١\٢\٢٠١٦

ھەڵوێستمان بەرانبەر رۆژاوا

دەبێ ھەڵوێستی رەخنە و ھاریکاریی بێ.

زاھیر باھیر      

- بەشی یەکەم -

وتارێکی زۆر لە خەڵکانێکی جیا جیاوە ، کورد کەمتر ، بەڵام بێیانە زۆر ‌ زیاتر ‌ سەبارەت بە لایەنە پرشنگدار و باشەکانی ئەزموونی ڕۆژاوا و سەرجەمی ڕوداوەکانی نوسراوە. من خۆم یەکێکم لەو کەسانەی کە چەندەھا وتار و بە دەیەھا دیمانەی تەلەفزووێنی و ڕادوێی ئەنارکستانی فەرەنسی و یۆنانی و ئیتاڵی و شوینەکانی دیکە و لەگەڵ ڕۆژانامە و گۆڤاری بێیانەدا کردوە و ‌ لە چەندەھا میتینگیش نەک ھەر لە بریتانیا بەڵکو لە وڵاتانی دیکەش کە ھەندێکیان بۆ من گیراوە قسەم ‌ لەسەر بەھاو نوێیەتی بزوتنەوەیەکی ئاوا کە لانی کەم ٦٠ ساڵە دەرنەکەوتوەتەوە جگە لەوەی زاپێتێستا ، ئەمە بێ لە بەشداری کردنم لە دەیەھا کۆبونەوە و دەربڕینی ناڕەزایی و خۆپیشاندان کە بۆ ھاوکاری ڕۆژاوا و قسەوباسی لەسەر کراوە . ھاوکاتیش سەرکەوتوبووم لە کردنی ئەزموونی ڕۆژاوا بە خالێکی نێو ئەجەندەی میتینگە گرنگەکانی ساڵی ٢٠١٤ و ٢٠١٥ ی ڕۆژی پەرتوکی ئەنارکستان لە لەندەن. ھەر ئەمەش بوە ھۆکارێک کە لە شارەکانی دیکە و ھەندێک وڵاتانی دیکەش کرایە ئەجەندەی ڕۆژی پەرتوکی ئەنارکستان.

ھەڵبەتە قسەی من بە تەنھا لەسەر ڕۆژاوا نییە بەڵکو بەشی باکوری-شە کە من ھیوایەکی زۆرم پێوە گرێداوە و تا ئێستاش ھەر وایە ، بۆ ئەمەش دووجار چومەتە باکور و لەسەر چونەکانیشم ڕاپۆرتی دوور و درێژم نوسیوە.

ئەم درێژدادڕییەی سەرەوەم بۆ باسکردنی خۆم و ھەڵنانم و منەتکردنم بەسەر ئەو دوو بزوتنەوەیەدا ، باکور و ڕۆژاوا نییە، ( ببورن گەر ئەو دەنگە لە خوێندنەوەیدا بداتەوە) بەڵکو تەنھا بۆ ئەوەیە کەخوێنەری ئەم وتارە بزانێت کە من لە ھەڵوێستی ھاریکاریانە و کۆمەکەوە ، یا ھەڵوێستی کورد وتەنی " دۆستم ئەوەیە دەمگرێنێت و دوژمنم ئەوەیە دەمخەنێنێت" ، سەرنجەکانم دەخەمە پێشچاوی خوێنەر. ھاوکاتیش پەیمانیش دەدەم تا نەبینم ئاڕاستەی ئەو دوو بزوتنەوەیە بە پێچەوانەی ئەوە دەڕوات کە بانگەشەی دەکات ، ئامادەم بە ‌ھەموو شێوەیەک تەنانەت بە ڕۆحی خۆشم خزمەت بەو بزوتنەوانە ‌ بکەم. لەگەڵ ئەوەشدا ، گەر خوێنەریش بە ھەڵوێستێکی دژ بەو دوو بزوتنەوەیەی، دەزانێت و ھەر شتێک دەڵێت گەردنی ئازا بێت و خۆشی لە ژیاندا ھەر ئازاد بێت، چونکە من باوشم بەو دوو بزوتنەوەیەدا لەبەر کوردایەتیکردن و قەومچێتی نەکردوە ، بەڵکو لەبەر ئەوەی کە ھەردوک بزوتنەوە، تا ڕادەیەک ڕێڕەیوێکی ئەنارکستیانەیان گرتوە و بەتاڵیش نیین لە کەمو کوڕی.

