١٣\١\٢٠١٢

هاشمى بکەنە بەرپرسى لقى دووى هەولێرى پارتى و

موتڵەگیش بۆ مەڵبەندى یه‌کی سلێمانیى یەکێتى!

هیوا رەش       

لە مێژووى بەزۆر دامەزراندنى عێراقەوە ، کەمینەیەکى سوننە مەزهەبى پشتئەستوور بە هاوکاریى بێ سنوورى شا و ئەمیرەکانى کەنداو و ئەمریکا، لە عێراق دەسەڵاتدار بوون و دەسەڵاتدارێتییەکەیان سیخناخە لە کەتنى نامرۆڤانە ( لەگەڵ سەردانەواندنم بۆ گلکۆى ونى شەهیدى سەرکردە - عەبدولکەریم قاسم )، لە پێناوى کورسیپارێزیدا ململانێى توندى نێوخۆى خۆیان بۆتە مایەى کودەتاى بەردەوام و کوشتارگەى بێوێنە و تۆمار کردنى مێژویەکى شووم دەرهەق بە یەکترى، دەسەڵاتخوازانى سوننە لە عێراقدا جگە لە نەهامەتیى گەورە ، بەخششێکیان پێنەبووە پێشکەشى گەلانى کوردستان و عێراقى بکەن ، بە تایبەتى لە سەردەمى بەعسییەکان لە باشوردا وێڕاى کۆمەڵکوژیى شیعەکان ، زەلکاو و قامیشەڵانەکانیشیان خاپور دەکرد ، لە کوردستانیشدا شەڕى گەورەى جینۆسایدیان بەرامبەر بە گەلى کورد پیادە دەکرد و تەنانەت لە دەڤەرە سوننیەکانیشدا لە تاوانى دژەمرۆڤایەتى کەمتەرخەمییان نەنواندووە ، ئاگرى کوشتوبڕ و ڕەتکردنەوەى بەرامبەر جەستەى سەرکردە بەعسییەکانى نێوخودى حیزبەکەى خۆشیانى سوتاندوە و دەیان کەسیان خراونەنە نێو حەوزى تیزاب و براونەنە بەر پەتى سێدارە ، ناکرێ و ناتوانرێ سەرپێیى باس لە ڕەشیى ڕەفتارە دزێوەکانیان لە چەند دێرێکدا بکرێ ، چونکە ڕەنگدانەوەى سیاسەتى فاشییانەى بەعسییەکان سنورى بەزاندووە و ئێران و کوێت و زۆربەى وڵاتانى ناوچەکەشى دوچارى ماڵوێرانیى کردوە ، حیزبى بەعس ڕۆڵى حیزبى چاوساغى بینی لە پەلکێش کردنى سوپاى وڵاتانى ئەوروپا و ئەمریکا بۆ ناوچەکە کە یەخسیر کردنى زیاترى گەلان بووە دەرهاویشتەى.

