تۆفیق
|
