|
٢٩\٣\٢٠١١
گوتارە کۆنەپەرست
و شکستەکانی مەلا بەختیار، فاروق و رەفیقەکانیان!
سەلام عەبدوڵا
مەلا(بەختیار عەلی) لە هەینی"پیرۆز"بە دوعا و پاڕانەوە دەیەوێ لە
ئازادی و عەداڵەتی کۆمەڵایەتی نزیکمان بکاتەوەو ونووسیویەتی: (خودایە
بۆ خاتری کەرامەتی ئینسان کە لەوێنەی خۆتدا خەڵقتکردووە...خوایە
کەرامەتی ئەوانیش بشکێنی....خودایە ئەو سیستێم و یاسا و حوکمڕانییە بە
سزا و ئابرووچوونی خۆی بگەیەنی...خودایە ئەم کیللەتە لەو نەگبەتی و
نەهامەتییانە رزگار بکەین...خۆایە جورئەت و بوێری ببەخشە بەم گەلە
قوربانیبەخشە...خودایە بە حیکمەتی خۆت پڕ مانکە لە هەدادان...خودایە
خودایە بوێری و سەبر ببەخشە بەو گەنجانە...خوداەی ئەم تارمایی وەحشەت...خودایە
ئێمە لە دۆزەخەوە پەنات بۆ ناهێنین، بەڵکو لە کوردستانەوە...).
ئایا ئەوە گوتاری نوێبوونەوەی دونیا و دەسەڵاتە؟ ئایا ئەوە خیتابی
رۆشنبیرێکە بیەوێ کۆمەڵگەکەی بۆ پێشەوە ببات؟!
بەداخەوە ئەو وتارە زیاتر فرەبێژی زۆرو زەوەن، پێوەنان و بێمانەیە کە
بەروونی شکستی و دەستپاچەیی گوتاری رۆشنبیری راستڕەو کۆنەپەرەست
سەرلێشێواو پیشاندەدا.
ئیمڕۆ ئەو دەنگە بە گاڵتەجاڕییەکی نوێی فاروق رەفیق ئامێتە بوو، چونکە
جەنابی"فەیلەسوف"یش هێرش بە بێ بۆنە بۆ مارکسیزمی برد! ئاخر نە مەسعود
بارزانی(لینین)ە و نە جەلال تالەبانی ستالین، کەچی ئیمڕۆ فاروق رەفیق
وەک راستڕەوێک، بە ریتوالی"لەبەر خودا"، نەفرەتی خۆی لە شوعیەت کرد!
رەفیق هەرگیز بابەت و بیرو هۆشی عەدالەتی کۆمەڵایەتی نەبووە بە مێوانی،
کەچی بۆ هەڵخەڵەتاندنی خەڵک، هەر باسی عەداڵەت دەکات کە لەداوییدا هەر
دەسەڵاتێکی تیموکراتی، ئۆلیگارشی، فاشی لێ سەوزدەبێت!
ئەزموونی 1968رۆشنبیری بلیمەتی درووستکرد، بەڵام بەردەرگای سەرا
شەرمەزاری و کۆنەپەرستی! دەنگی رۆشنبیری ئازادیخوا زمان و گفتارو
ئاراستەی تری هەیەو، ئەو نووسین و وتانە رەسەنایەتی و ئەرکی رۆشنبیری
ئازادیخوایان تێدا نابینرێت نییە، سوپاس بۆ دەرگای سلیمانی کە ئاوا بە
روونی دوو فاقی و شیزۆقرینی منداڵە زیرەکەکانی بەردەرگای دەزگا
رۆشنبیرییەکانی دەسەڵاتی، دەرخست.
رێبوار سیوەلی، بەختیار عەلی، فاروق رەفیق، لەبەر کۆڵەوارییان، ستەم و
تاوانەکانی پارتی و یەکێتی بە فاشیزم دەشوبهێنن!
لە سلیمانی سەردەمی بەعس، پەردە لەسەر پەیگەرێکی کاوە لادراو بوو بە
خۆپیشاندان و تا خوارەوەی نەخۆشخانەکە درێژەی هەبوو، منیش یەکێک بووم
لە خۆپیشاندەرەکان. پۆلیسەکان لەسەر ئۆتۆمبیلەکانیانەوە، تەنها تەقەیان
بەسەرمانەوە کرد. بە هەمان شێوە کاتێ لە هەولێر دانیشتوانی ئۆردوگای
کەسنەزان(خەڵکی گوندەکانی سیدەکان بوون)، بە کوتەک و بەرد
خۆپیشاندانیان کردو بەردیان بە پۆلیسەکانی خانەقا تێگرد، بەڵام تەقەیان
لێ نەکردین.