لە دواى ڕوخانى بەعسییەکانەوە یاسایەک بە ناوى ( ڕیشەکێشیى بەعس ) ەوە دەرچوو ، ئەم یاسایە دڵنەواییەکى باشى قوربانییانى دەستى بەعسییەکان بوو ، مایەى پێشوازى گەرمى سەرجەم چین و توێژەکانى کۆمەڵگاى کوردستانى و عێراقیى بوو جگە لە کاسەلێسان و خۆفرۆشانى بەعس ، لێ ڕەفتارى قێزەونى ئەمریکییەکان و بێسەرەوبەرەیى دەسەڵاتدارە نوێکانى عێراق ڕێگە خۆشکەر بوو بۆ سەرهەڵدانى ناڕەزایەتى و لەباربردنى خۆشهاتیى خەڵک ، زەمینە ڕەخسێنرا بۆ سەرقوتکردنەوەى بەعسییەکان و دوبارە خۆڕێکخستنەوەیان ، گەندەڵیى و ناعەدالەتیى و دزى و بەتاڵانبردنى سامانى خەڵک و نەشونماى چینێکى مشەخۆرى سەرمایەدار و لە بەرامبەردا چینێکى بەشمەینەت و بێکار و بێنان هێندەى تر هاوڵاتییانى توشى شۆک کرد و لە گەلێک حاڵەتدا ناچارى خۆزگەخوازیى بە ڕابردوو کران ! چەندین فاکتەرى سیاسى و ئابورى و کۆمەڵایەتیى هۆکار بوون بۆ ئەوەى بەعسییەکان خۆیان بنوێنن و هەندێک کاسەلێسى پێشوو و سەرکردەى ئێستایان لە یاساى ڕیشەکێشیى بەعس وەلا بنرێن و بگەڕێندرێنەوە نێو کایەى سیاسی و هەندێک لە ئەفسەرە تاوانبارەکانیشیان کە لە ڕیزى سوپادا مابوونەوە وەکو مارى سڕبوو کەوتنەوە کلکەلەقێ ، دەسلەپشتدانى ئەمریکاش لەولاوە بووەستێ لە چاو نوقاندن لێیان و دنەدانیان بۆ بەرپا کردنى ناکۆکیى مەزهەبیى بە مەبەستى کورتدەست کردنى ئێران لە کاروبارى ناوخۆى عێراقدا ، بەمە ئەستێرەى بەختى کۆنەبەعسییەکان هەڵکشا ، سەرەڕاى هەماهەنگیى تەواویان لەگەڵ تاقم و گروپە تیرۆریستەکان ئیتر وەکو ژمارەیەکى کارا خۆیان هاویشتە نێو هاوکێشە سیاسییەکان و چنگیان لە گەلێک پۆستى باڵا لە پەرلەمان و حکومەتدا گیر کرد .
بەعسییەکان لەوپەڕى لاوازیدا نکوڵییان لە مافەکانى گەلى کوردمان کردووە ، زەقترینیان دژایەتیى بەرچاوى مادەى 140 ى مردار و گەڕانەوەى ناوچە داگیرکراوەکانمانە ، سەدان وتاروێژیى نامەردانەیان دەرهەق بە گەلەکەمان بە هەمان عەقڵیەتى کۆنیانەوە دەرپەڕاندووە ، بیرمە جارێکیان سەرۆکى هەرێم بە ئەسپاییەکەوە باسى لە سەربەخۆیى کوردستان کرد ، ساڵح موتڵەگى کۆنە پەشتەماڵچیى ساجیدەى ژنى سەددام بە دانەجیڕەوە بەرپەچى دایەوە و وتى : لە ئێستادا دەستمان شکاوە ! ڕاستیشى دەکرد چونکە کاتێک دەستیان و ئەستۆیان وردوخاش نەببوو کیمیاباران و ئەنفال بە لایانەوە ئاوخواردنەوە بوو ، هێشتا مابویان ڕیسالەى جینۆسایدەکەیان بگەیەننە جێگە ، بەڵام بەخت یاوەریان نەبوو و دەستیان شکا بۆیە تا هەنوکەش بە ئومێدى گیرسانەوەى دەستیانن و خەون بە قەڵاچۆ کردنى ژیان و ژینگەى کوردستانەوە دەبینن ، دڵنیام ئەگەر بۆیان مەیسەر بێت تۆڵەى ( شهید المجاهد ) و ( قاید الاوحد ) ەکەیان و عەلى کیمیاوى و عەواد بەندەرمان لێدەکەنەوە.

بە هەموو بەڵگە و پێوەرەکان ، هاتنەوەى بەعسییەکان جگە لە سازشى سیاسییەکانى عێراق و خۆشحاڵیى ئەمریکا ، بە سۆنگەى کارە تیرۆریستى و دەستێکەڵییەکانیانەوە بوو لەگەڵ تیرۆریستاندا ، تا لەم دواییەدا بە ئاشکرا دەرکەوت کە تارق هاشمیى جێگرى سەرکۆمار چ ڕۆڵێکى نەگریسى گێڕاوە لە بەخۆڕایى خوێنڕشتن و جەرگسوتاندنى خەڵکى بێتاوان و نانەوەى پشێوى و نائارامى ؟ ! بە بەرچاوى تەواوى دنیاوە و بە دانپێدانانى حیمایەکانى خودى تاوانبار خۆى ، چەندین کارى تیرۆریستى ئەنجام دراوە ، لێ ئەمجارەیان جێگرى سەرکۆمار ( هاشمى ) و جێگرى سەرەکوەزیران ( موتڵەگ ) - دژایەتییەکانى خۆیان لە هەمبەر مافەکانى گەلى کورد بیر چۆتەوە و - شمال الحبیب - ەکەى خۆیان بیر کەوتۆتەوە و لە ترسى ڕاوەدونانى یاسایى خەریکە لێمان دەبن بە خدرى زیندە ، کوردستانى وێرانکراوى دەستى فکرى عەفلەقیزمیان کردۆتە ئارامگە و داڵدەى خۆیان و هانایان بۆ سەرکردە کوردە ( مخرب و عمیل ) ەکانى پێشوو هێناوە.

