|
٢٠\٧\٢٠٢٦
گۆرانیی پەپوولەکە.
|
مەی ئیسماعیل |
وەرگێرانی لە
عەرەبییەوە: فەرھاد
ئەحمەد |
«لاوەند» کوڕێکی بچوک بوو، زۆر حەزی لە
ژەنینی پیانۆ بوو، و خەونی دەبینی لە داهاتوودا ببێتە ژەنیارێکی گەورە.
ئەو هەموو هەفتەیەک دەچوو بۆ وانەی پیانۆ، و هەموو ڕۆژێک پێش خەوتن
ڕاهێنانی لەسەر ژەنین دەکرد. «لاوەند» بوو بە ژەنیارێکی لێهاتوو چونکە
لە ڕاهێنانەکانیدا دڵسۆز بوو؛ ڕەنگە زۆر شتی بیر بچوایەتەوە، بەڵام قەت
ڕاهێنانەکەی خۆی بیر نەدەچوو!
ڕۆژێک «مامۆستا هەژار » کە مامۆستای پیانۆکەی بوو پێی وت:
«لاوەند ، سبەی لەبەردەم جەماوەرێکی گەورەدا دەژەنیت، تۆ بوویتەتە
ژەنیارێکی بەتوانا! پەنجەکانت وەک سمۆرە بە سووکی بەسەر کلیلەکانی
پیانۆکەدا باز دەدەن. بەڵام شتێک کەمە».
«لاوەند » بە سەر سوڕمانەوە لێی پرسی: «ئەو شتە چییە؟»، چونکە دەیویست
ببێتە ژەنیارێکی ناودار و دیار، نەک تەنها ژەنیارێکی باش.
«مامۆستا هەژار» زەردەخەنەیەکی کرد و بە نهێنی بە گوێی «لاوەند»دا
چرپاند:
«بە تەواوی دڵتەوە بژەنە، نەک تەنها بە پەنجەکانت».
وەک هەمیشە، «مامۆستا هەژار» سندوقە بچووکەکەی هێنایە دەرەوە کە
ستیکەرەکانی تێدا هەڵدەگرت، و وێنەی پەپوولەیەکی جوانی لێ دەرهێنا. «لاوەند»
دەستی درێژ کرد و ئەویش پەپوولەکەی بە دەستیەوە چەسپاند و وتی: «بیر
لەم پەپوولە جوانە بکەرەوە کاتێک کە دەتەوێت بە دڵ بژەنیت».
لەو ڕۆژەدا، کاتێک هەموو منداڵەکان ڕۆشتن بۆ ئەوەی لە باخچەکەدا یاری
بکەن، «لاوەند» دانیشت و سەیری پەپوولەکەی دەکرد و لە خۆی دەپرسی: «من
دەتوانم بە پەنجەکانم بژەنم چونکە دەتوانم بیانجوڵێنم و کلیلەکانی
پیانۆکەی پێ دابگرم، بەڵام چۆن بە دڵم بژەنم لەکاتێکدا ناتوانم بیبینم؟».
بۆ یەکەمجار لە دوای ماوەیەکی درێژ، «لاوەند» بەبێ ئەوەی پیانۆ بژەنێت
چوو بخەوێت.
شەوی پێش کۆنسێرتەکە، «لاوەند» ڕاهێنانی نەکرد، چونکە نەیدەزانی چۆن
بە دڵ بیژەنێت! کاتێک بەیانی بەخەبەر هات، سەیری وێنەی پەپوولەکەی سەر
دەستی کرد.. بەڵام نەخێر! پەپوولەکەش ون ببوو! لەوکاتەدا «لاوەند » زۆر
شڵەژابوو... کاتێک ویستی پیانۆ بژەنێت، نەیدەتوانی پەنجەکانی بجوڵێنێت!
زۆری پێ نەچوو کاتی پێشکەشکردنی پارچە مۆسیقاکە هات. پیانۆکە لە
ناوەڕاستی سەکۆیەکی بازنەیی گەورەدا دانرابوو، جەماوەرەکەش لە چەندین
ڕیزدا لە دەوری دانیشتبوون.
«لاوەند» بەرەو پیانۆکە ڕۆیشت، لەسەر کورسی ژەنیارەکە دانیشت، و بۆ
ساتێک چاوەکانی نوقاند.. قسەکانی مامۆستا «هەژار» ی بیرکەوتەوە، و بیری
لە پەپوولە جوانەکە کردەوە. لە بێدەنگی هۆڵەکەدا، دەنگی شەقەی باڵە
ناسکەکانی بیست.. لەسەر شانی پەپوولەیەکی جوان نیشتەوە و دەستی کرد بە
چرپاندنی ئاوازێک.. پەنجەکانی «لاوەند » بە ئازادی کەوتنە جووڵە، و
بەدڵیی ئاوازی گۆرانیی پەپوولەکەی ژەند.
rahanddrwd@gmail.com
|
