٤\٤\٢٠٢٠

هەڵمەتێک لە پێناو ئازادیی رۆژنامەگەریی و خستنەڕووی سەندیکای ساختەی رۆژنامەنووسان.

سەندیکای رۆژنامەنووسانی کوردستان - لقی سلێمانی، سەبارەت بە پەتای کۆرۆنا (سوپاسنامە)یەکی بۆ رۆژنامەنووسان و دامودەزگەکان بڵاوکردەوە.. کە تێیدا بێجگە لە هەندێک ئامۆژگاریی بێزارکەر لە سەرەتایەکەیدا وەک مەلایێکی سەر سەکۆی مزگەوت بەو شێوەیە سوپاسی خودا دەکا: ''ناوچەكەمان (سوپاس بۆ خوا) تا ئێستا كارەساتبار نەبووە''! لە کۆتاییشدا وەک مەلایێکی بەر دەرکی سەرا داوا لە خودا دەکا بمانپارێزێ: ''خودايه سلێمانی و كوردستان و جیهانمان بپارێزە''!

ئێمە وەک ئەو کەسانەی خوارەوە کە ئەو هەڵمەتەمان راگەیاندوە ئەو لێدوانەی سەندیکا بە کارێکی زۆر نابەجێ و نەشیاو دەزانین و پێمانوایە رێک پێچەوانەی کاری رۆژنامەگەرییە. ئەرکی سەندیکا بە کورتییەکەی ئەوەیە بەرگریی لە ماف و ئازادییەکانی رۆژنامەنووسان بکا و بە شێوەیەکی گشتیی کاری رۆژنامەگەریی و هەموو سەکۆیەکانی میدیا ر ێکبخا.. نەک ئامۆژگارییان بکا و ستایش و سوپاسان ببخشێتەوە و خەریکی پاڕانەوە بێ! بە تایبەتییش لەو کاتەدا کە پەتای کۆرۆنا هەڕەشەیە لەسەر ژیانی تێکڕای مرۆڤەکان، دەبووایە سەندیکا - کە لەسەر بوودجەی خەڵک دامەزراوە - بێجگە لەوەی وەک ئەرکی خۆی میدیا بە ئاراستەیەکی مرۆڤپەروەرانەتردا ببا و نەهێڵێ کەسانی نابەرپرس و کۆلەوار لە دەسەڵاتداران و هەندێک لە مەلایەکان بە ئارەزووی خۆیان لە میدیایەکان لێدوانی نازاستییانە بدەن و بارودۆخەکە بشێوێنن.. پێویست بوو حکومەتیش ناچار بکا پێداویستییەکانی ژیانی رۆژانەی خەڵک دابین بکا و مووچە دوانەخا و باشترین دامودەزگەی تەندروستیی دژ بەو پەتایە ئامادە بکا.. تەنانەت پێویست بوو لەوەش بپێچێتەوە کە بۆچی حکومەت دەڵێ بوودجەم کەمە و ناتوانێ چەند مانگێک خەڵک بەخێوبکا.. لە کاتێکدا دەیان بەرپرس و خاوەن کۆمپانیا بە سامانی دزراوی خەڵک بوونەتە ملیۆنێر و ملیاردێر!