بەندە لە داڵدەدانى لێقەوماوان لاریم نیە ، بەڵام کە دەڵێم لێقەوماو مەبەستم ئەوانە نیە کە هەزاران خانەوادەیان لێقەوماو کردووە کە پێشمەرگەیەکى کوردیان لەبەر پێى ئەمنێکى عەرەبدا سەربڕیوە ! کێ دەڵێت جاشموستەشارە گرگنە کۆنەبەعسییە ئێستا خۆ بە پارتى و یەکێتى و گۆڕان زانەکان ، پیاوکوژە کۆستخستووە کوژراوە بە شەهید لە قەڵەم دراو و ئەمن و ئیستیخباراتە خۆفرۆش شەرەف هەرزانفرۆشە داڵدە دراوەکان لێقەوماون ؟ ! تا زلحیزبەکانى کوردستان یاساشکێنییان بۆ بکەن و پەنایان بدەن ! مەسخەرەى کوردایەتى لاى حیزبەکانى لەمەڕ خۆمان سنورشکێنیى کردووە ، جا بێحورمەتى کردن بە خوێنى شەهیدان و ئەنفالکراوان ، گەمە کردن بە هەستى کیمیابارانکراوان ، دانانى پیرۆزییەکانى نەتەوە لەسەر خوانى بەرژەوەندخوازیى حیزبدا بگاتە ئەو ڕادەیەى تا هەنوکە تەنها یەک تاکە چڵکاوخۆر پەتکێشى بەردەم دادگا نەکرێ ! ئیتر بۆچى هاشمى و هاشمییە تیرۆریست و سەدامییەکان داڵدە نەدرێن ، بۆیە لێرەوە داوا لە دەسەڵاتدارە پەند وەرنەگرتووەکانى مێژوو دەکەم ، هەرگیز چۆک بۆ هیچ یاسا و ڕێسا و نەریتێکى ئینسانى دا نەدەن و سیاسەتى ( هەشتیش لەسەر نۆ بێ ) پەیڕەو بکەن و بە زەڕەبینى حیزبە لە کوردایەتى تەکیوەکانیان بە دواى تاوانباراندا بگەڕێن و بیانحەوێننەوە ، چش لە دەمارى مەردایەتى نەتەوایەتى و نیشتمانپەروەریى ، با هاشمی و موتڵەگەکانیشمان لێ بکەن بە کەڵەگا و لە سەرووى یاساوە جێگەیان بۆ خۆش بکەن ، باشتریش وایە ئەم کردارەیان ڕاشکاوانەتر بنوێنن و کوردستان ڕادەستى بەعسى و جاشبەعسى و خۆفرۆش و گەندە و مەندەکانى بەر پیڵاوى بنەماڵەى سەدامى دیکتاتۆر بکەن ، بەڵام پۆستى حکومییان پێ نەبەخشن و سەرپشک بن لە حیزبەکانیاندا ، با هاشمى بکەنە بەرپرسى لقى دووى هەولێرى پارتى و موتڵەگیش بە بەرپرسى مەڵبەندى یەکى سلێمانیى یەکێتى دابنێن ، چونکە ئەوان پیاوى حیزب بوونە و هەقى خۆیانە پۆست و سەروکارى حیزبییان پێبسپێردرێت ، لەبەر ئەوەى ئەوانە پیاوى باڵان لە تاواندا ، بۆیە دەبێ پۆستى باڵاشیان پێ بدرێ لە حیزبدا و پۆستى حکومیى بە باڵاى ئەواندا کورت و کوێرە، کە دەڵێم پۆستى حیزبییان بدرێتێ لەبەر ئەوەمە کە لەم دەڤەرە سوتماک و بێخاوەنەى ئێمەدا چایچییەکى دیوەخانى بەرپرسێکى حیزبیى گەلێک لە سەرووى وەزیر و گزیرەکانى حکومەتدایە و لەوان بەژنزراڤترە و لەوانیش باشتر دەست لە بیناقاقاى خەڵک دەنێ.

ماڵپه‌ڕی هیوا ره‌ش