ئەوەی کە ماوەتەوە بیڵێم ، پێشئەوەی بچمە سەر کرۆکی باسەکەم ، ئەوەیە کە ھەوڵدەدەم بە ویژدانەوە و بە بەڵگە وە قسە بکەم مەبەستیشم بەئاگاھێنانەوەیە، تاکو فشارێک لە دەرەوە لەسەر بەرپرسان و داڕێژەنەرانی پلان ، بۆ پڕکردنەوەی ئەو کەلێنانەی کە لە بزوتنەوەکاندا بە تایبەت ڕۆژاوادا ھەیە، دروستبێت. سەکۆی ئەنارکیستانی کوردستان، کە من برادەێکیم، ساڵی پار و پێشتریش لە ڕێگای چەناڵە فەرمییەکانی بزوتنەوەکە ‌و ئۆرگانەکانییەوە ‌ و قسەکردن لەگەڵ بەرپرساندا ڕەخنەکانی خۆی پێڕاگەیاندوون ، نەک جارێک بەڵکو دوو چاریش بەڵام ، بەداخەوە کە ئەوان ھەر وەڵامیشیان نەداینەوە چجای ئەوەی کە بڵێن ھاوڕێیان ئەوە وایە یا وانییە.

کەموکوڕییەکان بۆچی؟

ئەوەی کە بزوتنەوەیەکی پاکژ و بێ کەموکوڕی بوێت ، یا لە دونیای کەتواریی نەگەیشتووە ، یا ھەر دەیەوێت ھەموو کەس و بزوتنەوەکەش بەویست و ئارەزوی ئەو بڕوات. خودی ژیان ڕاستەڕێگایەکی بێ پێچ و پەنا نییە، وەکو پێشتریش لە وتارێکی دیکەمدا پەنجەم بۆ ڕاکێشاوە ، بزوتنەوە ، بزوتنەوەی خەڵکە و خەڵکیش پێکھاتەی تاکەکانی کۆمەڵە و تاکەکانیش بە دەیەھا داوەوە بە خراپییەکان و پاشەڕۆی ئەم سیستەمەوە بەستراونەتەوە. ھەر چۆن بتەوێت و ھەر ‌ ھەنگاوێک بەکردەوە بگرینەبەر تاکو ‌ ھەندێک شت لە ئێستادا ڕەتبکەینەوە ھەوڵەکان لە سنورێکی دیاریکراو دەرناچێت ، ‌ ئیدی لەھەر شێوەیەکدا بانگەشەی پاکێتی خۆمان و کامڵی ئەنارکستێتی و سۆشیالیستی خۆمان بکەین، لەبەرئەوەی کە ژیانمان لە نێو ‌ سیستەمەکەدا ‌ سنورێکی دیاریکراوی بۆ نەخشاندوین،‌ خۆڕزگارکردنمان لێی، کارێکی مەحاڵە،‌ مەگەر ژیانێکی دێوانەیی بێ ھوودەیی بژین.