هەرگیز ناکرێ خەتا و حەماقەتی بەراوردکردن لە نێوان حکومەتی هەرێم و
رژێمی فاشیستی بەعس بکرێ. بەعسی ئەنفالی کردین، بۆیە بەبێ گوێدان بە
ئەتەکێتی نووسین، دەڵێم: تەنها گێل و گەمژەکان ئەو کارە دەکەن. نابێ
فاشیزم وەک جوێن بهێنرێت. کلیپی ئەشکەنجەدانی ئەو گەنجە تاوانە و
مەحکومە، بەڵام ئەو جۆرە تاوانانە نە تازەیە و نە دەگمەن، تازەکەی
ئەوەیە کە ئەو بەڕێزانە تازە بە خەبەر هاتوون...بەخێر نەیەنەوە، ئێوەش
کۆپییەکی تری ئەو شەلاق و ماچکردنەن، ئەوە نییە ئاراس قەتاح باسی
دەستبڕین و کوژانەی نەیارەکانی کرد و(محسن ئەدیب) کورتەباڵا وەک جوێن
بەکاردەهێنێت بۆ هەندێ بەرپرس لە هەڵەبجە، هەروا بەختیار لە وتارە
پیرۆزەکەی رۆژی هەینی پیرۆز، کەوتووەتە هەڵەی لەرادەبەدەر کوشندەو کول:
لەلایەکەوە بڕیار لەسەر خۆپیشاندەران دەداو دەڵێ(ئێوە و ئەوان لە هیچدا
لە یەک ناچن)، پاشان بە زمانی مامۆستا پێیان دەڵێ(دەبێت دروشمی ژیانی
ئێوە بێت، لە هیچدا لەوان نەچن)وپاشان ئامۆژگاریان دەکا(...تا هەوڵ
بدەن لەوان نەچن)....خۆش ئەوەیە نەمریان پێدەبەخشێ(ئێوە تەنیا هێزن کە
پیر نابن و ناڕۆن و هەمیشەیین)....چۆن؟ بۆ؟
من دەمەوێ تێبگەم، خۆپیشاندەران لەوان دەچن یان نا؟ کەس، حزب، شت هەیە
پیر نەبێت؟ بۆچی هەمیشەیین؟...
کەناڵی گەلی کوردستان ریکلام بۆ چاوپێکەوتنێک دەکات لەگەل پرۆفیسۆرێکی
ئەمریکی-لەوانەیە فاروق نامەکەی بۆ ئۆباما لەگەل ئەم"عەبقریە" دەنێرێ!-
و زوو زوو وتەیەکی بڵاودەکاتەوەو تێدا بە وەک تڕزلێکی ئەمریکی بە
ناڕازیبووان دەڵێ(بڕۆن کار بکەن!)...ئەزانن مانای چییە؟!
سەرەماگۆ لەبارەی دیموکراسی لە وڵاتی بەڕێز ئۆباما دەڵێ: (کاتێ گەشت بۆ
ئەمریکا دەکەم، کارمەندەکانیان دەتوانن هاردوێری کۆمپیوتەرەکەم کۆپی
بکەن، کاتێ بازاڕی دراو مایەپوچ دەبێ، داهاتی دەوڵەت ئاودیودەکەن، ئایا
ئەو کارانە چ پەویەندییەکیان هەیە لەگەل دیموکراسی؟ لەساڵانی رابردوو
سمینارێکی زۆرم لەبارەی جیهانگیری دەگێراو وەک هزرێکی تۆتالیتێر
پێناسەم دەکرد. بەداخەوە بارودۆخی ئێستا بۆچوونەکەی پشتڕاستدەکات.
هەرگیز مارکس وەک ئەم کاتە ئەکتوێل نەبووە.) .
بەڕێزان!
رۆشنبیر پارێزەری چاونەترسی بەرگرییە بۆ بەرەوچوونی پرۆسەی رزگاری مرۆڤ
لە گشت جۆرەکانی چەوساندنەوەو لەم رێگایە هەرگیز بیر لە
بەرژەوەندییەکانی خۆی ناکاتەوە، دوور بێت یان لەناوچەرگەی گۆڕەپانی
ململانییەکان، سەڕاستانە هیچ لە هەڵویستی بەرامبەر هیچ خاوەن دەسەڵاتێک،
ناگۆڕێت و زۆر دەمێگە گۆتا پێی وتووین: (هیچ شتێک بەرزتر نییە لە هزری
ئاشتی و عەدالەتی کۆمەڵایەتی)، بەڵام ئەگەر ئەو ئێستا لەناومان بوایە،
ئەوا بێگومان بەهەمان شێوە دووبارەی پرسیارەکانی دەکردەوە: لە چ
کۆمەڵگایەک دەمانەوێ بژین؟ ئایا بەڕاست دەماوێ هەموو شاێک ببێت بە
بازرگانی و کاڵاو (رەیع)لە هەستی مرۆی و کۆمەڵایەتی گرنگتر بێت؟).
گوتارەکانی ئەو بەرێزانە زۆر حزبین، حزبییەک لە خوارەوەی ئەقڵی مرۆیی
ئازادیخوازو تینووی سەرفەرازی لەستەمی سەرمایەی دارایی جیهانگیر کە
پەلوپووەکانی لەناو گەڕەکەکانی سایمانی و هەولێر.و خانەقین تەراتێن
دەکەن، بەڵام ئەو"بلیمەتانە"بەچەپڵەرێزان و دوعاو پاڕانەوەو نوێژ و
نامەناردن و تکاو جاسووسی و هێرشکردن بۆ گوڵە سوورەکەی ژیان بە ئیدیالی
خۆیان دەزانن!
(...ناتوانم ئەو زنجیرانە بشکێنم
کە بە زەمین کۆتم دەکەن!
هیچ نابینم،
هیچ ناڵێم... - فاوست)!.
سەرەڕای هەموو شکستییەکان و هەڵویستی ئەوانەی سەرمان شۆڕ دەکەن،
داخوازی هەژارو ستەمدیدەکان، داخوازی بەرەی ئێمەیەو دەستخستن و
پاراستنیان هەر بە ئێمە دەکرێ و ئەوەی"ئازادانە" بمانسڕێتەوە، بەخۆی
پێشوەخت بڕیاریداوە رسوا بکرێت...ئازادییەکەی دەسەڵات و ئێوە،
دەمخنکێنێ!
ماڵپه‌ڕی سه‌‌لام عه‌بدوڵا
|
