١٧\۴\٢٠١٠

       گەڕانەوە.

فەرهاد کەریم

تووڕەمە و
پێکەنینم رشانەوەی تەمەنمە و
زەلیلی دەستی سێکسم..
گەر مەرەقە سێکس نەبووایە
من نەدەبووم ..
بۆچی هاتووم؟.
چیم داوە لە بانک و شیعر نووسین؟
چیم داوە لە ئازادیی و خۆکوشین؟
چیم داوە لە بە جیهانیبوون و تاریکنشین؟
من عەوداڵی بەر لەدایکبوونم
خەباتیشم گەڕانەوە.
بۆیە هەمیشە نەفرەت و نەعلەتم..
کفر ناکەم،
ئەو پەیامە زەلیل و تێکشکاوە ناگەیێنم،
قابیل و هابیل و قەلەڕەشی گۆڕهەڵکه‌نبم
میهرەبانیم بەر لەدایکبوونمە و
خولیا و شەیدای گەڕانەوەم
کفر ناکەم، کفر ناکەم، کفر ناکەم
کفر ناکەم، کفر ناکەم، کفر ناکەم......

     قانگە مۆدێرن.
لە ناو سەرم
وشترێکی باڵبەستراو
هەڵپه‌یەتی -
بۆقێکی زگپڕ دەزێ -
لێرستانە -
کۆتر لای چەقۆ نووستووە
شار لە بیاباندا مردووە
پێلاو
ئەستێرە
سەگ
مانگ
دەمژمێر
قەنەفە
ئەسپ بەرەڵا
پەنجەرە خامۆش
پەردە نارنجۆک

ئاو شپرزە
مریشک گۆشت دەخوا
سەگ دانەوێلە

دەریا دەبێتە بیابان و
بیابانیش شمشێری خودا
رووبار دەبێتە چەم و
چەقەلیش زوڕنا
مەیموون چەقەنەی ئەنتەرنێت
شێر جگەرە دەکێشێ و
باڵداریش راوی مرۆڤ
گول پەپوولە
تاریکی فانۆس
رۆژ بەرەڵا
مێش سەما
مۆسیقا تەنەکەی قۆپاو
شیعر و وشەی دراو
پارچە رۆژنامە جلوبەرگ
ئاسمان دەمامک
(هەموومان)
پێلاوی زەویینە و
لە تابلۆداین.
 

farhad4hamad@yahoo.com