بەڵام وەک ئاشکرایە؛ ئەو سەندیکایە لەبەرئەوەی دەزگەیەکی ئازادی رۆژنامەنووسان نییە و ئەنجومەنەکەیان و سەرجەم بەرپرسانیان سەر بە حیزبەکانن و پەروەردی حیزبایەتی (خێلی مۆدێرن)ن و وەک کۆمەڵە مشەخۆرێکی بندیواران راستەوخۆ لە لایەن حیزبە دەسەڵاتدارە ستەمگەر و گەندەڵکارەکان دامەزرێندراون.. کاری زۆر لەوە نابەجێتریشیان لێدەوشێتەوە و هەر دەبێ ژار بڵاوبکەنەوە و وەک بەرپرسە نابەرپرسەکان و مەلا و بانگخوازە دەم هەراشەکان لەو بارودۆخە پڕ لە کارەساتەی پەتای کۆرۆنا خەڵک بێ هومێد و دەستەوەستان بکەن و لە جیاتی بڵاوکردنەوەی نووسینی بە سوود و پشتئەستوور بە زانست و تەکنەلۆژیا هەر لەبەر خودا بپاڕێنەوە.. ئەوە لە کاتێکدا بە پێی دینەکەی خۆشیان بێ - کە دەڵێن خودا کاری خراپ ناکا و تەنیا لە دوای مردن کۆیلەکانی خۆی سزا دەدا! - خودایەکەیان دوور و نزیک هیچ پەیوەندییەکی بە هەبوون و لەنێوچوونی ئەو ڤایرۆسەوە نییە، کەواتە پاڕانەوە تەنیا چاوبەستنی خەڵکە لە پێناو بەرژەوەندییە قۆرخکارییەکانی خۆیان و دەسەڵاتداران!

رۆژنامەنووسی ئازاد یان هەر کەسێکی ئازاد هەرگیز بڕوای بەوە نییە بە زۆر رێ لە هیچ (باوەڕ و ئایدۆلۆژیایەک) بگرێ.. بەڵکە خەبات دەکا بە ناوی زۆرینە بەسەر خەڵکدا نەسەپێندرێن و لە پێناو بەرژەوەندییە تەسکە خۆپەرستییە کەسیی و حیزبیی و دەسەڵاتدارییەکان بەکارنەبردرێن، بە هەمان شێوە دینیش - هەر دینێک - کە باوەڕ و ئایدۆلۆژیایەکە ناکرێ و نابێ بە زۆری زۆردارەکیی بە ناوی دینی زۆرینە بەسەر خەڵکدا بسەپێندرێ و کار و ماندووبوون و وزە و توانایە مادییەکانی هەموو خەڵک لە پەرستگە و پەروەردەی دینیی خەرج بکا.. چونکە بەو شێوەیە مافی خەڵکێکی زۆر پێشێلدەکرێ کە بێ دینن یان دینی جیاوازیان هەیە یان خەڵکانێکن سەر بە هەمان دینن بەڵام نایانەوێ سامان و بوودجەکەیان لە بڵاوکردنەوەی دین خەرج بکرێن.

جا ئێمە بە پێی ئەو تێڕوانینانەی سەرەوەمان و بە هۆی سەرجەم پێشێلکاریی و هەڵسوکەوتە ملهوڕییەکانی ئەو سەندیکایە حیزبییە وەک (بەکارهێنانی سەندیکا لە دژی چین و توێژە نەدارەکان و پرسە نەتەوەیی و نیشتیمانییەکان، سەپاندنی دینی زۆرینە بەسەر هەموو خەڵک، وەستانەوە دژی رۆژنامەنووسە ئازادەکان و ئازادیی رادەربڕین، دروستکردنی گەڕەلاوژێی میدیایی و پووچکردنەوەی کاری پیشەیی و شارەزاییانەی میدیا، و... تد) هیچ هومێدێکمان بەو سەندیکایە نییە بتوانێ بە پێی ئەو تێبینیی و رەخنانەی ئێمە بەخۆیاندا بچنەوە و رێی راستی رۆژنامەنووسیی بگرنەبەر و سەندیکایەکەیان بە واتای وشە بکەنە سەندیکای رۆژنامەنووسانی کوردستان، بەڵکە مەبەستمانە رێ لەو کارە نابەجێیانەیان بگرین و هەموو خەڵکی کوردستان لە خراپیی هەبوونی ئەو سەندیکایە ئاگادار بکەینەوە.. داواش لە هەموو ئەو کەسانە دەکەین کە خۆیان بە رۆژنامەنووسی ئازاد دەزانن و بە ناچاریی ئەندامن لەو سەندیکایە وازبهێنن و هەموومان پێکەوە رەتبکەینەوە.. لە داهاتووشدا تێبکۆشین سەندیکایەکی ئازادی رۆژنامەنووسانی کوردستان دابمەزرێ کە دوور بێ لە حیزب و حیزبایەتیی و دین و رەگەزپەرستیی و نێرسالاریی و ناوچەگەریی.

