|
|
|
١٦\٣\٢٠١٢ هەڵەبجە.. پەتەکەى ملى عەلى کیمیایی ناوێ.. ئازادیی دەوێ.
ئەم پەتە پەتى یاریەکى ترە دەسەڵات لە سەرى یارى دەکات بۆ فریودانى خەڵکى هەڵەبجە.. هەوڵێکى نه‌زانانه و نەزۆکانەیە لە پێناو ختووکەدانى هه‌ست و سۆز و خوێنگه‌رمیی خەڵکى هەڵەبجە.. بەڵام دەسەڵات خۆى باش ئەو ڕاستییه دەزانێ کە خەڵکى هەڵەبجە زۆر هۆشیارترن لەوە کە بە پەتێکى چڵکنى ملى جەلادێک بخەڵتین و فریووبدرێن و باش ئەوەش دەزانێ کە ئەم گەمەیەشى شکست دێنێ َو بە بنبه‌ست دەگا چونکە خەڵکى هەڵەبجە بیست و یەک ساڵە دەست و پەنجەى لەگەڵ درۆ و گەمە و فرتوفێل و بێ به‌ڵێنیی و سیناریۆکانى ئه‌م دەسەڵادا نەرم کردوە و دەستەکەى دەسەڵات ئاشکرا بووه لایان.
سەیرە بەرپرسانى دەسەڵات کاتێ لە هۆڵى یادکردنەوه‌که لە ڤیستیڤاڵەکەدا قسەى باقوبریق و زلیان دەکرد و خۆیان وەک فریشتەى ئاشتى و ئازادیی و دیموکراسى نیشان دەدا کەچى لە هەمان کات و ساتدا لە دەرەوەى ئەم هۆڵەدا لە شەقام و کۆڵانەکاندا هێزە سەرکوتگەرەکانیان بەردابووه خەڵکى ئەم شارە و گەنجانى ئەم شارە.. هەر لەو ساتەدا بە شێوەیەکى دڕندانە بەربوونە گیانى گەنجێکى ناڕازى شار وەک ئەوەى گەورەترین تیرۆرستى جیهانیان گرتبى! بەڵێ ئەو کاتەى بەرپرسانى دامودەزگاکاتى شار پەتەکەى ملى عەلى کیمیاییان وەردەگرت لە ڕێورەسمێکدا هەر ئا لەو کاتەدا لە دەرەوەى ئەو هۆڵەدا هاوڵاتییه‌کى ناڕازى ئەم شارە کە جامى تووڕەیی وناڕەزایى پڕ پڕ بوو دژ بە دەسەڵات کەوتە شکاندنى کێلى شەهیدەکانى کەسوکارەکەى خۆى! ئەگەر کەسێک ته‌واو نەگەیشتبێتە تینى و گیانى چۆن دەست دەبا بۆ شکاندنى کێلى ئازیزانى خۆى، من پێموایه دەسەڵات بەرپرسە لە ڕوودانى ئەم حاڵەتە و ئەو مرۆڤەى ناچارکردوە بە شکاندنى کێلى گۆڕى ئازیزانى خۆى.
ئاشکرایە که دەسەڵاتى کوردى بیست و یەک ساڵه کار لە سەر بچووککردنەوەى دۆسیەى هە ڵەبجە دەکا و لە بەغدا دەمێکە ئەو دۆسیەیەى دۆڕاندوە.. کەچى ئێستا بە پەتەکەى ملى عەلى کیمیایى بێتەوە مایە بە ڕاستیی ئەمە مایەى پێکەنین و گاڵتەجاڕییه، دواى ئەوه‌ش خەڵکى هەڵەبجە نایەوێت شارەکەى بەو پەتە پیسە پیس ببێ و ئەوانەشى ئەو پەتەیان وەرگرت لە و ڕێوڕەسمەدا ئەوانە کەسیان نوێنەرى سەربەخۆ و ڕاستەقینە و هەڵبژێردراوى خەڵکى هەڵەبجە نین و خەڵکى هەڵەبجە متمانەى بەوانە نەبەخشیوە بەڵکو ئەوانە لە ڕێی حیزبەکانیانەوە هەڵبژێردراون و بە زۆر سەپێنراون بە سەر خەڵکى هەڵەبجەدا و کراونەتە دەمڕاست و نوێنەرى هەڵەبجە بۆیە ئەو مافه‌یان نییه لە جیاتى خەڵکى هەڵەبجە بیربکەنەوە و بڕیار بدەن چونکە ئەوانە نوێنەرى حیزبەکانیانن نەک نوێنەرى خەڵکى کەواتە ئەو پەتەتان لە کوێ هێناوە بیبەنەوە بۆ هەمان شوێن چونکە کێشەى خەلِکى هەڵەبجە ئەو پەتە چڵکنە نییه و کێشە و داواکاریی و مافەکانى خەڵکى هەڵەبجە زۆر زۆر گەورە و گرنگترن لەو پەتە چڵکنە.
من پێموایە ئەم پەتە چڵکنە لە دوو واتا پتر
هیچ واتایه‌کی دیکه‌ی نییه: یەکەم: بە واتای بچووککردنەوە و
کورتکردنەوەى کارەساتى هەڵەبجە دێ لە پەتێکى چڵکندا. دووەم: بە واتای
گاڵتەکردن و سووکایەتییکردن دێت بە هه‌ستی خەڵکى هەڵەبجە و
قوربانییه‌کانى. هەر بۆیە داواکارین لێتان ئەو پەتە ببەنەوە بۆ شوێنى
خۆى، ئێوە پەتى چى دێنن بە دیارى بۆ هەڵەبجە لە کاتێکدا ئێوە مافى
خۆپیشاندانتان لە خەڵکى ئەم شارە سەندۆتەوەو دەتانەوێ پەت لە دەم و
دەست و قاچى خەڵکى ناڕازى هەڵەبجە ببەستن و نەیەڵن بێنە سەرشەقام و
داواى مافە مرۆییه‌کانی خۆیان بکەن.. داواى ئاو کارەبا و خزمەتگوزاریی
تر بکەن بۆ شارەکەیان، ئێوە گەر زەڕەیەک هەست و سۆزتان هەبووایە لەو
ڕۆژى یادەى هەڵەبجەدا پەلامارى گەنجانى ناڕازى و خەڵکى ئەم شاره‌تان
نەدەدا و شارتان نەدەکردە سەربازگەیەکى گەورە بۆ سەرکوتکردنى خەڵکەکەى،
گەر زەڕەیەک هەست و سۆزتان هەبوایە فیستیڤاڵتان بۆ ئەو یادە ساز نەدەدا
چونکە ئێوە خۆتان بەشێکن لە تاوانى هەڵەبجە و ئێوه‌ش لە دۆسیەى
هەڵەبجەدا تاوانبارن.
|
|
|
