١١\٦\٢٠١٨

    گەڕیدەیەک لە با.

هاوار تەیب

١
لەگەڕیدەیەک دەچم
کەماڵی نەبێ،
ھۆشی وێران وێران بێ.

٢
لەگەریدەیەک دەچم
کەسەراپای جەستەی
ئەنجن ئەنجن کرابێ.

٣
گەریدەیەک
ھەموو ڕۆژێک
بەتاوانی ماڵوێرانی
لەخاچ دەدرێ.

٤
گەڕیدەیەک
نزاکانی لای خوداش
گیر نابن.

٥
گەڕیدەیەک
ماڵیی لەباران
و
ڕۆحی لەھەور.

٦
گەڕێدەیەک
دەکرێت بەقوربانی کەوا و سەڵتەنەیەکی
دۆگما دۆگما.

٧
تۆ لە جنسی شەپۆلەکانی دەریایی و
وەک ھەور
بە شەقامەکانیی تەنیاییمدا
ھاتووچۆتە*.

٨
گەڕیدەیەک
لەشەقامەکانی تەنیاییمدا
خەریکی یاریکردنە
بەچارەنووسی ئاو.

٩
گەڕیدەیەک
لەڕۆژگاری ئاودا
خەریکی ھەڵدانەوەی لاپەڕە ڕەشـــەکانی
کەوا و سەڵتەنەتی دۆگمایی
ئایینە.

١٠
گەڕیدەیەک
لەتەنیاییمدا شەپۆل دەدات و
ھیندەی تەنیاییش تەنیایە.

١١
گەریدەیەک
دەیویســت لەگەڵ ژنێکدا
جێژوانێک لەدڵی بەرددا
دروست بکات.

١٢
گەڕیدەیەک
لەگەڵ خێڵ و نەریتدا
لەململانێ دایە،
تاببێتەوە بەخۆی.

١٣
گەریدەیەک
دەیەوێ لەگەڵ بادا
تۆفانێک ھەڵبکا.

١٤
سەرت بەرز بکەوە و
دییەکانت دابخە،‌
تاوێنەی من
بۆ ھەمیشە لەنیگاکانت ون نەبێ.
منیش وەک گەڕیدەیەک
بسکی ئاڵۆزت بۆ شانە
دەکەم.

___________________________________________

* کۆپلە شیعرێکی خاتوو شیلان جەبارە، بە کەمێک دەستکارییەوە.

٢٠\٦\٢٠١٣ - رانیە

ماڵپەڕی هاوار تەیب