● ئەو هەڵمەتە لەبەرئەوەی دەربارەی رۆژنامەگەرییە و پەیوەندیی بەو پەتایەی ئێستاکەشەوە هەیە پەیوەستە بە تێکڕای خوێنەران.. جا داوا لە هەمووتان دەکەین بە واژۆی خۆتان پشتگیرییمان بکەن، بۆ ئەو مەبەستەش دەتوانن لە رێی ئەو ئیمێڵەوە rojnamen@yahoo.com یان لە رێی فەیسبووک و تۆڕە کۆمەڵایەتییەکانی دیکەوە (ناو و پیشە و شوێنی نیشتەجێبوون)ی خۆتان بنێرن.. ئێمە خۆمان ناوەکانتان دەخەینە سەر ئەو لیستەی خوارەوە و دیسان بڵاویدەکەینەوە، هەروا کورتەنامەیەکیش بە ئیمێڵی خۆتان بۆ ئیمیڵەکەی ئێمە بنێرن تا لە هەنگاوەکانی داهاتوو ئاگادارتان بکەینەوە.

 

لیستی ناوەکان بە پێی ئەلفوبێ:

- ئەو کەسانەی خوارەوە کە بەو هەڵمەتە هەڵستاون زۆربەی هەرە زۆریان بێجگە لە پیشەکانی خۆیان کاری نووسین و چالاکیی رۆژنامەنووسییان هەیە بەڵام لە میدیایە حیزبییەکان و سێبەرەکانیان کار ناکەن.. واتە ئازاد و سەربەخۆن و زۆر دوورن لەو سەندیکایە گەندەڵکارەی رۆژنامەنووسان کە دەرباری حیزبەکان و حکومەتە ستەمگەرەکەی کوردستانە -

 

تێبینیی:
١- دەقی ئەو هەڵمەتە لە سەرەتادا هەندێک درێژ بوو و وردەکاریی پتری تێدابوو.. بەڵام پاش ئەوەی ئەو کەسانەی سەرەوە واژۆیان لەسەری کرد و کۆمەڵێک سەرنج و تێبینییان لەسەری هەبوو بە تایبەتییش لەسەر درێژییەکەی.. بە لەبەرچاوگرتنی هەموو سەرنج و تێبینییەکان لە داڕشتنێکی ناوکۆیی و نوێ کورت و پوخت کرا و ئەو دەقەی سەرەوەی لێدەرچوو.
٢- هەر کەسێک حەز بکا یان بە پێویستی بزانێ دەتوانێ دەقی ''سوپاسنامە''کەی بە ناو سەندیکای رۆژنامەنووسانی کوردستان لەگەڵ ''‌هەندێک رەخنەی ئێمە لە شێوازی نووسین و بڵاوکردنەوە و زمانی دەقی نووسینەکەیان'' لەو بەستەرەدا ببینێ: (سوپاسنامە و رەخنە).

هەنگاوی دووەمی ئەو هەڵمەتە.

لەبەرئەوەی ئەو هەڵمەتە وەک ئەوانە نییە کە لە پێناو خۆدەرخستنی چەند کەسێک ئەنجامدەدرێن و پاش چەند رۆژێک کۆتاییان دێ و هیچیان لێ بەرهەم نایێ.. بەڵکە ئامانجی گەورەی لە پشتە و درێژەدەکێشێ.. بۆیە لە هەنگاوی دووەممان هەموو ئەو کەسانەی سەرەوە کە خاوەنی هەڵمەتەکەن لە نێو خۆیان (٨) کەس وەک سەرپەرشتکارانی هەڵمەتەکە هەڵدەبژێرن تا بە هەماهەنگیی هەمووان و ئەو کەسانەش کە لەمەودوا ناوەکانی خۆیان دەنێرن بەرنامەڕێژیی بۆ هەڵمەتەکە بکەن و هەنگاوەکانی داهاتوو رێکبخەن.

٤\٤\٢٠٢٠
rojnamen@yahoo.com