ئەمەی سەرەوەش بەرانبەر بە ڕۆژاو و باکور و کۆمەڵی کوردی و تاکی کورد، ھەر ڕاستە . ئەمە جگە لەوەی کە گەر تۆزێک بە ویژدانەوە لەو بزوتنەوەیە ڕابمێنین و ئەمجا دادگایی بکەین ، دەبێت نەک ھەر بارەکەی/کۆڵەکەی بەڵکو سەربارەکانیشی ، بەتایبەت لە بزوتنەوەی ڕۆژاوادا ببیبین وەکو : بوونی لە شەڕدا بەبەردەوامی، مەترسی شەڕی ناوخۆ و ھاتنەوەی ئەسەد و دەوڵەتی فاشی تورکیا و ئابڵوقەدانی ئابوری و سیاسی و ڕۆشنبیری و کۆەمەڵایەتی و ھەبوونی دوو پارتی سیاسی ھیراشی کە بەتەواوی لە پشتی ئەو بزوتنەوانەوەن تا ڕادەی دانانی پلان و پرۆژە بۆیان ....گەلێکی دیکە . ھەموو ئەمانە قورسیی دیکە دەخەنە سەر شانی ئەو بزوتنەوانە، بەتایبەت ڕۆژاوا ، ھەر ئەم ھۆکارەش وای لێدەکات ئەگەر بێ ئەو کێشانەی سەرەوە ‌ گەر یەک کەموکوڕی ھەبێت ، ئەم کێشانەی دیکە سەنگ و ژمارەی گرفتەکان بیگومان زیاد دەکەن.

ئەو کەسانەی کە ڕەخنە لەو بزوتنەوەیە دەگرن بە دابڕینی لە بارە کۆمەڵایەتی و ئابوری و سیاسییەکەی کە بزوتن و پێشەوچونی بزوتنەوەکەی سنوردار کردەوە ‌ و لەو زەمینەیەی کە بزوتنەوەی "بەھاری عەرەبی" تیادا ڕویدا و سەرەنجامەکەی، بە بێ ڕەچاوکردنی ئەو بارودۆخانەی سەرەوە، ھەوڵەکانیان یەکلایەنەیە. ھەروەھا حساب نەکردنی نەبوونی ئەو ھاریکارییە پتەوەی کە بە بزوتنەوەی کەتەلۆنیا لە ئیسپانیا و ئەوەی زاپێتێستای ١٩٩٤ و ھەتا ئەوەی وڵاتی نیکەراگوای ساڵانی ھەشتاکانی چەرخی پێشوو، کرا، ڕەخنەکانیان زڕە و بێ بەرە ، تەنھا ڕەخنەیە و ھاریکاری و کۆمەکی لەگەڵدا نییە ، تەنھا سوکایەتی پێکردنێتی و داوەریی تیادا نییە.

لە بزوتنەوەی ڕۆژاوادا دوو ھەڵسەنگاندن گرنگە و دەبێت بە ھەند وەربگێرێن ، ڕەنگە ئەو کاتە حوکمێکی باشتری بەسەردا بدەین. یەکەمیان: ئایا کارە خراپەکانی زۆرترە لە کارە باشەکانی یا پێچەوانەکەی ڕاستە؟ ئایە کێشی کارە خراپەکان لە کارە باشەکانی سەنگترە یاخود پێچەوانەکەی؟. لای من کارە باشەکان کە ئەو بزوتنەوەیە ئەنجامیداون و ئەوانەی کە بەدیھێناوە بە بەراورد لە گەڵ کارە خراپەکاندا و ئەو چالاکییانەی کە کراون لە دیدی مندا ، کارە باشەکان زۆر زیاترن ، ئەمە جگە لەوەی کارە ھەڵەکان نەگەیشتونەتە قۆناغێک کە ڕاستکردنەوەیان مەحاڵ بێت . دووھەم: ئاڕاستەی ئەو بزتنەوەیە. لای من ئەو بزوتنەوەیە ھێشتا ڕاستەڕێگای خۆی وننەکردووە و بەو ئاقارەدا دەڕوات کە بانگەشەی بۆ دەکات، لانیکەم تاکو ئێستا ئەمە وایە ، داھاتوش پەنجا پەنجایە و بەلابردنی ئەو زەمینەیەی کە لە سەرەوە باسمکرد یا لابەلاکردنەوە ئەو کێشانە ، دەتوانرێت ڕێژە و ھیوای سەرکەوتنی ئەو بزوتنەوەیە زیاتر بێت، بۆ ئەمەش ئەرکی کەسانی سۆشیالیست و ئازادیخوازان و چەپ و کۆمۆنیست و نقابییەکانە کە کۆمەکی پێبکەن تاکو سەرکەوتن مسۆگەر بکات.

٣٠\١\٢٠١٦ - لەندەن

ماڵپەڕی زاهیر باهیر